yacciddhi te viśo yathā pra deva varuṇa vratam । minīmasi dyavidyavi ॥१॥ mā no vadhāya hatnave jihīḷānasya rīradhaḥ । mā hṛṇānasya manyave ॥२॥ vi mṛḷīkāya te mano rathīraśvaṃ na saṃditam । gīrbhirvaruṇa sīmahi ॥३॥ parā hi me vimanyavaḥ patanti vasyaiṣṭaye । vayo na vasatīrupa ॥४॥ kadā kṣatraśriyaṃ naramā varuṇaṃ karāmahe । mṛḷīkāyorucakṣasam ॥५॥ taditsamānamāśāte venantā na pra yucchataḥ । dhṛtavratāya dāśuṣe ॥६॥ vedā yo vīnāṃ padamantarikṣeṇa patatām । veda nāvaḥ samudriyaḥ ॥७॥ veda māso dhṛtavrato dvādaśa prajāvataḥ । vedā ya upajāyate ॥८॥ veda vātasya vartanimurorṛṣvasya bṛhataḥ । vedā ye adhyāsate ॥९॥ ni ṣasāda dhṛtavrato varuṇaḥ pastyāsvā । sāmrājyāya sukratuḥ ॥१०॥ ato viśvānyadbhutā cikitvām̐ abhi paśyati । kṛtāni yā ca kartvā ॥११॥ sa no viśvāhā sukraturādityaḥ supathā karat । pra ṇa āyūṃṣi tāriṣat ॥१२॥ bibhraddrāpiṃ hiraṇyayaṃ varuṇo vasta nirṇijam । pari spaśo ni ṣedire ॥१३॥ na yaṃ dipsanti dipsavo na druhvāṇo janānām । na devamabhimātayaḥ ॥१४॥ uta yo mānuṣeṣvā yaśaścakre asāmyā । asmākamudareṣvā ॥१५॥ parā me yanti dhītayo gāvo na gavyūtīranu । icchantīrurucakṣasam ॥१६॥ saṃ nu vocāvahai punaryato me madhvābhṛtam । hoteva kṣadase priyam ॥१७॥ darśaṃ nu viśvadarśataṃ darśaṃ rathamadhi kṣami । etā juṣata me giraḥ ॥१८॥ imaṃ me varuṇa śrudhī havamadyā ca mṛḷaya । tvāmavasyurā cake ॥१९॥ tvaṃ viśvasya medhira divaśca gmaśca rājasi । sa yāmani prati śrudhi ॥२०॥ uduttamaṃ mumugdhi no vi pāśaṃ madhyamaṃ cṛta । avādhamāni jīvase ॥२१॥

“Hymn to Varuṇa, confessing the daily violation of his law and seeking forgiveness — 21 verses. (after R.T.H. Griffith)”