prātaryujā vi bodhayāśvināveha gacchatām । asya somasya pītaye ॥१॥ yā surathā rathītamobhā devā divispṛśā । aśvinā tā havāmahe ॥२॥ yā vāṃ kaśā madhumatyaśvinā sūnṛtāvatī । tayā yajñaṃ mimikṣatam ॥३॥ nahi vāmasti dūrake yatrā rathena gacchathaḥ । aśvinā somino gṛham ॥४॥ hiraṇyapāṇimūtaye savitāramupa hvaye । sa cettā devatā padam ॥५॥ apāṃ napātamavase savitāramupa stuhi । tasya vratānyuśmasi ॥६॥ vibhaktāraṃ havāmahe vasościtrasya rādhasaḥ । savitāraṃ nṛcakṣasam ॥७॥ sakhāya ā ni ṣīdata savitā stomyo nu naḥ । dātā rādhāṃsi śumbhati ॥८॥ agne patnīrihā vaha devānāmuśatīrupa । tvaṣṭāraṃ somapītaye ॥९॥ ā gnā agna ihāvase hotrāṃ yaviṣṭha bhāratīm । varūtrīṃ dhiṣaṇāṃ vaha ॥१०॥ abhi no devīravasā mahaḥ śarmaṇā nṛpatnīḥ । acchinnapatrāḥ sacantām ॥११॥ ihendrāṇīmupa hvaye varuṇānīṃ svastaye । agnāyīṃ somapītaye ॥१२॥ mahī dyauḥ pṛthivī ca na imaṃ yajñaṃ mimikṣatām । pipṛtāṃ no bharīmabhiḥ ॥१३॥ tayoridghṛtavatpayo viprā rihanti dhītibhiḥ । gandharvasya dhruve pade ॥१४॥ syonā pṛthivi bhavānṛkṣarā niveśanī । yacchā naḥ śarma saprathaḥ ॥१५॥ ato devā avantu no yato viṣṇurvicakrame । pṛthivyāḥ sapta dhāmabhiḥ ॥१६॥ idaṃ viṣṇurvi cakrame tredhā ni dadhe padam । samūḷhamasya pāṃsure ॥१७॥ trīṇi padā vi cakrame viṣṇurgopā adābhyaḥ । ato dharmāṇi dhārayan ॥१८॥ viṣṇoḥ karmāṇi paśyata yato vratāni paspaśe । indrasya yujyaḥ sakhā ॥१९॥ tadviṣṇoḥ paramaṃ padaṃ sadā paśyanti sūrayaḥ । divīva cakṣurātatam ॥२०॥ tadviprāso vipanyavo jāgṛvāṃsaḥ samindhate । viṣṇoryatparamaṃ padam ॥२१॥

“Composite hymn to the Aśvins, Savitṛ, Agni, Viṣṇu and other gods at the Soma rite — 21 verses. (after R.T.H. Griffith)”