Sanskrit Corpus

ṛtaṃ devāya kṛṇvate savitra indrāyāhighne na ramanta āpaḥ । aharaharyātyakturapāṃ kiyātyā prathamaḥ sarga āsām ॥१॥ yo vṛtrāya sinamatrābhariṣyatpra taṃ janitrī viduṣa uvāca । patho radantīranu joṣamasmai divedive dhunayo yantyartham ॥२॥ ūrdhvo hyasthādadhyantarikṣe'dhā vṛtrāya pra vadhaṃ jabhāra । mihaṃ vasāna upa hīmadudrottigmāyudho ajayacchatrumindraḥ ॥३॥ bṛhaspate tapuṣāśneva vidhya vṛkadvaraso asurasya vīrān । yathā jaghantha dhṛṣatā purā cidevā jahi śatrumasmākamindra ॥४॥ ava kṣipa divo aśmānamuccā yena śatruṃ mandasāno nijūrvāḥ । tokasya sātau tanayasya bhūrerasmām̐ ardhaṃ kṛṇutādindra gonām ॥५॥ pra hi kratuṃ vṛhatho yaṃ vanutho radhrasya stho yajamānasya codau । indrāsomā yuvamasmām̐ aviṣṭamasminbhayasthe kṛṇutamu lokam ॥६॥ na mā tamanna śramannota tandranna vocāma mā sunoteti somam । yo me pṛṇādyo dadadyo nibodhādyo mā sunvantamupa gobhirāyat ॥७॥ sarasvati tvamasmām̐ aviḍḍhi marutvatī dhṛṣatī jeṣi śatrūn । tyaṃ cicchardhantaṃ taviṣīyamāṇamindro hanti vṛṣabhaṃ śaṇḍikānām ॥८॥ yo naḥ sanutya uta vā jighatnurabhikhyāya taṃ tigitena vidhya । bṛhaspata āyudhairjeṣi śatrūndruhe rīṣantaṃ pari dhehi rājan ॥९॥ asmākebhiḥ satvabhiḥ śūra śūrairvīryā kṛdhi yāni te kartvāni । jyogabhūvannanudhūpitāso hatvī teṣāmā bharā no vasūni ॥१०॥ taṃ vaḥ śardhaṃ mārutaṃ sumnayurgiropa bruve namasā daivyaṃ janam । yathā rayiṃ sarvavīraṃ naśāmahā apatyasācaṃ śrutyaṃ divedive ॥११॥

“Hymn to Indra, with Indra-Soma, Sarasvatī, Bṛhaspati and the Maruts, on the flowing streams — 11 verses. (after R.T.H. Griffith)”

asmākaṃ mitrāvaruṇāvataṃ rathamādityai rudrairvasubhiḥ sacābhuvā । pra yadvayo na paptanvasmanaspari śravasyavo hṛṣīvanto vanarṣadaḥ ॥१॥ adha smā na udavatā sajoṣaso rathaṃ devāso abhi vikṣu vājayum । yadāśavaḥ padyābhistitrato rajaḥ pṛthivyāḥ sānau jaṅghananta pāṇibhiḥ ॥२॥ uta sya na indro viśvacarṣaṇirdivaḥ śardhena mārutena sukratuḥ । anu nu sthātyavṛkābhirūtibhī rathaṃ mahe sanaye vājasātaye ॥३॥ uta sya devo bhuvanasya sakṣaṇistvaṣṭā gnābhiḥ sajoṣā jūjuvadratham । iḷā bhago bṛhaddivota rodasī pūṣā puraṃdhiraśvināvadhā patī ॥४॥ uta tye devī subhage mithūdṛśoṣāsānaktā jagatāmapījuvā । stuṣe yadvāṃ pṛthivi navyasā vaca sthātuśca vayastrivayā upastire ॥५॥ uta vaḥ śaṃsamuśijāmiva śmasyahirbudhnyo'ja ekapāduta । trita ṛbhukṣāḥ savitā cano dadhe'pāṃ napādāśuhemā dhiyā śami ॥६॥ etā vo vaśmyudyatā yajatrā atakṣannāyavo navyase sam । śravasyavo vājaṃ cakānāḥ saptirna rathyo aha dhītimaśyāḥ ॥७॥

“Hymn to Varuṇa and Mitra with the Vasus, Rudras and Ādityas, asked to help the car — 7 verses. (after R.T.H. Griffith)”

asya me dyāvāpṛthivī ṛtāyato bhūtamavitrī vacasaḥ siṣāsataḥ । yayorāyuḥ prataraṃ te idaṃ pura upastute vasūyurvāṃ maho dadhe ॥१॥ mā no guhyā ripa āyorahandabhanmā na ābhyo rīradho ducchunābhyaḥ । mā no vi yauḥ sakhyā viddhi tasya naḥ sumnāyatā manasā tattvemahe ॥२॥ aheḷatā manasā śruṣṭimā vaha duhānāṃ dhenuṃ pipyuṣīmasaścatam । padyābhirāśuṃ vacasā ca vājinaṃ tvāṃ hinomi puruhūta viśvahā ॥३॥ rākāmahaṃ suhavāṃ suṣṭutī huve śṛṇotu naḥ subhagā bodhatu tmanā । sīvyatvapaḥ sūcyācchidyamānayā dadātu vīraṃ śatadāyamukthyam ॥४॥ yāste rāke sumatayaḥ supeśaso yābhirdadāsi dāśuṣe vasūni । tābhirno adya sumanā upāgahi sahasrapoṣaṃ subhage rarāṇā ॥५॥ sinīvāli pṛthuṣṭuke yā devānāmasi svasā । juṣasva havyamāhutaṃ prajāṃ devi didiḍḍhi naḥ ॥६॥ yā subāhuḥ svaṅguriḥ suṣūmā bahusūvarī । tasyai viśpatnyai haviḥ sinīvālyai juhotana ॥७॥ yā guṅgūryā sinīvālī yā rākā yā sarasvatī । indrāṇīmahva ūtaye varuṇānīṃ svastaye ॥८॥

“Hymn to Heaven and Earth with Indra or Tvaṣṭar, Rākā and Sinīvālī — 8 verses. (after R.T.H. Griffith)”

ā te pitarmarutāṃ sumnametu mā naḥ sūryasya saṃdṛśo yuyothāḥ । abhi no vīro arvati kṣameta pra jāyemahi rudra prajābhiḥ ॥१॥ tvādattebhī rudra śaṃtamebhiḥ śataṃ himā aśīya bheṣajebhiḥ । vyasmaddveṣo vitaraṃ vyaṃho vyamīvāścātayasvā viṣūcīḥ ॥२॥ śreṣṭho jātasya rudra śriyāsi tavastamastavasāṃ vajrabāho । parṣi ṇaḥ pāramaṃhasaḥ svasti viśvā abhītī rapaso yuyodhi ॥३॥ mā tvā rudra cukrudhāmā namobhirmā duṣṭutī vṛṣabha mā sahūtī । unno vīrām̐ arpaya bheṣajebhirbhiṣaktamaṃ tvā bhiṣajāṃ śṛṇomi ॥४॥ havīmabhirhavate yo havirbhirava stomebhī rudraṃ diṣīya । ṛdūdaraḥ suhavo mā no asyai babhruḥ suśipro rīradhanmanāyai ॥५॥ unmā mamanda vṛṣabho marutvāntvakṣīyasā vayasā nādhamānam । ghṛṇīva cchāyāmarapā aśīyā vivāseyaṃ rudrasya sumnam ॥६॥ kva sya te rudra mṛḷayākurhasto yo asti bheṣajo jalāṣaḥ । apabhartā rapaso daivyasyābhī nu mā vṛṣabha cakṣamīthāḥ ॥७॥ pra babhrave vṛṣabhāya śvitīce maho mahīṃ suṣṭutimīrayāmi । namasyā kalmalīkinaṃ namobhirgṛṇīmasi tveṣaṃ rudrasya nāma ॥८॥ sthirebhiraṅgaiḥ pururūpa ugro babhruḥ śukrebhiḥ pipiśe hiraṇyaiḥ । īśānādasya bhuvanasya bhūrerna vā u yoṣadrudrādasuryam ॥९॥ arhanbibharṣi sāyakāni dhanvārhanniṣkaṃ yajataṃ viśvarūpam । arhannidaṃ dayase viśvamabhvaṃ na vā ojīyo rudra tvadasti ॥१०॥ stuhi śrutaṃ gartasadaṃ yuvānaṃ mṛgaṃ na bhīmamupahatnumugram । mṛḷā jaritre rudra stavāno'nyaṃ te asmanni vapantu senāḥ ॥११॥ kumāraścitpitaraṃ vandamānaṃ prati nānāma rudropayantam । bhūrerdātāraṃ satpatiṃ gṛṇīṣe stutastvaṃ bheṣajā rāsyasme ॥१२॥ yā vo bheṣajā marutaḥ śucīni yā śaṃtamā vṛṣaṇo yā mayobhu । yāni manuravṛṇītā pitā nastā śaṃ ca yośca rudrasya vaśmi ॥१३॥ pari ṇo hetī rudrasya vṛjyāḥ pari tveṣasya durmatirmahī gāt । ava sthirā maghavadbhyastanuṣva mīḍhvastokāya tanayāya mṛḷa ॥१४॥ evā babhro vṛṣabha cekitāna yathā deva na hṛṇīṣe na haṃsi । havanaśrunno rudreha bodhi bṛhadvadema vidathe suvīrāḥ ॥१५॥

“Hymn to Rudra, father of the Maruts, asked to spare the worshippers from his missile — 15 verses. (after R.T.H. Griffith)”

dhārāvarā maruto dhṛṣṇvojaso mṛgā na bhīmāstaviṣībhirarcinaḥ । agnayo na śuśucānā ṛjīṣiṇo bhṛmiṃ dhamanto apa gā avṛṇvata ॥१॥ dyāvo na stṛbhiścitayanta khādino vyabhriyā na dyutayanta vṛṣṭayaḥ । rudro yadvo maruto rukmavakṣaso vṛṣājani pṛśnyāḥ śukra ūdhani ॥२॥ ukṣante aśvām̐ atyām̐ ivājiṣu nadasya karṇaisturayanta āśubhiḥ । hiraṇyaśiprā maruto davidhvataḥ pṛkṣaṃ yātha pṛṣatībhiḥ samanyavaḥ ॥३॥ pṛkṣe tā viśvā bhuvanā vavakṣire mitrāya vā sadamā jīradānavaḥ । pṛṣadaśvāso anavabhrarādhasa ṛjipyāso na vayuneṣu dhūrṣadaḥ ॥४॥ indhanvabhirdhenubhī rapśadūdhabhiradhvasmabhiḥ pathibhirbhrājadṛṣṭayaḥ । ā haṃsāso na svasarāṇi gantana madhormadāya marutaḥ samanyavaḥ ॥५॥ ā no brahmāṇi marutaḥ samanyavo narāṃ na śaṃsaḥ savanāni gantana । aśvāmiva pipyata dhenumūdhani kartā dhiyaṃ jaritre vājapeśasam ॥६॥ taṃ no dāta maruto vājinaṃ ratha āpānaṃ brahma citayaddivedive । iṣaṃ stotṛbhyo vṛjaneṣu kārave saniṃ medhāmariṣṭaṃ duṣṭaraṃ sahaḥ ॥७॥ yadyuñjate maruto rukmavakṣaso'śvānratheṣu bhaga ā sudānavaḥ । dhenurna śiśve svasareṣu pinvate janāya rātahaviṣe mahīmiṣam ॥८॥ yo no maruto vṛkatāti martyo ripurdadhe vasavo rakṣatā riṣaḥ । vartayata tapuṣā cakriyābhi tamava rudrā aśaso hantanā vadhaḥ ॥९॥ citraṃ tadvo maruto yāma cekite pṛśnyā yadūdharapyāpayo duhuḥ । yadvā nide navamānasya rudriyāstritaṃ jarāya juratāmadābhyāḥ ॥१०॥ tānvo maho maruta evayāvno viṣṇoreṣasya prabhṛthe havāmahe । hiraṇyavarṇānkakuhānyatasruco brahmaṇyantaḥ śaṃsyaṃ rādha īmahe ॥११॥ te daśagvāḥ prathamā yajñamūhire te no hinvantūṣaso vyuṣṭiṣu । uṣā na rāmīraruṇairaporṇute maho jyotiṣā śucatā goarṇasā ॥१२॥ te kṣoṇībhiraruṇebhirnāñjibhī rudrā ṛtasya sadaneṣu vāvṛdhuḥ । nimeghamānā atyena pājasā suścandraṃ varṇaṃ dadhire supeśasam ॥१३॥ tām̐ iyāno mahi varūthamūtaya upa ghedenā namasā gṛṇīmasi । trito na yānpañca hotṝnabhiṣṭaya āvavartadavarāñcakriyāvase ॥१४॥ yayā radhraṃ pārayathātyaṃho yayā nido muñcatha vanditāram । arvācī sā maruto yā va ūtiro ṣu vāśreva sumatirjigātu ॥१५॥

“Hymn to the Maruts of resistless might, who love the rain — 15 verses. (after R.T.H. Griffith)”

upemasṛkṣi vājayurvacasyāṃ cano dadhīta nādyo giro me । apāṃ napādāśuhemā kuvitsa supeśasaskarati joṣiṣaddhi ॥१॥ imaṃ svasmai hṛda ā sutaṣṭaṃ mantraṃ vocema kuvidasya vedat । apāṃ napādasuryasya mahnā viśvānyaryo bhuvanā jajāna ॥२॥ samanyā yantyupa yantyanyāḥ samānamūrvaṃ nadyaḥ pṛṇanti । tamū śuciṃ śucayo dīdivāṃsamapāṃ napātaṃ pari tasthurāpaḥ ॥३॥ tamasmerā yuvatayo yuvānaṃ marmṛjyamānāḥ pari yantyāpaḥ । sa śukrebhiḥ śikvabhī revadasme dīdāyānidhmo ghṛtanirṇigapsu ॥४॥ asmai tisro avyathyāya nārīrdevāya devīrdidhiṣantyannam । kṛtā ivopa hi prasarsre apsu sa pīyūṣaṃ dhayati pūrvasūnām ॥५॥ aśvasyātra janimāsya ca svardruho riṣaḥ sampṛcaḥ pāhi sūrīn । āmāsu pūrṣu paro apramṛṣyaṃ nārātayo vi naśannānṛtāni ॥६॥ sva ā dame sudughā yasya dhenuḥ svadhāṃ pīpāya subhvannamatti । so apāṃ napādūrjayannapsvantarvasudeyāya vidhate vi bhāti ॥७॥ yo apsvā śucinā daivyena ṛtāvājasra urviyā vibhāti । vayā idanyā bhuvanānyasya pra jāyante vīrudhaśca prajābhiḥ ॥८॥ apāṃ napādā hyasthādupasthaṃ jihmānāmūrdhvo vidyutaṃ vasānaḥ । tasya jyeṣṭhaṃ mahimānaṃ vahantīrhiraṇyavarṇāḥ pari yanti yahvīḥ ॥९॥ hiraṇyarūpaḥ sa hiraṇyasaṃdṛgapāṃ napātsedu hiraṇyavarṇaḥ । hiraṇyayātpari yonerniṣadyā hiraṇyadā dadatyannamasmai ॥१०॥ tadasyānīkamuta cāru nāmāpīcyaṃ vardhate napturapām । yamindhate yuvatayaḥ samitthā hiraṇyavarṇaṃ ghṛtamannamasya ॥११॥ asmai bahūnāmavamāya sakhye yajñairvidhema namasā havirbhiḥ । saṃ sānu mārjmi didhiṣāmi bilmairdadhāmyannaiḥ pari vanda ṛgbhiḥ ॥१२॥ sa īṃ vṛṣājanayattāsu garbhaṃ sa īṃ śiśurdhayati taṃ rihanti । so apāṃ napādanabhimlātavarṇo'nyasyeveha tanvā viveṣa ॥१३॥ asminpade parame tasthivāṃsamadhvasmabhirviśvahā dīdivāṃsam । āpo naptre ghṛtamannaṃ vahantīḥ svayamatkaiḥ pari dīyanti yahvīḥ ॥१४॥ ayāṃsamagne sukṣitiṃ janāyāyāṃsamu maghavadbhyaḥ suvṛktim । viśvaṃ tadbhadraṃ yadavanti devā bṛhadvadema vidathe suvīrāḥ ॥१५॥

“Hymn to Apāṃ Napāt, the Floods' Child, asked to accept the songs — 15 verses. (after R.T.H. Griffith)”

tubhyaṃ hinvāno vasiṣṭa gā apo'dhukṣansīmavibhiradribhirnaraḥ । pibendra svāhā prahutaṃ vaṣaṭkṛtaṃ hotrādā somaṃ prathamo ya īśiṣe ॥१॥ yajñaiḥ sammiślāḥ pṛṣatībhirṛṣṭibhiryāmañchubhrāso añjiṣu priyā uta । āsadyā barhirbharatasya sūnavaḥ potrādā somaṃ pibatā divo naraḥ ॥२॥ ameva naḥ suhavā ā hi gantana ni barhiṣi sadatanā raṇiṣṭana । athā mandasva jujuṣāṇo andhasastvaṣṭardevebhirjanibhiḥ sumadgaṇaḥ ॥३॥ ā vakṣi devām̐ iha vipra yakṣi cośanhotarni ṣadā yoniṣu triṣu । prati vīhi prasthitaṃ somyaṃ madhu pibāgnīdhrāttava bhāgasya tṛpṇuhi ॥४॥ eṣa sya te tanvo nṛmṇavardhanaḥ saha ojaḥ pradivi bāhvorhitaḥ । tubhyaṃ suto maghavantubhyamābhṛtastvamasya brāhmaṇādā tṛpatpiba ॥५॥ juṣethāṃ yajñaṃ bodhataṃ havasya me satto hotā nividaḥ pūrvyā anu । acchā rājānā nama etyāvṛtaṃ praśāstrādā pibataṃ somyaṃ madhu ॥६॥

“Hymn to the seasonal gods — Indra, the Maruts, Tvaṣṭar, Agni and Mitra-Varuṇa — with the Hotar's cup — 6 verses. (after R.T.H. Griffith)”

mandasva hotrādanu joṣamandhaso'dhvaryavaḥ sa pūrṇāṃ vaṣṭyāsicam । tasmā etaṃ bharata tadvaśo dadirhotrātsomaṃ draviṇodaḥ piba ṛtubhiḥ ॥१॥ yamu pūrvamahuve tamidaṃ huve sedu havyo dadiryo nāma patyate । adhvaryubhiḥ prasthitaṃ somyaṃ madhu potrātsomaṃ draviṇodaḥ piba ṛtubhiḥ ॥२॥ medyantu te vahnayo yebhirīyase'riṣaṇyanvīḷayasvā vanaspate । āyūyā dhṛṣṇo abhigūryā tvaṃ neṣṭrātsomaṃ draviṇodaḥ piba ṛtubhiḥ ॥३॥ apāddhotrāduta potrādamattota neṣṭrādajuṣata prayo hitam । turīyaṃ pātramamṛktamamartyaṃ draviṇodāḥ pibatu drāviṇodasaḥ ॥४॥ arvāñcamadya yayyaṃ nṛvāhaṇaṃ rathaṃ yuñjāthāmiha vāṃ vimocanam । pṛṅktaṃ havīṃṣi madhunā hi kaṃ gatamathā somaṃ pibataṃ vājinīvasū ॥५॥ joṣyagne samidhaṃ joṣyāhutiṃ joṣi brahma janyaṃ joṣi suṣṭutim । viśvebhirviśvām̐ ṛtunā vaso maha uśandevām̐ uśataḥ pāyayā haviḥ ॥६॥

“Hymn to the seasonal gods, with Draviṇodā, the Aśvins and Agni — 6 verses. (after R.T.H. Griffith)”

udu ṣya devaḥ savitā savāya śaśvattamaṃ tadapā vahnirasthāt । nūnaṃ devebhyo vi hi dhāti ratnamathābhajadvītihotraṃ svastau ॥१॥ viśvasya hi śruṣṭaye deva ūrdhvaḥ pra bāhavā pṛthupāṇiḥ sisarti । āpaścidasya vrata ā nimṛgrā ayaṃ cidvāto ramate parijman ॥२॥ āśubhiścidyānvi mucāti nūnamarīramadatamānaṃ cidetoḥ । ahyarṣūṇāṃ cinnyayām̐ aviṣyāmanu vrataṃ saviturmokyāgāt ॥३॥ punaḥ samavyadvitataṃ vayantī madhyā kartornyadhācchakma dhīraḥ । utsaṃhāyāsthādvyṛtūm̐radardhararamatiḥ savitā deva āgāt ॥४॥ nānaukāṃsi duryo viśvamāyurvi tiṣṭhate prabhavaḥ śoko agneḥ । jyeṣṭhaṃ mātā sūnave bhāgamādhādanvasya ketamiṣitaṃ savitrā ॥५॥ samāvavarti viṣṭhito jigīṣurviśveṣāṃ kāmaścaratāmamābhūt । śaśvām̐ apo vikṛtaṃ hitvyāgādanu vrataṃ saviturdaivyasya ॥६॥ tvayā hitamapyamapsu bhāgaṃ dhanvānvā mṛgayaso vi tasthuḥ । vanāni vibhyo nakirasya tāni vratā devasya saviturminanti ॥७॥ yādrādhyaṃ varuṇo yonimapyamaniśitaṃ nimiṣi jarbhurāṇaḥ । viśvo mārtāṇḍo vrajamā paśurgātsthaśo janmāni savitā vyākaḥ ॥८॥ na yasyendro varuṇo na mitro vratamaryamā na minanti rudraḥ । nārātayastamidaṃ svasti huve devaṃ savitāraṃ namobhiḥ ॥९॥ bhagaṃ dhiyaṃ vājayantaḥ puraṃdhiṃ narāśaṃso gnāspatirno avyāḥ । āye vāmasya saṃgathe rayīṇāṃ priyā devasya savituḥ syāma ॥१०॥ asmabhyaṃ taddivo adbhyaḥ pṛthivyāstvayā dattaṃ kāmyaṃ rādha ā gāt । śaṃ yatstotṛbhya āpaye bhavātyuruśaṃsāya savitarjaritre ॥११॥

“Hymn to Savitṛ, risen to quicken, the priest who neglects not his constant duty — 11 verses. (after R.T.H. Griffith)”

grāvāṇeva tadidarthaṃ jarethe gṛdhreva vṛkṣaṃ nidhimantamaccha । brahmāṇeva vidatha ukthaśāsā dūteva havyā janyā purutrā ॥१॥ prātaryāvāṇā rathyeva vīrājeva yamā varamā sacethe । mene iva tanvā śumbhamāne dampatīva kratuvidā janeṣu ॥२॥ śṛṅgeva naḥ prathamā gantamarvākchaphāviva jarbhurāṇā tarobhiḥ । cakravākeva prati vastorusrārvāñcā yātaṃ rathyeva śakrā ॥३॥ nāveva naḥ pārayataṃ yugeva nabhyeva na upadhīva pradhīva । śvāneva no ariṣaṇyā tanūnāṃ khṛgaleva visrasaḥ pātamasmān ॥४॥ vātevājuryā nadyeva rītirakṣī iva cakṣuṣā yātamarvāk । hastāviva tanve śambhaviṣṭhā pādeva no nayataṃ vasyo accha ॥५॥ oṣṭhāviva madhvāsne vadantā stanāviva pipyataṃ jīvase naḥ । nāseva nastanvo rakṣitārā karṇāviva suśrutā bhūtamasme ॥६॥ hasteva śaktimabhi saṃdadī naḥ kṣāmeva naḥ samajataṃ rajāṃsi । imā giro aśvinā yuṣmayantīḥ kṣṇotreṇeva svadhitiṃ saṃ śiśītam ॥७॥ etāni vāmaśvinā vardhanāni brahma stomaṃ gṛtsamadāso akran । tāni narā jujuṣāṇopa yātaṃ bṛhadvadema vidathe suvīrāḥ ॥८॥

“Hymn to the Aśvins, called like two press-stones to the tree of treasure — 8 verses. (after R.T.H. Griffith)”

somāpūṣaṇā jananā rayīṇāṃ jananā divo jananā pṛthivyāḥ । jātau viśvasya bhuvanasya gopau devā akṛṇvannamṛtasya nābhim ॥१॥ imau devau jāyamānau juṣantemau tamāṃsi gūhatāmajuṣṭā । ābhyāmindraḥ pakvamāmāsvantaḥ somāpūṣabhyāṃ janadusriyāsu ॥२॥ somāpūṣaṇā rajaso vimānaṃ saptacakraṃ rathamaviśvaminvam । viṣūvṛtaṃ manasā yujyamānaṃ taṃ jinvatho vṛṣaṇā pañcaraśmim ॥३॥ divyanyaḥ sadanaṃ cakra uccā pṛthivyāmanyo adhyantarikṣe । tāvasmabhyaṃ puruvāraṃ purukṣuṃ rāyaspoṣaṃ vi ṣyatāṃ nābhimasme ॥४॥ viśvānyanyo bhuvanā jajāna viśvamanyo abhicakṣāṇa eti । somāpūṣaṇāvavataṃ dhiyaṃ me yuvābhyāṃ viśvāḥ pṛtanā jayema ॥५॥ dhiyaṃ pūṣā jinvatu viśvaminvo rayiṃ somo rayipatirdadhātu । avatu devyaditiranarvā bṛhadvadema vidathe suvīrāḥ ॥६॥

“Hymn to Soma and Pūṣan, parents of all riches, earth and high heaven — 6 verses. (after R.T.H. Griffith)”

vāyo ye te sahasriṇo rathāsastebhirā gahi । niyutvānsomapītaye ॥१॥ niyutvānvāyavā gahyayaṃ śukro ayāmi te । gantāsi sunvato gṛham ॥२॥ śukrasyādya gavāśira indravāyū niyutvataḥ । ā yātaṃ pibataṃ narā ॥३॥ ayaṃ vāṃ mitrāvaruṇā sutaḥ soma ṛtāvṛdhā । mamediha śrutaṃ havam ॥४॥ rājānāvanabhidruhā dhruve sadasyuttame । sahasrasthūṇa āsāte ॥५॥ tā samrājā ghṛtāsutī ādityā dānunaspatī । sacete anavahvaram ॥६॥ gomadū ṣu nāsatyāśvāvadyātamaśvinā । vartī rudrā nṛpāyyam ॥७॥ na yatparo nāntara ādadharṣadvṛṣaṇvasū । duḥśaṃso martyo ripuḥ ॥८॥ tā na ā voḷhamaśvinā rayiṃ piśaṅgasaṃdṛśam । dhiṣṇyā varivovidam ॥९॥ indro aṅga mahadbhayamabhī ṣadapa cucyavat । sa hi sthiro vicarṣaṇiḥ ॥१०॥ indraśca mṛḷayāti no na naḥ paścādaghaṃ naśat । bhadraṃ bhavāti naḥ puraḥ ॥११॥ indra āśābhyaspari sarvābhyo abhayaṃ karat । jetā śatrūnvicarṣaṇiḥ ॥१२॥ viśve devāsa ā gata śṛṇutā ma imaṃ havam । edaṃ barhirni ṣīdata ॥१३॥ tīvro vo madhumām̐ ayaṃ śunahotreṣu matsaraḥ । etaṃ pibata kāmyam ॥१४॥ indrajyeṣṭhā marudgaṇā devāsaḥ pūṣarātayaḥ । viśve mama śrutā havam ॥१५॥ ambitame nadītame devitame sarasvati । apraśastā iva smasi praśastimamba naskṛdhi ॥१६॥ tve viśvā sarasvati śritāyūṃṣi devyām । śunahotreṣu matsva prajāṃ devi didiḍḍhi naḥ ॥१७॥ imā brahma sarasvati juṣasva vājinīvati । yā te manma gṛtsamadā ṛtāvari priyā deveṣu juhvati ॥१८॥ pretāṃ yajñasya śambhuvā yuvāmidā vṛṇīmahe । agniṃ ca havyavāhanam ॥१९॥ dyāvā naḥ pṛthivī imaṃ sidhramadya divispṛśam । yajñaṃ deveṣu yacchatām ॥२०॥ ā vāmupasthamadruhā devāḥ sīdantu yajñiyāḥ । ihādya somapītaye ॥२१॥

“Composite hymn to Vāyu, Indra-Vāyu, Mitra-Varuṇa, the Aśvins, Indra, the Viśvedevas, Sarasvatī and Heaven and Earth — 21 verses. (after R.T.H. Griffith)”

kanikradajjanuṣaṃ prabruvāṇa iyarti vācamariteva nāvam । sumaṅgalaśca śakune bhavāsi mā tvā kā cidabhibhā viśvyā vidat ॥१॥ mā tvā śyena udvadhīnmā suparṇo mā tvā vidadiṣumānvīro astā । pitryāmanu pradiśaṃ kanikradatsumaṅgalo bhadravādī vadeha ॥२॥ ava kranda dakṣiṇato gṛhāṇāṃ sumaṅgalo bhadravādī śakunte । mā na stena īśata māghaśaṃso bṛhadvadema vidathe suvīrāḥ ॥३॥

“Hymn to the auspicious Bird (the falcon, Indra in quail form), telling its race aloud — 3 verses. (after R.T.H. Griffith)”

pradakṣiṇidabhi gṛṇanti kāravo vayo vadanta ṛtuthā śakuntayaḥ । ubhe vācau vadati sāmagā iva gāyatraṃ ca traiṣṭubhaṃ cānu rājati ॥१॥ udgāteva śakune sāma gāyasi brahmaputra iva savaneṣu śaṃsasi । vṛṣeva vājī śiśumatīrapītyā sarvato naḥ śakune bhadramā vada viśvato naḥ śakune puṇyamā vada ॥२॥ āvadam̐stvaṃ śakune bhadramā vada tūṣṇīmāsīnaḥ sumatiṃ cikiddhi naḥ । yadutpatanvadasi karkariryathā bṛhadvadema vidathe suvīrāḥ ॥३॥

“Hymn to the winged birds that chant in due season, like a Sāma-chanter — 3 verses. (after R.T.H. Griffith)”

somasya mā tavasaṃ vakṣyagne vahniṃ cakartha vidathe yajadhyai । devām̐ acchā dīdyadyuñje adriṃ śamāye agne tanvaṃ juṣasva ॥१॥ prāñcaṃ yajñaṃ cakṛma vardhatāṃ gīḥ samidbhiragniṃ namasā duvasyan । divaḥ śaśāsurvidathā kavīnāṃ gṛtsāya cittavase gātumīṣuḥ ॥२॥ mayo dadhe medhiraḥ pūtadakṣo divaḥ subandhurjanuṣā pṛthivyāḥ । avindannu darśatamapsvantardevāso agnimapasi svasṝṇām ॥३॥ avardhayansubhagaṃ sapta yahvīḥ śvetaṃ jajñānamaruṣaṃ mahitvā । śiśuṃ na jātamabhyāruraśvā devāso agniṃ janimanvapuṣyan ॥४॥ śukrebhiraṅgai raja ātatanvānkratuṃ punānaḥ kavibhiḥ pavitraiḥ । śocirvasānaḥ paryāyurapāṃ śriyo mimīte bṛhatīranūnāḥ ॥५॥ vavrājā sīmanadatīradabdhā divo yahvīravasānā anagnāḥ । sanā atra yuvatayaḥ sayonīrekaṃ garbhaṃ dadhire sapta vāṇīḥ ॥६॥ stīrṇā asya saṃhato viśvarūpā ghṛtasya yonau sravathe madhūnām । asthuratra dhenavaḥ pinvamānā mahī dasmasya mātarā samīcī ॥७॥ babhrāṇaḥ sūno sahaso vyadyauddadhānaḥ śukrā rabhasā vapūṃṣi । ścotanti dhārā madhuno ghṛtasya vṛṣā yatra vāvṛdhe kāvyena ॥८॥ pituścidūdharjanuṣā viveda vyasya dhārā asṛjadvi dhenāḥ । guhā carantaṃ sakhibhiḥ śivebhirdivo yahvībhirna guhā babhūva ॥९॥ pituśca garbhaṃ janituśca babhre pūrvīreko adhayatpīpyānāḥ । vṛṣṇe sapatnī śucaye sabandhū ubhe asmai manuṣye ni pāhi ॥१०॥ urau mahām̐ anibādhe vavardhāpo agniṃ yaśasaḥ saṃ hi pūrvīḥ । ṛtasya yonāvaśayaddamūnā jāmīnāmagnirapasi svasṝṇām ॥११॥ akro na babhriḥ samithe mahīnāṃ didṛkṣeyaḥ sūnave bhāṛjīkaḥ । udusriyā janitā yo jajānāpāṃ garbho nṛtamo yahvo agniḥ ॥१२॥ apāṃ garbhaṃ darśatamoṣadhīnāṃ vanā jajāna subhagā virūpam । devāsaścinmanasā saṃ hi jagmuḥ paniṣṭhaṃ jātaṃ tavasaṃ duvasyan ॥१३॥ bṛhanta idbhānavo bhāṛjīkamagniṃ sacanta vidyuto na śukrāḥ । guheva vṛddhaṃ sadasi sve antarapāra ūrve amṛtaṃ duhānāḥ ॥१४॥ īḷe ca tvā yajamāno havirbhirīḷe sakhitvaṃ sumatiṃ nikāmaḥ । devairavo mimīhi saṃ jaritre rakṣā ca no damyebhiranīkaiḥ ॥१५॥ upakṣetārastava supraṇīte'gne viśvāni dhanyā dadhānāḥ । suretasā śravasā tuñjamānā abhi ṣyāma pṛtanāyūm̐radevān ॥१६॥ ā devānāmabhavaḥ keturagne mandro viśvāni kāvyāni vidvān । prati martām̐ avāsayo damūnā anu devānrathiro yāsi sādhan ॥१७॥ ni duroṇe amṛto martyānāṃ rājā sasāda vidathāni sādhan । ghṛtapratīka urviyā vyadyaudagnirviśvāni kāvyāni vidvān ॥१८॥ ā no gahi sakhyebhiḥ śivebhirmahānmahībhirūtibhiḥ saraṇyan । asme rayiṃ bahulaṃ saṃtarutraṃ suvācaṃ bhāgaṃ yaśasaṃ kṛdhī naḥ ॥१९॥ etā te agne janimā sanāni pra pūrvyāya nūtanāni vocam । mahānti vṛṣṇe savanā kṛtemā janmañjanmannihito jātavedāḥ ॥२०॥ janmañjanmannihito jātavedā viśvāmitrebhiridhyate ajasraḥ । tasya vayaṃ sumatau yajñiyasyāpi bhadre saumanase syāma ॥२१॥ imaṃ yajñaṃ sahasāvantvaṃ no devatrā dhehi sukrato rarāṇaḥ । pra yaṃsi hotarbṛhatīriṣo no'gne mahi draviṇamā yajasva ॥२२॥ iḷāmagne purudaṃsaṃ saniṃ goḥ śaśvattamaṃ havamānāya sādha । syānnaḥ sūnustanayo vijāvāgne sā te sumatirbhūtvasme ॥२३॥

“Hymn to Agni, who makes the singer the Soma's priest to worship in assembly — 23 verses. (after R.T.H. Griffith)”

vaiśvānarāya dhiṣaṇāmṛtāvṛdhe ghṛtaṃ na pūtamagnaye janāmasi । dvitā hotāraṃ manuṣaśca vāghato dhiyā rathaṃ na kuliśaḥ samṛṇvati ॥१॥ sa rocayajjanuṣā rodasī ubhe sa mātrorabhavatputra īḍyaḥ । havyavāḷagnirajaraścanohito dūḷabho viśāmatithirvibhāvasuḥ ॥२॥ kratvā dakṣasya taruṣo vidharmaṇi devāso agniṃ janayanta cittibhiḥ । rurucānaṃ bhānunā jyotiṣā mahāmatyaṃ na vājaṃ saniṣyannupa bruve ॥३॥ ā mandrasya saniṣyanto vareṇyaṃ vṛṇīmahe ahrayaṃ vājamṛgmiyam । rātiṃ bhṛgūṇāmuśijaṃ kavikratumagniṃ rājantaṃ divyena śociṣā ॥४॥ agniṃ sumnāya dadhire puro janā vājaśravasamiha vṛktabarhiṣaḥ । yatasrucaḥ surucaṃ viśvadevyaṃ rudraṃ yajñānāṃ sādhadiṣṭimapasām ॥५॥ pāvakaśoce tava hi kṣayaṃ pari hotaryajñeṣu vṛktabarhiṣo naraḥ । agne duva icchamānāsa āpyamupāsate draviṇaṃ dhehi tebhyaḥ ॥६॥ ā rodasī apṛṇadā svarmahajjātaṃ yadenamapaso adhārayan । so adhvarāya pari ṇīyate kaviratyo na vājasātaye canohitaḥ ॥७॥ namasyata havyadātiṃ svadhvaraṃ duvasyata damyaṃ jātavedasam । rathīrṛtasya bṛhato vicarṣaṇiragnirdevānāmabhavatpurohitaḥ ॥८॥ tisro yahvasya samidhaḥ parijmano'gnerapunannuśijo amṛtyavaḥ । tāsāmekāmadadhurmartye bhujamu lokamu dve upa jāmimīyatuḥ ॥९॥ viśāṃ kaviṃ viśpatiṃ mānuṣīriṣaḥ saṃ sīmakṛṇvansvadhitiṃ na tejase । sa udvato nivato yāti veviṣatsa garbhameṣu bhuvaneṣu dīdharat ॥१०॥ sa jinvate jaṭhareṣu prajajñivānvṛṣā citreṣu nānadanna siṃhaḥ । vaiśvānaraḥ pṛthupājā amartyo vasu ratnā dayamāno vi dāśuṣe ॥११॥ vaiśvānaraḥ pratnathā nākamāruhaddivaspṛṣṭhaṃ bhandamānaḥ sumanmabhiḥ । sa pūrvavajjanayañjantave dhanaṃ samānamajmaṃ paryeti jāgṛviḥ ॥१२॥ ṛtāvānaṃ yajñiyaṃ vipramukthyamā yaṃ dadhe mātariśvā divi kṣayam । taṃ citrayāmaṃ harikeśamīmahe sudītimagniṃ suvitāya navyase ॥१३॥ śuciṃ na yāmanniṣiraṃ svardṛśaṃ ketuṃ divo rocanasthāmuṣarbudham । agniṃ mūrdhānaṃ divo apratiṣkutaṃ tamīmahe namasā vājinaṃ bṛhat ॥१४॥ mandraṃ hotāraṃ śucimadvayāvinaṃ damūnasamukthyaṃ viśvacarṣaṇim । rathaṃ na citraṃ vapuṣāya darśataṃ manurhitaṃ sadamidrāya īmahe ॥१५॥

“Hymn to Agni Vaiśvānara, who strengthens Holy Law, presented praise like pure oil — 15 verses. (after R.T.H. Griffith)”

vaiśvānarāya pṛthupājase vipo ratnā vidhanta dharuṇeṣu gātave । agnirhi devām̐ amṛto duvasyatyathā dharmāṇi sanatā na dūduṣat ॥१॥ antardūto rodasī dasma īyate hotā niṣatto manuṣaḥ purohitaḥ । kṣayaṃ bṛhantaṃ pari bhūṣati dyubhirdevebhiragniriṣito dhiyāvasuḥ ॥२॥ ketuṃ yajñānāṃ vidathasya sādhanaṃ viprāso agniṃ mahayanta cittibhiḥ । apāṃsi yasminnadhi saṃdadhurgirastasminsumnāni yajamāna ā cake ॥३॥ pitā yajñānāmasuro vipaścitāṃ vimānamagnirvayunaṃ ca vāghatām । ā viveśa rodasī bhūrivarpasā purupriyo bhandate dhāmabhiḥ kaviḥ ॥४॥ candramagniṃ candrarathaṃ harivrataṃ vaiśvānaramapsuṣadaṃ svarvidam । vigāhaṃ tūrṇiṃ taviṣībhirāvṛtaṃ bhūrṇiṃ devāsa iha suśriyaṃ dadhuḥ ॥५॥ agnirdevebhirmanuṣaśca jantubhistanvāno yajñaṃ purupeśasaṃ dhiyā । rathīrantarīyate sādhadiṣṭibhirjīro damūnā abhiśasticātanaḥ ॥६॥ agne jarasva svapatya āyunyūrjā pinvasva samiṣo didīhi naḥ । vayāṃsi jinva bṛhataśca jāgṛva uśigdevānāmasi sukraturvipām ॥७॥ viśpatiṃ yahvamatithiṃ naraḥ sadā yantāraṃ dhīnāmuśijaṃ ca vāghatām । adhvarāṇāṃ cetanaṃ jātavedasaṃ pra śaṃsanti namasā jūtibhirvṛdhe ॥८॥ vibhāvā devaḥ suraṇaḥ pari kṣitīragnirbabhūva śavasā sumadrathaḥ । tasya vratāni bhūripoṣiṇo vayamupa bhūṣema dama ā suvṛktibhiḥ ॥९॥ vaiśvānara tava dhāmānyā cake yebhiḥ svarvidabhavo vicakṣaṇa । jāta āpṛṇo bhuvanāni rodasī agne tā viśvā paribhūrasi tmanā ॥१०॥ vaiśvānarasya daṃsanābhyo bṛhadariṇādekaḥ svapasyayā kaviḥ । ubhā pitarā mahayannajāyatāgnirdyāvāpṛthivī bhūriretasā ॥११॥

“Hymn to Agni Vaiśvānara, who shines afar and serves the gods — 11 verses. (after R.T.H. Griffith)”

samitsamitsumanā bodhyasme śucāśucā sumatiṃ rāsi vasvaḥ । ā deva devānyajathāya vakṣi sakhā sakhīnsumanā yakṣyagne ॥१॥ yaṃ devāsastrirahannāyajante divedive varuṇo mitro agniḥ । semaṃ yajñaṃ madhumantaṃ kṛdhī nastanūnapādghṛtayoniṃ vidhantam ॥२॥ pra dīdhitirviśvavārā jigāti hotāramiḷaḥ prathamaṃ yajadhyai । acchā namobhirvṛṣabhaṃ vandadhyai sa devānyakṣadiṣito yajīyān ॥३॥ ūrdhvo vāṃ gāturadhvare akāryūrdhvā śocīṃṣi prasthitā rajāṃsi । divo vā nābhā nyasādi hotā stṛṇīmahi devavyacā vi barhiḥ ॥४॥ sapta hotrāṇi manasā vṛṇānā invanto viśvaṃ prati yannṛtena । nṛpeśaso vidatheṣu pra jātā abhīmaṃ yajñaṃ vi caranta pūrvīḥ ॥५॥ ā bhandamāne uṣasā upāke uta smayete tanvā virūpe । yathā no mitro varuṇo jujoṣadindro marutvām̐ uta vā mahobhiḥ ॥६॥ daivyā hotārā prathamā nyṛñje sapta pṛkṣāsaḥ svadhayā madanti । ṛtaṃ śaṃsanta ṛtamitta āhuranu vrataṃ vratapā dīdhyānāḥ ॥७॥ ā bhāratī bhāratībhiḥ sajoṣā iḷā devairmanuṣyebhiragniḥ । sarasvatī sārasvatebhirarvāktisro devīrbarhiredaṃ sadantu ॥८॥ tannasturīpamadha poṣayitnu deva tvaṣṭarvi rarāṇaḥ syasva । yato vīraḥ karmaṇyaḥ sudakṣo yuktagrāvā jāyate devakāmaḥ ॥९॥ vanaspate'va sṛjopa devānagnirhaviḥ śamitā sūdayāti । sedu hotā satyataro yajāti yathā devānāṃ janimāni veda ॥१०॥ ā yāhyagne samidhāno arvāṅindreṇa devaiḥ sarathaṃ turebhiḥ । barhirna āstāmaditiḥ suputrā svāhā devā amṛtā mādayantām ॥११॥

“Āprī hymn: Agni, asked to be friendly with each kindled log and bring the gods — 11 verses. (after R.T.H. Griffith)”

pratyagniruṣasaścekitāno'bodhi vipraḥ padavīḥ kavīnām। pṛthupājā devayadbhiḥ samiddho'pa dvārā tamaso vahnirāvaḥ ॥१॥ predvagnirvāvṛdhe stomebhirgīrbhiḥ stotṝṇāṃ namasya ukthaiḥ। pūrvīrṛtasya saṃdṛśaścakānaḥ saṃ dūto adyauduṣaso viroke ॥२॥ adhāyyagnirmānuṣīṣu vikṣvapāṃ garbho mitra ṛtena sādhan। ā haryato yajataḥ sānvasthādabhūdu vipro havyo matīnām ॥३॥ mitro agnirbhavati yatsamiddho mitro hotā varuṇo jātavedāḥ। mitro adhvaryuriṣiro damūnā mitraḥ sindhūnāmuta parvatānām ॥४॥ pāti priyaṃ ripo agraṃ padaṃ veḥ pāti yahvaścaraṇaṃ sūryasya। pāti nābhā saptaśīrṣāṇamagniḥ pāti devānāmupamādamṛṣvaḥ ॥५॥ ṛbhuścakra īḍyaṃ cāru nāma viśvāni devo vayunāni vidvān। sasasya carma ghṛtavatpadaṃ vestadidagnī rakṣatyaprayucchan ॥६॥ ā yonimagnirghṛtavantamasthātpṛthupragāṇamuśantamuśānaḥ। dīdyānaḥ śucirṛṣvaḥ pāvakaḥ punaḥpunarmātarā navyasī kaḥ ॥७॥ sadyo jāta oṣadhībhirvavakṣe yadī vardhanti prasvo ghṛtena। āpa iva pravatā śumbhamānā uruṣyadagniḥ pitrorupasthe ॥८॥ udu ṣṭutaḥ samidhā yahvo adyaudvarṣmandivo adhi nābhā pṛthivyāḥ। mitro agnirīḍyo mātariśvā dūto vakṣadyajathāya devān ॥९॥ udastambhītsamidhā nākamṛṣvo'gnirbhavannuttamo rocanānām। yadī bhṛgubhyaḥ pari mātariśvā guhā santaṃ havyavāhaṃ samīdhe ॥१०॥ iḷāmagne purudaṃsaṃ saniṃ goḥ śaśvattamaṃ havamānāya sādha। syānnaḥ sūnustanayo vijāvāgne sā te sumatirbhūtvasme ॥११॥

“Hymn to Agni, wakened against the Dawns, the holy singer who precedes the sages — 11 verses. (after R.T.H. Griffith)”

pra kāravo mananā vacyamānā devadrīcīṃ nayata devayantaḥ । dakṣiṇāvāḍvājinī prācyeti havirbharantyagnaye ghṛtācī ॥१॥ ā rodasī apṛṇā jāyamāna uta pra rikthā adha nu prayajyo । divaścidagne mahinā pṛthivyā vacyantāṃ te vahnayaḥ saptajihvāḥ ॥२॥ dyauśca tvā pṛthivī yajñiyāso ni hotāraṃ sādayante damāya । yadī viśo mānuṣīrdevayantīḥ prayasvatīrīḷate śukramarciḥ ॥३॥ mahānsadhasthe dhruva ā niṣatto'ntardyāvā māhine haryamāṇaḥ । āskre sapatnī ajare amṛkte sabardughe urugāyasya dhenū ॥४॥ vratā te agne mahato mahāni tava kratvā rodasī ā tatantha । tvaṃ dūto abhavo jāyamānastvaṃ netā vṛṣabha carṣaṇīnām ॥५॥ ṛtasya vā keśinā yogyābhirghṛtasnuvā rohitā dhuri dhiṣva । athā vaha devāndeva viśvānsvadhvarā kṛṇuhi jātavedaḥ ॥६॥ divaścidā te rucayanta rokā uṣo vibhātīranu bhāsi pūrvīḥ । apo yadagna uśadhagvaneṣu hoturmandrasya panayanta devāḥ ॥७॥ urau vā ye antarikṣe madanti divo vā ye rocane santi devāḥ । ūmā vā ye suhavāso yajatrā āyemire rathyo agne aśvāḥ ॥८॥ aibhiragne sarathaṃ yāhyarvāṅnānārathaṃ vā vibhavo hyaśvāḥ । patnīvatastriṃśataṃ trīm̐śca devānanuṣvadhamā vaha mādayasva ॥९॥ sa hotā yasya rodasī cidurvī yajñaṃyajñamabhi vṛdhe gṛṇītaḥ । prācī adhvareva tasthatuḥ sumeke ṛtāvarī ṛtajātasya satye ॥१०॥ iḷāmagne purudaṃsaṃ saniṃ goḥ śaśvattamaṃ havamānāya sādha । syānnaḥ sūnustanayo vijāvāgne sā te sumatirbhūtvasme ॥११॥

“Hymn to Agni, to whom the singers bring the god-approaching ladle — 11 verses. (after R.T.H. Griffith)”

pra ya āruḥ śitipṛṣṭhasya dhāserā mātarā viviśuḥ sapta vāṇīḥ । parikṣitā pitarā saṃ carete pra sarsrāte dīrghamāyuḥ prayakṣe ॥१॥ divakṣaso dhenavo vṛṣṇo aśvā devīrā tasthau madhumadvahantīḥ । ṛtasya tvā sadasi kṣemayantaṃ paryekā carati vartaniṃ gauḥ ॥२॥ ā sīmarohatsuyamā bhavantīḥ patiścikitvānrayividrayīṇām । pra nīlapṛṣṭho atasasya dhāsestā avāsayatpurudhapratīkaḥ ॥३॥ mahi tvāṣṭramūrjayantīrajuryaṃ stabhūyamānaṃ vahato vahanti । vyaṅgebhirdidyutānaḥ sadhastha ekāmiva rodasī ā viveśa ॥४॥ jānanti vṛṣṇo aruṣasya śevamuta bradhnasya śāsane raṇanti । divorucaḥ suruco rocamānā iḷā yeṣāṃ gaṇyā māhinā gīḥ ॥५॥ uto pitṛbhyāṃ pravidānu ghoṣaṃ maho mahadbhyāmanayanta śūṣam । ukṣā ha yatra pari dhānamaktoranu svaṃ dhāma jariturvavakṣa ॥६॥ adhvaryubhiḥ pañcabhiḥ sapta viprāḥ priyaṃ rakṣante nihitaṃ padaṃ veḥ । prāñco madantyukṣaṇo ajuryā devā devānāmanu hi vratā guḥ ॥७॥ daivyā hotārā prathamā nyṛñje sapta pṛkṣāsaḥ svadhayā madanti । ṛtaṃ śaṃsanta ṛtamitta āhuranu vrataṃ vratapā dīdhyānāḥ ॥८॥ vṛṣāyante mahe atyāya pūrvīrvṛṣṇe citrāya raśmayaḥ suyāmāḥ । deva hotarmandrataraścikitvānmaho devānrodasī eha vakṣi ॥९॥ pṛkṣaprayajo draviṇaḥ suvācaḥ suketava uṣaso revadūṣuḥ । uto cidagne mahinā pṛthivyāḥ kṛtaṃ cidenaḥ saṃ mahe daśasya ॥१०॥ iḷāmagne purudaṃsaṃ saniṃ goḥ śaśvattamaṃ havamānāya sādha । syānnaḥ sūnustanayo vijāvāgne sā te sumatirbhūtvasme ॥११॥

“Hymn to Agni, whose seven tones rise between the pair of Mothers — 11 verses. (after R.T.H. Griffith)”

añjanti tvāmadhvare devayanto vanaspate madhunā daivyena । yadūrdhvastiṣṭhā draviṇeha dhattādyadvā kṣayo māturasyā upasthe ॥१॥ samiddhasya śrayamāṇaḥ purastādbrahma vanvāno ajaraṃ suvīram । āre asmadamatiṃ bādhamāna ucchrayasva mahate saubhagāya ॥२॥ ucchrayasva vanaspate varṣmanpṛthivyā adhi । sumitī mīyamāno varco dhā yajñavāhase ॥३॥ yuvā suvāsāḥ parivīta āgātsa u śreyānbhavati jāyamānaḥ । taṃ dhīrāsaḥ kavaya unnayanti svādhyo manasā devayantaḥ ॥४॥ jāto jāyate sudinatve ahnāṃ samarya ā vidathe vardhamānaḥ । punanti dhīrā apaso manīṣā devayā vipra udiyarti vācam ॥५॥ yānvo naro devayanto nimimyurvanaspate svadhitirvā tatakṣa । te devāsaḥ svaravastasthivāṃsaḥ prajāvadasme didhiṣantu ratnam ॥६॥ ye vṛkṇāso adhi kṣami nimitāso yatasrucaḥ । te no vyantu vāryaṃ devatrā kṣetrasādhasaḥ ॥७॥ ādityā rudrā vasavaḥ sunīthā dyāvākṣāmā pṛthivī antarikṣam । sajoṣaso yajñamavantu devā ūrdhvaṃ kṛṇvantvadhvarasya ketum ॥८॥ haṃsā iva śreṇiśo yatānāḥ śukrā vasānāḥ svaravo na āguḥ । unnīyamānāḥ kavibhiḥ purastāddevā devānāmapi yanti pāthaḥ ॥९॥ śṛṅgāṇīvecchṛṅgiṇāṃ saṃ dadṛśre caṣālavantaḥ svaravaḥ pṛthivyām । vāghadbhirvā vihave śroṣamāṇā asmām̐ avantu pṛtanājyeṣu ॥१०॥ vanaspate śatavalśo vi roha sahasravalśā vi vayaṃ ruhema । yaṃ tvāmayaṃ svadhitistejamānaḥ praṇināya mahate saubhagāya ॥११॥

“Hymn to the sacrificial Post, anointed with heavenly meath — 11 verses. (after R.T.H. Griffith)”

sakhāyastvā vavṛmahe devaṃ martāsa ūtaye । apāṃ napātaṃ subhagaṃ sudīditiṃ supratūrtimanehasam ॥१॥ kāyamāno vanā tvaṃ yanmātṝrajagannapaḥ । na tatte agne pramṛṣe nivartanaṃ yaddūre sannihābhavaḥ ॥२॥ ati tṛṣṭaṃ vavakṣithāthaiva sumanā asi । praprānye yanti paryanya āsate yeṣāṃ sakhye asi śritaḥ ॥३॥ īyivāṃsamati sridhaḥ śaśvatīrati saścataḥ । anvīmavindannicirāso adruho'psu siṃhamiva śritam ॥४॥ sasṛvāṃsamiva tmanāgnimitthā tirohitam । ainaṃ nayanmātariśvā parāvato devebhyo mathitaṃ pari ॥५॥ taṃ tvā martā agṛbhṇata devebhyo havyavāhana । viśvānyadyajñām̐ abhipāsi mānuṣa tava kratvā yaviṣṭhya ॥६॥ tadbhadraṃ tava daṃsanā pākāya cicchadayati । tvāṃ yadagne paśavaḥ samāsate samiddhamapiśarvare ॥७॥ ā juhotā svadhvaraṃ śīraṃ pāvakaśociṣam । āśuṃ dūtamajiraṃ pratnamīḍyaṃ śruṣṭī devaṃ saparyata ॥८॥ trīṇi śatā trī sahasrāṇyagniṃ triṃśacca devā nava cāsaparyan । aukṣanghṛtairastṛṇanbarhirasmā ādiddhotāraṃ nyasādayanta ॥९॥

“Hymn to Agni, the Waters' Child, chosen by mortals as their help — 9 verses. (after R.T.H. Griffith)”

tvāmagne manīṣiṇaḥ samrājaṃ carṣaṇīnām । devaṃ martāsa indhate samadhvare ॥१॥ tvāṃ yajñeṣvṛtvijamagne hotāramīḷate । gopā ṛtasya dīdihi sve dame ॥२॥ sa ghā yaste dadāśati samidhā jātavedase । so agne dhatte suvīryaṃ sa puṣyati ॥३॥ sa keturadhvarāṇāmagnirdevebhirā gamat । añjānaḥ sapta hotṛbhirhaviṣmate ॥४॥ pra hotre pūrvyaṃ vaco'gnaye bharatā bṛhat । vipāṃ jyotīṃṣi bibhrate na vedhase ॥५॥ agniṃ vardhantu no giro yato jāyata ukthyaḥ । mahe vājāya draviṇāya darśataḥ ॥६॥ agne yajiṣṭho adhvare devāndevayate yaja । hotā mandro vi rājasyati sridhaḥ ॥७॥ sa naḥ pāvaka dīdihi dyumadasme suvīryam । bhavā stotṛbhyo antamaḥ svastaye ॥८॥ taṃ tvā viprā vipanyavo jāgṛvāṃsaḥ samindhate । havyavāhamamartyaṃ sahovṛdham ॥९॥

“Hymn to Agni, the imperial lord of all mankind, kindled with understanding — 9 verses. (after R.T.H. Griffith)”

agnirhotā purohito'dhvarasya vicarṣaṇiḥ । sa veda yajñamānuṣak ॥१॥ sa havyavāḷamartya uśigdūtaścanohitaḥ । agnirdhiyā samṛṇvati ॥२॥ agnirdhiyā sa cetati keturyajñasya pūrvyaḥ । arthaṃ hyasya taraṇi ॥३॥ agniṃ sūnuṃ sanaśrutaṃ sahaso jātavedasam । vahniṃ devā akṛṇvata ॥४॥ adābhyaḥ puraetā viśāmagnirmānuṣīṇām । tūrṇī rathaḥ sadā navaḥ ॥५॥ sāhvānviśvā abhiyujaḥ kraturdevānāmamṛktaḥ । agnistuviśravastamaḥ ॥६॥ abhi prayāṃsi vāhasā dāśvām̐ aśnoti martyaḥ । kṣayaṃ pāvakaśociṣaḥ ॥७॥ pari viśvāni sudhitāgneraśyāma manmabhiḥ । viprāso jātavedasaḥ ॥८॥ agne viśvāni vāryā vājeṣu saniṣāmahe । tve devāsa erire ॥९॥

“Hymn to Agni, priest and great high priest of sacrifice, swift in act — 9 verses. (after R.T.H. Griffith)”

indrāgnī ā gataṃ sutaṃ gīrbhirnabho vareṇyam । asya pātaṃ dhiyeṣitā ॥१॥ indrāgnī jarituḥ sacā yajño jigāti cetanaḥ । ayā pātamimaṃ sutam ॥२॥ indramagniṃ kavicchadā yajñasya jūtyā vṛṇe । tā somasyeha tṛmpatām ॥३॥ tośā vṛtrahaṇā huve sajitvānāparājitā । indrāgnī vājasātamā ॥४॥ pra vāmarcantyukthino nīthāvido jaritāraḥ । indrāgnī iṣa ā vṛṇe ॥५॥ indrāgnī navatiṃ puro dāsapatnīradhūnutam । sākamekena karmaṇā ॥६॥ indrāgnī apasasparyupa pra yanti dhītayaḥ । ṛtasya pathyā anu ॥७॥ indrāgnī taviṣāṇi vāṃ sadhasthāni prayāṃsi ca । yuvoraptūryaṃ hitam ॥८॥ indrāgnī rocanā divaḥ pari vājeṣu bhūṣathaḥ । tadvāṃ ceti pra vīryam ॥९॥

“Hymn to Indra and Agni, moved by the hymn to come and drink the juice — 9 verses. (after R.T.H. Griffith)”

pra vo devāyāgnaye barhiṣṭhamarcāsmai । gamaddevebhirā sa no yajiṣṭho barhirā sadat ॥१॥ ṛtāvā yasya rodasī dakṣaṃ sacanta ūtayaḥ । haviṣmantastamīḷate taṃ saniṣyanto'vase ॥२॥ sa yantā vipra eṣāṃ sa yajñānāmathā hi ṣaḥ । agniṃ taṃ vo duvasyata dātā yo vanitā magham ॥३॥ sa naḥ śarmāṇi vītaye'gniryacchatu śaṃtamā । yato naḥ pruṣṇavadvasu divi kṣitibhyo apsvā ॥४॥ dīdivāṃsamapūrvyaṃ vasvībhirasya dhītibhiḥ । ṛkvāṇo agnimindhate hotāraṃ viśpatiṃ viśām ॥५॥ uta no brahmannaviṣa uktheṣu devahūtamaḥ । śaṃ naḥ śocā marudvṛdho'gne sahasrasātamaḥ ॥६॥ nū no rāsva sahasravattokavatpuṣṭimadvasu । dyumadagne suvīryaṃ varṣiṣṭhamanupakṣitam ॥७॥

“Hymn to Agni, this god of yours, sung aloud with utmost power — 7 verses. (after R.T.H. Griffith)”

ā hotā mandro vidathānyasthātsatyo yajvā kavitamaḥ sa vedhāḥ । vidyudrathaḥ sahasasputro agniḥ śociṣkeśaḥ pṛthivyāṃ pājo aśret ॥१॥ ayāmi te namauktiṃ juṣasva ṛtāvastubhyaṃ cetate sahasvaḥ । vidvām̐ ā vakṣi viduṣo ni ṣatsi madhya ā barhirūtaye yajatra ॥२॥ dravatāṃ ta uṣasā vājayantī agne vātasya pathyābhiraccha । yatsīmañjanti pūrvyaṃ havirbhirā vandhureva tasthaturduroṇe ॥३॥ mitraśca tubhyaṃ varuṇaḥ sahasvo'gne viśve marutaḥ sumnamarcan । yacchociṣā sahasasputra tiṣṭhā abhi kṣitīḥ prathayansūryo nṝn ॥४॥ vayaṃ te adya rarimā hi kāmamuttānahastā namasopasadya । yajiṣṭhena manasā yakṣi devānasredhatā manmanā vipro agne ॥५॥ tvaddhi putra sahaso vi pūrvīrdevasya yantyūtayo vi vājāḥ । tvaṃ dehi sahasriṇaṃ rayiṃ no'drogheṇa vacasā satyamagne ॥६॥ tubhyaṃ dakṣa kavikrato yānīmā deva martāso adhvare akarma । tvaṃ viśvasya surathasya bodhi sarvaṃ tadagne amṛta svadeha ॥७॥

“Hymn to Agni, the pleasant priest come into the synod, Son of Strength — 7 verses. (after R.T.H. Griffith)”

vi pājasā pṛthunā śośucāno bādhasva dviṣo rakṣaso amīvāḥ । suśarmaṇo bṛhataḥ śarmaṇi syāmagnerahaṃ suhavasya praṇītau ॥१॥ tvaṃ no asyā uṣaso vyuṣṭau tvaṃ sūra udite bodhi gopāḥ । janmeva nityaṃ tanayaṃ juṣasva stomaṃ me agne tanvā sujāta ॥२॥ tvaṃ nṛcakṣā vṛṣabhānu pūrvīḥ kṛṣṇāsvagne aruṣo vi bhāhi । vaso neṣi ca parṣi cātyaṃhaḥ kṛdhī no rāya uśijo yaviṣṭha ॥३॥ aṣāḷho agne vṛṣabho didīhi puro viśvāḥ saubhagā saṃjigīvān । yajñasya netā prathamasya pāyorjātavedo bṛhataḥ supraṇīte ॥४॥ acchidrā śarma jaritaḥ purūṇi devām̐ acchā dīdyānaḥ sumedhāḥ । ratho na sasnirabhi vakṣi vājamagne tvaṃ rodasī naḥ sumeke ॥५॥ pra pīpaya vṛṣabha jinva vājānagne tvaṃ rodasī naḥ sudoghe । devebhirdeva surucā rucāno mā no martasya durmatiḥ pari ṣṭhāt ॥६॥ iḷāmagne purudaṃsaṃ saniṃ goḥ śaśvattamaṃ havamānāya sādha । syānnaḥ sūnustanayo vijāvāgne sā te sumatirbhūtvasme ॥७॥

“Hymn to Agni, asked with wide-extending lustre to dispel the terrors of the fiends — 7 verses. (after R.T.H. Griffith)”

ayamagniḥ suvīryasyeśe mahaḥ saubhagasya । rāya īśe svapatyasya gomata īśe vṛtrahathānām ॥१॥ imaṃ naro marutaḥ saścatā vṛdhaṃ yasminrāyaḥ śevṛdhāsaḥ । abhi ye santi pṛtanāsu dūḍhyo viśvāhā śatrumādabhuḥ ॥२॥ sa tvaṃ no rāyaḥ śiśīhi mīḍhvo agne suvīryasya । tuvidyumna varṣiṣṭhasya prajāvato'namīvasya śuṣmiṇaḥ ॥३॥ cakriryo viśvā bhuvanābhi sāsahiścakrirdeveṣvā duvaḥ । ā deveṣu yatata ā suvīrya ā śaṃsa uta nṛṇām ॥४॥ mā no agne'mataye māvīratāyai rīradhaḥ । māgotāyai sahasasputra mā nide'pa dveṣāṃsyā kṛdhi ॥५॥ śagdhi vājasya subhaga prajāvato'gne bṛhato adhvare । saṃ rāyā bhūyasā sṛja mayobhunā tuvidyumna yaśasvatā ॥६॥

“Hymn to Agni, lord of great felicity, hero strength and wealth in herds of kine — 6 verses. (after R.T.H. Griffith)”

samidhyamānaḥ prathamānu dharmā samaktubhirajyate viśvavāraḥ । śociṣkeśo ghṛtanirṇikpāvakaḥ suyajño agniryajathāya devān ॥१॥ yathāyajo hotramagne pṛthivyā yathā divo jātavedaścikitvān । evānena haviṣā yakṣi devānmanuṣvadyajñaṃ pra tiremamadya ॥२॥ trīṇyāyūṃṣi tava jātavedastisra ājānīruṣasaste agne । tābhirdevānāmavo yakṣi vidvānathā bhava yajamānāya śaṃ yoḥ ॥३॥ agniṃ sudītiṃ sudṛśaṃ gṛṇanto namasyāmastveḍyaṃ jātavedaḥ । tvāṃ dūtamaratiṃ havyavāhaṃ devā akṛṇvannamṛtasya nābhim ॥४॥ yastvaddhotā pūrvo agne yajīyāndvitā ca sattā svadhayā ca śambhuḥ । tasyānu dharma pra yajā cikitvo'tha no dhā adhvaraṃ devavītau ॥५॥

“Hymn to Agni, duly enkindled after ancient custom, balmed with unguents — 5 verses. (after R.T.H. Griffith)”

bhavā no agne sumanā upetau sakheva sakhye pitareva sādhuḥ । purudruho hi kṣitayo janānāṃ prati pratīcīrdahatādarātīḥ ॥१॥ tapo ṣvagne antarām̐ amitrāntapā śaṃsamararuṣaḥ parasya । tapo vaso cikitāno acittānvi te tiṣṭhantāmajarā ayāsaḥ ॥२॥ idhmenāgna icchamāno ghṛtena juhomi havyaṃ tarase balāya । yāvadīśe brahmaṇā vandamāna imāṃ dhiyaṃ śataseyāya devīm ॥३॥ ucchociṣā sahasasputra stuto bṛhadvayaḥ śaśamāneṣu dhehi । revadagne viśvāmitreṣu śaṃ yormarmṛjmā te tanvaṃ bhūri kṛtvaḥ ॥४॥ kṛdhi ratnaṃ susanitardhanānāṃ sa ghedagne bhavasi yatsamiddhaḥ । stoturduroṇe subhagasya revatsṛprā karasnā dadhiṣe vapūṃṣi ॥५॥

“Hymn to Agni, asked to be kind as a friend, father and mother — 5 verses. (after R.T.H. Griffith)”

ॐ īśā vāsyamidm̐ sarvṃ yatkiñca jagatyāṃ jagat | tena tyaktena bhuñjīthā mā gr̥dhḥ kasyasviddhanam ||

“All this world, whatsoever moves on earth, is indwelt by the Lord. Enjoy through renunciation; covet no one's wealth.”

ॐ śṃ no mitrḥ śṃ varuṇḥ | śṃ no bhavatvaryamā | śṃ na indro br̥haspatiḥ | śṃ no viṣṇururukramḥ | namo brahmaṇe | namaste vāyo | tvameva pratyakṣṃ brahmāsi | tvāmeva pratyakṣṃ brahma vadiṣyāmi | r̥tṃ vadiṣyāmi | satyṃ vadiṣyāmi | tanmāmavatu | tadvaktāramavatu | avatu mām | avatu vaktāram | ॐ śāntiḥ śāntiḥ śāntiḥ ||

“The peace-chant: may Mitra, Varuṇa, Aryaman, Indra, Bṛhaspati and Viṣṇu grant us weal; homage to Brahman and to Vāyu, the visible Brahman. 'I shall speak thee as the visible Brahman; I shall speak right and truth; may that protect me and the teacher.' Om, peace, peace, peace.”

kurvanneveha karmāṇi jijīviṣecchatm̐ samāḥ | evṃ tvayi nānyatheto'sti na karma lipyate nare ||

“Doing deeds here, one should wish to live a hundred years. For thee there is no other course; so action does not cling to a man.”

ॐ śīkṣāṃ vyākhyāsyāmḥ | varṇḥ svarḥ | mātrā balam | sāma santānḥ | ityuktḥ śīkṣādhyāyḥ ||

“'We shall expound phonetics: sound, accent, measure, force, articulation, and continuity — so is the chapter on pronunciation declared.'”

asuryā nāma te lokā andhena tamasā''vr̥tāḥ | tām̐ste pretyābhigacchanti ye ke cātmahano janāḥ ||

“Sunless are those worlds, covered in blind darkness; to them after death go all who destroy the Self.”

saha nau yaśḥ | saha nau brahmavarcasam | athātḥ sṃhitāyā upaniṣadṃ vyākhyāsyāmḥ | pañcasvadhikaraṇeṣu | adhilokamadhijyautiṣamadhividyamadhiprajamadhyātmam | tā mahāsm̐hitā ityācakṣate | athādhilokam | pr̥thivī pūrvarūpam | dyauruttararūpam | ākāśḥ sandhiḥ || vāyuḥ sandhānam | ityadhilokam | athādhijyautiṣam | agniḥ pūrvarūpam | āditya uttararūpam | āpḥ sandhiḥ | vaidyutḥ sandhānam | ityadhijyautiṣam | athādhividyam | ācāryḥ pūrvarūpam || antevāsyuttararūpam | vidyā sandhiḥ | pravacanm̐sandhānam | ityadhividyam | athādhiprajam | mātā pūrvarūpam | pitottararūpam | prajā sandhiḥ | prajananm̐sandhānam | ityadhiprajam || athādhyātmam | adharā hanuḥ pūrvarūpam | uttarā hanuruttararūpam | vāksandhiḥ | jihvāsandhānam | ityadhyātmam | itīmā mahāsm̐hitāḥ | ya evametā mahāsm̐hitā vyākhyātā veda | sandhīyate prajayā paśubhiḥ brahmavarcasenānnādyena suvargyeṇa lokena ||

“'May glory and Vedic lustre come to us both.' Then the lore of combination (saṃhitā) in five spheres — world, lights, knowledge, progeny, self — each with first form, second form, juncture and junction; these are the great combinations. Who knows them thus is joined with offspring, cattle, Vedic lustre, food and the heavenly world.”

anejadekṃ manaso javīyo nainaddevā āpnuvanpūrvamarṣat | taddhāvato'nyānatyeti tiṣṭhattasminnapo mātariśvā dadhāti ||

“Unmoving, the One outruns the mind; the gods could not reach it as it sped ahead. Standing still, it overtakes the runners; in it Mātariśvan (the wind) sustains the waters.”

yaśchandasāmr̥ṣabho viśvarūpḥ | chandobhyo'dhyamr̥tātsṃbabhūva | sa mendro medhayā spr̥ṇotu | amr̥tasya deva dhāraṇo bhūyāsam | śarīrṃ me vicarṣaṇam | jihvā me madhumattamā | karṇābhyāṃ bhūri viśruvam | brahmaṇḥ kośo'si medhayā pihitḥ | śrutṃ me gopāya || āvahantī vitanvānā kurvāṇā'cīramātmanḥ | vāsām̐si mama gāvaśca | annapāne ca sarvadā | tato me śriyamāvaha | lomaśāṃ paśubhiḥ saha svāhā | āmāyantu brahmacāriṇḥ svāhā | vimāyantu brahmacāriṇḥ svāhā | pramāyantu brahmacāriṇḥ svāhā | damāyantu brahmacāriṇḥ svāhā | śamāyantu brahmacāriṇḥ svāhā || yaśo jane'sāni svāhā | śreyān vasyaso'sāni svāhā | tṃ tvā bhaga praviśāni svāhā | sa mā bhaga praviśa svāhā | tasmin sahasraśākhe | nibhagāhṃ tvayi mr̥je svāhā | yathā''pḥ pravatāyanti yathā māsā aharjaram | evṃ māṃ brahmacāriṇḥ dhātarāyantu sarvatḥ svāhā | prativeśo'si pra mā bhāhi pra mā padyasva ||

“The bull of metres, all-formed, born from the immortal Vedas — may Indra strengthen me with wisdom through him. Prayers for a discerning body, sweet speech, keen hearing, guarded learning, and for wealth with students flocking like waters running down and months toward the year; 'thou art my refuge — shine forth to me.'”

tadejati tannaijati taddūre tadvantike | tadantarasya sarvasya tadu sarvasyāsya bāhyatḥ ||

“It moves and it moves not; it is far and it is near; it is within all this and outside all this.”

bhūrbhuvḥ suvariti vā etāstisro vyāhr̥tayḥ | tāsāmuha smaitāṃ caturthīṃ māhācamasyḥ pravedayate | maha iti | tad brahma | sa ātmā | aṅgānyanyā devatāḥ | bhūriti vā ayṃ lokḥ | bhuva ityantarikṣam | suvarityasau lokḥ || maha ityādityḥ | ādityena vāva sarve loka mahīyante | bhūriti vā agniḥ | bhuva iti vāyuḥ | suvarityādityḥ | maha iti candramāḥ | candramasā vāva sarvāṇi jyotīm̐ṣi mahīyante | bhūriti vā r̥cḥ | bhuva iti sāmāni | suvariti yajūm̐ṣi || maha iti brahma | brahmaṇā vāva sarve vedā mahīyante | bhūriti vai prāṇḥ | bhuva ityapānḥ | suvariti vyānḥ | maha ityannam | annena vāva sarve prāṇa mahīyante | tā vā etāścatasraścaturdhā | catasraścatasro vyāhr̥tayḥ | tā yo veda | sa veda brahma | sarve'smai devā balimāvahanti ||

“Bhūr, Bhuvar, Suvar are the three sacred utterances; Māhācamasya revealed a fourth, Mahas — that is Brahman, that is the Self, the other deities its limbs. Each utterance is fourfold across worlds, gods, Vedas and breaths; who knows them knows Brahman, and all gods bring him offerings.”

yastu sarvāṇi bhūtānyātmanyevānupaśyati | sarvabhūteṣu cātmānṃ tato na vijugupsate ||

“Who sees all beings in the Self itself, and the Self in all beings, feels no revulsion thereafter.”

sa ya eṣo'ntarhr̥daya ākāśḥ | tasminnayṃ puruṣo manomayḥ | amr̥to hiraṇmayḥ | antareṇa tāluke | ya eṣa stana ivāvalambate | sendrayoniḥ | yatrāsau keśānto vivartate | vyapohya śīrṣakapāle | bhūrityagnau pratitiṣṭhati | bhuva iti vāyau || suvarityāditye | maha iti brahmaṇi | āpnoti svārājyam | āpnoti manasaspatim | vākpatiścakṣuṣpatiḥ | śrotrapatirvijñānapatiḥ | etattato bhavati | ākāśaśarīrṃ brahma | satyātma prāṇārāmṃ mana ānandam | śāntisamr̥ddhamamr̥tam | iti prācīnayogyopāssva ||

“In the heart's space stands the mind-made, immortal, golden Person, reached through the palate and the parting of the hair. Abiding in fire, wind, sun and Brahman through the utterances, he attains self-rule and lordship of mind, speech, sight, hearing and knowledge — Brahman whose body is space, whose self is truth, delighting in breath, blissful in mind, rich in peace, immortal. Worship thus, as taught of old.”

yasminsarvāṇi bhūtānyātmaivābhūdvijānatḥ | tatra ko mohḥ kḥ śoka ekatvamanupaśyatḥ ||

“When, for the knower, all beings have become the Self itself, what delusion or sorrow can there be for one who sees oneness?”

pr̥thivyantarikṣṃ dyaurdiśo'vāntaradiśāḥ | agnirvāyurādityaścandramā nakṣatrāṇi | āpa oṣadhayo vanaspataya ākāśa ātmā | ityadhibhūtam | athādhyātmam | prāṇo vyāno'pāna udānḥ samānḥ | cakṣuḥ śrotrṃ mano vāk tvak | carma mām̐sm̐ snāvāsthi majjā | etadadhividhāya r̥ṣiravocat | pāṅktṃ vā idm̐ sarvam | pāṅktenaiva pāṅktm̐ spr̥ṇotīti ||

“Earth, sky, heaven, quarters; fire, wind, sun, moon, stars; waters, plants, trees, space, self — the outer fivefolds; and within: five breaths, five senses, skin, flesh, sinew, bone, marrow. Ordering this, the seer declared: all this is fivefold, and by the fivefold the fivefold is strengthened.”

sa paryagācchukramakāyamavraṇamasnāvirm̐ śuddhamapāpaviddham | kavirmanīṣī paribhūḥ svayambhūryāthātathyato'rthān vyadadhācchāśvatībhyḥ samābhyḥ ||

“He pervades all — radiant, bodiless, unwounded, pure, untouched by evil; the seer, the thinker, the all-surpassing, self-existent, who ordained all ends for the eternal years.”

omiti brahma | omitīdm̐sarvam | omityetadanukr̥tirhasma vā apyo śrāvayetyāśrāvayanti | omiti sāmāni gāyanti | om̐śomiti śastrāṇi śm̐santi | omityadhvaryuḥ pratigarṃ pratigr̥ṇāti | omiti brahmā prasauti | omityagnihotramanujānāti | omiti brāhmaṇḥ pravakṣyannāha brahmopāpnavānīti brahmaivopāpnoti ||

“Om is Brahman; Om is all this. Om is assent — priests chant it in rites, songs and recitations, and the sacrificer approves with Om. The Brahmin about to recite says Om, 'may I attain Brahman' — and attains Brahman indeed.”

andhṃ tamḥ praviśanti ye'vidyāmupāsate | tato bhūya iva te tamo ya u vidyāyām̐ ratāḥ ||

“Into blind darkness enter those who worship ignorance; into still greater darkness, those devoted to (mere) knowledge.”

r̥tṃ ca svādhyāyapravacane ca | satyṃ ca svādhyāyapravacane ca | tapaśca svādhyāyapravacane ca | damaśca svādhyāyapravacane ca | śamaśca svādhyāyapravacane ca | agnayaśca svādhyāyapravacane ca | agnihotrṃ ca svādhyāyapravacane ca | atithayaśca svādhyāyapravacane ca | mānuṣṃ ca svādhyāyapravacane ca | prajā ca svādhyāyapravacane ca | prajanaśca svādhyāyapravacane ca | prajātiśca svādhyāyapravacane ca | satyamiti satyavacā rāthītarḥ | tapa iti taponityḥ pauruśiṣṭiḥ | svādhyāyapravacane eveti nāko maudgalyḥ | taddhi tapastaddhi tapḥ ||

“Right, truth, austerity, restraint, calm, fires, fire-offering, guests, common duty, offspring, begetting and nurture — each along with study and teaching. Rāthītara holds by truth, Pauruśiṣṭi by austerity, Nāka Maudgalya by study and teaching alone — for that is austerity indeed.”