kayā śubhā savayasaḥ sanīḷāḥ samānyā marutaḥ saṃ mimikṣuḥ । kayā matī kuta etāsa ete'rcanti śuṣmaṃ vṛṣaṇo vasūyā ॥१॥ kasya brahmāṇi jujuṣuryuvānaḥ ko adhvare maruta ā vavarta । śyenām̐ iva dhrajato antarikṣe kena mahā manasā rīramāma ॥२॥ kutastvamindra māhinaḥ sanneko yāsi satpate kiṃ ta itthā । saṃ pṛcchase samarāṇaḥ śubhānairvocestanno harivo yatte asme ॥३॥ brahmāṇi me matayaḥ śaṃ sutāsaḥ śuṣma iyarti prabhṛto me adriḥ । ā śāsate prati haryantyukthemā harī vahatastā no accha ॥४॥ ato vayamantamebhiryujānāḥ svakṣatrebhistanvaḥ śumbhamānāḥ । mahobhiretām̐ upa yujmahe nvindra svadhāmanu hi no babhūtha ॥५॥ kva syā vo marutaḥ svadhāsīdyanmāmekaṃ samadhattāhihatye । ahaṃ hyugrastaviṣastuviṣmānviśvasya śatroranamaṃ vadhasnaiḥ ॥६॥ bhūri cakartha yujyebhirasme samānebhirvṛṣabha pauṃsyebhiḥ । bhūrīṇi hi kṛṇavāmā śaviṣṭhendra kratvā maruto yadvaśāma ॥७॥ vadhīṃ vṛtraṃ maruta indriyeṇa svena bhāmena taviṣo babhūvān । ahametā manave viśvaścandrāḥ sugā apaścakara vajrabāhuḥ ॥८॥ anuttamā te maghavannakirnu na tvāvām̐ asti devatā vidānaḥ । na jāyamāno naśate na jāto yāni kariṣyā kṛṇuhi pravṛddha ॥९॥ ekasya cinme vibhvastvojo yā nu dadhṛṣvānkṛṇavai manīṣā । ahaṃ hyugro maruto vidāno yāni cyavamindra idīśa eṣām ॥१०॥ amandanmā maruta stomo atra yanme naraḥ śrutyaṃ brahma cakra । indrāya vṛṣṇe sumakhāya mahyaṃ sakhye sakhāyastanve tanūbhiḥ ॥११॥ evedete prati mā rocamānā anedyaḥ śrava eṣo dadhānāḥ । saṃcakṣyā marutaścandravarṇā acchānta me chadayāthā ca nūnam ॥१२॥ ko nvatra maruto māmahe vaḥ pra yātana sakhīm̐racchā sakhāyaḥ । manmāni citrā apivātayanta eṣāṃ bhūta navedā ma ṛtānām ॥१३॥ ā yadduvasyādduvase na kārurasmāñcakre mānyasya medhā । o ṣu vartta maruto vipramacchemā brahmāṇi jaritā vo arcat ॥१४॥ eṣa va stomo maruta iyaṃ gīrmāndāryasya mānyasya kāroḥ । eṣā yāsīṣṭa tanve vayāṃ vidyāmeṣaṃ vṛjanaṃ jīradānum ॥१५॥

“Hymn to Indra with the Maruts, asking from what bright beauty and place they have come — 15 verses. (after R.T.H. Griffith)”