yajñena vardhata jātavedasamagniṃ yajadhvaṃ haviṣā tanā girā । samidhānaṃ suprayasaṃ svarṇaraṃ dyukṣaṃ hotāraṃ vṛjaneṣu dhūrṣadam ॥१॥ abhi tvā naktīruṣaso vavāśire'gne vatsaṃ na svasareṣu dhenavaḥ । diva ivedaratirmānuṣā yugā kṣapo bhāsi puruvāra saṃyataḥ ॥२॥ taṃ devā budhne rajasaḥ sudaṃsasaṃ divaspṛthivyoraratiṃ nyerire । rathamiva vedyaṃ śukraśociṣamagniṃ mitraṃ na kṣitiṣu praśaṃsyam ॥३॥ tamukṣamāṇaṃ rajasi sva ā dame candramiva surucaṃ hvāra ā dadhuḥ । pṛśnyāḥ pataraṃ citayantamakṣabhiḥ pātho na pāyuṃ janasī ubhe anu ॥४॥ sa hotā viśvaṃ pari bhūtvadhvaraṃ tamu havyairmanuṣa ṛñjate girā । hiriśipro vṛdhasānāsu jarbhuraddyaurna stṛbhiścitayadrodasī anu ॥५॥ sa no revatsamidhānaḥ svastaye saṃdadasvānrayimasmāsu dīdihi । ā naḥ kṛṇuṣva suvitāya rodasī agne havyā manuṣo deva vītaye ॥६॥ dā no agne bṛhato dāḥ sahasriṇo duro na vājaṃ śrutyā apā vṛdhi । prācī dyāvāpṛthivī brahmaṇā kṛdhi svarṇa śukramuṣaso vi didyutaḥ ॥७॥ sa idhāna uṣaso rāmyā anu svarṇa dīdedaruṣeṇa bhānunā । hotrābhiragnirmanuṣaḥ svadhvaro rājā viśāmatithiścārurāyave ॥८॥ evā no agne amṛteṣu pūrvya dhīṣpīpāya bṛhaddiveṣu mānuṣā । duhānā dhenurvṛjaneṣu kārave tmanā śatinaṃ pururūpamiṣaṇi ॥९॥ vayamagne arvatā vā suvīryaṃ brahmaṇā vā citayemā janām̐ ati । asmākaṃ dyumnamadhi pañca kṛṣṭiṣūccā svarṇa śuśucīta duṣṭaram ॥१०॥ sa no bodhi sahasya praśaṃsyo yasminsujātā iṣayanta sūrayaḥ । yamagne yajñamupayanti vājino nitye toke dīdivāṃsaṃ sve dame ॥११॥ ubhayāso jātavedaḥ syāma te stotāro agne sūrayaśca śarmaṇi । vasvo rāyaḥ puruścandrasya bhūyasaḥ prajāvataḥ svapatyasya śagdhi naḥ ॥१२॥ ye stotṛbhyo goagrāmaśvapeśasamagne rātimupasṛjanti sūrayaḥ । asmāñca tām̐śca pra hi neṣi vasya ā bṛhadvadema vidathe suvīrāḥ ॥१३॥

“Hymn to Agni, who knows all life, exalted with oblation and song — 13 verses. (after R.T.H. Griffith)”