somasya mā tavasaṃ vakṣyagne vahniṃ cakartha vidathe yajadhyai । devām̐ acchā dīdyadyuñje adriṃ śamāye agne tanvaṃ juṣasva ॥१॥ prāñcaṃ yajñaṃ cakṛma vardhatāṃ gīḥ samidbhiragniṃ namasā duvasyan । divaḥ śaśāsurvidathā kavīnāṃ gṛtsāya cittavase gātumīṣuḥ ॥२॥ mayo dadhe medhiraḥ pūtadakṣo divaḥ subandhurjanuṣā pṛthivyāḥ । avindannu darśatamapsvantardevāso agnimapasi svasṝṇām ॥३॥ avardhayansubhagaṃ sapta yahvīḥ śvetaṃ jajñānamaruṣaṃ mahitvā । śiśuṃ na jātamabhyāruraśvā devāso agniṃ janimanvapuṣyan ॥४॥ śukrebhiraṅgai raja ātatanvānkratuṃ punānaḥ kavibhiḥ pavitraiḥ । śocirvasānaḥ paryāyurapāṃ śriyo mimīte bṛhatīranūnāḥ ॥५॥ vavrājā sīmanadatīradabdhā divo yahvīravasānā anagnāḥ । sanā atra yuvatayaḥ sayonīrekaṃ garbhaṃ dadhire sapta vāṇīḥ ॥६॥ stīrṇā asya saṃhato viśvarūpā ghṛtasya yonau sravathe madhūnām । asthuratra dhenavaḥ pinvamānā mahī dasmasya mātarā samīcī ॥७॥ babhrāṇaḥ sūno sahaso vyadyauddadhānaḥ śukrā rabhasā vapūṃṣi । ścotanti dhārā madhuno ghṛtasya vṛṣā yatra vāvṛdhe kāvyena ॥८॥ pituścidūdharjanuṣā viveda vyasya dhārā asṛjadvi dhenāḥ । guhā carantaṃ sakhibhiḥ śivebhirdivo yahvībhirna guhā babhūva ॥९॥ pituśca garbhaṃ janituśca babhre pūrvīreko adhayatpīpyānāḥ । vṛṣṇe sapatnī śucaye sabandhū ubhe asmai manuṣye ni pāhi ॥१०॥ urau mahām̐ anibādhe vavardhāpo agniṃ yaśasaḥ saṃ hi pūrvīḥ । ṛtasya yonāvaśayaddamūnā jāmīnāmagnirapasi svasṝṇām ॥११॥ akro na babhriḥ samithe mahīnāṃ didṛkṣeyaḥ sūnave bhāṛjīkaḥ । udusriyā janitā yo jajānāpāṃ garbho nṛtamo yahvo agniḥ ॥१२॥ apāṃ garbhaṃ darśatamoṣadhīnāṃ vanā jajāna subhagā virūpam । devāsaścinmanasā saṃ hi jagmuḥ paniṣṭhaṃ jātaṃ tavasaṃ duvasyan ॥१३॥ bṛhanta idbhānavo bhāṛjīkamagniṃ sacanta vidyuto na śukrāḥ । guheva vṛddhaṃ sadasi sve antarapāra ūrve amṛtaṃ duhānāḥ ॥१४॥ īḷe ca tvā yajamāno havirbhirīḷe sakhitvaṃ sumatiṃ nikāmaḥ । devairavo mimīhi saṃ jaritre rakṣā ca no damyebhiranīkaiḥ ॥१५॥ upakṣetārastava supraṇīte'gne viśvāni dhanyā dadhānāḥ । suretasā śravasā tuñjamānā abhi ṣyāma pṛtanāyūm̐radevān ॥१६॥ ā devānāmabhavaḥ keturagne mandro viśvāni kāvyāni vidvān । prati martām̐ avāsayo damūnā anu devānrathiro yāsi sādhan ॥१७॥ ni duroṇe amṛto martyānāṃ rājā sasāda vidathāni sādhan । ghṛtapratīka urviyā vyadyaudagnirviśvāni kāvyāni vidvān ॥१८॥ ā no gahi sakhyebhiḥ śivebhirmahānmahībhirūtibhiḥ saraṇyan । asme rayiṃ bahulaṃ saṃtarutraṃ suvācaṃ bhāgaṃ yaśasaṃ kṛdhī naḥ ॥१९॥ etā te agne janimā sanāni pra pūrvyāya nūtanāni vocam । mahānti vṛṣṇe savanā kṛtemā janmañjanmannihito jātavedāḥ ॥२०॥ janmañjanmannihito jātavedā viśvāmitrebhiridhyate ajasraḥ । tasya vayaṃ sumatau yajñiyasyāpi bhadre saumanase syāma ॥२१॥ imaṃ yajñaṃ sahasāvantvaṃ no devatrā dhehi sukrato rarāṇaḥ । pra yaṃsi hotarbṛhatīriṣo no'gne mahi draviṇamā yajasva ॥२२॥ iḷāmagne purudaṃsaṃ saniṃ goḥ śaśvattamaṃ havamānāya sādha । syānnaḥ sūnustanayo vijāvāgne sā te sumatirbhūtvasme ॥२३॥

“Hymn to Agni, who makes the singer the Soma's priest to worship in assembly — 23 verses. (after R.T.H. Griffith)”