Sanskrit Corpus

prati va enā namasāhamemi sūktena bhikṣe sumatiṃ turāṇām । rarāṇatā maruto vedyābhirni heḷo dhatta vi mucadhvamaśvān ॥१॥ eṣa va stomo maruto namasvānhṛdā taṣṭo manasā dhāyi devāḥ । upemā yāta manasā juṣāṇā yūyaṃ hi ṣṭhā namasa idvṛdhāsaḥ ॥२॥ stutāso no maruto mṛḷayantūta stuto maghavā śambhaviṣṭhaḥ । ūrdhvā naḥ santu komyā vanānyahāni viśvā maruto jigīṣā ॥३॥ asmādahaṃ taviṣādīṣamāṇa indrādbhiyā maruto rejamānaḥ । yuṣmabhyaṃ havyā niśitānyāsantānyāre cakṛmā mṛḷatā naḥ ॥४॥ yena mānāsaścitayanta usrā vyuṣṭiṣu śavasā śaśvatīnām । sa no marudbhirvṛṣabha śravo dhā ugra ugrebhi sthaviraḥ sahodāḥ ॥५॥ tvaṃ pāhīndra sahīyaso nṝnbhavā marudbhiravayātaheḷāḥ । supraketebhiḥ sāsahirdadhāno vidyāmeṣaṃ vṛjanaṃ jīradānum ॥६॥

“Hymn to the Maruts and to Indra with the Maruts, craving the favour of the Strong Ones — 6 verses. (after R.T.H. Griffith)”

citro vo'stu yāmaścitra ūtī sudānavaḥ । maruto ahibhānavaḥ ॥१॥ āre sā vaḥ sudānavo maruta ṛñjatī śaruḥ । āre aśmā yamasyatha ॥२॥ tṛṇaskandasya nu viśaḥ pari vṛṅkta sudānavaḥ । ūrdhvānnaḥ karta jīvase ॥३॥

“Hymn to the Maruts, asked to make their coming wonderful with help — 3 verses. (after R.T.H. Griffith)”

gāyatsāma nabhanyaṃ yathā verarcāma tadvāvṛdhānaṃ svarvat । gāvo dhenavo barhiṣyadabdhā ā yatsadmānaṃ divyaṃ vivāsān ॥१॥ arcadvṛṣā vṛṣabhiḥ sveduhavyairmṛgo nāśno ati yajjuguryāt । pra mandayurmanāṃ gūrta hotā bharate maryo mithunā yajatraḥ ॥२॥ nakṣaddhotā pari sadma mitā yanbharadgarbhamā śaradaḥ pṛthivyāḥ । krandadaśvo nayamāno ruvadgaurantardūto na rodasī caradvāk ॥३॥ tā karmāṣatarāsmai pra cyautnāni devayanto bharante । jujoṣadindro dasmavarcā nāsatyeva sugmyo ratheṣṭhāḥ ॥४॥ tamu ṣṭuhīndraṃ yo ha satvā yaḥ śūro maghavā yo ratheṣṭhāḥ । pratīcaścidyodhīyānvṛṣaṇvānvavavruṣaścittamaso vihantā ॥५॥ pra yaditthā mahinā nṛbhyo astyaraṃ rodasī kakṣye nāsmai । saṃ vivya indro vṛjanaṃ na bhūmā bharti svadhāvām̐ opaśamiva dyām ॥६॥ samatsu tvā śūra satāmurāṇaṃ prapathintamaṃ paritaṃsayadhyai । sajoṣasa indraṃ made kṣoṇīḥ sūriṃ cidye anumadanti vājaiḥ ॥७॥ evā hi te śaṃ savanā samudra āpo yatta āsu madanti devīḥ । viśvā te anu joṣyā bhūdgauḥ sūrīm̐ścidyadi dhiṣā veṣi janān ॥८॥ asāma yathā suṣakhāya ena svabhiṣṭayo narāṃ na śaṃsaiḥ । asadyathā na indro vandaneṣṭhāsturo na karma nayamāna ukthā ॥९॥ viṣpardhaso narāṃ na śaṃsairasmākāsadindro vajrahastaḥ । mitrāyuvo na pūrpatiṃ suśiṣṭau madhyāyuva upa śikṣanti yajñaiḥ ॥१०॥ yajño hi ṣmendraṃ kaścidṛndhañjuhurāṇaścinmanasā pariyan । tīrthe nācchā tātṛṣāṇamoko dīrgho na sidhramā kṛṇotyadhvā ॥११॥ mo ṣū ṇa indrātra pṛtsu devairasti hi ṣmā te śuṣminnavayāḥ । mahaścidyasya mīḷhuṣo yavyā haviṣmato maruto vandate gīḥ ॥१२॥ eṣa stoma indra tubhyamasme etena gātuṃ harivo vido naḥ । ā no vavṛtyāḥ suvitāya deva vidyāmeṣaṃ vṛjanaṃ jīradānum ॥१३॥

“Hymn to Indra, who lets the praise-song burst forth bird-like — 13 verses. (after R.T.H. Griffith)”

tvaṃ rājendra ye ca devā rakṣā nṝnpāhyasura tvamasmān । tvaṃ satpatirmaghavā nastarutrastvaṃ satyo vasavānaḥ sahodāḥ ॥१॥ dano viśa indra mṛdhravācaḥ sapta yatpuraḥ śarma śāradīrdart । ṛṇorapo anavadyārṇā yūne vṛtraṃ purukutsāya randhīḥ ॥२॥ ajā vṛta indra śūrapatnīrdyāṃ ca yebhiḥ puruhūta nūnam । rakṣo agnimaśuṣaṃ tūrvayāṇaṃ siṃho na dame apāṃsi vastoḥ ॥३॥ śeṣannu ta indra sasminyonau praśastaye pavīravasya mahnā । sṛjadarṇāṃsyava yadyudhā gāstiṣṭhaddharī dhṛṣatā mṛṣṭa vājān ॥४॥ vaha kutsamindra yasmiñcākansyūmanyū ṛjrā vātasyāśvā । pra sūraścakraṃ vṛhatādabhīke'bhi spṛdho yāsiṣadvajrabāhuḥ ॥५॥ jaghanvām̐ indra mitrerūñcodapravṛddho harivo adāśūn । pra ye paśyannaryamaṇaṃ sacāyostvayā śūrtā vahamānā apatyam ॥६॥ rapatkavirindrārkasātau kṣāṃ dāsāyopabarhaṇīṃ kaḥ । karattisro maghavā dānucitrā ni duryoṇe kuyavācaṃ mṛdhi śret ॥७॥ sanā tā ta indra navyā āguḥ saho nabho'viraṇāya pūrvīḥ । bhinatpuro na bhido adevīrnanamo vadharadevasya pīyoḥ ॥८॥ tvaṃ dhunirindra dhunimatīrṛṇorapaḥ sīrā na sravantīḥ । pra yatsamudramati śūra parṣi pārayā turvaśaṃ yaduṃ svasti ॥९॥ tvamasmākamindra viśvadha syā avṛkatamo narāṃ nṛpātā । sa no viśvāsāṃ spṛdhāṃ sahodā vidyāmeṣaṃ vṛjanaṃ jīradānum ॥१०॥

“Hymn to Indra, king of all the gods, asked to protect and preserve the men — 10 verses. (after R.T.H. Griffith)”

matsyapāyi te mahaḥ pātrasyeva harivo matsaro madaḥ । vṛṣā te vṛṣṇa indurvājī sahasrasātamaḥ ॥१॥ ā naste gantu matsaro vṛṣā mado vareṇyaḥ । sahāvām̐ indra sānasiḥ pṛtanāṣāḷamartyaḥ ॥२॥ tvaṃ hi śūraḥ sanitā codayo manuṣo ratham । sahāvāndasyumavratamoṣaḥ pātraṃ na śociṣā ॥३॥ muṣāya sūryaṃ kave cakramīśāna ojasā । vaha śuṣṇāya vadhaṃ kutsaṃ vātasyāśvaiḥ ॥४॥ śuṣmintamo hi te mado dyumnintama uta kratuḥ । vṛtraghnā varivovidā maṃsīṣṭhā aśvasātamaḥ ॥५॥ yathā pūrvebhyo jaritṛbhya indra maya ivāpo na tṛṣyate babhūtha । tāmanu tvā nividaṃ johavīmi vidyāmeṣaṃ vṛjanaṃ jīradānum ॥६॥

“Hymn to Indra, whose glory has been quaffed like the enlivening mead — 6 verses. (after R.T.H. Griffith)”

matsi no vasyaiṣṭaya indramindo vṛṣā viśa । ṛghāyamāṇa invasi śatrumanti na vindasi ॥१॥ tasminnā veśayā giro ya ekaścarṣaṇīnām । anu svadhā yamupyate yavaṃ na carkṛṣadvṛṣā ॥२॥ yasya viśvāni hastayoḥ pañca kṣitīnāṃ vasu । spāśayasva yo asmadhrugdivyevāśanirjahi ॥३॥ asunvantaṃ samaṃ jahi dūṇāśaṃ yo na te mayaḥ । asmabhyamasya vedanaṃ daddhi sūriścidohate ॥४॥ āvo yasya dvibarhaso'rkeṣu sānuṣagasat । ājāvindrasyendo prāvo vājeṣu vājinam ॥५॥ yathā pūrvebhyo jaritṛbhya indra maya ivāpo na tṛṣyate babhūtha । tāmanu tvā nividaṃ johavīmi vidyāmeṣaṃ vṛjanaṃ jīradānum ॥६॥

“Hymn to Indra, cheered with Soma draughts to win bliss — 6 verses. (after R.T.H. Griffith)”

ā carṣaṇiprā vṛṣabho janānāṃ rājā kṛṣṭīnāṃ puruhūta indraḥ । stutaḥ śravasyannavasopa madrigyuktvā harī vṛṣaṇā yāhyarvāṅ ॥१॥ ye te vṛṣaṇo vṛṣabhāsa indra brahmayujo vṛṣarathāso atyāḥ । tām̐ ā tiṣṭha tebhirā yāhyarvāṅhavāmahe tvā suta indra some ॥२॥ ā tiṣṭha rathaṃ vṛṣaṇaṃ vṛṣā te sutaḥ somaḥ pariṣiktā madhūni । yuktvā vṛṣabhyāṃ vṛṣabha kṣitīnāṃ haribhyāṃ yāhi pravatopa madrik ॥३॥ ayaṃ yajño devayā ayaṃ miyedha imā brahmāṇyayamindra somaḥ । stīrṇaṃ barhirā tu śakra pra yāhi pibā niṣadya vi mucā harī iha ॥४॥ o suṣṭuta indra yāhyarvāṅupa brahmāṇi mānyasya kāroḥ । vidyāma vastoravasā gṛṇanto vidyāmeṣaṃ vṛjanaṃ jīradānum ॥५॥

“Hymn to Indra, the bull of men and king of the races, called to succour — 5 verses. (after R.T.H. Griffith)”

yaddha syā ta indra śruṣṭirasti yayā babhūtha jaritṛbhya ūtī । mā naḥ kāmaṃ mahayantamā dhagviśvā te aśyāṃ paryāpa āyoḥ ॥१॥ na ghā rājendra ā dabhanno yā nu svasārā kṛṇavanta yonau । āpaścidasmai sutukā aveṣangamanna indraḥ sakhyā vayaśca ॥२॥ jetā nṛbhirindraḥ pṛtsu śūraḥ śrotā havaṃ nādhamānasya kāroḥ । prabhartā rathaṃ dāśuṣa upāka udyantā giro yadi ca tmanā bhūt ॥३॥ evā nṛbhirindraḥ suśravasyā prakhādaḥ pṛkṣo abhi mitriṇo bhūt । samarya iṣa stavate vivāci satrākaro yajamānasya śaṃsaḥ ॥४॥ tvayā vayaṃ maghavannindra śatrūnabhi ṣyāma mahato manyamānān । tvaṃ trātā tvamu no vṛdhe bhūrvidyāmeṣaṃ vṛjanaṃ jīradānum ॥५॥

“Hymn to Indra, asked not to blast the wish that would exalt him — 5 verses. (after R.T.H. Griffith)”

pūrvīrahaṃ śaradaḥ śaśramāṇā doṣā vastoruṣaso jarayantīḥ । mināti śriyaṃ jarimā tanūnāmapyū nu patnīrvṛṣaṇo jagamyuḥ ॥१॥ ye ciddhi pūrva ṛtasāpa āsansākaṃ devebhiravadannṛtāni । te cidavāsurnahyantamāpuḥ samū nu patnīrvṛṣabhirjagamyuḥ ॥२॥ na mṛṣā śrāntaṃ yadavanti devā viśvā itspṛdho abhyaśnavāva । jayāvedatra śatanīthamājiṃ yatsamyañcā mithunāvabhyajāva ॥३॥ nadasya mā rudhataḥ kāma āgannita ājāto amutaḥ kutaścit । lopāmudrā vṛṣaṇaṃ nī riṇāti dhīramadhīrā dhayati śvasantam ॥४॥ imaṃ nu somamantito hṛtsu pītamupa bruve । yatsīmāgaścakṛmā tatsu mṛḷatu pulukāmo hi martyaḥ ॥५॥ agastyaḥ khanamānaḥ khanitraiḥ prajāmapatyaṃ balamicchamānaḥ । ubhau varṇāvṛṣirugraḥ pupoṣa satyā deveṣvāśiṣo jagāma ॥६॥

“Dialogue hymn to Rati: Agastya and Lopāmudrā on love and the ascetic's discipline — 6 verses. (after R.T.H. Griffith)”

yuvo rajāṃsi suyamāso aśvā ratho yadvāṃ paryarṇāṃsi dīyat । hiraṇyayā vāṃ pavayaḥ pruṣāyanmadhvaḥ pibantā uṣasaḥ sacethe ॥१॥ yuvamatyasyāva nakṣatho yadvipatmano naryasya prayajyoḥ । svasā yadvāṃ viśvagūrtī bharāti vājāyeṭṭe madhupāviṣe ca ॥२॥ yuvaṃ paya usriyāyāmadhattaṃ pakvamāmāyāmava pūrvyaṃ goḥ । antaryadvanino vāmṛtapsū hvāro na śuciryajate haviṣmān ॥३॥ yuvaṃ ha gharmaṃ madhumantamatraye'po na kṣodo'vṛṇītameṣe । tadvāṃ narāvaśvinā paśvaiṣṭī rathyeva cakrā prati yanti madhvaḥ ॥४॥ ā vāṃ dānāya vavṛtīya dasrā goroheṇa taugryo na jivriḥ । apaḥ kṣoṇī sacate māhinā vāṃ jūrṇo vāmakṣuraṃhaso yajatrā ॥५॥ ni yadyuvethe niyutaḥ sudānū upa svadhābhiḥ sṛjathaḥ puraṃdhim । preṣadveṣadvāto na sūrirā mahe dade suvrato na vājam ॥६॥ vayaṃ ciddhi vāṃ jaritāraḥ satyā vipanyāmahe vi paṇirhitāvān । adhā ciddhi ṣmāśvināvanindyā pātho hi ṣmā vṛṣaṇāvantidevam ॥७॥ yuvāṃ ciddhi ṣmāśvināvanu dyūnvirudrasya prasravaṇasya sātau । agastyo narāṃ nṛṣu praśastaḥ kārādhunīva citayatsahasraiḥ ॥८॥ pra yadvahethe mahinā rathasya pra syandrā yātho manuṣo na hotā । dhattaṃ sūribhya uta vā svaśvyaṃ nāsatyā rayiṣācaḥ syāma ॥९॥ taṃ vāṃ rathaṃ vayamadyā huvema stomairaśvinā suvitāya navyam । ariṣṭanemiṃ pari dyāmiyānaṃ vidyāmeṣaṃ vṛjanaṃ jīradānum ॥१०॥

“Hymn to the Aśvins, whose coursers travel through the regions as their car flies — 10 verses. (after R.T.H. Griffith)”

kadu preṣṭhāviṣāṃ rayīṇāmadhvaryantā yadunninītho apām । ayaṃ vāṃ yajño akṛta praśastiṃ vasudhitī avitārā janānām ॥१॥ ā vāmaśvāsaḥ śucayaḥ payaspā vātaraṃhaso divyāso atyāḥ । manojuvo vṛṣaṇo vītapṛṣṭhā eha svarājo aśvinā vahantu ॥२॥ ā vāṃ ratho'vanirna pravatvānsṛpravandhuraḥ suvitāya gamyāḥ । vṛṣṇa sthātārā manaso javīyānahampūrvo yajato dhiṣṇyā yaḥ ॥३॥ iheha jātā samavāvaśītāmarepasā tanvā nāmabhiḥ svaiḥ । jiṣṇurvāmanyaḥ sumakhasya sūrirdivo anyaḥ subhagaḥ putra ūhe ॥४॥ pra vāṃ niceruḥ kakuho vaśām̐ anu piśaṅgarūpaḥ sadanāni gamyāḥ । harī anyasya pīpayanta vājairmathrā rajāṃsyaśvinā vi ghoṣaiḥ ॥५॥ pra vāṃ śaradvānvṛṣabho na niṣṣāṭ pūrvīriṣaścarati madhva iṣṇan । evairanyasya pīpayanta vājairveṣantīrūrdhvā nadyo na āguḥ ॥६॥ asarji vāṃ sthavirā vedhasā gīrbāḷhe aśvinā tredhā kṣarantī । upastutāvavataṃ nādhamānaṃ yāmannayāmañchṛṇutaṃ havaṃ me ॥७॥ uta syā vāṃ ruśato vapsaso gīstribarhiṣi sadasi pinvate nṝn । vṛṣā vāṃ megho vṛṣaṇā pīpāya gorna seke manuṣo daśasyan ॥८॥ yuvāṃ pūṣevāśvinā puraṃdhiragnimuṣāṃ na jarate haviṣmān । huve yadvāṃ varivasyā gṛṇāno vidyāmeṣaṃ vṛjanaṃ jīradānum ॥९॥

“Hymn to the Aśvins, asked what strength and riches they bring from the waters — 9 verses. (after R.T.H. Griffith)”

abhūdidaṃ vayunamo ṣu bhūṣatā ratho vṛṣaṇvānmadatā manīṣiṇaḥ । dhiyaṃjinvā dhiṣṇyā viśpalāvasū divo napātā sukṛte śucivratā ॥१॥ indratamā hi dhiṣṇyā maruttamā dasrā daṃsiṣṭhā rathyā rathītamā । pūrṇaṃ rathaṃ vahethe madhva ācitaṃ tena dāśvāṃsamupa yātho aśvinā ॥२॥ kimatra dasrā kṛṇuthaḥ kimāsāthe jano yaḥ kaścidahavirmahīyate । ati kramiṣṭaṃ jurataṃ paṇerasuṃ jyotirviprāya kṛṇutaṃ vacasyave ॥३॥ jambhayatamabhito rāyataḥ śuno hataṃ mṛdho vidathustānyaśvinā । vācaṃvācaṃ jaritū ratninīṃ kṛtamubhā śaṃsaṃ nāsatyāvataṃ mama ॥४॥ yuvametaṃ cakrathuḥ sindhuṣu plavamātmanvantaṃ pakṣiṇaṃ taugryāya kam । yena devatrā manasā nirūhathuḥ supaptanī petathuḥ kṣodaso mahaḥ ॥५॥ avaviddhaṃ taugryamapsvantaranārambhaṇe tamasi praviddham । catasro nāvo jaṭhalasya juṣṭā udaśvibhyāmiṣitāḥ pārayanti ॥६॥ kaḥ svidvṛkṣo niṣṭhito madhye arṇaso yaṃ taugryo nādhitaḥ paryaṣasvajat । parṇā mṛgasya patarorivārabha udaśvinā ūhathuḥ śromatāya kam ॥७॥ tadvāṃ narā nāsatyāvanu ṣyādyadvāṃ mānāsa ucathamavocan । asmādadya sadasaḥ somyādā vidyāmeṣaṃ vṛjanaṃ jīradānum ॥८॥

“Hymn to the Aśvins, asked to appear promptly, glad in their strong-steeded chariot — 8 verses. (after R.T.H. Griffith)”

taṃ yuñjāthāṃ manaso yo javīyāntrivandhuro vṛṣaṇā yastricakraḥ । yenopayāthaḥ sukṛto duroṇaṃ tridhātunā patatho virna parṇaiḥ ॥१॥ suvṛdratho vartate yannabhi kṣāṃ yattiṣṭhathaḥ kratumantānu pṛkṣe । vapurvapuṣyā sacatāmiyaṃ gīrdivo duhitroṣasā sacethe ॥२॥ ā tiṣṭhataṃ suvṛtaṃ yo ratho vāmanu vratāni vartate haviṣmān । yena narā nāsatyeṣayadhyai vartiryāthastanayāya tmane ca ॥३॥ mā vāṃ vṛko mā vṛkīrā dadharṣīnmā pari varktamuta māti dhaktam । ayaṃ vāṃ bhāgo nihita iyaṃ gīrdasrāvime vāṃ nidhayo madhūnām ॥४॥ yuvāṃ gotamaḥ purumīḷho atrirdasrā havate'vase haviṣmān । diśaṃ na diṣṭāmṛjūyeva yantā me havaṃ nāsatyopa yātam ॥५॥ atāriṣma tamasaspāramasya prati vāṃ stomo aśvināvadhāyi । eha yātaṃ pathibhirdevayānairvidyāmeṣaṃ vṛjanaṃ jīradānum ॥६॥

“Hymn to the Aśvins, asked to make ready their three-wheeled, triple-seated car — 6 verses. (after R.T.H. Griffith)”

tā vāmadya tāvaparaṃ huvemocchantyāmuṣasi vahnirukthaiḥ । nāsatyā kuha citsantāvaryo divo napātā sudāstarāya ॥१॥ asme ū ṣu vṛṣaṇā mādayethāmutpaṇīm̐rhatamūrmyā madantā । śrutaṃ me acchoktibhirmatīnāmeṣṭā narā nicetārā ca karṇaiḥ ॥२॥ śriye pūṣanniṣukṛteva devā nāsatyā vahatuṃ sūryāyāḥ । vacyante vāṃ kakuhā apsu jātā yugā jūrṇeva varuṇasya bhūreḥ ॥३॥ asme sā vāṃ mādhvī rātirastu stomaṃ hinotaṃ mānyasya kāroḥ । anu yadvāṃ śravasyā sudānū suvīryāya carṣaṇayo madanti ॥४॥ eṣa vāṃ stomo aśvināvakāri mānebhirmaghavānā suvṛkti । yātaṃ vartistanayāya tmane cāgastye nāsatyā madantā ॥५॥ atāriṣma tamasaspāramasya prati vāṃ stomo aśvināvadhāyi । eha yātaṃ pathibhirdevayānairvidyāmeṣaṃ vṛjanaṃ jīradānum ॥६॥

“Hymn to the Aśvins, Nāsatyas, invoked both to-day and when the priest is here with lauds — 6 verses. (after R.T.H. Griffith)”

katarā pūrvā katarāparāyoḥ kathā jāte kavayaḥ ko vi veda । viśvaṃ tmanā bibhṛto yaddha nāma vi vartete ahanī cakriyeva ॥१॥ bhūriṃ dve acarantī carantaṃ padvantaṃ garbhamapadī dadhāte । nityaṃ na sūnuṃ pitrorupasthe dyāvā rakṣataṃ pṛthivī no abhvāt ॥२॥ aneho dātramaditeranarvaṃ huve svarvadavadhaṃ namasvat । tadrodasī janayataṃ jaritre dyāvā rakṣataṃ pṛthivī no abhvāt ॥३॥ atapyamāne avasāvantī anu ṣyāma rodasī devaputre । ubhe devānāmubhayebhirahnāṃ dyāvā rakṣataṃ pṛthivī no abhvāt ॥४॥ saṃgacchamāne yuvatī samante svasārā jāmī pitrorupasthe । abhijighrantī bhuvanasya nābhiṃ dyāvā rakṣataṃ pṛthivī no abhvāt ॥५॥ urvī sadmanī bṛhatī ṛtena huve devānāmavasā janitrī । dadhāte ye amṛtaṃ supratīke dyāvā rakṣataṃ pṛthivī no abhvāt ॥६॥ urvī pṛthvī bahule dūreante upa bruve namasā yajñe asmin । dadhāte ye subhage supratūrtī dyāvā rakṣataṃ pṛthivī no abhvāt ॥७॥ devānvā yaccakṛmā kaccidāgaḥ sakhāyaṃ vā sadamijjāspatiṃ vā । iyaṃ dhīrbhūyā avayānameṣāṃ dyāvā rakṣataṃ pṛthivī no abhvāt ॥८॥ ubhā śaṃsā naryā māmaviṣṭāmubhe māmūtī avasā sacetām । bhūri cidaryaḥ sudāstarāyeṣā madanta iṣayema devāḥ ॥९॥ ṛtaṃ dive tadavocaṃ pṛthivyā abhiśrāvāya prathamaṃ sumedhāḥ । pātāmavadyādduritādabhīke pitā mātā ca rakṣatāmavobhiḥ ॥१०॥ idaṃ dyāvāpṛthivī satyamastu pitarmātaryadihopabruve vām । bhūtaṃ devānāmavame avobhirvidyāmeṣaṃ vṛjanaṃ jīradānum ॥११॥

“Hymn to Heaven and Earth, asking which is elder and how they were born — 11 verses. (after R.T.H. Griffith)”

ā na iḷābhirvidathe suśasti viśvānaraḥ savitā deva etu । api yathā yuvāno matsathā no viśvaṃ jagadabhipitve manīṣā ॥१॥ ā no viśva āskrā gamantu devā mitro aryamā varuṇaḥ sajoṣāḥ । bhuvanyathā no viśve vṛdhāsaḥ karansuṣāhā vithuraṃ na śavaḥ ॥२॥ preṣṭhaṃ vo atithiṃ gṛṇīṣe'gniṃ śastibhisturvaṇiḥ sajoṣāḥ । asadyathā no varuṇaḥ sukīrtiriṣaśca parṣadarigūrtaḥ sūriḥ ॥३॥ upa va eṣe namasā jigīṣoṣāsānaktā sudugheva dhenuḥ । samāne ahanvimimāno arkaṃ viṣurūpe payasi sasminnūdhan ॥४॥ uta no'hirbudhnyo mayaskaḥ śiśuṃ na pipyuṣīva veti sindhuḥ । yena napātamapāṃ junāma manojuvo vṛṣaṇo yaṃ vahanti ॥५॥ uta na īṃ tvaṣṭā gantvacchā smatsūribhirabhipitve sajoṣāḥ । ā vṛtrahendraścarṣaṇiprāstuviṣṭamo narāṃ na iha gamyāḥ ॥६॥ uta na īṃ matayo'śvayogāḥ śiśuṃ na gāvastaruṇaṃ rihanti । tamīṃ giro janayo na patnīḥ surabhiṣṭamaṃ narāṃ nasanta ॥७॥ uta na īṃ maruto vṛddhasenāḥ smadrodasī samanasaḥ sadantu । pṛṣadaśvāso'vanayo na rathā riśādaso mitrayujo na devāḥ ॥८॥ pra nu yadeṣāṃ mahinā cikitre pra yuñjate prayujaste suvṛkti । adha yadeṣāṃ sudine na śarurviśvameriṇaṃ pruṣāyanta senāḥ ॥९॥ pro aśvināvavase kṛṇudhvaṃ pra pūṣaṇaṃ svatavaso hi santi । adveṣo viṣṇurvāta ṛbhukṣā acchā sumnāya vavṛtīya devān ॥१०॥ iyaṃ sā vo asme dīdhitiryajatrā apiprāṇī ca sadanī ca bhūyāḥ । ni yā deveṣu yatate vasūyurvidyāmeṣaṃ vṛjanaṃ jīradānum ॥११॥

“Hymn to Savitṛ and the ever-youthful gods, asked to come to the synod through praise — 11 verses. (after R.T.H. Griffith)”

pituṃ nu stoṣaṃ maho dharmāṇaṃ taviṣīm । yasya trito vyojasā vṛtraṃ viparvamardayat ॥१॥ svādo pito madho pito vayaṃ tvā vavṛmahe । asmākamavitā bhava ॥२॥ upa naḥ pitavā cara śivaḥ śivābhirūtibhiḥ । mayobhuradviṣeṇyaḥ sakhā suśevo advayāḥ ॥३॥ tava tye pito rasā rajāṃsyanu viṣṭhitāḥ । divi vātā iva śritāḥ ॥४॥ tava tye pito dadatastava svādiṣṭha te pito । pra svādmāno rasānāṃ tuvigrīvā iverate ॥५॥ tve pito mahānāṃ devānāṃ mano hitam । akāri cāru ketunā tavāhimavasāvadhīt ॥६॥ yadado pito ajaganvivasva parvatānām । atrā cinno madho pito'raṃ bhakṣāya gamyāḥ ॥७॥ yadapāmoṣadhīnāṃ pariṃśamāriśāmahe । vātāpe pīva idbhava ॥८॥ yatte soma gavāśiro yavāśiro bhajāmahe । vātāpe pīva idbhava ॥९॥ karambha oṣadhe bhava pīvo vṛkka udārathiḥ । vātāpe pīva idbhava ॥१०॥ taṃ tvā vayaṃ pito vacobhirgāvo na havyā suṣūdima । devebhyastvā sadhamādamasmabhyaṃ tvā sadhamādam ॥११॥

“Hymn to Food, which upholds great strength and by whose power Trita rent Vṛtra — 11 verses. (after R.T.H. Griffith)”

samiddho adya rājasi devo devaiḥ sahasrajit । dūto havyā kavirvaha ॥१॥ tanūnapādṛtaṃ yate madhvā yajñaḥ samajyate । dadhatsahasriṇīriṣaḥ ॥२॥ ājuhvāno na īḍyo devām̐ ā vakṣi yajñiyān । agne sahasrasā asi ॥३॥ prācīnaṃ barhirojasā sahasravīramastṛṇan । yatrādityā virājatha ॥४॥ virāṭ samrāḍvibhvīḥ prabhvīrbahvīśca bhūyasīśca yāḥ । duro ghṛtānyakṣaran ॥५॥ surukme hi supeśasādhi śriyā virājataḥ । uṣāsāveha sīdatām ॥६॥ prathamā hi suvācasā hotārā daivyā kavī । yajñaṃ no yakṣatāmimam ॥७॥ bhāratīḷe sarasvati yā vaḥ sarvā upabruve । tā naścodayata śriye ॥८॥ tvaṣṭā rūpāṇi hi prabhuḥ paśūnviśvānsamānaje । teṣāṃ na sphātimā yaja ॥९॥ upa tmanyā vanaspate pātho devebhyaḥ sṛja । agnirhavyāni siṣvadat ॥१०॥ purogā agnirdevānāṃ gāyatreṇa samajyate । svāhākṛtīṣu rocate ॥११॥

“Āprī hymn: Agni, winner of thousands, kindled and shining among the gods — 11 verses. (after R.T.H. Griffith)”

agne naya supathā rāye asmānviśvāni deva vayunāni vidvān । yuyodhyasmajjuhurāṇameno bhūyiṣṭhāṃ te namauktiṃ vidhema ॥१॥ agne tvaṃ pārayā navyo asmānsvastibhirati durgāṇi viśvā । pūśca pṛthvī bahulā na urvī bhavā tokāya tanayāya śaṃ yoḥ ॥२॥ agne tvamasmadyuyodhyamīvā anagnitrā abhyamanta kṛṣṭīḥ । punarasmabhyaṃ suvitāya deva kṣāṃ viśvebhiramṛtebhiryajatra ॥३॥ pāhi no agne pāyubhirajasrairuta priye sadana ā śuśukvān । mā te bhayaṃ jaritāraṃ yaviṣṭha nūnaṃ vidanmāparaṃ sahasvaḥ ॥४॥ mā no agne'va sṛjo aghāyāviṣyave ripave ducchunāyai । mā datvate daśate mādate no mā rīṣate sahasāvanparā dāḥ ॥५॥ vi gha tvāvām̐ ṛtajāta yaṃsadgṛṇāno agne tanve varūtham । viśvādririkṣoruta vā ninitsorabhihrutāmasi hi deva viṣpaṭ ॥६॥ tvaṃ tām̐ agna ubhayānvi vidvānveṣi prapitve manuṣo yajatra । abhipitve manave śāsyo bhūrmarmṛjenya uśigbhirnākraḥ ॥७॥ avocāma nivacanānyasminmānasya sūnuḥ sahasāne agnau । vayaṃ sahasramṛṣibhiḥ sanema vidyāmeṣaṃ vṛjanaṃ jīradānum ॥८॥

“Hymn to Agni, asked to lead by goodly paths to riches and to remove the sin that makes us stray — 8 verses. (after R.T.H. Griffith)”

anarvāṇaṃ vṛṣabhaṃ mandrajihvaṃ bṛhaspatiṃ vardhayā navyamarkaiḥ । gāthānyaḥ suruco yasya devā āśṛṇvanti navamānasya martāḥ ॥१॥ tamṛtviyā upa vācaḥ sacante sargo na yo devayatāmasarji । bṛhaspatiḥ sa hyañjo varāṃsi vibhvābhavatsamṛte mātariśvā ॥२॥ upastutiṃ namasa udyatiṃ ca ślokaṃ yaṃsatsaviteva pra bāhū । asya kratvāhanyo yo asti mṛgo na bhīmo arakṣasastuviṣmān ॥३॥ asya śloko divīyate pṛthivyāmatyo na yaṃsadyakṣabhṛdvicetāḥ । mṛgāṇāṃ na hetayo yanti cemā bṛhaspaterahimāyām̐ abhi dyūn ॥४॥ ye tvā devosrikaṃ manyamānāḥ pāpā bhadramupajīvanti pajrāḥ । na dūḍhye anu dadāsi vāmaṃ bṛhaspate cayasa itpiyārum ॥५॥ supraituḥ sūyavaso na panthā durniyantuḥ pariprīto na mitraḥ । anarvāṇo abhi ye cakṣate no'pīvṛtā aporṇuvanto asthuḥ ॥६॥ saṃ yaṃ stubho'vanayo na yanti samudraṃ na sravato rodhacakrāḥ । sa vidvām̐ ubhayaṃ caṣṭe antarbṛhaspatistara āpaśca gṛdhraḥ ॥७॥ evā mahastuvijātastuviṣmānbṛhaspatirvṛṣabho dhāyi devaḥ । sa na stuto vīravaddhātu gomadvidyāmeṣaṃ vṛjanaṃ jīradānum ॥८॥

“Hymn to Bṛhaspati, the scatheless, praised with hymns as leader of the song — 8 verses. (after R.T.H. Griffith)”

kaṅkato na kaṅkato'tho satīnakaṅkataḥ । dvāviti pluṣī iti nyadṛṣṭā alipsata ॥१॥ adṛṣṭānhantyāyatyatho hanti parāyatī । atho avaghnatī hantyatho pinaṣṭi piṃṣatī ॥२॥ śarāsaḥ kuśarāso darbhāsaḥ sairyā uta । mauñjā adṛṣṭā vairiṇāḥ sarve sākaṃ nyalipsata ॥३॥ ni gāvo goṣṭhe asadanni mṛgāso avikṣata । ni ketavo janānāṃ nyadṛṣṭā alipsata ॥४॥ eta u tye pratyadṛśranpradoṣaṃ taskarā iva । adṛṣṭā viśvadṛṣṭāḥ pratibuddhā abhūtana ॥५॥ dyaurvaḥ pitā pṛthivī mātā somo bhrātāditiḥ svasā । adṛṣṭā viśvadṛṣṭāstiṣṭhatelayatā su kam ॥६॥ ye aṃsyā ye aṅgyāḥ sūcīkā ye prakaṅkatāḥ । adṛṣṭāḥ kiṃ caneha vaḥ sarve sākaṃ ni jasyata ॥७॥ utpurastātsūrya eti viśvadṛṣṭo adṛṣṭahā । adṛṣṭānsarvāñjambhayansarvāśca yātudhānyaḥ ॥८॥ udapaptadasau sūryaḥ puru viśvāni jūrvan । ādityaḥ parvatebhyo viśvadṛṣṭo adṛṣṭahā ॥९॥ sūrye viṣamā sajāmi dṛtiṃ surāvato gṛhe । so cinnu na marāti no vayaṃ marāmāre asya yojanaṃ hariṣṭhā madhu tvā madhulā cakāra ॥१०॥ iyattikā śakuntikā sakā jaghāsa te viṣam । so cinnu na marāti no vayaṃ marāmāre asya yojanaṃ hariṣṭhā madhu tvā madhulā cakāra ॥११॥ triḥ sapta viṣpuliṅgakā viṣasya puṣyamakṣan । tāścinnu na maranti no vayaṃ marāmāre asya yojanaṃ hariṣṭhā madhu tvā madhulā cakāra ॥१२॥ navānāṃ navatīnāṃ viṣasya ropuṣīṇām । sarvāsāmagrabhaṃ nāmāre asya yojanaṃ hariṣṭhā madhu tvā madhulā cakāra ॥१३॥ triḥ sapta mayūryaḥ sapta svasāro agruvaḥ । tāste viṣaṃ vi jabhrira udakaṃ kumbhinīriva ॥१४॥ iyattakaḥ kuṣumbhakastakaṃ bhinadmyaśmanā । tato viṣaṃ pra vāvṛte parācīranu saṃvataḥ ॥१५॥ kuṣumbhakastadabravīdgireḥ pravartamānakaḥ । vṛścikasyārasaṃ viṣamarasaṃ vṛścika te viṣam ॥१६॥

“Hymn against venomous worms and poison, addressed to the Sun's healing powers — 16 verses. (after R.T.H. Griffith)”

tvamagne dyubhistvamāśuśukṣaṇistvamadbhyastvamaśmanaspari । tvaṃ vanebhyastvamoṣadhībhyastvaṃ nṛṇāṃ nṛpate jāyase śuciḥ ॥१॥ tavāgne hotraṃ tava potramṛtviyaṃ tava neṣṭraṃ tvamagnidṛtāyataḥ । tava praśāstraṃ tvamadhvarīyasi brahmā cāsi gṛhapatiśca no dame ॥२॥ tvamagna indro vṛṣabhaḥ satāmasi tvaṃ viṣṇururugāyo namasyaḥ । tvaṃ brahmā rayividbrahmaṇaspate tvaṃ vidhartaḥ sacase puraṃdhyā ॥३॥ tvamagne rājā varuṇo dhṛtavratastvaṃ mitro bhavasi dasma īḍyaḥ । tvamaryamā satpatiryasya sambhujaṃ tvamaṃśo vidathe deva bhājayuḥ ॥४॥ tvamagne tvaṣṭā vidhate suvīryaṃ tava gnāvo mitramahaḥ sajātyam । tvamāśuhemā rariṣe svaśvyaṃ tvaṃ narāṃ śardho asi purūvasuḥ ॥५॥ tvamagne rudro asuro maho divastvaṃ śardho mārutaṃ pṛkṣa īśiṣe । tvaṃ vātairaruṇairyāsi śaṃgayastvaṃ pūṣā vidhataḥ pāsi nu tmanā ॥६॥ tvamagne draviṇodā araṃkṛte tvaṃ devaḥ savitā ratnadhā asi । tvaṃ bhago nṛpate vasva īśiṣe tvaṃ pāyurdame yaste'vidhat ॥७॥ tvāmagne dama ā viśpatiṃ viśastvāṃ rājānaṃ suvidatramṛñjate । tvaṃ viśvāni svanīka patyase tvaṃ sahasrāṇi śatā daśa prati ॥८॥ tvāmagne pitaramiṣṭibhirnarastvāṃ bhrātrāya śamyā tanūrucam । tvaṃ putro bhavasi yaste'vidhattvaṃ sakhā suśevaḥ pāsyādhṛṣaḥ ॥९॥ tvamagna ṛbhurāke namasyastvaṃ vājasya kṣumato rāya īśiṣe । tvaṃ vi bhāsyanu dakṣi dāvane tvaṃ viśikṣurasi yajñamātaniḥ ॥१०॥ tvamagne aditirdeva dāśuṣe tvaṃ hotrā bhāratī vardhase girā । tvamiḷā śatahimāsi dakṣase tvaṃ vṛtrahā vasupate sarasvatī ॥११॥ tvamagne subhṛta uttamaṃ vayastava spārhe varṇa ā saṃdṛśi śriyaḥ । tvaṃ vājaḥ prataraṇo bṛhannasi tvaṃ rayirbahulo viśvataspṛthuḥ ॥१२॥ tvāmagna ādityāsa āsyaṃ tvāṃ jihvāṃ śucayaścakrire kave । tvāṃ rātiṣāco adhvareṣu saścire tve devā haviradantyāhutam ॥१३॥ tve agne viśve amṛtāso adruha āsā devā haviradantyāhutam । tvayā martāsaḥ svadanta āsutiṃ tvaṃ garbho vīrudhāṃ jajñiṣe śuciḥ ॥१४॥ tvaṃ tānsaṃ ca prati cāsi majmanāgne sujāta pra ca deva ricyase । pṛkṣo yadatra mahinā vi te bhuvadanu dyāvāpṛthivī rodasī ubhe ॥१५॥ ye stotṛbhyo goagrāmaśvapeśasamagne rātimupasṛjanti sūrayaḥ । asmāñca tām̐śca pra hi neṣi vasya ā bṛhadvadema vidathe suvīrāḥ ॥१६॥

“Hymn to Agni, brought to life from the waters, the stone and the forest trees — 16 verses. (after R.T.H. Griffith)”

yajñena vardhata jātavedasamagniṃ yajadhvaṃ haviṣā tanā girā । samidhānaṃ suprayasaṃ svarṇaraṃ dyukṣaṃ hotāraṃ vṛjaneṣu dhūrṣadam ॥१॥ abhi tvā naktīruṣaso vavāśire'gne vatsaṃ na svasareṣu dhenavaḥ । diva ivedaratirmānuṣā yugā kṣapo bhāsi puruvāra saṃyataḥ ॥२॥ taṃ devā budhne rajasaḥ sudaṃsasaṃ divaspṛthivyoraratiṃ nyerire । rathamiva vedyaṃ śukraśociṣamagniṃ mitraṃ na kṣitiṣu praśaṃsyam ॥३॥ tamukṣamāṇaṃ rajasi sva ā dame candramiva surucaṃ hvāra ā dadhuḥ । pṛśnyāḥ pataraṃ citayantamakṣabhiḥ pātho na pāyuṃ janasī ubhe anu ॥४॥ sa hotā viśvaṃ pari bhūtvadhvaraṃ tamu havyairmanuṣa ṛñjate girā । hiriśipro vṛdhasānāsu jarbhuraddyaurna stṛbhiścitayadrodasī anu ॥५॥ sa no revatsamidhānaḥ svastaye saṃdadasvānrayimasmāsu dīdihi । ā naḥ kṛṇuṣva suvitāya rodasī agne havyā manuṣo deva vītaye ॥६॥ dā no agne bṛhato dāḥ sahasriṇo duro na vājaṃ śrutyā apā vṛdhi । prācī dyāvāpṛthivī brahmaṇā kṛdhi svarṇa śukramuṣaso vi didyutaḥ ॥७॥ sa idhāna uṣaso rāmyā anu svarṇa dīdedaruṣeṇa bhānunā । hotrābhiragnirmanuṣaḥ svadhvaro rājā viśāmatithiścārurāyave ॥८॥ evā no agne amṛteṣu pūrvya dhīṣpīpāya bṛhaddiveṣu mānuṣā । duhānā dhenurvṛjaneṣu kārave tmanā śatinaṃ pururūpamiṣaṇi ॥९॥ vayamagne arvatā vā suvīryaṃ brahmaṇā vā citayemā janām̐ ati । asmākaṃ dyumnamadhi pañca kṛṣṭiṣūccā svarṇa śuśucīta duṣṭaram ॥१०॥ sa no bodhi sahasya praśaṃsyo yasminsujātā iṣayanta sūrayaḥ । yamagne yajñamupayanti vājino nitye toke dīdivāṃsaṃ sve dame ॥११॥ ubhayāso jātavedaḥ syāma te stotāro agne sūrayaśca śarmaṇi । vasvo rāyaḥ puruścandrasya bhūyasaḥ prajāvataḥ svapatyasya śagdhi naḥ ॥१२॥ ye stotṛbhyo goagrāmaśvapeśasamagne rātimupasṛjanti sūrayaḥ । asmāñca tām̐śca pra hi neṣi vasya ā bṛhadvadema vidathe suvīrāḥ ॥१३॥

“Hymn to Agni, who knows all life, exalted with oblation and song — 13 verses. (after R.T.H. Griffith)”

samiddho agnirnihitaḥ pṛthivyāṃ pratyaṅviśvāni bhuvanānyasthāt । hotā pāvakaḥ pradivaḥ sumedhā devo devānyajatvagnirarhan ॥१॥ narāśaṃsaḥ prati dhāmānyañjantisro divaḥ prati mahnā svarciḥ । ghṛtapruṣā manasā havyamundanmūrdhanyajñasya samanaktu devān ॥२॥ īḷito agne manasā no arhandevānyakṣi mānuṣātpūrvo adya । sa ā vaha marutāṃ śardho acyutamindraṃ naro barhiṣadaṃ yajadhvam ॥३॥ deva barhirvardhamānaṃ suvīraṃ stīrṇaṃ rāye subharaṃ vedyasyām । ghṛtenāktaṃ vasavaḥ sīdatedaṃ viśve devā ādityā yajñiyāsaḥ ॥४॥ vi śrayantāmurviyā hūyamānā dvāro devīḥ suprāyaṇā namobhiḥ । vyacasvatīrvi prathantāmajuryā varṇaṃ punānā yaśasaṃ suvīram ॥५॥ sādhvapāṃsi sanatā na ukṣite uṣāsānaktā vayyeva raṇvite । tantuṃ tataṃ saṃvayantī samīcī yajñasya peśaḥ sudughe payasvatī ॥६॥ daivyā hotārā prathamā viduṣṭara ṛju yakṣataḥ samṛcā vapuṣṭarā । devānyajantāvṛtuthā samañjato nābhā pṛthivyā adhi sānuṣu triṣu ॥७॥ sarasvatī sādhayantī dhiyaṃ na iḷā devī bhāratī viśvatūrtiḥ । tisro devīḥ svadhayā barhiredamacchidraṃ pāntu śaraṇaṃ niṣadya ॥८॥ piśaṅgarūpaḥ subharo vayodhāḥ śruṣṭī vīro jāyate devakāmaḥ । prajāṃ tvaṣṭā vi ṣyatu nābhimasme athā devānāmapyetu pāthaḥ ॥९॥ vanaspatiravasṛjannupa sthādagnirhaviḥ sūdayāti pra dhībhiḥ । tridhā samaktaṃ nayatu prajānandevebhyo daivyaḥ śamitopa havyam ॥१०॥ ghṛtaṃ mimikṣe ghṛtamasya yonirghṛte śrito ghṛtamvasya dhāma । anuṣvadhamā vaha mādayasva svāhākṛtaṃ vṛṣabha vakṣi havyam ॥११॥

“Āprī hymn: Agni set upon the earth, well kindled as priest and purifier — 11 verses. (after R.T.H. Griffith)”

huve vaḥ sudyotmānaṃ suvṛktiṃ viśāmagnimatithiṃ suprayasam । mitra iva yo didhiṣāyyo bhūddeva ādeve jane jātavedāḥ ॥१॥ imaṃ vidhanto apāṃ sadhasthe dvitādadhurbhṛgavo vikṣvāyoḥ । eṣa viśvānyabhyastu bhūmā devānāmagniraratirjīrāśvaḥ ॥२॥ agniṃ devāso mānuṣīṣu vikṣu priyaṃ dhuḥ kṣeṣyanto na mitram । sa dīdayaduśatīrūrmyā ā dakṣāyyo yo dāsvate dama ā ॥३॥ asya raṇvā svasyeva puṣṭiḥ saṃdṛṣṭirasya hiyānasya dakṣoḥ । vi yo bharibhradoṣadhīṣu jihvāmatyo na rathyo dodhavīti vārān ॥४॥ ā yanme abhvaṃ vanadaḥ panantośigbhyo nāmimīta varṇam । sa citreṇa cikite raṃsu bhāsā jujurvām̐ yo muhurā yuvā bhūt ॥५॥ ā yo vanā tātṛṣāṇo na bhāti vārṇa pathā rathyeva svānīt । kṛṣṇādhvā tapū raṇvaściketa dyauriva smayamāno nabhobhiḥ ॥६॥ sa yo vyasthādabhi dakṣadurvīṃ paśurnaiti svayuragopāḥ । agniḥ śociṣmām̐ atasānyuṣṇankṛṣṇavyathirasvadayanna bhūma ॥७॥ nū te pūrvasyāvaso adhītau tṛtīye vidathe manma śaṃsi । asme agne saṃyadvīraṃ bṛhantaṃ kṣumantaṃ vājaṃ svapatyaṃ rayiṃ dāḥ ॥८॥ tvayā yathā gṛtsamadāso agne guhā vanvanta uparām̐ abhi ṣyuḥ । suvīrāso abhimātiṣāhaḥ smatsūribhyo gṛṇate tadvayo dhāḥ ॥९॥

“Hymn to Agni, the guest of men, rich in oblations, whom all must strive to win — 9 verses. (after R.T.H. Griffith)”

hotājaniṣṭa cetanaḥ pitā pitṛbhya ūtaye । prayakṣañjenyaṃ vasu śakema vājino yamam ॥१॥ ā yasminsapta raśmayastatā yajñasya netari । manuṣvaddaivyamaṣṭamaṃ potā viśvaṃ tadinvati ॥२॥ dadhanve vā yadīmanu vocadbrahmāṇi veru tat । pari viśvāni kāvyā nemiścakramivābhavat ॥३॥ sākaṃ hi śucinā śuciḥ praśāstā kratunājani । vidvām̐ asya vratā dhruvā vayā ivānu rohate ॥४॥ tā asya varṇamāyuvo neṣṭuḥ sacanta dhenavaḥ । kuvittisṛbhya ā varaṃ svasāro yā idaṃ yayuḥ ॥५॥ yadī māturupa svasā ghṛtaṃ bharantyasthita । tāsāmadhvaryurāgatau yavo vṛṣṭīva modate ॥६॥ svaḥ svāya dhāyase kṛṇutāmṛtvigṛtvijam । stomaṃ yajñaṃ cādaraṃ vanemā rarimā vayam ॥७॥ yathā vidvām̐ araṃ karadviśvebhyo yajatebhyaḥ । ayamagne tve api yaṃ yajñaṃ cakṛmā vayam ॥८॥

“Hymn to Agni, born herald and teacher, guardian of the patrons — 8 verses. (after R.T.H. Griffith)”

imāṃ me agne samidhamimāmupasadaṃ vaneḥ । imā u ṣu śrudhī giraḥ ॥१॥ ayā te agne vidhemorjo napādaśvamiṣṭe । enā sūktena sujāta ॥२॥ taṃ tvā gīrbhirgirvaṇasaṃ draviṇasyuṃ draviṇodaḥ । saparyema saparyavaḥ ॥३॥ sa bodhi sūrirmaghavā vasupate vasudāvan । yuyodhyasmaddveṣāṃsi ॥४॥ sa no vṛṣṭiṃ divaspari sa no vājamanarvāṇam । sa naḥ sahasriṇīriṣaḥ ॥५॥ īḷānāyāvasyave yaviṣṭha dūta no girā । yajiṣṭha hotarā gahi ॥६॥ antarhyagna īyase vidvāñjanmobhayā kave । dūto janyeva mitryaḥ ॥७॥ sa vidvām̐ ā ca piprayo yakṣi cikitva ānuṣak । ā cāsminsatsi barhiṣi ॥८॥

“Hymn to Agni, asked to accept the flaming brand and the prayer — 8 verses. (after R.T.H. Griffith)”

śreṣṭhaṃ yaviṣṭha bhāratāgne dyumantamā bhara । vaso puruspṛhaṃ rayim ॥१॥ mā no arātirīśata devasya martyasya ca । parṣi tasyā uta dviṣaḥ ॥२॥ viśvā uta tvayā vayaṃ dhārā udanyā iva । ati gāhemahi dviṣaḥ ॥३॥ śuciḥ pāvaka vandyo'gne bṛhadvi rocase । tvaṃ ghṛtebhirāhutaḥ ॥४॥ tvaṃ no asi bhāratāgne vaśābhirukṣabhiḥ । aṣṭāpadībhirāhutaḥ ॥५॥ drvannaḥ sarpirāsutiḥ pratno hotā vareṇyaḥ । sahasasputro adbhutaḥ ॥६॥

“Hymn to Agni, the most youthful Vasu and Bhārata, asked to bring splendid wealth — 6 verses. (after R.T.H. Griffith)”

vājayanniva nū rathānyogām̐ agnerupa stuhi । yaśastamasya mīḷhuṣaḥ ॥१॥ yaḥ sunītho dadāśuṣe'juryo jarayannarim । cārupratīka āhutaḥ ॥२॥ ya u śriyā dameṣvā doṣoṣasi praśasyate । yasya vrataṃ na mīyate ॥३॥ ā yaḥ svarṇa bhānunā citro vibhātyarciṣā । añjāno ajarairabhi ॥४॥ atrimanu svarājyamagnimukthāni vāvṛdhuḥ । viśvā adhi śriyo dadhe ॥५॥ agnerindrasya somasya devānāmūtibhirvayam । ariṣyantaḥ sacemahyabhi ṣyāma pṛtanyataḥ ॥६॥

“Hymn to Agni, the liberal and most splendid, whose car is harnessed — 6 verses. (after R.T.H. Griffith)”

ni hotā hotṛṣadane vidānastveṣo dīdivām̐ asadatsudakṣaḥ । adabdhavratapramatirvasiṣṭhaḥ sahasrambharaḥ śucijihvo agniḥ ॥१॥ tvaṃ dūtastvamu naḥ paraspāstvaṃ vasya ā vṛṣabha praṇetā । agne tokasya nastane tanūnāmaprayucchandīdyadbodhi gopāḥ ॥२॥ vidhema te parame janmannagne vidhema stomairavare sadhasthe । yasmādyonerudārithā yaje taṃ pra tve havīṃṣi juhure samiddhe ॥३॥ agne yajasva haviṣā yajīyāñchruṣṭī deṣṇamabhi gṛṇīhi rādhaḥ । tvaṃ hyasi rayipatī rayīṇāṃ tvaṃ śukrasya vacaso manotā ॥४॥ ubhayaṃ te na kṣīyate vasavyaṃ divedive jāyamānasya dasma । kṛdhi kṣumantaṃ jaritāramagne kṛdhi patiṃ svapatyasya rāyaḥ ॥५॥ sainānīkena suvidatro asme yaṣṭā devām̐ āyajiṣṭhaḥ svasti । adabdho gopā uta naḥ paraspā agne dyumaduta revaddidīhi ॥६॥

“Hymn to Agni, seated in the herald's place, whose foresight keeps the Law — 6 verses. (after R.T.H. Griffith)”

johūtro agniḥ prathamaḥ piteveḷaspade manuṣā yatsamiddhaḥ । śriyaṃ vasāno amṛto vicetā marmṛjenyaḥ śravasyaḥ sa vājī ॥१॥ śrūyā agniścitrabhānurhavaṃ me viśvābhirgīrbhiramṛto vicetāḥ । śyāvā rathaṃ vahato rohitā votāruṣāha cakre vibhṛtraḥ ॥२॥ uttānāyāmajanayansuṣūtaṃ bhuvadagniḥ purupeśāsu garbhaḥ । śiriṇāyāṃ cidaktunā mahobhiraparīvṛto vasati pracetāḥ ॥३॥ jigharmyagniṃ haviṣā ghṛtena pratikṣiyantaṃ bhuvanāni viśvā । pṛthuṃ tiraścā vayasā bṛhantaṃ vyaciṣṭhamannai rabhasaṃ dṛśānam ॥४॥ ā viśvataḥ pratyañcaṃ jigharmyarakṣasā manasā tajjuṣeta । maryaśrī spṛhayadvarṇo agnirnābhimṛśe tanvā jarbhurāṇaḥ ॥५॥ jñeyā bhāgaṃ sahasāno vareṇa tvādūtāso manuvadvadema । anūnamagniṃ juhvā vacasyā madhupṛcaṃ dhanasā johavīmi ॥६॥

“Hymn to Agni, loudly calling like a father, kindled on the seat of worship — 6 verses. (after R.T.H. Griffith)”

śrudhī havamindra mā riṣaṇyaḥ syāma te dāvane vasūnām । imā hi tvāmūrjo vardhayanti vasūyavaḥ sindhavo na kṣarantaḥ ॥१॥ sṛjo mahīrindra yā apinvaḥ pariṣṭhitā ahinā śūra pūrvīḥ । amartyaṃ ciddāsaṃ manyamānamavābhinadukthairvāvṛdhānaḥ ॥२॥ uktheṣvinnu śūra yeṣu cākanstomeṣvindra rudriyeṣu ca । tubhyedetā yāsu mandasānaḥ pra vāyave sisrate na śubhrāḥ ॥३॥ śubhraṃ nu te śuṣmaṃ vardhayantaḥ śubhraṃ vajraṃ bāhvordadhānāḥ । śubhrastvamindra vāvṛdhāno asme dāsīrviśaḥ sūryeṇa sahyāḥ ॥४॥ guhā hitaṃ guhyaṃ gūḷhamapsvapīvṛtaṃ māyinaṃ kṣiyantam । uto apo dyāṃ tastabhvāṃsamahannahiṃ śūra vīryeṇa ॥५॥ stavā nu ta indra pūrvyā mahānyuta stavāma nūtanā kṛtāni । stavā vajraṃ bāhvoruśantaṃ stavā harī sūryasya ketū ॥६॥ harī nu ta indra vājayantā ghṛtaścutaṃ svāramasvārṣṭām । vi samanā bhūmiraprathiṣṭāraṃsta parvataścitsariṣyan ॥७॥ ni parvataḥ sādyaprayucchansaṃ mātṛbhirvāvaśāno akrān । dūre pāre vāṇīṃ vardhayanta indreṣitāṃ dhamaniṃ paprathanni ॥८॥ indro mahāṃ sindhumāśayānaṃ māyāvinaṃ vṛtramasphuranniḥ । arejetāṃ rodasī bhiyāne kanikradato vṛṣṇo asya vajrāt ॥९॥ aroravīdvṛṣṇo asya vajro'mānuṣaṃ yanmānuṣo nijūrvāt । ni māyino dānavasya māyā apādayatpapivānsutasya ॥१०॥ pibāpibedindra śūra somaṃ mandantu tvā mandinaḥ sutāsaḥ । pṛṇantaste kukṣī vardhayantvitthā sutaḥ paura indramāva ॥११॥ tve indrāpyabhūma viprā dhiyaṃ vanema ṛtayā sapantaḥ । avasyavo dhīmahi praśastiṃ sadyaste rāyo dāvane syāma ॥१२॥ syāma te ta indra ye ta ūtī avasyava ūrjaṃ vardhayantaḥ । śuṣmintamaṃ yaṃ cākanāma devāsme rayiṃ rāsi vīravantam ॥१३॥ rāsi kṣayaṃ rāsi mitramasme rāsi śardha indra mārutaṃ naḥ । sajoṣaso ye ca mandasānāḥ pra vāyavaḥ pāntyagraṇītim ॥१४॥ vyantvinnu yeṣu mandasānastṛpatsomaṃ pāhi drahyadindra । asmānsu pṛtsvā tarutrāvardhayo dyāṃ bṛhadbhirarkaiḥ ॥१५॥ bṛhanta innu ye te tarutrokthebhirvā sumnamāvivāsān । stṛṇānāso barhiḥ pastyāvattvotā idindra vājamagman ॥१६॥ ugreṣvinnu śūra mandasānastrikadrukeṣu pāhi somamindra । pradodhuvacchmaśruṣu prīṇāno yāhi haribhyāṃ sutasya pītim ॥१७॥ dhiṣvā śavaḥ śūra yena vṛtramavābhinaddānumaurṇavābham । apāvṛṇorjyotirāryāya ni savyataḥ sādi dasyurindra ॥१८॥ sanema ye ta ūtibhistaranto viśvā spṛdha āryeṇa dasyūn । asmabhyaṃ tattvāṣṭraṃ viśvarūpamarandhayaḥ sākhyasya tritāya ॥१९॥ asya suvānasya mandinastritasya nyarbudaṃ vāvṛdhāno astaḥ । avartayatsūryo na cakraṃ bhinadvalamindro aṅgirasvān ॥२०॥ nūnaṃ sā te prati varaṃ jaritre duhīyadindra dakṣiṇā maghonī । śikṣā stotṛbhyo māti dhagbhago no bṛhadvadema vidathe suvīrāḥ ॥२१॥

“Hymn to Indra, asked not to be heedless but to give treasures — 21 verses. (after R.T.H. Griffith)”

yo jāta eva prathamo manasvāndevo devānkratunā paryabhūṣat । yasya śuṣmādrodasī abhyasetāṃ nṛmṇasya mahnā sa janāsa indraḥ ॥१॥ yaḥ pṛthivīṃ vyathamānāmadṛṃhadyaḥ parvatānprakupitām̐ aramṇāt । yo antarikṣaṃ vimame varīyo yo dyāmastabhnātsa janāsa indraḥ ॥२॥ yo hatvāhimariṇātsapta sindhūnyo gā udājadapadhā valasya । yo aśmanorantaragniṃ jajāna saṃvṛksamatsu sa janāsa indraḥ ॥३॥ yenemā viśvā cyavanā kṛtāni yo dāsaṃ varṇamadharaṃ guhākaḥ । śvaghnīva yo jigīvām̐llakṣamādadaryaḥ puṣṭāni sa janāsa indraḥ ॥४॥ yaṃ smā pṛcchanti kuha seti ghoramutemāhurnaiṣo astītyenam । so aryaḥ puṣṭīrvija ivā mināti śradasmai dhatta sa janāsa indraḥ ॥५॥ yo radhrasya coditā yaḥ kṛśasya yo brahmaṇo nādhamānasya kīreḥ । yuktagrāvṇo yo'vitā suśipraḥ sutasomasya sa janāsa indraḥ ॥६॥ yasyāśvāsaḥ pradiśi yasya gāvo yasya grāmā yasya viśve rathāsaḥ । yaḥ sūryaṃ ya uṣasaṃ jajāna yo apāṃ netā sa janāsa indraḥ ॥७॥ yaṃ krandasī saṃyatī vihvayete pare'vara ubhayā amitrāḥ । samānaṃ cidrathamātasthivāṃsā nānā havete sa janāsa indraḥ ॥८॥ yasmānna ṛte vijayante janāso yaṃ yudhyamānā avase havante । yo viśvasya pratimānaṃ babhūva yo acyutacyutsa janāsa indraḥ ॥९॥ yaḥ śaśvato mahyeno dadhānānamanyamānāñcharvā jaghāna । yaḥ śardhate nānudadāti śṛdhyāṃ yo dasyorhantā sa janāsa indraḥ ॥१०॥ yaḥ śambaraṃ parvateṣu kṣiyantaṃ catvāriṃśyāṃ śaradyanvavindat । ojāyamānaṃ yo ahiṃ jaghāna dānuṃ śayānaṃ sa janāsa indraḥ ॥११॥ yaḥ saptaraśmirvṛṣabhastuviṣmānavāsṛjatsartave sapta sindhūn । yo rauhiṇamasphuradvajrabāhurdyāmārohantaṃ sa janāsa indraḥ ॥१२॥ dyāvā cidasmai pṛthivī namete śuṣmāccidasya parvatā bhayante । yaḥ somapā nicito vajrabāhuryo vajrahastaḥ sa janāsa indraḥ ॥१३॥ yaḥ sunvantamavati yaḥ pacantaṃ yaḥ śaṃsantaṃ yaḥ śaśamānamūtī । yasya brahma vardhanaṃ yasya somo yasyedaṃ rādhaḥ sa janāsa indraḥ ॥१४॥ yaḥ sunvate pacate dudhra ā cidvājaṃ dardarṣi sa kilāsi satyaḥ । vayaṃ ta indra viśvaha priyāsaḥ suvīrāso vidathamā vadema ॥१५॥

“Hymn to Indra, who just born became the gods' protector by power and might — 15 verses. (after R.T.H. Griffith)”

ṛturjanitrī tasyā apaspari makṣū jāta āviśadyāsu vardhate । tadāhanā abhavatpipyuṣī payo'ṃśoḥ pīyūṣaṃ prathamaṃ tadukthyam ॥१॥ sadhrīmā yanti pari bibhratīḥ payo viśvapsnyāya pra bharanta bhojanam । samāno adhvā pravatāmanuṣyade yastākṛṇoḥ prathamaṃ sāsyukthyaḥ ॥२॥ anveko vadati yaddadāti tadrūpā minantadapā eka īyate । viśvā ekasya vinudastitikṣate yastākṛṇoḥ prathamaṃ sāsyukthyaḥ ॥३॥ prajābhyaḥ puṣṭiṃ vibhajanta āsate rayimiva pṛṣṭhaṃ prabhavantamāyate । asinvandaṃṣṭraiḥ pituratti bhojanaṃ yastākṛṇoḥ prathamaṃ sāsyukthyaḥ ॥४॥ adhākṛṇoḥ pṛthivīṃ saṃdṛśe dive yo dhautīnāmahihannāriṇakpathaḥ । taṃ tvā stomebhirudabhirna vājinaṃ devaṃ devā ajanansāsyukthyaḥ ॥५॥ yo bhojanaṃ ca dayase ca vardhanamārdrādā śuṣkaṃ madhumaddudohitha । sa śevadhiṃ ni dadhiṣe vivasvati viśvasyaika īśiṣe sāsyukthyaḥ ॥६॥ yaḥ puṣpiṇīśca prasvaśca dharmaṇādhi dāne vyavanīradhārayaḥ । yaścāsamā ajano didyuto diva ururūrvām̐ abhitaḥ sāsyukthyaḥ ॥७॥ yo nārmaraṃ sahavasuṃ nihantave pṛkṣāya ca dāsaveśāya cāvahaḥ । ūrjayantyā apariviṣṭamāsyamutaivādya purukṛtsāsyukthyaḥ ॥८॥ śataṃ vā yasya daśa sākamādya ekasya śruṣṭau yaddha codamāvitha । arajjau dasyūnsamunabdabhītaye suprāvyo abhavaḥ sāsyukthyaḥ ॥९॥ viśvedanu rodhanā asya pauṃsyaṃ dadurasmai dadhire kṛtnave dhanam । ṣaḷastabhnā viṣṭiraḥ pañca saṃdṛśaḥ pari paro abhavaḥ sāsyukthyaḥ ॥१०॥ supravācanaṃ tava vīra vīryaṃ yadekena kratunā vindase vasu । jātūṣṭhirasya pra vayaḥ sahasvato yā cakartha sendra viśvāsyukthyaḥ ॥११॥ aramayaḥ sarapasastarāya kaṃ turvītaye ca vayyāya ca srutim । nīcā santamudanayaḥ parāvṛjaṃ prāndhaṃ śroṇaṃ śravayansāsyukthyaḥ ॥१२॥ asmabhyaṃ tadvaso dānāya rādhaḥ samarthayasva bahu te vasavyam । indra yaccitraṃ śravasyā anu dyūnbṛhadvadema vidathe suvīrāḥ ॥१३॥

“Hymn to Indra, born of the Season and entering the growing floods — 13 verses. (after R.T.H. Griffith)”

adhvaryavo bharatendrāya somamāmatrebhiḥ siñcatā madyamandhaḥ । kāmī hi vīraḥ sadamasya pītiṃ juhota vṛṣṇe tadideṣa vaṣṭi ॥१॥ adhvaryavo yo apo vavrivāṃsaṃ vṛtraṃ jaghānāśanyeva vṛkṣam । tasmā etaṃ bharata tadvaśāyam̐ eṣa indro arhati pītimasya ॥२॥ adhvaryavo yo dṛbhīkaṃ jaghāna yo gā udājadapa hi valaṃ vaḥ । tasmā etamantarikṣe na vātamindraṃ somairorṇuta jūrna vastraiḥ ॥३॥ adhvaryavo ya uraṇaṃ jaghāna nava cakhvāṃsaṃ navatiṃ ca bāhūn । yo arbudamava nīcā babādhe tamindraṃ somasya bhṛthe hinota ॥४॥ adhvaryavo yaḥ svaśnaṃ jaghāna yaḥ śuṣṇamaśuṣaṃ yo vyaṃsam । yaḥ pipruṃ namuciṃ yo rudhikrāṃ tasmā indrāyāndhaso juhota ॥५॥ adhvaryavo yaḥ śataṃ śambarasya puro bibhedāśmaneva pūrvīḥ । yo varcinaḥ śatamindraḥ sahasramapāvapadbharatā somamasmai ॥६॥ adhvaryavo yaḥ śatamā sahasraṃ bhūmyā upasthe'vapajjaghanvān । kutsasyāyoratithigvasya vīrānnyāvṛṇagbharatā somamasmai ॥७॥ adhvaryavo yannaraḥ kāmayādhve śruṣṭī vahanto naśathā tadindre । gabhastipūtaṃ bharata śrutāyendrāya somaṃ yajyavo juhota ॥८॥ adhvaryavaḥ kartanā śruṣṭimasmai vane nipūtaṃ vana unnayadhvam । juṣāṇo hastyamabhi vāvaśe va indrāya somaṃ madiraṃ juhota ॥९॥ adhvaryavaḥ payasodharyathā goḥ somebhirīṃ pṛṇatā bhojamindram । vedāhamasya nibhṛtaṃ ma etadditsantaṃ bhūyo yajataściketa ॥१०॥ adhvaryavo yo divyasya vasvo yaḥ pārthivasya kṣamyasya rājā । tamūrdaraṃ na pṛṇatā yavenendraṃ somebhistadapo vo astu ॥११॥ asmabhyaṃ tadvaso dānāya rādhaḥ samarthayasva bahu te vasavyam । indra yaccitraṃ śravasyā anu dyūnbṛhadvadema vidathe suvīrāḥ ॥१२॥

“Hymn to Indra, for whom the ministers bring the gladdening Soma — 12 verses. (after R.T.H. Griffith)”

pra ghā nvasya mahato mahāni satyā satyasya karaṇāni vocam । trikadrukeṣvapibatsutasyāsya made ahimindro jaghāna ॥१॥ avaṃśe dyāmastabhāyadbṛhantamā rodasī apṛṇadantarikṣam । sa dhārayatpṛthivīṃ paprathacca somasya tā mada indraścakāra ॥२॥ sadmeva prāco vi mimāya mānairvajreṇa khānyatṛṇannadīnām । vṛthāsṛjatpathibhirdīrghayāthaiḥ somasya tā mada indraścakāra ॥३॥ sa pravoḷhṝnparigatyā dabhīterviśvamadhāgāyudhamiddhe agnau । saṃ gobhiraśvairasṛjadrathebhiḥ somasya tā mada indraścakāra ॥४॥ sa īṃ mahīṃ dhunimetoraramṇātso asnātṝnapārayatsvasti । ta utsnāya rayimabhi pra tasthuḥ somasya tā mada indraścakāra ॥५॥ sodañcaṃ sindhumariṇānmahitvā vajreṇāna uṣasaḥ saṃ pipeṣa । ajavaso javinībhirvivṛścansomasya tā mada indraścakāra ॥६॥ sa vidvām̐ apagohaṃ kanīnāmāvirbhavannudatiṣṭhatparāvṛk । prati śroṇa sthādvyanagacaṣṭa somasya tā mada indraścakāra ॥७॥ bhinadvalamaṅgirobhirgṛṇāno vi parvatasya dṛṃhitānyairat । riṇagrodhāṃsi kṛtrimāṇyeṣāṃ somasya tā mada indraścakāra ॥८॥ svapnenābhyupyā cumuriṃ dhuniṃ ca jaghantha dasyuṃ pra dabhītimāvaḥ । rambhī cidatra vivide hiraṇyaṃ somasya tā mada indraścakāra ॥९॥ nūnaṃ sā te prati varaṃ jaritre duhīyadindra dakṣiṇā maghonī । śikṣā stotṛbhyo māti dhagbhago no bṛhadvadema vidathe suvīrāḥ ॥१०॥

“Hymn to Indra, declaring his mighty and true exploits at the Trikadrukas — 10 verses. (after R.T.H. Griffith)”

pra vaḥ satāṃ jyeṣṭhatamāya suṣṭutimagnāviva samidhāne havirbhare । indramajuryaṃ jarayantamukṣitaṃ sanādyuvānamavase havāmahe ॥१॥ yasmādindrādbṛhataḥ kiṃ canemṛte viśvānyasminsambhṛtādhi vīryā । jaṭhare somaṃ tanvī saho maho haste vajraṃ bharati śīrṣaṇi kratum ॥२॥ na kṣoṇībhyāṃ paribhve ta indriyaṃ na samudraiḥ parvatairindra te rathaḥ । na te vajramanvaśnoti kaścana yadāśubhiḥ patasi yojanā puru ॥३॥ viśve hyasmai yajatāya dhṛṣṇave kratuṃ bharanti vṛṣabhāya saścate । vṛṣā yajasva haviṣā viduṣṭaraḥ pibendra somaṃ vṛṣabheṇa bhānunā ॥४॥ vṛṣṇaḥ kośaḥ pavate madhva ūrmirvṛṣabhānnāya vṛṣabhāya pātave । vṛṣaṇādhvaryū vṛṣabhāso adrayo vṛṣaṇaṃ somaṃ vṛṣabhāya suṣvati ॥५॥ vṛṣā te vajra uta te vṛṣā ratho vṛṣaṇā harī vṛṣabhāṇyāyudhā । vṛṣṇo madasya vṛṣabha tvamīśiṣa indra somasya vṛṣabhasya tṛpṇuhi ॥६॥ pra te nāvaṃ na samane vacasyuvaṃ brahmaṇā yāmi savaneṣu dādhṛṣiḥ । kuvinno asya vacaso nibodhiṣadindramutsaṃ na vasunaḥ sicāmahe ॥७॥ purā sambādhādabhyā vavṛtsva no dhenurna vatsaṃ yavasasya pipyuṣī । sakṛtsu te sumatibhiḥ śatakrato saṃ patnībhirna vṛṣaṇo nasīmahi ॥८॥ nūnaṃ sā te prati varaṃ jaritre duhīyadindra dakṣiṇā maghonī । śikṣā stotṛbhyo māti dhagbhago no bṛhadvadema vidathe suvīrāḥ ॥९॥

“Hymn to Indra, the best among the good, brought eulogy like oblation — 9 verses. (after R.T.H. Griffith)”

tadasmai navyamaṅgirasvadarcata śuṣmā yadasya pratnathodīrate । viśvā yadgotrā sahasā parīvṛtā made somasya dṛṃhitānyairayat ॥१॥ sa bhūtu yo ha prathamāya dhāyasa ojo mimāno mahimānamātirat । śūro yo yutsu tanvaṃ parivyata śīrṣaṇi dyāṃ mahinā pratyamuñcata ॥२॥ adhākṛṇoḥ prathamaṃ vīryaṃ mahadyadasyāgre brahmaṇā śuṣmamairayaḥ । ratheṣṭhena haryaśvena vicyutāḥ pra jīrayaḥ sisrate sadhryakpṛthak ॥३॥ adhā yo viśvā bhuvanābhi majmaneśānakṛtpravayā abhyavardhata । ādrodasī jyotiṣā vahnirātanotsīvyantamāṃsi dudhitā samavyayat ॥४॥ sa prācīnānparvatāndṛṃhadojasādharācīnamakṛṇodapāmapaḥ । adhārayatpṛthivīṃ viśvadhāyasamastabhnānmāyayā dyāmavasrasaḥ ॥५॥ sāsmā araṃ bāhubhyāṃ yaṃ pitākṛṇodviśvasmādā januṣo vedasaspari । yenā pṛthivyāṃ ni kriviṃ śayadhyai vajreṇa hatvyavṛṇaktuviṣvaṇiḥ ॥६॥ amājūriva pitroḥ sacā satī samānādā sadasastvāmiye bhagam । kṛdhi praketamupa māsyā bhara daddhi bhāgaṃ tanvo yena māmahaḥ ॥७॥ bhojaṃ tvāmindra vayaṃ huvema dadiṣṭvamindrāpāṃsi vājān । aviḍḍhīndra citrayā na ūtī kṛdhi vṛṣannindra vasyaso naḥ ॥८॥ nūnaṃ sā te prati varaṃ jaritre duhīyadindra dakṣiṇā maghonī । śikṣā stotṛbhyo māti dhagbhago no bṛhadvadema vidathe suvīrāḥ ॥९॥

“Hymn to Indra, whose mighty powers are shown as in ancient days — 9 verses. (after R.T.H. Griffith)”

prātā ratho navo yoji sasniścaturyugastrikaśaḥ saptaraśmiḥ । daśāritro manuṣyaḥ svarṣāḥ sa iṣṭibhirmatibhī raṃhyo bhūt ॥१॥ sāsmā araṃ prathamaṃ sa dvitīyamuto tṛtīyaṃ manuṣaḥ sa hotā । anyasyā garbhamanya ū jananta so anyebhiḥ sacate jenyo vṛṣā ॥२॥ harī nu kaṃ ratha indrasya yojamāyai sūktena vacasā navena । mo ṣu tvāmatra bahavo hi viprā ni rīramanyajamānāso anye ॥३॥ ā dvābhyāṃ haribhyāmindra yāhyā caturbhirā ṣaḍbhirhūyamānaḥ । āṣṭābhirdaśabhiḥ somapeyamayaṃ sutaḥ sumakha mā mṛdhaskaḥ ॥४॥ ā viṃśatyā triṃśatā yāhyarvāṅā catvāriṃśatā haribhiryujānaḥ । ā pañcāśatā surathebhirindrā ṣaṣṭyā saptatyā somapeyam ॥५॥ āśītyā navatyā yāhyarvāṅā śatena haribhiruhyamānaḥ । ayaṃ hi te śunahotreṣu soma indra tvāyā pariṣikto madāya ॥६॥ mama brahmendra yāhyacchā viśvā harī dhuri dhiṣvā rathasya । purutrā hi vihavyo babhūthāsmiñchūra savane mādayasva ॥७॥ na ma indreṇa sakhyaṃ vi yoṣadasmabhyamasya dakṣiṇā duhīta । upa jyeṣṭhe varūthe gabhastau prāyeprāye jigīvāṃsaḥ syāma ॥८॥ nūnaṃ sā te prati varaṃ jaritre duhīyadindra dakṣiṇā maghonī । śikṣā stotṛbhyo māti dhagbhago no bṛhadvadema vidathe suvīrāḥ ॥९॥

“Hymn to Indra, whose rich new car with four yokes and seven reins is equipped at morning — 9 verses. (after R.T.H. Griffith)”

apāyyasyāndhaso madāya manīṣiṇaḥ suvānasya prayasaḥ । yasminnindraḥ pradivi vāvṛdhāna oko dadhe brahmaṇyantaśca naraḥ ॥१॥ asya mandāno madhvo vajrahasto'himindro arṇovṛtaṃ vi vṛścat । pra yadvayo na svasarāṇyacchā prayāṃsi ca nadīnāṃ cakramanta ॥२॥ sa māhina indro arṇo apāṃ prairayadahihācchā samudram । ajanayatsūryaṃ vidadgā aktunāhnāṃ vayunāni sādhat ॥३॥ so apratīni manave purūṇīndro dāśaddāśuṣe hanti vṛtram । sadyo yo nṛbhyo atasāyyo bhūtpaspṛdhānebhyaḥ sūryasya sātau ॥४॥ sa sunvata indraḥ sūryamā devo riṇaṅmartyāya stavān । ā yadrayiṃ guhadavadyamasmai bharadaṃśaṃ naitaśo daśasyan ॥५॥ sa randhayatsadivaḥ sārathaye śuṣṇamaśuṣaṃ kuyavaṃ kutsāya । divodāsāya navatiṃ ca navendraḥ puro vyairacchambarasya ॥६॥ evā ta indrocathamahema śravasyā na tmanā vājayantaḥ । aśyāma tatsāptamāśuṣāṇā nanamo vadharadevasya pīyoḥ ॥७॥ evā te gṛtsamadāḥ śūra manmāvasyavo na vayunāni takṣuḥ । brahmaṇyanta indra te navīya iṣamūrjaṃ sukṣitiṃ sumnamaśyuḥ ॥८॥ nūnaṃ sā te prati varaṃ jaritre duhīyadindra dakṣiṇā maghonī । śikṣā stotṛbhyo māti dhagbhago no bṛhadvadema vidathe suvīrāḥ ॥९॥

“Hymn to Indra, grown mighty by the sweet Soma draughts — 9 verses. (after R.T.H. Griffith)”

vayaṃ te vaya indra viddhi ṣu ṇaḥ pra bharāmahe vājayurna ratham । vipanyavo dīdhyato manīṣā sumnamiyakṣantastvāvato nṝn ॥१॥ tvaṃ na indra tvābhirūtī tvāyato abhiṣṭipāsi janān । tvamino dāśuṣo varūtetthādhīrabhi yo nakṣati tvā ॥२॥ sa no yuvendro johūtraḥ sakhā śivo narāmastu pātā । yaḥ śaṃsantaṃ yaḥ śaśamānamūtī pacantaṃ ca stuvantaṃ ca praṇeṣat ॥३॥ tamu stuṣa indraṃ taṃ gṛṇīṣe yasminpurā vāvṛdhuḥ śāśaduśca । sa vasvaḥ kāmaṃ pīparadiyāno brahmaṇyato nūtanasyāyoḥ ॥४॥ so aṅgirasāmucathā jujuṣvānbrahmā tūtodindro gātumiṣṇan । muṣṇannuṣasaḥ sūryeṇa stavānaśnasya cicchiśnathatpūrvyāṇi ॥५॥ sa ha śruta indro nāma deva ūrdhvo bhuvanmanuṣe dasmatamaḥ । ava priyamarśasānasya sāhvāñchiro bharaddāsasya svadhāvān ॥६॥ sa vṛtrahendraḥ kṛṣṇayonīḥ puraṃdaro dāsīrairayadvi । ajanayanmanave kṣāmapaśca satrā śaṃsaṃ yajamānasya tūtot ॥७॥ tasmai tavasyamanu dāyi satrendrāya devebhirarṇasātau । prati yadasya vajraṃ bāhvordhurhatvī dasyūnpura āyasīrni tārīt ॥८॥ nūnaṃ sā te prati varaṃ jaritre duhīyadindra dakṣiṇā maghonī । śikṣā stotṛbhyo māti dhagbhago no bṛhadvadema vidathe suvīrāḥ ॥९॥

“Hymn to Indra, to whom power is brought as one brings forth his car — 9 verses. (after R.T.H. Griffith)”

viśvajite dhanajite svarjite satrājite nṛjita urvarājite । aśvajite gojite abjite bharendrāya somaṃ yajatāya haryatam ॥१॥ abhibhuve'bhibhaṅgāya vanvate'ṣāḷhāya sahamānāya vedhase । tuvigraye vahnaye duṣṭarītave satrāsāhe nama indrāya vocata ॥२॥ satrāsāho janabhakṣo janaṃsahaścyavano yudhmo anu joṣamukṣitaḥ । vṛtaṃcayaḥ sahurirvikṣvārita indrasya vocaṃ pra kṛtāni vīryā ॥३॥ anānudo vṛṣabho dodhato vadho gambhīra ṛṣvo asamaṣṭakāvyaḥ । radhracodaḥ śnathano vīḷitaspṛthurindraḥ suyajña uṣasaḥ svarjanat ॥४॥ yajñena gātumapturo vividrire dhiyo hinvānā uśijo manīṣiṇaḥ । abhisvarā niṣadā gā avasyava indre hinvānā draviṇānyāśata ॥५॥ indra śreṣṭhāni draviṇāni dhehi cittiṃ dakṣasya subhagatvamasme । poṣaṃ rayīṇāmariṣṭiṃ tanūnāṃ svādmānaṃ vācaḥ sudinatvamahnām ॥६॥

“Hymn to Indra, lord of all, lord of wealth, light, men and tilth — 6 verses. (after R.T.H. Griffith)”

trikadrukeṣu mahiṣo yavāśiraṃ tuviśuṣmastṛpatsomamapibadviṣṇunā sutaṃ yathāvaśat । sa īṃ mamāda mahi karma kartave mahāmuruṃ sainaṃ saścaddevo devaṃ satyamindraṃ satya induḥ ॥१॥ adha tviṣīmām̐ abhyojasā kriviṃ yudhābhavadā rodasī apṛṇadasya majmanā pra vāvṛdhe । adhattānyaṃ jaṭhare premaricyata sainaṃ saścaddevo devaṃ satyamindraṃ satya induḥ ॥२॥ sākaṃ jātaḥ kratunā sākamojasā vavakṣitha sākaṃ vṛddho vīryaiḥ sāsahirmṛdho vicarṣaṇiḥ । dātā rādhaḥ stuvate kāmyaṃ vasu sainaṃ saścaddevo devaṃ satyamindraṃ satya induḥ ॥३॥ tava tyannaryaṃ nṛto'pa indra prathamaṃ pūrvyaṃ divi pravācyaṃ kṛtam । yaddevasya śavasā prāriṇā asuṃ riṇannapaḥ । bhuvadviśvamabhyādevamojasā vidādūrjaṃ śatakraturvidādiṣam ॥४॥

“Hymn to Indra, who at the Trikadrukas drank the Soma with Viṣṇu — 4 verses. (after R.T.H. Griffith)”

gaṇānāṃ tvā gaṇapatiṃ havāmahe kaviṃ kavīnāmupamaśravastamam । jyeṣṭharājaṃ brahmaṇāṃ brahmaṇaspata ā naḥ śṛṇvannūtibhiḥ sīda sādanam ॥१॥ devāścitte asurya pracetaso bṛhaspate yajñiyaṃ bhāgamānaśuḥ । usrā iva sūryo jyotiṣā maho viśveṣāmijjanitā brahmaṇāmasi ॥२॥ ā vibādhyā parirāpastamāṃsi ca jyotiṣmantaṃ rathamṛtasya tiṣṭhasi । bṛhaspate bhīmamamitradambhanaṃ rakṣohaṇaṃ gotrabhidaṃ svarvidam ॥३॥ sunītibhirnayasi trāyase janaṃ yastubhyaṃ dāśānna tamaṃho aśnavat । brahmadviṣastapano manyumīrasi bṛhaspate mahi tatte mahitvanam ॥४॥ na tamaṃho na duritaṃ kutaścana nārātayastitirurna dvayāvinaḥ । viśvā idasmāddhvaraso vi bādhase yaṃ sugopā rakṣasi brahmaṇaspate ॥५॥ tvaṃ no gopāḥ pathikṛdvicakṣaṇastava vratāya matibhirjarāmahe । bṛhaspate yo no abhi hvaro dadhe svā taṃ marmartu ducchunā harasvatī ॥६॥ uta vā yo no marcayādanāgaso'rātīvā martaḥ sānuko vṛkaḥ । bṛhaspate apa taṃ vartayā pathaḥ sugaṃ no asyai devavītaye kṛdhi ॥७॥ trātāraṃ tvā tanūnāṃ havāmahe'vaspartaradhivaktāramasmayum । bṛhaspate devanido ni barhaya mā durevā uttaraṃ sumnamunnaśan ॥८॥ tvayā vayaṃ suvṛdhā brahmaṇaspate spārhā vasu manuṣyā dadīmahi । yā no dūre taḷito yā arātayo'bhi santi jambhayā tā anapnasaḥ ॥९॥ tvayā vayamuttamaṃ dhīmahe vayo bṛhaspate papriṇā sasninā yujā । mā no duḥśaṃso abhidipsurīśata pra suśaṃsā matibhistāriṣīmahi ॥१०॥ anānudo vṛṣabho jagmirāhavaṃ niṣṭaptā śatruṃ pṛtanāsu sāsahiḥ । asi satya ṛṇayā brahmaṇaspata ugrasya ciddamitā vīḷuharṣiṇaḥ ॥११॥ adevena manasā yo riṣaṇyati śāsāmugro manyamāno jighāṃsati । bṛhaspate mā praṇaktasya no vadho ni karma manyuṃ durevasya śardhataḥ ॥१२॥ bhareṣu havyo namasopasadyo gantā vājeṣu sanitā dhanaṃdhanam । viśvā idaryo abhidipsvo mṛdho bṛhaspatirvi vavarhā rathām̐ iva ॥१३॥ tejiṣṭhayā tapanī rakṣasastapa ye tvā nide dadhire dṛṣṭavīryam । āvistatkṛṣva yadasatta ukthyaṃ bṛhaspate vi parirāpo ardaya ॥१४॥ bṛhaspate ati yadaryo arhāddyumadvibhāti kratumajjaneṣu । yaddīdayacchavasa ṛtaprajāta tadasmāsu draviṇaṃ dhehi citram ॥१५॥ mā na stenebhyo ye abhi druhaspade nirāmiṇo ripavo'nneṣu jāgṛdhuḥ । ā devānāmohate vi vrayo hṛdi bṛhaspate na paraḥ sāmno viduḥ ॥१६॥ viśvebhyo hi tvā bhuvanebhyaspari tvaṣṭājanatsāmnaḥsāmnaḥ kaviḥ । sa ṛṇacidṛṇayā brahmaṇaspatirdruho hantā maha ṛtasya dhartari ॥१७॥ tava śriye vyajihīta parvato gavāṃ gotramudasṛjo yadaṅgiraḥ । indreṇa yujā tamasā parīvṛtaṃ bṛhaspate nirapāmaubjo arṇavam ॥१८॥ brahmaṇaspate tvamasya yantā sūktasya bodhi tanayaṃ ca jinva । viśvaṃ tadbhadraṃ yadavanti devā bṛhadvadema vidathe suvīrāḥ ॥१९॥

“Hymn to Bṛhaspati, lord and leader of the heavenly hosts, king supreme of prayers — 19 verses. (after R.T.H. Griffith)”

semāmaviḍḍhi prabhṛtiṃ ya īśiṣe'yā vidhema navayā mahā girā । yathā no mīḍhvānstavate sakhā tava bṛhaspate sīṣadhaḥ sota no matim ॥१॥ yo nantvānyanamannyojasotādardarmanyunā śambarāṇi vi । prācyāvayadacyutā brahmaṇaspatirā cāviśadvasumantaṃ vi parvatam ॥२॥ taddevānāṃ devatamāya kartvamaśrathnandṛḷhāvradanta vīḷitā । udgā ājadabhinadbrahmaṇā valamagūhattamo vyacakṣayatsvaḥ ॥३॥ aśmāsyamavataṃ brahmaṇaspatirmadhudhāramabhi yamojasātṛṇat । tameva viśve papire svardṛśo bahu sākaṃ sisicurutsamudriṇam ॥४॥ sanā tā kā cidbhuvanā bhavītvā mādbhiḥ śaradbhirduro varanta vaḥ । ayatantā carato anyadanyadidyā cakāra vayunā brahmaṇaspatiḥ ॥५॥ abhinakṣanto abhi ye tamānaśurnidhiṃ paṇīnāṃ paramaṃ guhā hitam । te vidvāṃsaḥ praticakṣyānṛtā punaryata u āyantadudīyurāviśam ॥६॥ ṛtāvānaḥ praticakṣyānṛtā punarāta ā tasthuḥ kavayo mahaspathaḥ । te bāhubhyāṃ dhamitamagnimaśmani nakiḥ ṣo astyaraṇo jahurhi tam ॥७॥ ṛtajyena kṣipreṇa brahmaṇaspatiryatra vaṣṭi pra tadaśnoti dhanvanā । tasya sādhvīriṣavo yābhirasyati nṛcakṣaso dṛśaye karṇayonayaḥ ॥८॥ sa saṃnayaḥ sa vinayaḥ purohitaḥ sa suṣṭutaḥ sa yudhi brahmaṇaspatiḥ । cākṣmo yadvājaṃ bharate matī dhanāditsūryastapati tapyaturvṛthā ॥९॥ vibhu prabhu prathamaṃ mehanāvato bṛhaspateḥ suvidatrāṇi rādhyā । imā sātāni venyasya vājino yena janā ubhaye bhuñjate viśaḥ ॥१०॥ yo'vare vṛjane viśvathā vibhurmahāmu raṇvaḥ śavasā vavakṣitha । sa devo devānprati paprathe pṛthu viśvedu tā paribhūrbrahmaṇaspatiḥ ॥११॥ viśvaṃ satyaṃ maghavānā yuvoridāpaścana pra minanti vrataṃ vām । acchendrābrahmaṇaspatī havirno'nnaṃ yujeva vājinā jigātam ॥१२॥ utāśiṣṭhā anu śṛṇvanti vahnayaḥ sabheyo vipro bharate matī dhanā । vīḷudveṣā anu vaśa ṛṇamādadiḥ sa ha vājī samithe brahmaṇaspatiḥ ॥१३॥ brahmaṇaspaterabhavadyathāvaśaṃ satyo manyurmahi karmā kariṣyataḥ । yo gā udājatsa dive vi cābhajanmahīva rītiḥ śavasāsaratpṛthak ॥१४॥ brahmaṇaspate suyamasya viśvahā rāyaḥ syāma rathyo vayasvataḥ । vīreṣu vīrām̐ upa pṛṅdhi nastvaṃ yadīśāno brahmaṇā veṣi me havam ॥१५॥ brahmaṇaspate tvamasya yantā sūktasya bodhi tanayaṃ ca jinva । viśvaṃ tadbhadraṃ yadavanti devā bṛhadvadema vidathe suvīrāḥ ॥१६॥

“Hymn to Brahmanaspati, asked to be pleased with the offering and new song — 16 verses. (after R.T.H. Griffith)”

indhāno agniṃ vanavadvanuṣyataḥ kṛtabrahmā śūśuvadrātahavya it । jātena jātamati sa pra sarsṛte yaṃyaṃ yujaṃ kṛṇute brahmaṇaspatiḥ ॥१॥ vīrebhirvīrānvanavadvanuṣyato gobhī rayiṃ paprathadbodhati tmanā । tokaṃ ca tasya tanayaṃ ca vardhate yaṃyaṃ yujaṃ kṛṇute brahmaṇaspatiḥ ॥२॥ sindhurna kṣodaḥ śimīvām̐ ṛghāyato vṛṣeva vadhrīm̐rabhi vaṣṭyojasā । agneriva prasitirnāha vartave yaṃyaṃ yujaṃ kṛṇute brahmaṇaspatiḥ ॥३॥ tasmā arṣanti divyā asaścataḥ sa satvabhiḥ prathamo goṣu gacchati । anibhṛṣṭataviṣirhantyojasā yaṃyaṃ yujaṃ kṛṇute brahmaṇaspatiḥ ॥४॥ tasmā idviśve dhunayanta sindhavo'cchidrā śarma dadhire purūṇi । devānāṃ sumne subhagaḥ sa edhate yaṃyaṃ yujaṃ kṛṇute brahmaṇaspatiḥ ॥५॥

“Hymn to Brahmanaspati, who lighting the flame shall conquer enemies — 5 verses. (after R.T.H. Griffith)”

ṛjuricchaṃso vanavadvanuṣyato devayannidadevayantamabhyasat । suprāvīridvanavatpṛtsu duṣṭaraṃ yajvedayajyorvi bhajāti bhojanam ॥१॥ yajasva vīra pra vihi manāyato bhadraṃ manaḥ kṛṇuṣva vṛtratūrye । haviṣkṛṇuṣva subhago yathāsasi brahmaṇaspaterava ā vṛṇīmahe ॥२॥ sa ijjanena sa viśā sa janmanā sa putrairvājaṃ bharate dhanā nṛbhiḥ । devānāṃ yaḥ pitaramāvivāsati śraddhāmanā haviṣā brahmaṇaspatim ॥३॥ yo asmai havyairghṛtavadbhiravidhatpra taṃ prācā nayati brahmaṇaspatiḥ । uruṣyatīmaṃhaso rakṣatī riṣo'ṃhościdasmā urucakriradbhutaḥ ॥४॥

“Hymn to Brahmanaspati, by whom the righteous singer overcomes his enemies — 4 verses. (after R.T.H. Griffith)”

imā gira ādityebhyo ghṛtasnūḥ sanādrājabhyo juhvā juhomi । śṛṇotu mitro aryamā bhago nastuvijāto varuṇo dakṣo aṃśaḥ ॥१॥ imaṃ stomaṃ sakratavo me adya mitro aryamā varuṇo juṣanta । ādityāsaḥ śucayo dhārapūtā avṛjinā anavadyā ariṣṭāḥ ॥२॥ ta ādityāsa uravo gabhīrā adabdhāso dipsanto bhūryakṣāḥ । antaḥ paśyanti vṛjinota sādhu sarvaṃ rājabhyaḥ paramā cidanti ॥३॥ dhārayanta ādityāso jagatsthā devā viśvasya bhuvanasya gopāḥ । dīrghādhiyo rakṣamāṇā asuryamṛtāvānaścayamānā ṛṇāni ॥४॥ vidyāmādityā avaso vo asya yadaryamanbhaya ā cinmayobhu । yuṣmākaṃ mitrāvaruṇā praṇītau pari śvabhreva duritāni vṛjyām ॥५॥ sugo hi vo aryamanmitra panthā anṛkṣaro varuṇa sādhurasti । tenādityā adhi vocatā no yacchatā no duṣparihantu śarma ॥६॥ pipartu no aditī rājaputrāti dveṣāṃsyaryamā sugebhiḥ । bṛhanmitrasya varuṇasya śarmopa syāma puruvīrā ariṣṭāḥ ॥७॥ tisro bhūmīrdhārayantrīm̐ruta dyūntrīṇi vratā vidathe antareṣām । ṛtenādityā mahi vo mahitvaṃ tadaryamanvaruṇa mitra cāru ॥८॥ trī rocanā divyā dhārayanta hiraṇyayāḥ śucayo dhārapūtāḥ । asvapnajo animiṣā adabdhā uruśaṃsā ṛjave martyāya ॥९॥ tvaṃ viśveṣāṃ varuṇāsi rājā ye ca devā asura ye ca martāḥ । śataṃ no rāsva śarado vicakṣe'śyāmāyūṃṣi sudhitāni pūrvā ॥१०॥ na dakṣiṇā vi cikite na savyā na prācīnamādityā nota paścā । pākyā cidvasavo dhīryā cidyuṣmānīto abhayaṃ jyotiraśyām ॥११॥ yo rājabhya ṛtanibhyo dadāśa yaṃ vardhayanti puṣṭayaśca nityāḥ । sa revānyāti prathamo rathena vasudāvā vidatheṣu praśastaḥ ॥१२॥ śucirapaḥ sūyavasā adabdha upa kṣeti vṛddhavayāḥ suvīraḥ । nakiṣṭaṃ ghnantyantito na dūrādya ādityānāṃ bhavati praṇītau ॥१३॥ adite mitra varuṇota mṛḷa yadvo vayaṃ cakṛmā kaccidāgaḥ । urvaśyāmabhayaṃ jyotirindra mā no dīrghā abhi naśantamisrāḥ ॥१४॥ ubhe asmai pīpayataḥ samīcī divo vṛṣṭiṃ subhago nāma puṣyan । ubhā kṣayāvājayanyāti pṛtsūbhāvardhau bhavataḥ sādhū asmai ॥१५॥ yā vo māyā abhidruhe yajatrāḥ pāśā ādityā ripave vicṛttāḥ । aśvīva tām̐ ati yeṣaṃ rathenāriṣṭā urāvā śarmansyāma ॥१६॥ māhaṃ maghono varuṇa priyasya bhūridāvna ā vidaṃ śūnamāpeḥ । mā rāyo rājansuyamādava sthāṃ bṛhadvadema vidathe suvīrāḥ ॥१७॥

“Hymn to the Ādityas — Mitra, Aryaman, Bhaga and others — offered fatness with the ladle — 17 verses. (after R.T.H. Griffith)”

idaṃ kaverādityasya svarājo viśvāni sāntyabhyastu mahnā । ati yo mandro yajathāya devaḥ sukīrtiṃ bhikṣe varuṇasya bhūreḥ ॥१॥ tava vrate subhagāsaḥ syāma svādhyo varuṇa tuṣṭuvāṃsaḥ । upāyana uṣasāṃ gomatīnāmagnayo na jaramāṇā anu dyūn ॥२॥ tava syāma puruvīrasya śarmannuruśaṃsasya varuṇa praṇetaḥ । yūyaṃ naḥ putrā aditeradabdhā abhi kṣamadhvaṃ yujyāya devāḥ ॥३॥ pra sīmādityo asṛjadvidhartām̐ ṛtaṃ sindhavo varuṇasya yanti । na śrāmyanti na vi mucantyete vayo na paptū raghuyā parijman ॥४॥ vi macchrathāya raśanāmivāga ṛdhyāma te varuṇa khāmṛtasya । mā tantuśchedi vayato dhiyaṃ me mā mātrā śāryapasaḥ pura ṛtoḥ ॥५॥ apo su myakṣa varuṇa bhiyasaṃ matsamrāḷṛtāvo'nu mā gṛbhāya । dāmeva vatsādvi mumugdhyaṃho nahi tvadāre nimiṣaścaneśe ॥६॥ mā no vadhairvaruṇa ye ta iṣṭāvenaḥ kṛṇvantamasura bhrīṇanti । mā jyotiṣaḥ pravasathāni ganma vi ṣū mṛdhaḥ śiśratho jīvase naḥ ॥७॥ namaḥ purā te varuṇota nūnamutāparaṃ tuvijāta bravāma । tve hi kaṃ parvate na śritānyapracyutāni dūḷabha vratāni ॥८॥ para ṛṇā sāvīradha matkṛtāni māhaṃ rājannanyakṛtena bhojam । avyuṣṭā innu bhūyasīruṣāsa ā no jīvānvaruṇa tāsu śādhi ॥९॥ yo me rājanyujyo vā sakhā vā svapne bhayaṃ bhīrave mahyamāha । steno vā yo dipsati no vṛko vā tvaṃ tasmādvaruṇa pāhyasmān ॥१०॥ māhaṃ maghono varuṇa priyasya bhūridāvna ā vidaṃ śūnamāpeḥ । mā rāyo rājansuyamādava sthāṃ bṛhadvadema vidathe suvīrāḥ ॥११॥

“Hymn to Varuṇa, the self-radiant wise Āditya, asked for renown — 11 verses. (after R.T.H. Griffith)”

dhṛtavratā ādityā iṣirā āre matkarta rahasūrivāgaḥ । śṛṇvato vo varuṇa mitra devā bhadrasya vidvām̐ avase huve vaḥ ॥१॥ yūyaṃ devāḥ pramatiryūyamojo yūyaṃ dveṣāṃsi sanutaryuyota । abhikṣattāro abhi ca kṣamadhvamadyā ca no mṛḷayatāparaṃ ca ॥२॥ kimū nu vaḥ kṛṇavāmāpareṇa kiṃ sanena vasava āpyena । yūyaṃ no mitrāvaruṇādite ca svastimindrāmaruto dadhāta ॥३॥ haye devā yūyamidāpaya stha te mṛḷata nādhamānāya mahyam । mā vo ratho madhyamavāḷṛte bhūnmā yuṣmāvatsvāpiṣu śramiṣma ॥४॥ pra va eko mimaya bhūryāgo yanmā piteva kitavaṃ śaśāsa । āre pāśā āre aghāni devā mā mādhi putre vimiva grabhīṣṭa ॥५॥ arvāñco adyā bhavatā yajatrā ā vo hārdi bhayamāno vyayeyam । trādhvaṃ no devā nijuro vṛkasya trādhvaṃ kartādavapado yajatrāḥ ॥६॥ māhaṃ maghono varuṇa priyasya bhūridāvna ā vidaṃ śūnamāpeḥ । mā rāyo rājansuyamādava sthāṃ bṛhadvadema vidathe suvīrāḥ ॥७॥

“Hymn to the upholders of Law, the strong Ādityas, asked to remove sin — 7 verses. (after R.T.H. Griffith)”