Sanskrit Corpus

ihendrāgnī upa hvaye tayoritstomamuśmasi । tā somaṃ somapātamā ॥१॥ tā yajñeṣu pra śaṃsatendrāgnī śumbhatā naraḥ । tā gāyatreṣu gāyata ॥२॥ tā mitrasya praśastaya indrāgnī tā havāmahe । somapā somapītaye ॥३॥ ugrā santā havāmaha upedaṃ savanaṃ sutam । indrāgnī eha gacchatām ॥४॥ tā mahāntā sadaspatī indrāgnī rakṣa ubjatam । aprajāḥ santvatriṇaḥ ॥५॥ tena satyena jāgṛtamadhi pracetune pade । indrāgnī śarma yacchatam ॥६॥

“Hymn to Indra and Agni, the chief Soma-drinkers, invoked for praise — 6 verses. (after R.T.H. Griffith)”

prātaryujā vi bodhayāśvināveha gacchatām । asya somasya pītaye ॥१॥ yā surathā rathītamobhā devā divispṛśā । aśvinā tā havāmahe ॥२॥ yā vāṃ kaśā madhumatyaśvinā sūnṛtāvatī । tayā yajñaṃ mimikṣatam ॥३॥ nahi vāmasti dūrake yatrā rathena gacchathaḥ । aśvinā somino gṛham ॥४॥ hiraṇyapāṇimūtaye savitāramupa hvaye । sa cettā devatā padam ॥५॥ apāṃ napātamavase savitāramupa stuhi । tasya vratānyuśmasi ॥६॥ vibhaktāraṃ havāmahe vasościtrasya rādhasaḥ । savitāraṃ nṛcakṣasam ॥७॥ sakhāya ā ni ṣīdata savitā stomyo nu naḥ । dātā rādhāṃsi śumbhati ॥८॥ agne patnīrihā vaha devānāmuśatīrupa । tvaṣṭāraṃ somapītaye ॥९॥ ā gnā agna ihāvase hotrāṃ yaviṣṭha bhāratīm । varūtrīṃ dhiṣaṇāṃ vaha ॥१०॥ abhi no devīravasā mahaḥ śarmaṇā nṛpatnīḥ । acchinnapatrāḥ sacantām ॥११॥ ihendrāṇīmupa hvaye varuṇānīṃ svastaye । agnāyīṃ somapītaye ॥१२॥ mahī dyauḥ pṛthivī ca na imaṃ yajñaṃ mimikṣatām । pipṛtāṃ no bharīmabhiḥ ॥१३॥ tayoridghṛtavatpayo viprā rihanti dhītibhiḥ । gandharvasya dhruve pade ॥१४॥ syonā pṛthivi bhavānṛkṣarā niveśanī । yacchā naḥ śarma saprathaḥ ॥१५॥ ato devā avantu no yato viṣṇurvicakrame । pṛthivyāḥ sapta dhāmabhiḥ ॥१६॥ idaṃ viṣṇurvi cakrame tredhā ni dadhe padam । samūḷhamasya pāṃsure ॥१७॥ trīṇi padā vi cakrame viṣṇurgopā adābhyaḥ । ato dharmāṇi dhārayan ॥१८॥ viṣṇoḥ karmāṇi paśyata yato vratāni paspaśe । indrasya yujyaḥ sakhā ॥१९॥ tadviṣṇoḥ paramaṃ padaṃ sadā paśyanti sūrayaḥ । divīva cakṣurātatam ॥२०॥ tadviprāso vipanyavo jāgṛvāṃsaḥ samindhate । viṣṇoryatparamaṃ padam ॥२१॥

“Composite hymn to the Aśvins, Savitṛ, Agni, Viṣṇu and other gods at the Soma rite — 21 verses. (after R.T.H. Griffith)”

tīvrāḥ somāsa ā gahyāśīrvantaḥ sutā ime । vāyo tānprasthitānpiba ॥१॥ ubhā devā divispṛśendravāyū havāmahe । asya somasya pītaye ॥२॥ indravāyū manojuvā viprā havanta ūtaye । sahasrākṣā dhiyaspatī ॥३॥ mitraṃ vayaṃ havāmahe varuṇaṃ somapītaye । jajñānā pūtadakṣasā ॥४॥ ṛtena yāvṛtāvṛdhāvṛtasya jyotiṣaspatī । tā mitrāvaruṇā huve ॥५॥ varuṇaḥ prāvitā bhuvanmitro viśvābhirūtibhiḥ । karatāṃ naḥ surādhasaḥ ॥६॥ marutvantaṃ havāmaha indramā somapītaye । sajūrgaṇena tṛmpatu ॥७॥ indrajyeṣṭhā marudgaṇā devāsaḥ pūṣarātayaḥ । viśve mama śrutā havam ॥८॥ hata vṛtraṃ sudānava indreṇa sahasā yujā । mā no duḥśaṃsa īśata ॥९॥ viśvāndevānhavāmahe marutaḥ somapītaye । ugrā hi pṛśnimātaraḥ ॥१०॥ jayatāmiva tanyaturmarutāmeti dhṛṣṇuyā । yacchubhaṃ yāthanā naraḥ ॥११॥ haskārādvidyutasparyato jātā avantu naḥ । maruto mṛḷayantu naḥ ॥१२॥ ā pūṣañcitrabarhiṣamāghṛṇe dharuṇaṃ divaḥ । ājā naṣṭaṃ yathā paśum ॥१३॥ pūṣā rājānamāghṛṇirapagūḷhaṃ guhā hitam । avindaccitrabarhiṣam ॥१४॥ uto sa mahyamindubhiḥ ṣaḍyuktām̐ anuseṣidhat । gobhiryavaṃ na carkṛṣat ॥१५॥ ambayo yantyadhvabhirjāmayo adhvarīyatām । pṛñcatīrmadhunā payaḥ ॥१६॥ amūryā upa sūrye yābhirvā sūryaḥ saha । tā no hinvantvadhvaram ॥१७॥ apo devīrupa hvaye yatra gāvaḥ pibanti naḥ । sindhubhyaḥ kartvaṃ haviḥ ॥१८॥ apsvantaramṛtamapsu bheṣajamapāmuta praśastaye । devā bhavata vājinaḥ ॥१९॥ apsu me somo abravīdantarviśvāni bheṣajā । agniṃ ca viśvaśambhuvamāpaśca viśvabheṣajīḥ ॥२०॥ āpaḥ pṛṇīta bheṣajaṃ varūthaṃ tanve mama । jyokca sūryaṃ dṛśe ॥२१॥ idamāpaḥ pra vahata yatkiṃ ca duritaṃ mayi । yadvāhamabhidudroha yadvā śepa utānṛtam ॥२२॥ āpo adyānvacāriṣaṃ rasena samagasmahi । payasvānagna ā gahi taṃ mā saṃ sṛja varcasā ॥२३॥ saṃ māgne varcasā sṛja saṃ prajayā samāyuṣā । vidyurme asya devā indro vidyātsaha ṛṣibhiḥ ॥२४॥

“Hymn to Vāyu, Indra-Vāyu, Mitra-Varuṇa, Pūṣan, the Waters and Agni, invited to the Soma — 24 verses. (after R.T.H. Griffith)”

kasya nūnaṃ katamasyāmṛtānāṃ manāmahe cāru devasya nāma । ko no mahyā aditaye punardātpitaraṃ ca dṛśeyaṃ mātaraṃ ca ॥१॥ agnervayaṃ prathamasyāmṛtānāṃ manāmahe cāru devasya nāma । sa no mahyā aditaye punardātpitaraṃ ca dṛśeyaṃ mātaraṃ ca ॥२॥ abhi tvā deva savitarīśānaṃ vāryāṇām । sadāvanbhāgamīmahe ॥३॥ yaściddhi ta itthā bhagaḥ śaśamānaḥ purā nidaḥ । adveṣo hastayordadhe ॥४॥ bhagabhaktasya te vayamudaśema tavāvasā । mūrdhānaṃ rāya ārabhe ॥५॥ nahi te kṣatraṃ na saho na manyuṃ vayaścanāmī patayanta āpuḥ । nemā āpo animiṣaṃ carantīrna ye vātasya praminantyabhvam ॥६॥ abudhne rājā varuṇo vanasyordhvaṃ stūpaṃ dadate pūtadakṣaḥ । nīcīnā sthurupari budhna eṣāmasme antarnihitāḥ ketavaḥ syuḥ ॥७॥ uruṃ hi rājā varuṇaścakāra sūryāya panthāmanvetavā u । apade pādā pratidhātave'karutāpavaktā hṛdayāvidhaścit ॥८॥ śataṃ te rājanbhiṣajaḥ sahasramurvī gabhīrā sumatiṣṭe astu । bādhasva dūre nirṛtiṃ parācaiḥ kṛtaṃ cidenaḥ pra mumugdhyasmat ॥९॥ amī ya ṛkṣā nihitāsa uccā naktaṃ dadṛśre kuha ciddiveyuḥ । adabdhāni varuṇasya vratāni vicākaśaccandramā naktameti ॥१०॥ tattvā yāmi brahmaṇā vandamānastadā śāste yajamāno havirbhiḥ । aheḷamāno varuṇeha bodhyuruśaṃsa mā na āyuḥ pra moṣīḥ ॥११॥ tadinnaktaṃ taddivā mahyamāhustadayaṃ keto hṛda ā vi caṣṭe । śunaḥśepo yamahvadgṛbhītaḥ so asmānrājā varuṇo mumoktu ॥१२॥ śunaḥśepo hyahvadgṛbhītastriṣvādityaṃ drupadeṣu baddhaḥ । avainaṃ rājā varuṇaḥ sasṛjyādvidvām̐ adabdho vi mumoktu pāśān ॥१३॥ ava te heḷo varuṇa namobhirava yajñebhirīmahe havirbhiḥ । kṣayannasmabhyamasura pracetā rājannenāṃsi śiśrathaḥ kṛtāni ॥१४॥ uduttamaṃ varuṇa pāśamasmadavādhamaṃ vi madhyamaṃ śrathāya । athā vayamāditya vrate tavānāgaso aditaye syāma ॥१५॥

“Hymn to Prajāpati, Agni, Savitṛ and Varuṇa, asking who shall restore us to Aditi — 15 verses. (after R.T.H. Griffith)”

yacciddhi te viśo yathā pra deva varuṇa vratam । minīmasi dyavidyavi ॥१॥ mā no vadhāya hatnave jihīḷānasya rīradhaḥ । mā hṛṇānasya manyave ॥२॥ vi mṛḷīkāya te mano rathīraśvaṃ na saṃditam । gīrbhirvaruṇa sīmahi ॥३॥ parā hi me vimanyavaḥ patanti vasyaiṣṭaye । vayo na vasatīrupa ॥४॥ kadā kṣatraśriyaṃ naramā varuṇaṃ karāmahe । mṛḷīkāyorucakṣasam ॥५॥ taditsamānamāśāte venantā na pra yucchataḥ । dhṛtavratāya dāśuṣe ॥६॥ vedā yo vīnāṃ padamantarikṣeṇa patatām । veda nāvaḥ samudriyaḥ ॥७॥ veda māso dhṛtavrato dvādaśa prajāvataḥ । vedā ya upajāyate ॥८॥ veda vātasya vartanimurorṛṣvasya bṛhataḥ । vedā ye adhyāsate ॥९॥ ni ṣasāda dhṛtavrato varuṇaḥ pastyāsvā । sāmrājyāya sukratuḥ ॥१०॥ ato viśvānyadbhutā cikitvām̐ abhi paśyati । kṛtāni yā ca kartvā ॥११॥ sa no viśvāhā sukraturādityaḥ supathā karat । pra ṇa āyūṃṣi tāriṣat ॥१२॥ bibhraddrāpiṃ hiraṇyayaṃ varuṇo vasta nirṇijam । pari spaśo ni ṣedire ॥१३॥ na yaṃ dipsanti dipsavo na druhvāṇo janānām । na devamabhimātayaḥ ॥१४॥ uta yo mānuṣeṣvā yaśaścakre asāmyā । asmākamudareṣvā ॥१५॥ parā me yanti dhītayo gāvo na gavyūtīranu । icchantīrurucakṣasam ॥१६॥ saṃ nu vocāvahai punaryato me madhvābhṛtam । hoteva kṣadase priyam ॥१७॥ darśaṃ nu viśvadarśataṃ darśaṃ rathamadhi kṣami । etā juṣata me giraḥ ॥१८॥ imaṃ me varuṇa śrudhī havamadyā ca mṛḷaya । tvāmavasyurā cake ॥१९॥ tvaṃ viśvasya medhira divaśca gmaśca rājasi । sa yāmani prati śrudhi ॥२०॥ uduttamaṃ mumugdhi no vi pāśaṃ madhyamaṃ cṛta । avādhamāni jīvase ॥२१॥

“Hymn to Varuṇa, confessing the daily violation of his law and seeking forgiveness — 21 verses. (after R.T.H. Griffith)”

vasiṣvā hi miyedhya vastrāṇyūrjāṃ pate । semaṃ no adhvaraṃ yaja ॥१॥ ni no hotā vareṇyaḥ sadā yaviṣṭha manmabhiḥ । agne divitmatā vacaḥ ॥२॥ ā hi ṣmā sūnave pitāpiryajatyāpaye । sakhā sakhye vareṇyaḥ ॥३॥ ā no barhī riśādaso varuṇo mitro aryamā । sīdantu manuṣo yathā ॥४॥ pūrvya hotarasya no mandasva sakhyasya ca । imā u ṣu śrudhī giraḥ ॥५॥ yacciddhi śaśvatā tanā devaṃdevaṃ yajāmahe । tve iddhūyate haviḥ ॥६॥ priyo no astu viśpatirhotā mandro vareṇyaḥ । priyāḥ svagnayo vayam ॥७॥ svagnayo hi vāryaṃ devāso dadhire ca naḥ । svagnayo manāmahe ॥८॥ athā na ubhayeṣāmamṛta martyānām । mithaḥ santu praśastayaḥ ॥९॥ viśvebhiragne agnibhirimaṃ yajñamidaṃ vacaḥ । cano dhāḥ sahaso yaho ॥१०॥

“Hymn to Agni, lord of prospering powers, asked to present the sacrifice — 10 verses. (after R.T.H. Griffith)”

aśvaṃ na tvā vāravantaṃ vandadhyā agniṃ namobhiḥ । samrājantamadhvarāṇām ॥१॥ sa ghā naḥ sūnuḥ śavasā pṛthupragāmā suśevaḥ । mīḍhvām̐ asmākaṃ babhūyāt ॥२॥ sa no dūrāccāsācca ni martyādaghāyoḥ । pāhi sadamidviśvāyuḥ ॥३॥ imamū ṣu tvamasmākaṃ saniṃ gāyatraṃ navyāṃsam । agne deveṣu pra vocaḥ ॥४॥ ā no bhaja parameṣvā vājeṣu madhyameṣu । śikṣā vasvo antamasya ॥५॥ vibhaktāsi citrabhāno sindhorūrmā upāka ā । sadyo dāśuṣe kṣarasi ॥६॥ yamagne pṛtsu martyamavā vājeṣu yaṃ junāḥ । sa yantā śaśvatīriṣaḥ ॥७॥ nakirasya sahantya paryetā kayasya cit । vājo asti śravāyyaḥ ॥८॥ sa vājaṃ viśvacarṣaṇirarvadbhirastu tarutā । viprebhirastu sanitā ॥९॥ jarābodha tadviviḍḍhi viśeviśe yajñiyāya । stomaṃ rudrāya dṛśīkam ॥१०॥ sa no mahām̐ animāno dhūmaketuḥ puruścandraḥ । dhiye vājāya hinvatu ॥११॥ sa revām̐ iva viśpatirdaivyaḥ ketuḥ śṛṇotu naḥ । ukthairagnirbṛhadbhānuḥ ॥१२॥ namo mahadbhyo namo arbhakebhyo namo yuvabhyo nama āśinebhyaḥ । yajāma devānyadi śaknavāma mā jyāyasaḥ śaṃsamā vṛkṣi devāḥ ॥१३॥

“Hymn to Agni, imperial lord of sacred rites, glorified with worship — 13 verses. (after R.T.H. Griffith)”

yatra grāvā pṛthubudhna ūrdhvo bhavati sotave । ulūkhalasutānāmavedvindra jalgulaḥ ॥१॥ yatra dvāviva jaghanādhiṣavaṇyā kṛtā । ulūkhalasutānāmavedvindra jalgulaḥ ॥२॥ yatra nāryapacyavamupacyavaṃ ca śikṣate । ulūkhalasutānāmavedvindra jalgulaḥ ॥३॥ yatra manthāṃ vibadhnate raśmīnyamitavā iva । ulūkhalasutānāmavedvindra jalgulaḥ ॥४॥ yacciddhi tvaṃ gṛhegṛha ulūkhalaka yujyase । iha dyumattamaṃ vada jayatāmiva dundubhiḥ ॥५॥ uta sma te vanaspate vāto vi vātyagramit । atho indrāya pātave sunu somamulūkhala ॥६॥ āyajī vājasātamā tā hyuccā vijarbhṛtaḥ । harī ivāndhāṃsi bapsatā ॥७॥ tā no adya vanaspatī ṛṣvāvṛṣvebhiḥ sotṛbhiḥ । indrāya madhumatsutam ॥८॥ ucchiṣṭaṃ camvorbhara somaṃ pavitra ā sṛja । ni dhehi goradhi tvaci ॥९॥

“Hymn to Indra with the pressing-stones and mortar, drinking the Soma draught — 9 verses. (after R.T.H. Griffith)”

yacciddhi satya somapā anāśastā iva smasi । ā tū na indra śaṃsaya goṣvaśveṣu śubhriṣu sahasreṣu tuvīmagha ॥१॥ śiprinvājānāṃ pate śacīvastava daṃsanā । ā tū na indra śaṃsaya goṣvaśveṣu śubhriṣu sahasreṣu tuvīmagha ॥२॥ ni ṣvāpayā mithūdṛśā sastāmabudhyamāne । ā tū na indra śaṃsaya goṣvaśveṣu śubhriṣu sahasreṣu tuvīmagha ॥३॥ sasantu tyā arātayo bodhantu śūra rātayaḥ । ā tū na indra śaṃsaya goṣvaśveṣu śubhriṣu sahasreṣu tuvīmagha ॥४॥ samindra gardabhaṃ mṛṇa nuvantaṃ pāpayāmuyā । ā tū na indra śaṃsaya goṣvaśveṣu śubhriṣu sahasreṣu tuvīmagha ॥५॥ patāti kuṇḍṛṇācyā dūraṃ vāto vanādadhi । ā tū na indra śaṃsaya goṣvaśveṣu śubhriṣu sahasreṣu tuvīmagha ॥६॥ sarvaṃ parikrośaṃ jahi jambhayā kṛkadāśvam । ā tū na indra śaṃsaya goṣvaśveṣu śubhriṣu sahasreṣu tuvīmagha ॥७॥

“Hymn to Indra, the Soma-drinker, asked to give hope of horses and kine — 7 verses. (after R.T.H. Griffith)”

ā va indraṃ kriviṃ yathā vājayantaḥ śatakratum । maṃhiṣṭhaṃ siñca indubhiḥ ॥१॥ śataṃ vā yaḥ śucīnāṃ sahasraṃ vā samāśirām । edu nimnaṃ na rīyate ॥२॥ saṃ yanmadāya śuṣmiṇa enā hyasyodare । samudro na vyaco dadhe ॥३॥ ayamu te samatasi kapota iva garbhadhim । vacastaccinna ohase ॥४॥ stotraṃ rādhānāṃ pate girvāho vīra yasya te । vibhūtirastu sūnṛtā ॥५॥ ūrdhvastiṣṭhā na ūtaye'sminvāje śatakrato । samanyeṣu bravāvahai ॥६॥ yogeyoge tavastaraṃ vājevāje havāmahe । sakhāya indramūtaye ॥७॥ ā ghā gamadyadi śravatsahasriṇībhirūtibhiḥ । vājebhirupa no havam ॥८॥ anu pratnasyaukaso huve tuvipratiṃ naram । yaṃ te pūrvaṃ pitā huve ॥९॥ taṃ tvā vayaṃ viśvavārā śāsmahe puruhūta । sakhe vaso jaritṛbhyaḥ ॥१०॥ asmākaṃ śipriṇīnāṃ somapāḥ somapāvnām । sakhe vajrinsakhīnām ॥११॥ tathā tadastu somapāḥ sakhe vajrintathā kṛṇu । yathā ta uśmasīṣṭaye ॥१२॥ revatīrnaḥ sadhamāda indre santu tuvivājāḥ । kṣumanto yābhirmadema ॥१३॥ ā gha tvāvāntmanāpta stotṛbhyo dhṛṣṇaviyānaḥ । ṛṇorakṣaṃ na cakryoḥ ॥१४॥ ā yadduvaḥ śatakratavā kāmaṃ jaritṝṇām । ṛṇorakṣaṃ na śacībhiḥ ॥१५॥ śaśvadindraḥ popruthadbhirjigāya nānadadbhiḥ śāśvasadbhirdhanāni । sa no hiraṇyarathaṃ daṃsanāvānsa naḥ sanitā sanaye sa no'dāt ॥१६॥ āśvināvaśvāvatyeṣā yātaṃ śavīrayā । gomaddasrā hiraṇyavat ॥१७॥ samānayojano hi vāṃ ratho dasrāvamartyaḥ । samudre aśvineyate ॥१८॥ nyaghnyasya mūrdhani cakraṃ rathasya yemathuḥ । pari dyāmanyadīyate ॥१९॥ kasta uṣaḥ kadhapriye bhuje marto amartye । kaṃ nakṣase vibhāvari ॥२०॥ vayaṃ hi te amanmahyāntādā parākāt । aśve na citre aruṣi ॥२१॥ tvaṃ tyebhirā gahi vājebhirduhitardivaḥ । asme rayiṃ ni dhāraya ॥२२॥

“Hymn to Indra, the Aśvins and Uṣas, seeking strength through the Soma-drops — 22 verses. (after R.T.H. Griffith)”

tvamagne prathamo aṅgirā ṛṣirdevo devānāmabhavaḥ śivaḥ sakhā । tava vrate kavayo vidmanāpaso'jāyanta maruto bhrājadṛṣṭayaḥ ॥१॥ tvamagne prathamo aṅgirastamaḥ kavirdevānāṃ pari bhūṣasi vratam । vibhurviśvasmai bhuvanāya medhiro dvimātā śayuḥ katidhā cidāyave ॥२॥ tvamagne prathamo mātariśvana āvirbhava sukratūyā vivasvate । arejetāṃ rodasī hotṛvūrye'saghnorbhāramayajo maho vaso ॥३॥ tvamagne manave dyāmavāśayaḥ purūravase sukṛte sukṛttaraḥ । śvātreṇa yatpitrormucyase paryā tvā pūrvamanayannāparaṃ punaḥ ॥४॥ tvamagne vṛṣabhaḥ puṣṭivardhana udyatasruce bhavasi śravāyyaḥ । ya āhutiṃ pari vedā vaṣaṭkṛtimekāyuragre viśa āvivāsasi ॥५॥ tvamagne vṛjinavartaniṃ naraṃ sakmanpiparṣi vidathe vicarṣaṇe । yaḥ śūrasātā paritakmye dhane dabhrebhiścitsamṛtā haṃsi bhūyasaḥ ॥६॥ tvaṃ tamagne amṛtatva uttame martaṃ dadhāsi śravase divedive । yastātṛṣāṇa ubhayāya janmane mayaḥ kṛṇoṣi praya ā ca sūraye ॥७॥ tvaṃ no agne sanaye dhanānāṃ yaśasaṃ kāruṃ kṛṇuhi stavānaḥ । ṛdhyāma karmāpasā navena devairdyāvāpṛthivī prāvataṃ naḥ ॥८॥ tvaṃ no agne pitrorupastha ā devo deveṣvanavadya jāgṛviḥ । tanūkṛdbodhi pramatiśca kārave tvaṃ kalyāṇa vasu viśvamopiṣe ॥९॥ tvamagne pramatistvaṃ pitāsi nastvaṃ vayaskṛttava jāmayo vayam । saṃ tvā rāyaḥ śatinaḥ saṃ sahasriṇaḥ suvīraṃ yanti vratapāmadābhya ॥१०॥ tvāmagne prathamamāyumāyave devā akṛṇvannahuṣasya viśpatim । iḷāmakṛṇvanmanuṣasya śāsanīṃ pituryatputro mamakasya jāyate ॥११॥ tvaṃ no agne tava deva pāyubhirmaghono rakṣa tanvaśca vandya । trātā tokasya tanaye gavāmasyanimeṣaṃ rakṣamāṇastava vrate ॥१२॥ tvamagne yajyave pāyurantaro'niṣaṅgāya caturakṣa idhyase । yo rātahavyo'vṛkāya dhāyase kīreścinmantraṃ manasā vanoṣi tam ॥१३॥ tvamagna uruśaṃsāya vāghate spārhaṃ yadrekṇaḥ paramaṃ vanoṣi tat । ādhrasya citpramatirucyase pitā pra pākaṃ śāssi pra diśo viduṣṭaraḥ ॥१४॥ tvamagne prayatadakṣiṇaṃ naraṃ varmeva syūtaṃ pari pāsi viśvataḥ । svādukṣadmā yo vasatau syonakṛjjīvayājaṃ yajate sopamā divaḥ ॥१५॥ imāmagne śaraṇiṃ mīmṛṣo na imamadhvānaṃ yamagāma dūrāt । āpiḥ pitā pramatiḥ somyānāṃ bhṛmirasyṛṣikṛnmartyānām ॥१६॥ manuṣvadagne aṅgirasvadaṅgiro yayātivatsadane pūrvavacchuce । accha yāhyā vahā daivyaṃ janamā sādaya barhiṣi yakṣi ca priyam ॥१७॥ etenāgne brahmaṇā vāvṛdhasva śaktī vā yatte cakṛmā vidā vā । uta pra ṇeṣyabhi vasyo asmānsaṃ naḥ sṛja sumatyā vājavatyā ॥१८॥

“Hymn to Agni, the earliest Aṅgiras and seer, whose ordinance the Maruts follow — 18 verses. (after R.T.H. Griffith)”

indrasya nu vīryāṇi pra vocaṃ yāni cakāra prathamāni vajrī । ahannahimanvapastatarda pra vakṣaṇā abhinatparvatānām ॥१॥ ahannahiṃ parvate śiśriyāṇaṃ tvaṣṭāsmai vajraṃ svaryaṃ tatakṣa । vāśrā iva dhenavaḥ syandamānā añjaḥ samudramava jagmurāpaḥ ॥२॥ vṛṣāyamāṇo'vṛṇīta somaṃ trikadrukeṣvapibatsutasya । ā sāyakaṃ maghavādatta vajramahannenaṃ prathamajāmahīnām ॥३॥ yadindrāhanprathamajāmahīnāmānmāyināmamināḥ prota māyāḥ । ātsūryaṃ janayandyāmuṣāsaṃ tādītnā śatruṃ na kilā vivitse ॥४॥ ahanvṛtraṃ vṛtrataraṃ vyaṃsamindro vajreṇa mahatā vadhena । skandhāṃsīva kuliśenā vivṛkṇāhiḥ śayata upapṛkpṛthivyāḥ ॥५॥ ayoddheva durmada ā hi juhve mahāvīraṃ tuvibādhamṛjīṣam । nātārīdasya samṛtiṃ vadhānāṃ saṃ rujānāḥ pipiṣa indraśatruḥ ॥६॥ apādahasto apṛtanyadindramāsya vajramadhi sānau jaghāna । vṛṣṇo vadhriḥ pratimānaṃ bubhūṣanpurutrā vṛtro aśayadvyastaḥ ॥७॥ nadaṃ na bhinnamamuyā śayānaṃ mano ruhāṇā ati yantyāpaḥ । yāścidvṛtro mahinā paryatiṣṭhattāsāmahiḥ patsutaḥśīrbabhūva ॥८॥ nīcāvayā abhavadvṛtraputrendro asyā ava vadharjabhāra । uttarā sūradharaḥ putra āsīddānuḥ śaye sahavatsā na dhenuḥ ॥९॥ atiṣṭhantīnāmaniveśanānāṃ kāṣṭhānāṃ madhye nihitaṃ śarīram । vṛtrasya niṇyaṃ vi carantyāpo dīrghaṃ tama āśayadindraśatruḥ ॥१०॥ dāsapatnīrahigopā atiṣṭhanniruddhā āpaḥ paṇineva gāvaḥ । apāṃ bilamapihitaṃ yadāsīdvṛtraṃ jaghanvām̐ apa tadvavāra ॥११॥ aśvyo vāro abhavastadindra sṛke yattvā pratyahandeva ekaḥ । ajayo gā ajayaḥ śūra somamavāsṛjaḥ sartave sapta sindhūn ॥१२॥ nāsmai vidyunna tanyatuḥ siṣedha na yāṃ mihamakiraddhrāduniṃ ca । indraśca yadyuyudhāte ahiścotāparībhyo maghavā vi jigye ॥१३॥ aheryātāraṃ kamapaśya indra hṛdi yatte jaghnuṣo bhīragacchat । nava ca yannavatiṃ ca sravantīḥ śyeno na bhīto ataro rajāṃsi ॥१४॥ indro yāto'vasitasya rājā śamasya ca śṛṅgiṇo vajrabāhuḥ । sedu rājā kṣayati carṣaṇīnāmarānna nemiḥ pari tā babhūva ॥१५॥

“Hymn to Indra, celebrating his manly deeds: the slaying of Vṛtra and the release of the waters — 15 verses. (after R.T.H. Griffith)”

etāyāmopa gavyanta indramasmākaṃ su pramatiṃ vāvṛdhāti । anāmṛṇaḥ kuvidādasya rāyo gavāṃ ketaṃ paramāvarjate naḥ ॥१॥ upedahaṃ dhanadāmapratītaṃ juṣṭāṃ na śyeno vasatiṃ patāmi । indraṃ namasyannupamebhirarkairya stotṛbhyo havyo asti yāman ॥२॥ ni sarvasena iṣudhīm̐rasakta samaryo gā ajati yasya vaṣṭi । coṣkūyamāṇa indra bhūri vāmaṃ mā paṇirbhūrasmadadhi pravṛddha ॥३॥ vadhīrhi dasyuṃ dhaninaṃ ghanenam̐ ekaścarannupaśākebhirindra । dhanoradhi viṣuṇakte vyāyannayajvānaḥ sanakāḥ pretimīyuḥ ॥४॥ parā cicchīrṣā vavṛjusta indrāyajvāno yajvabhi spardhamānāḥ । pra yaddivo hariva sthātarugra niravratām̐ adhamo rodasyoḥ ॥५॥ ayuyutsannanavadyasya senāmayātayanta kṣitayo navagvāḥ । vṛṣāyudho na vadhrayo niraṣṭāḥ pravadbhirindrāccitayanta āyan ॥६॥ tvametānrudato jakṣataścāyodhayo rajasa indra pāre । avādaho diva ā dasyumuccā pra sunvata stuvataḥ śaṃsamāvaḥ ॥७॥ cakrāṇāsaḥ parīṇahaṃ pṛthivyā hiraṇyena maṇinā śumbhamānāḥ । na hinvānāsastitirusta indraṃ pari spaśo adadhātsūryeṇa ॥८॥ pari yadindra rodasī ubhe abubhojīrmahinā viśvataḥ sīm । amanyamānām̐ abhi manyamānairnirbrahmabhiradhamo dasyumindra ॥९॥ na ye divaḥ pṛthivyā antamāpurna māyābhirdhanadāṃ paryabhūvan । yujaṃ vajraṃ vṛṣabhaścakra indro nirjyotiṣā tamaso gā adukṣat ॥१०॥ anu svadhāmakṣarannāpo asyāvardhata madhya ā nāvyānām । sadhrīcīnena manasā tamindra ojiṣṭhena hanmanāhannabhi dyūn ॥११॥ nyāvidhyadilībiśasya dṛḷhā vi śṛṅgiṇamabhinacchuṣṇamindraḥ । yāvattaro maghavanyāvadojo vajreṇa śatrumavadhīḥ pṛtanyum ॥१२॥ abhi sidhmo ajigādasya śatrūnvi tigmena vṛṣabheṇā puro'bhet । saṃ vajreṇāsṛjadvṛtramindraḥ pra svāṃ matimatiracchāśadānaḥ ॥१३॥ āvaḥ kutsamindra yasmiñcākanprāvo yudhyantaṃ vṛṣabhaṃ daśadyum । śaphacyuto reṇurnakṣata dyāmucchvaitreyo nṛṣāhyāya tasthau ॥१४॥ āvaḥ śamaṃ vṛṣabhaṃ tugryāsu kṣetrajeṣe maghavañchvitryaṃ gām । jyokcidatra tasthivāṃso akrañchatrūyatāmadharā vedanākaḥ ॥१५॥

“Hymn to Indra, sought for booty and for protection — 15 verses. (after R.T.H. Griffith)”

triścinno adyā bhavataṃ navedasā vibhurvāṃ yāma uta rātiraśvinā । yuvorhi yantraṃ himyeva vāsaso'bhyāyaṃsenyā bhavataṃ manīṣibhiḥ ॥१॥ trayaḥ pavayo madhuvāhane rathe somasya venāmanu viśva idviduḥ । traya skambhāsa skabhitāsa ārabhe trirnaktaṃ yāthastrirvaśvinā divā ॥२॥ samāne ahantriravadyagohanā triradya yajñaṃ madhunā mimikṣatam । trirvājavatīriṣo aśvinā yuvaṃ doṣā asmabhyamuṣasaśca pinvatam ॥३॥ trirvartiryātaṃ triranuvrate jane triḥ suprāvye tredheva śikṣatam । trirnāndyaṃ vahatamaśvinā yuvaṃ triḥ pṛkṣo asme akṣareva pinvatam ॥४॥ trirno rayiṃ vahatamaśvinā yuvaṃ trirdevatātā trirutāvataṃ dhiyaḥ । triḥ saubhagatvaṃ triruta śravāṃsi nastriṣṭhaṃ vāṃ sūre duhitā ruhadratham ॥५॥ trirno aśvinā divyāni bheṣajā triḥ pārthivāni triru dattamadbhyaḥ । omānaṃ śaṃyormamakāya sūnave tridhātu śarma vahataṃ śubhaspatī ॥६॥ trirno aśvinā yajatā divedive pari tridhātu pṛthivīmaśāyatam । tisro nāsatyā rathyā parāvata ātmeva vātaḥ svasarāṇi gacchatam ॥७॥ triraśvinā sindhubhiḥ saptamātṛbhistraya āhāvāstredhā haviṣkṛtam । tisraḥ pṛthivīrupari pravā divo nākaṃ rakṣethe dyubhiraktubhirhitam ॥८॥ kva trī cakrā trivṛto rathasya kva trayo vandhuro ye sanīḷāḥ । kadā yogo vājino rāsabhasya yena yajñaṃ nāsatyopayāthaḥ ॥९॥ ā nāsatyā gacchataṃ hūyate havirmadhvaḥ pibataṃ madhupebhirāsabhiḥ । yuvorhi pūrvaṃ savitoṣaso rathamṛtāya citraṃ ghṛtavantamiṣyati ॥१०॥ ā nāsatyā tribhirekādaśairiha devebhiryātaṃ madhupeyamaśvinā । prāyustāriṣṭaṃ nī rapāṃsi mṛkṣataṃ sedhataṃ dveṣo bhavataṃ sacābhuvā ॥११॥ ā no aśvinā trivṛtā rathenārvāñcaṃ rayiṃ vahataṃ suvīram । śṛṇvantā vāmavase johavīmi vṛdhe ca no bhavataṃ vājasātau ॥१२॥

“Hymn to the Aśvins, who observe the day and bring far-stretching bounty — 12 verses. (after R.T.H. Griffith)”

hvayāmyagniṃ prathamaṃ svastaye hvayāmi mitrāvaruṇāvihāvase । hvayāmi rātrīṃ jagato niveśanīṃ hvayāmi devaṃ savitāramūtaye ॥१॥ ā kṛṣṇena rajasā vartamāno niveśayannamṛtaṃ martyaṃ ca । hiraṇyayena savitā rathenā devo yāti bhuvanāni paśyan ॥२॥ yāti devaḥ pravatā yātyudvatā yāti śubhrābhyāṃ yajato haribhyām । ā devo yāti savitā parāvato'pa viśvā duritā bādhamānaḥ ॥३॥ abhīvṛtaṃ kṛśanairviśvarūpaṃ hiraṇyaśamyaṃ yajato bṛhantam । āsthādrathaṃ savitā citrabhānuḥ kṛṣṇā rajāṃsi taviṣīṃ dadhānaḥ ॥४॥ vi janāñchyāvāḥ śitipādo akhyanrathaṃ hiraṇyapraugaṃ vahantaḥ । śaśvadviśaḥ saviturdaivyasyopasthe viśvā bhuvanāni tasthuḥ ॥५॥ tisro dyāvaḥ saviturdvā upasthām̐ ekā yamasya bhuvane virāṣāṭ । āṇiṃ na rathyamamṛtādhi tasthuriha bravītu ya u tacciketat ॥६॥ vi suparṇo antarikṣāṇyakhyadgabhīravepā asuraḥ sunīthaḥ । kvedānīṃ sūryaḥ kaściketa katamāṃ dyāṃ raśmirasyā tatāna ॥७॥ aṣṭau vyakhyatkakubhaḥ pṛthivyāstrī dhanva yojanā sapta sindhūn । hiraṇyākṣaḥ savitā deva āgāddadhadratnā dāśuṣe vāryāṇi ॥८॥ hiraṇyapāṇiḥ savitā vicarṣaṇirubhe dyāvāpṛthivī antarīyate । apāmīvāṃ bādhate veti sūryamabhi kṛṣṇena rajasā dyāmṛṇoti ॥९॥ hiraṇyahasto asuraḥ sunīthaḥ sumṛḷīkaḥ svavām̐ yātvarvāṅ । apasedhanrakṣaso yātudhānānasthāddevaḥ pratidoṣaṃ gṛṇānaḥ ॥१०॥ ye te panthāḥ savitaḥ pūrvyāso'reṇavaḥ sukṛtā antarikṣe । tebhirno adya pathibhiḥ sugebhī rakṣā ca no adhi ca brūhi deva ॥११॥

“Hymn to Savitṛ, first invoked with Agni, Mitra-Varuṇa and Night, for prosperity — 11 verses. (after R.T.H. Griffith)”

pra vo yahvaṃ purūṇāṃ viśāṃ devayatīnām । agniṃ sūktebhirvacobhirīmahe yaṃ sīmidanya īḷate ॥१॥ janāso agniṃ dadhire sahovṛdhaṃ haviṣmanto vidhema te । sa tvaṃ no adya sumanā ihāvitā bhavā vājeṣu santya ॥२॥ pra tvā dūtaṃ vṛṇīmahe hotāraṃ viśvavedasam । mahaste sato vi carantyarcayo divi spṛśanti bhānavaḥ ॥३॥ devāsastvā varuṇo mitro aryamā saṃ dūtaṃ pratnamindhate । viśvaṃ so agne jayati tvayā dhanaṃ yaste dadāśa martyaḥ ॥४॥ mandro hotā gṛhapatiragne dūto viśāmasi । tve viśvā saṃgatāni vratā dhruvā yāni devā akṛṇvata ॥५॥ tve idagne subhage yaviṣṭhya viśvamā hūyate haviḥ । sa tvaṃ no adya sumanā utāparaṃ yakṣi devānsuvīryā ॥६॥ taṃ ghemitthā namasvina upa svarājamāsate । hotrābhiragniṃ manuṣaḥ samindhate titirvāṃso ati sridhaḥ ॥७॥ ghnanto vṛtramataranrodasī apa uru kṣayāya cakrire । bhuvatkaṇve vṛṣā dyumnyāhutaḥ krandadaśvo gaviṣṭiṣu ॥८॥ saṃ sīdasva mahām̐ asi śocasva devavītamaḥ । vi dhūmamagne aruṣaṃ miyedhya sṛja praśasta darśatam ॥९॥ yaṃ tvā devāso manave dadhuriha yajiṣṭhaṃ havyavāhana । yaṃ kaṇvo medhyātithirdhanaspṛtaṃ yaṃ vṛṣā yamupastutaḥ ॥१०॥ yamagniṃ medhyātithiḥ kaṇva īdha ṛtādadhi । tasya preṣo dīdiyustamimā ṛcastamagniṃ vardhayāmasi ॥११॥ rāyaspūrdhi svadhāvo'sti hi te'gne deveṣvāpyam । tvaṃ vājasya śrutyasya rājasi sa no mṛḷa mahām̐ asi ॥१२॥ ūrdhva ū ṣu ṇa ūtaye tiṣṭhā devo na savitā । ūrdhvo vājasya sanitā yadañjibhirvāghadbhirvihvayāmahe ॥१३॥ ūrdhvo naḥ pāhyaṃhaso ni ketunā viśvaṃ samatriṇaṃ daha । kṛdhī na ūrdhvāñcarathāya jīvase vidā deveṣu no duvaḥ ॥१४॥ pāhi no agne rakṣasaḥ pāhi dhūrterarāvṇaḥ । pāhi rīṣata uta vā jighāṃsato bṛhadbhāno yaviṣṭhya ॥१५॥ ghaneva viṣvagvi jahyarāvṇastapurjambha yo asmadhruk । yo martyaḥ śiśīte atyaktubhirmā naḥ sa ripurīśata ॥१६॥ agnirvavne suvīryamagniḥ kaṇvāya saubhagam । agniḥ prāvanmitrota medhyātithimagniḥ sātā upastutam ॥१७॥ agninā turvaśaṃ yaduṃ parāvata ugrādevaṃ havāmahe । agnirnayannavavāstvaṃ bṛhadrathaṃ turvītiṃ dasyave sahaḥ ॥१८॥ ni tvāmagne manurdadhe jyotirjanāya śaśvate । dīdetha kaṇva ṛtajāta ukṣito yaṃ namasyanti kṛṣṭayaḥ ॥१९॥ tveṣāso agneramavanto arcayo bhīmāso na pratītaye । rakṣasvinaḥ sadamidyātumāvato viśvaṃ samatriṇaṃ daha ॥२०॥

“Hymn to Agni, lord of many families, supplicated with holy hymns — 20 verses. (after R.T.H. Griffith)”

krīḷaṃ vaḥ śardho mārutamanarvāṇaṃ ratheśubham । kaṇvā abhi pra gāyata ॥१॥ ye pṛṣatībhirṛṣṭibhiḥ sākaṃ vāśībhirañjibhiḥ । ajāyanta svabhānavaḥ ॥२॥ iheva śṛṇva eṣāṃ kaśā hasteṣu yadvadān । ni yāmañcitramṛñjate ॥३॥ pra vaḥ śardhāya ghṛṣvaye tveṣadyumnāya śuṣmiṇe । devattaṃ brahma gāyata ॥४॥ pra śaṃsā goṣvaghnyaṃ krīḷaṃ yacchardho mārutam । jambhe rasasya vāvṛdhe ॥५॥ ko vo varṣiṣṭha ā naro divaśca gmaśca dhūtayaḥ । yatsīmantaṃ na dhūnutha ॥६॥ ni vo yāmāya mānuṣo dadhra ugrāya manyave । jihīta parvato giriḥ ॥७॥ yeṣāmajmeṣu pṛthivī jujurvām̐ iva viśpatiḥ । bhiyā yāmeṣu rejate ॥८॥ sthiraṃ hi jānameṣāṃ vayo māturniretave । yatsīmanu dvitā śavaḥ ॥९॥ udu tye sūnavo giraḥ kāṣṭhā ajmeṣvatnata । vāśrā abhijñu yātave ॥१०॥ tyaṃ cidghā dīrghaṃ pṛthuṃ miho napātamamṛdhram । pra cyāvayanti yāmabhiḥ ॥११॥ maruto yaddha vo balaṃ janām̐ acucyavītana । girīm̐racucyavītana ॥१२॥ yaddha yānti marutaḥ saṃ ha bruvate'dhvannā । śṛṇoti kaścideṣām ॥१३॥ pra yāta śībhamāśubhiḥ santi kaṇveṣu vo duvaḥ । tatro ṣu mādayādhvai ॥१४॥ asti hi ṣmā madāya vaḥ smasi ṣmā vayameṣām । viśvaṃ cidāyurjīvase ॥१५॥

“Hymn to the Maruts, the unassailable band, sung by the Kaṇvas — 15 verses. (after R.T.H. Griffith)”

kaddha nūnaṃ kadhapriyaḥ pitā putraṃ na hastayoḥ । dadhidhve vṛktabarhiṣaḥ ॥१॥ kva nūnaṃ kadvo arthaṃ gantā divo na pṛthivyāḥ । kva vo gāvo na raṇyanti ॥२॥ kva vaḥ sumnā navyāṃsi marutaḥ kva suvitā । kvo viśvāni saubhagā ॥३॥ yadyūyaṃ pṛśnimātaro martāsaḥ syātana । stotā vo amṛtaḥ syāt ॥४॥ mā vo mṛgo na yavase jaritā bhūdajoṣyaḥ । pathā yamasya gādupa ॥५॥ mo ṣu ṇaḥ parāparā nirṛtirdurhaṇā vadhīt । padīṣṭa tṛṣṇayā saha ॥६॥ satyaṃ tveṣā amavanto dhanvañcidā rudriyāsaḥ । mihaṃ kṛṇvantyavātām ॥७॥ vāśreva vidyunmimāti vatsaṃ na mātā siṣakti । yadeṣāṃ vṛṣṭirasarji ॥८॥ divā cittamaḥ kṛṇvanti parjanyenodavāhena । yatpṛthivīṃ vyundanti ॥९॥ adha svanānmarutāṃ viśvamā sadma pārthivam । arejanta pra mānuṣāḥ ॥१०॥ maruto vīḷupāṇibhiścitrā rodhasvatīranu । yātemakhidrayāmabhiḥ ॥११॥ sthirā vaḥ santu nemayo rathā aśvāsa eṣām । susaṃskṛtā abhīśavaḥ ॥१२॥ acchā vadā tanā girā jarāyai brahmaṇaspatim । agniṃ mitraṃ na darśatam ॥१३॥ mimīhi ślokamāsye parjanya iva tatanaḥ । gāya gāyatramukthyam ॥१४॥ vandasva mārutaṃ gaṇaṃ tveṣaṃ panasyumarkiṇam । asme vṛddhā asanniha ॥१५॥

“Hymn to the Maruts, implored to take the worshippers by both hands — 15 verses. (after R.T.H. Griffith)”

pra yaditthā parāvataḥ śocirna mānamasyatha । kasya kratvā marutaḥ kasya varpasā kaṃ yātha kaṃ ha dhūtayaḥ ॥१॥ sthirā vaḥ santvāyudhā parāṇude vīḷū uta pratiṣkabhe । yuṣmākamastu taviṣī panīyasī mā martyasya māyinaḥ ॥२॥ parā ha yatsthiraṃ hatha naro vartayathā guru । vi yāthana vaninaḥ pṛthivyā vyāśāḥ parvatānām ॥३॥ nahi vaḥ śatrurvivide adhi dyavi na bhūmyāṃ riśādasaḥ । yuṣmākamastu taviṣī tanā yujā rudrāso nū cidādhṛṣe ॥४॥ pra vepayanti parvatānvi viñcanti vanaspatīn । pro ārata maruto durmadā iva devāsaḥ sarvayā viśā ॥५॥ upo ratheṣu pṛṣatīrayugdhvaṃ praṣṭirvahati rohitaḥ । ā vo yāmāya pṛthivī cidaśrodabībhayanta mānuṣāḥ ॥६॥ ā vo makṣū tanāya kaṃ rudrā avo vṛṇīmahe । gantā nūnaṃ no'vasā yathā puretthā kaṇvāya bibhyuṣe ॥७॥ yuṣmeṣito maruto martyeṣita ā yo no abhva īṣate । vi taṃ yuyota śavasā vyojasā vi yuṣmākābhirūtibhiḥ ॥८॥ asāmi hi prayajyavaḥ kaṇvaṃ dada pracetasaḥ । asāmibhirmaruta ā na ūtibhirgantā vṛṣṭiṃ na vidyutaḥ ॥९॥ asāmyojo bibhṛthā sudānavo'sāmi dhūtayaḥ śavaḥ । ṛṣidviṣe marutaḥ parimanyava iṣuṃ na sṛjata dviṣam ॥१०॥

“Hymn to the Maruts, the shakers of the earth, asked whither they go — 10 verses. (after R.T.H. Griffith)”

uttiṣṭha brahmaṇaspate devayantastvemahe । upa pra yantu marutaḥ sudānava indra prāśūrbhavā sacā ॥१॥ tvāmiddhi sahasasputra martya upabrūte dhane hite । suvīryaṃ maruta ā svaśvyaṃ dadhīta yo va ācake ॥२॥ praitu brahmaṇaspatiḥ pra devyetu sūnṛtā । acchā vīraṃ naryaṃ paṅktirādhasaṃ devā yajñaṃ nayantu naḥ ॥३॥ yo vāghate dadāti sūnaraṃ vasu sa dhatte akṣiti śravaḥ । tasmā iḷāṃ suvīrāmā yajāmahe supratūrtimanehasam ॥४॥ pra nūnaṃ brahmaṇaspatirmantraṃ vadatyukthyam । yasminnindro varuṇo mitro aryamā devā okāṃsi cakrire ॥५॥ tamidvocemā vidatheṣu śambhuvaṃ mantraṃ devā anehasam । imāṃ ca vācaṃ pratiharyathā naro viśvedvāmā vo aśnavat ॥६॥ ko devayantamaśnavajjanaṃ ko vṛktabarhiṣam । prapra dāśvānpastyābhirasthitāntarvāvatkṣayaṃ dadhe ॥७॥ upa kṣatraṃ pṛñcīta hanti rājabhirbhaye citsukṣitiṃ dadhe । nāsya vartā na tarutā mahādhane nārbhe asti vajriṇaḥ ॥८॥

“Hymn to Brahmanaspati with the Maruts and Indra — 8 verses. (after R.T.H. Griffith)”

yaṃ rakṣanti pracetaso varuṇo mitro aryamā । nū citsa dabhyate janaḥ ॥१॥ yaṃ bāhuteva piprati pānti martyaṃ riṣaḥ । ariṣṭaḥ sarva edhate ॥२॥ vi durgā vi dviṣaḥ puro ghnanti rājāna eṣām । nayanti duritā tiraḥ ॥३॥ sugaḥ panthā anṛkṣara ādityāsa ṛtaṃ yate । nātrāvakhādo asti vaḥ ॥४॥ yaṃ yajñaṃ nayathā nara ādityā ṛjunā pathā । pra vaḥ sa dhītaye naśat ॥५॥ sa ratnaṃ martyo vasu viśvaṃ tokamuta tmanā । acchā gacchatyastṛtaḥ ॥६॥ kathā rādhāma sakhāya stomaṃ mitrasyāryamṇaḥ । mahi psaro varuṇasya ॥७॥ mā vo ghnantaṃ mā śapantaṃ prati voce devayantam । sumnairidva ā vivāse ॥८॥ caturaściddadamānādbibhīyādā nidhātoḥ । na duruktāya spṛhayet ॥९॥

“Hymn to Varuṇa, Mitra and Aryaman, the wise gods who protect the righteous — 9 verses. (after R.T.H. Griffith)”

saṃ pūṣannadhvanastira vyaṃho vimuco napāt । sakṣvā deva pra ṇaspuraḥ ॥१॥ yo naḥ pūṣannagho vṛko duḥśeva ādideśati । apa sma taṃ patho jahi ॥२॥ apa tyaṃ paripanthinaṃ muṣīvāṇaṃ huraścitam । dūramadhi sruteraja ॥३॥ tvaṃ tasya dvayāvino'ghaśaṃsasya kasya cit । padābhi tiṣṭha tapuṣim ॥४॥ ā tatte dasra mantumaḥ pūṣannavo vṛṇīmahe । yena pitṝnacodayaḥ ॥५॥ adhā no viśvasaubhaga hiraṇyavāśīmattama । dhanāni suṣaṇā kṛdhi ॥६॥ ati naḥ saścato naya sugā naḥ supathā kṛṇu । pūṣanniha kratuṃ vidaḥ ॥७॥ abhi sūyavasaṃ naya na navajvāro adhvane । pūṣanniha kratuṃ vidaḥ ॥८॥ śagdhi pūrdhi pra yaṃsi ca śiśīhi prāsyudaram । pūṣanniha kratuṃ vidaḥ ॥९॥ na pūṣaṇaṃ methāmasi sūktairabhi gṛṇīmasi । vasūni dasmamīmahe ॥१०॥

“Hymn to Pūṣan, asked to shorten the way and clear the path — 10 verses. (after R.T.H. Griffith)”

kadrudrāya pracetase mīḷhuṣṭamāya tavyase । vocema śaṃtamaṃ hṛde ॥१॥ yathā no aditiḥ karatpaśve nṛbhyo yathā gave । yathā tokāya rudriyam ॥२॥ yathā no mitro varuṇo yathā rudraściketati । yathā viśve sajoṣasaḥ ॥३॥ gāthapatiṃ medhapatiṃ rudraṃ jalāṣabheṣajam । tacchaṃyoḥ sumnamīmahe ॥४॥ yaḥ śukra iva sūryo hiraṇyamiva rocate । śreṣṭho devānāṃ vasuḥ ॥५॥ śaṃ naḥ karatyarvate sugaṃ meṣāya meṣye । nṛbhyo nāribhyo gave ॥६॥ asme soma śriyamadhi ni dhehi śatasya nṛṇām । mahi śravastuvinṛmṇam ॥७॥ mā naḥ somaparibādho mārātayo juhuranta । ā na indo vāje bhaja ॥८॥ yāste prajā amṛtasya parasmindhāmannṛtasya । mūrdhā nābhā soma vena ābhūṣantīḥ soma vedaḥ ॥९॥

“Hymn to Rudra, the strong and bounteous, with Soma in the closing verses — 9 verses. (after R.T.H. Griffith)”

agne vivasvaduṣasaścitraṃ rādho amartya । ā dāśuṣe jātavedo vahā tvamadyā devām̐ uṣarbudhaḥ ॥१॥ juṣṭo hi dūto asi havyavāhano'gne rathīradhvarāṇām । sajūraśvibhyāmuṣasā suvīryamasme dhehi śravo bṛhat ॥२॥ adyā dūtaṃ vṛṇīmahe vasumagniṃ purupriyam । dhūmaketuṃ bhāṛjīkaṃ vyuṣṭiṣu yajñānāmadhvaraśriyam ॥३॥ śreṣṭhaṃ yaviṣṭhamatithiṃ svāhutaṃ juṣṭaṃ janāya dāśuṣe । devām̐ acchā yātave jātavedasamagnimīḷe vyuṣṭiṣu ॥४॥ staviṣyāmi tvāmahaṃ viśvasyāmṛta bhojana । agne trātāramamṛtaṃ miyedhya yajiṣṭhaṃ havyavāhana ॥५॥ suśaṃso bodhi gṛṇate yaviṣṭhya madhujihvaḥ svāhutaḥ । praskaṇvasya pratirannāyurjīvase namasyā daivyaṃ janam ॥६॥ hotāraṃ viśvavedasaṃ saṃ hi tvā viśa indhate । sa ā vaha puruhūta pracetaso'gne devām̐ iha dravat ॥७॥ savitāramuṣasamaśvinā bhagamagniṃ vyuṣṭiṣu kṣapaḥ । kaṇvāsastvā sutasomāsa indhate havyavāhaṃ svadhvara ॥८॥ patirhyadhvarāṇāmagne dūto viśāmasi । uṣarbudha ā vaha somapītaye devām̐ adya svardṛśaḥ ॥९॥ agne pūrvā anūṣaso vibhāvaso dīdetha viśvadarśataḥ । asi grāmeṣvavitā purohito'si yajñeṣu mānuṣaḥ ॥१०॥ ni tvā yajñasya sādhanamagne hotāramṛtvijam । manuṣvaddeva dhīmahi pracetasaṃ jīraṃ dūtamamartyam ॥११॥ yaddevānāṃ mitramahaḥ purohito'ntaro yāsi dūtyam । sindhoriva prasvanitāsa ūrmayo'gnerbhrājante arcayaḥ ॥१२॥ śrudhi śrutkarṇa vahnibhirdevairagne sayāvabhiḥ । ā sīdantu barhiṣi mitro aryamā prātaryāvāṇo adhvaram ॥१३॥ śṛṇvantu stomaṃ marutaḥ sudānavo'gnijihvā ṛtāvṛdhaḥ । pibatu somaṃ varuṇo dhṛtavrato'śvibhyāmuṣasā sajūḥ ॥१४॥

“Hymn to Agni Jātavedas, bringing the gods who waken with the morn — 14 verses. (after R.T.H. Griffith)”

tvamagne vasūm̐riha rudrām̐ ādityām̐ uta । yajā svadhvaraṃ janaṃ manujātaṃ ghṛtapruṣam ॥१॥ śruṣṭīvāno hi dāśuṣe devā agne vicetasaḥ । tānrohidaśva girvaṇastrayastriṃśatamā vaha ॥२॥ priyamedhavadatrivajjātavedo virūpavat । aṅgirasvanmahivrata praskaṇvasya śrudhī havam ॥३॥ mahikerava ūtaye priyamedhā ahūṣata । rājantamadhvarāṇāmagniṃ śukreṇa śociṣā ॥४॥ ghṛtāhavana santyemā u ṣu śrudhī giraḥ । yābhiḥ kaṇvasya sūnavo havante'vase tvā ॥५॥ tvāṃ citraśravastama havante vikṣu jantavaḥ । śociṣkeśaṃ purupriyāgne havyāya voḷhave ॥६॥ ni tvā hotāramṛtvijaṃ dadhire vasuvittamam । śrutkarṇaṃ saprathastamaṃ viprā agne diviṣṭiṣu ॥७॥ ā tvā viprā acucyavuḥ sutasomā abhi prayaḥ । bṛhadbhā bibhrato haviragne martāya dāśuṣe ॥८॥ prātaryāvṇaḥ sahaskṛta somapeyāya santya । ihādya daivyaṃ janaṃ barhirā sādayā vaso ॥९॥ arvāñcaṃ daivyaṃ janamagne yakṣva sahūtibhiḥ । ayaṃ somaḥ sudānavastaṃ pāta tiroahnyam ॥१०॥

“Hymn to Agni, worship of the Vasus, Rudras and Ādityas — 10 verses. (after R.T.H. Griffith)”

eṣo uṣā apūrvyā vyucchati priyā divaḥ । stuṣe vāmaśvinā bṛhat ॥१॥ yā dasrā sindhumātarā manotarā rayīṇām । dhiyā devā vasuvidā ॥२॥ vacyante vāṃ kakuhāso jūrṇāyāmadhi viṣṭapi । yadvāṃ ratho vibhiṣpatāt ॥३॥ haviṣā jāro apāṃ piparti papurirnarā । pitā kuṭasya carṣaṇiḥ ॥४॥ ādāro vāṃ matīnāṃ nāsatyā matavacasā । pātaṃ somasya dhṛṣṇuyā ॥५॥ yā naḥ pīparadaśvinā jyotiṣmatī tamastiraḥ । tāmasme rāsāthāmiṣam ॥६॥ ā no nāvā matīnāṃ yātaṃ pārāya gantave । yuñjāthāmaśvinā ratham ॥७॥ aritraṃ vāṃ divaspṛthu tīrthe sindhūnāṃ rathaḥ । dhiyā yuyujra indavaḥ ॥८॥ divaskaṇvāsa indavo vasu sindhūnāṃ pade । svaṃ vavriṃ kuha dhitsathaḥ ॥९॥ abhūdu bhā u aṃśave hiraṇyaṃ prati sūryaḥ । vyakhyajjihvayāsitaḥ ॥१०॥ abhūdu pārametave panthā ṛtasya sādhuyā । adarśi vi srutirdivaḥ ॥११॥ tattadidaśvinoravo jaritā prati bhūṣati । made somasya pipratoḥ ॥१२॥ vāvasānā vivasvati somasya pītyā girā । manuṣvacchambhū ā gatam ॥१३॥ yuvoruṣā anu śriyaṃ parijmanorupācarat । ṛtā vanatho aktubhiḥ ॥१४॥ ubhā pibatamaśvinobhā naḥ śarma yacchatam । avidriyābhirūtibhiḥ ॥१५॥

“Hymn to the Aśvins, extolled at daybreak with Uṣas — 15 verses. (after R.T.H. Griffith)”

ayaṃ vāṃ madhumattamaḥ sutaḥ soma ṛtāvṛdhā । tamaśvinā pibataṃ tiroahnyaṃ dhattaṃ ratnāni dāśuṣe ॥१॥ trivandhureṇa trivṛtā supeśasā rathenā yātamaśvinā । kaṇvāso vāṃ brahma kṛṇvantyadhvare teṣāṃ su śṛṇutaṃ havam ॥२॥ aśvinā madhumattamaṃ pātaṃ somamṛtāvṛdhā । athādya dasrā vasu bibhratā rathe dāśvāṃsamupa gacchatam ॥३॥ triṣadhasthe barhiṣi viśvavedasā madhvā yajñaṃ mimikṣatam । kaṇvāso vāṃ sutasomā abhidyavo yuvāṃ havante aśvinā ॥४॥ yābhiḥ kaṇvamabhiṣṭibhiḥ prāvataṃ yuvamaśvinā । tābhiḥ ṣvasmām̐ avataṃ śubhaspatī pātaṃ somamṛtāvṛdhā ॥५॥ sudāse dasrā vasu bibhratā rathe pṛkṣo vahatamaśvinā । rayiṃ samudrāduta vā divasparyasme dhattaṃ puruspṛham ॥६॥ yannāsatyā parāvati yadvā stho adhi turvaśe । ato rathena suvṛtā na ā gataṃ sākaṃ sūryasya raśmibhiḥ ॥७॥ arvāñcā vāṃ saptayo'dhvaraśriyo vahantu savanedupa । iṣaṃ pṛñcantā sukṛte sudānava ā barhiḥ sīdataṃ narā ॥८॥ tena nāsatyā gataṃ rathena sūryatvacā । yena śaśvadūhathurdāśuṣe vasu madhvaḥ somasya pītaye ॥९॥ ukthebhirarvāgavase purūvasū arkaiśca ni hvayāmahe । śaśvatkaṇvānāṃ sadasi priye hi kaṃ somaṃ papathuraśvinā ॥१०॥

“Hymn to the Aśvins, who strengthen law, offered the sweet Soma — 10 verses. (after R.T.H. Griffith)”

saha vāmena na uṣo vyucchā duhitardivaḥ । saha dyumnena bṛhatā vibhāvari rāyā devi dāsvatī ॥१॥ aśvāvatīrgomatīrviśvasuvido bhūri cyavanta vastave । udīraya prati mā sūnṛtā uṣaścoda rādho maghonām ॥२॥ uvāsoṣā ucchācca nu devī jīrā rathānām । ye asyā ācaraṇeṣu dadhrire samudre na śravasyavaḥ ॥३॥ uṣo ye te pra yāmeṣu yuñjate mano dānāya sūrayaḥ । atrāha tatkaṇva eṣāṃ kaṇvatamo nāma gṛṇāti nṛṇām ॥४॥ ā ghā yoṣeva sūnaryuṣā yāti prabhuñjatī । jarayantī vṛjanaṃ padvadīyata utpātayati pakṣiṇaḥ ॥५॥ vi yā sṛjati samanaṃ vyarthinaḥ padaṃ na vetyodatī । vayo nakiṣṭe paptivāṃsa āsate vyuṣṭau vājinīvati ॥६॥ eṣāyukta parāvataḥ sūryasyodayanādadhi । śataṃ rathebhiḥ subhagoṣā iyaṃ vi yātyabhi mānuṣān ॥७॥ viśvamasyā nānāma cakṣase jagajjyotiṣkṛṇoti sūnarī । apa dveṣo maghonī duhitā diva uṣā ucchadapa sridhaḥ ॥८॥ uṣa ā bhāhi bhānunā candreṇa duhitardivaḥ । āvahantī bhūryasmabhyaṃ saubhagaṃ vyucchantī diviṣṭiṣu ॥९॥ viśvasya hi prāṇanaṃ jīvanaṃ tve vi yaducchasi sūnari । sā no rathena bṛhatā vibhāvari śrudhi citrāmaghe havam ॥१०॥ uṣo vājaṃ hi vaṃsva yaścitro mānuṣe jane । tenā vaha sukṛto adhvarām̐ upa ye tvā gṛṇanti vahnayaḥ ॥११॥ viśvāndevām̐ ā vaha somapītaye'ntarikṣāduṣastvam । sāsmāsu dhā gomadaśvāvadukthyamuṣo vājaṃ suvīryam ॥१२॥ yasyā ruśanto arcayaḥ prati bhadrā adṛkṣata । sā no rayiṃ viśvavāraṃ supeśasamuṣā dadātu sugmyam ॥१३॥ ye ciddhi tvāmṛṣayaḥ pūrva ūtaye juhūre'vase mahi । sā na stomām̐ abhi gṛṇīhi rādhasoṣaḥ śukreṇa śociṣā ॥१४॥ uṣo yadadya bhānunā vi dvārāvṛṇavo divaḥ । pra no yacchatādavṛkaṃ pṛthu cchardiḥ pra devi gomatīriṣaḥ ॥१५॥ saṃ no rāyā bṛhatā viśvapeśasā mimikṣvā samiḷābhirā । saṃ dyumnena viśvaturoṣo mahi saṃ vājairvājinīvati ॥१६॥

“Hymn to Uṣas, daughter of the sky, asked to dawn with prosperity — 16 verses. (after R.T.H. Griffith)”

uṣo bhadrebhirā gahi divaścidrocanādadhi । vahantvaruṇapsava upa tvā somino gṛham ॥१॥ supeśasaṃ sukhaṃ rathaṃ yamadhyasthā uṣastvam । tenā suśravasaṃ janaṃ prāvādya duhitardivaḥ ॥२॥ vayaścitte patatriṇo dvipaccatuṣpadarjuni । uṣaḥ prārannṛtūm̐ranu divo antebhyaspari ॥३॥ vyucchantī hi raśmibhirviśvamābhāsi rocanam । tāṃ tvāmuṣarvasūyavo gīrbhiḥ kaṇvā ahūṣata ॥४॥

“Hymn to Uṣas, borne by red steeds to the Soma-pourer's house — 4 verses. (after R.T.H. Griffith)”

udu tyaṃ jātavedasaṃ devaṃ vahanti ketavaḥ । dṛśe viśvāya sūryam ॥१॥ apa tye tāyavo yathā nakṣatrā yantyaktubhiḥ । sūrāya viśvacakṣase ॥२॥ adṛśramasya ketavo vi raśmayo janām̐ anu । bhrājanto agnayo yathā ॥३॥ taraṇirviśvadarśato jyotiṣkṛdasi sūrya । viśvamā bhāsi rocanam ॥४॥ pratyaṅdevānāṃ viśaḥ pratyaṅṅudeṣi mānuṣān । pratyaṅviśvaṃ svardṛśe ॥५॥ yenā pāvaka cakṣasā bhuraṇyantaṃ janām̐ anu । tvaṃ varuṇa paśyasi ॥६॥ vi dyāmeṣi rajaspṛthvahā mimāno aktubhiḥ । paśyañjanmāni sūrya ॥७॥ sapta tvā harito rathe vahanti deva sūrya । śociṣkeśaṃ vicakṣaṇa ॥८॥ ayukta sapta śundhyuvaḥ sūro rathasya naptyaḥ । tābhiryāti svayuktibhiḥ ॥९॥ udvayaṃ tamasaspari jyotiṣpaśyanta uttaram । devaṃ devatrā sūryamaganma jyotiruttamam ॥१०॥ udyannadya mitramaha ārohannuttarāṃ divam । hṛdrogaṃ mama sūrya harimāṇaṃ ca nāśaya ॥११॥ śukeṣu me harimāṇaṃ ropaṇākāsu dadhmasi । atho hāridraveṣu me harimāṇaṃ ni dadhmasi ॥१२॥ udagādayamādityo viśvena sahasā saha । dviṣantaṃ mahyaṃ randhayanmo ahaṃ dviṣate radham ॥१३॥

“Hymn to Sūrya, the all-seeing sun-god — 13 verses. (after R.T.H. Griffith)”

abhi tyaṃ meṣaṃ puruhūtamṛgmiyamindraṃ gīrbhirmadatā vasvo arṇavam । yasya dyāvo na vicaranti mānuṣā bhuje maṃhiṣṭhamabhi vipramarcata ॥१॥ abhīmavanvansvabhiṣṭimūtayo'ntarikṣaprāṃ taviṣībhirāvṛtam । indraṃ dakṣāsa ṛbhavo madacyutaṃ śatakratuṃ javanī sūnṛtāruhat ॥२॥ tvaṃ gotramaṅgirobhyo'vṛṇorapotātraye śatadureṣu gātuvit । sasena cidvimadāyāvaho vasvājāvadriṃ vāvasānasya nartayan ॥३॥ tvamapāmapidhānāvṛṇorapādhārayaḥ parvate dānumadvasu । vṛtraṃ yadindra śavasāvadhīrahimāditsūryaṃ divyārohayo dṛśe ॥४॥ tvaṃ māyābhirapa māyino'dhamaḥ svadhābhirye adhi śuptāvajuhvata । tvaṃ piprornṛmaṇaḥ prārujaḥ puraḥ pra ṛjiśvānaṃ dasyuhatyeṣvāvitha ॥५॥ tvaṃ kutsaṃ śuṣṇahatyeṣvāvithārandhayo'tithigvāya śambaram । mahāntaṃ cidarbudaṃ ni kramīḥ padā sanādeva dasyuhatyāya jajñiṣe ॥६॥ tve viśvā taviṣī sadhryagghitā tava rādhaḥ somapīthāya harṣate । tava vajraścikite bāhvorhito vṛścā śatrorava viśvāni vṛṣṇyā ॥७॥ vi jānīhyāryānye ca dasyavo barhiṣmate randhayā śāsadavratān । śākī bhava yajamānasya coditā viśvettā te sadhamādeṣu cākana ॥८॥ anuvratāya randhayannapavratānābhūbhirindraḥ śnathayannanābhuvaḥ । vṛddhasya cidvardhato dyāminakṣata stavāno vamro vi jaghāna saṃdihaḥ ॥९॥ takṣadyatta uśanā sahasā saho vi rodasī majmanā bādhate śavaḥ । ā tvā vātasya nṛmaṇo manoyuja ā pūryamāṇamavahannabhi śravaḥ ॥१०॥ mandiṣṭa yaduśane kāvye sacām̐ indro vaṅkū vaṅkutarādhi tiṣṭhati । ugro yayiṃ nirapaḥ srotasāsṛjadvi śuṣṇasya dṛṃhitā airayatpuraḥ ॥११॥ ā smā rathaṃ vṛṣapāṇeṣu tiṣṭhasi śāryātasya prabhṛtā yeṣu mandase । indra yathā sutasomeṣu cākano'narvāṇaṃ ślokamā rohase divi ॥१२॥ adadā arbhāṃ mahate vacasyave kakṣīvate vṛcayāmindra sunvate । menābhavo vṛṣaṇaśvasya sukrato viśvettā te savaneṣu pravācyā ॥१३॥ indro aśrāyi sudhyo nireke pajreṣu stomo duryo na yūpaḥ । aśvayurgavyū rathayurvasūyurindra idrāyaḥ kṣayati prayantā ॥१४॥ idaṃ namo vṛṣabhāya svarāje satyaśuṣmāya tavase'vāci । asminnindra vṛjane sarvavīrāḥ smatsūribhistava śarmansyāma ॥१५॥

“Hymn to Indra, the sea of wealth, whose gracious deeds spread among men — 15 verses. (after R.T.H. Griffith)”

tyaṃ su meṣaṃ mahayā svarvidaṃ śataṃ yasya subhvaḥ sākamīrate । atyaṃ na vājaṃ havanasyadaṃ rathamendraṃ vavṛtyāmavase suvṛktibhiḥ ॥१॥ sa parvato na dharuṇeṣvacyutaḥ sahasramūtistaviṣīṣu vāvṛdhe । indro yadvṛtramavadhīnnadīvṛtamubjannarṇāṃsi jarhṛṣāṇo andhasā ॥२॥ sa hi dvaro dvariṣu vavra ūdhani candrabudhno madavṛddho manīṣibhiḥ । indraṃ tamahve svapasyayā dhiyā maṃhiṣṭharātiṃ sa hi paprirandhasaḥ ॥३॥ ā yaṃ pṛṇanti divi sadmabarhiṣaḥ samudraṃ na subhvaḥ svā abhiṣṭayaḥ । taṃ vṛtrahatye anu tasthurūtayaḥ śuṣmā indramavātā ahrutapsavaḥ ॥४॥ abhi svavṛṣṭiṃ made asya yudhyato raghvīriva pravaṇe sasrurūtayaḥ । indro yadvajrī dhṛṣamāṇo andhasā bhinadvalasya paridhīm̐riva tritaḥ ॥५॥ parīṃ ghṛṇā carati titviṣe śavo'po vṛtvī rajaso budhnamāśayat । vṛtrasya yatpravaṇe durgṛbhiśvano nijaghantha hanvorindra tanyatum ॥६॥ hradaṃ na hi tvā nyṛṣantyūrmayo brahmāṇīndra tava yāni vardhanā । tvaṣṭā citte yujyaṃ vāvṛdhe śavastatakṣa vajramabhibhūtyojasam ॥७॥ jaghanvām̐ u haribhiḥ sambhṛtakratavindra vṛtraṃ manuṣe gātuyannapaḥ । ayacchathā bāhvorvajramāyasamadhārayo divyā sūryaṃ dṛśe ॥८॥ bṛhatsvaścandramamavadyadukthyamakṛṇvata bhiyasā rohaṇaṃ divaḥ । yanmānuṣapradhanā indramūtayaḥ svarnṛṣāco maruto'madannanu ॥९॥ dyauścidasyāmavām̐ aheḥ svanādayoyavīdbhiyasā vajra indra te । vṛtrasya yadbadbadhānasya rodasī made sutasya śavasābhinacchiraḥ ॥१०॥ yadinnvindra pṛthivī daśabhujirahāni viśvā tatananta kṛṣṭayaḥ । atrāha te maghavanviśrutaṃ saho dyāmanu śavasā barhaṇā bhuvat ॥११॥ tvamasya pāre rajaso vyomanaḥ svabhūtyojā avase dhṛṣanmanaḥ । cakṛṣe bhūmiṃ pratimānamojaso'paḥ svaḥ paribhūreṣyā divam ॥१२॥ tvaṃ bhuvaḥ pratimānaṃ pṛthivyā ṛṣvavīrasya bṛhataḥ patirbhūḥ । viśvamāprā antarikṣaṃ mahitvā satyamaddhā nakiranyastvāvān ॥१३॥ na yasya dyāvāpṛthivī anu vyaco na sindhavo rajaso antamānaśuḥ । nota svavṛṣṭiṃ made asya yudhyata eko anyaccakṛṣe viśvamānuṣak ॥१४॥ ārcannatra marutaḥ sasminnājau viśve devāso amadannanu tvā । vṛtrasya yadbhṛṣṭimatā vadhena ni tvamindra pratyānaṃ jaghantha ॥१५॥

“Hymn to Indra, who finds the light of heaven with his hundred helpers — 15 verses. (after R.T.H. Griffith)”

nyū ṣu vācaṃ pra mahe bharāmahe gira indrāya sadane vivasvataḥ । nū ciddhi ratnaṃ sasatāmivāvidanna duṣṭutirdraviṇodeṣu śasyate ॥१॥ duro aśvasya dura indra gorasi duro yavasya vasuna inaspatiḥ । śikṣānaraḥ pradivo akāmakarśanaḥ sakhā sakhibhyastamidaṃ gṛṇīmasi ॥२॥ śacīva indra purukṛddyumattama tavedidamabhitaścekite vasu । ataḥ saṃgṛbhyābhibhūta ā bhara mā tvāyato jarituḥ kāmamūnayīḥ ॥३॥ ebhirdyubhiḥ sumanā ebhirindubhirnirundhāno amatiṃ gobhiraśvinā । indreṇa dasyuṃ darayanta indubhiryutadveṣasaḥ samiṣā rabhemahi ॥४॥ samindra rāyā samiṣā rabhemahi saṃ vājebhiḥ puruścandrairabhidyubhiḥ । saṃ devyā pramatyā vīraśuṣmayā goagrayāśvāvatyā rabhemahi ॥५॥ te tvā madā amadantāni vṛṣṇyā te somāso vṛtrahatyeṣu satpate । yatkārave daśa vṛtrāṇyaprati barhiṣmate ni sahasrāṇi barhayaḥ ॥६॥ yudhā yudhamupa ghedeṣi dhṛṣṇuyā purā puraṃ samidaṃ haṃsyojasā । namyā yadindra sakhyā parāvati nibarhayo namuciṃ nāma māyinam ॥७॥ tvaṃ karañjamuta parṇayaṃ vadhīstejiṣṭhayātithigvasya vartanī । tvaṃ śatā vaṅgṛdasyābhinatpuro'nānudaḥ pariṣūtā ṛjiśvanā ॥८॥ tvametāñjanarājño dvirdaśābandhunā suśravasopajagmuṣaḥ । ṣaṣṭiṃ sahasrā navatiṃ nava śruto ni cakreṇa rathyā duṣpadāvṛṇak ॥९॥ tvamāvitha suśravasaṃ tavotibhistava trāmabhirindra tūrvayāṇam । tvamasmai kutsamatithigvamāyuṃ mahe rājñe yūne arandhanāyaḥ ॥१०॥ ya udṛcīndra devagopāḥ sakhāyaste śivatamā asāma । tvāṃ stoṣāma tvayā suvīrā drāghīya āyuḥ prataraṃ dadhānāḥ ॥११॥

“Hymn to Indra, giver of horses, kine and barley, lord and guard of wealth — 11 verses. (after R.T.H. Griffith)”

mā no asminmaghavanpṛtsvaṃhasi nahi te antaḥ śavasaḥ parīṇaśe । akrandayo nadyo roruvadvanā kathā na kṣoṇīrbhiyasā samārata ॥१॥ arcā śakrāya śākine śacīvate śṛṇvantamindraṃ mahayannabhi ṣṭuhi । yo dhṛṣṇunā śavasā rodasī ubhe vṛṣā vṛṣatvā vṛṣabho nyṛñjate ॥२॥ arcā dive bṛhate śūṣyaṃ vacaḥ svakṣatraṃ yasya dhṛṣato dhṛṣanmanaḥ । bṛhacchravā asuro barhaṇā kṛtaḥ puro haribhyāṃ vṛṣabho ratho hi ṣaḥ ॥३॥ tvaṃ divo bṛhataḥ sānu kopayo'va tmanā dhṛṣatā śambaraṃ bhinat । yanmāyino vrandino mandinā dhṛṣacchitāṃ gabhastimaśaniṃ pṛtanyasi ॥४॥ ni yadvṛṇakṣi śvasanasya mūrdhani śuṣṇasya cidvrandino roruvadvanā । prācīnena manasā barhaṇāvatā yadadyā citkṛṇavaḥ kastvā pari ॥५॥ tvamāvitha naryaṃ turvaśaṃ yaduṃ tvaṃ turvītiṃ vayyaṃ śatakrato । tvaṃ rathametaśaṃ kṛtvye dhane tvaṃ puro navatiṃ dambhayo nava ॥६॥ sa ghā rājā satpatiḥ śūśuvajjano rātahavyaḥ prati yaḥ śāsaminvati । ukthā vā yo abhigṛṇāti rādhasā dānurasmā uparā pinvate divaḥ ॥७॥ asamaṃ kṣatramasamā manīṣā pra somapā apasā santu neme । ye ta indra daduṣo vardhayanti mahi kṣatraṃ sthaviraṃ vṛṣṇyaṃ ca ॥८॥ tubhyedete bahulā adridugdhāścamūṣadaścamasā indrapānāḥ । vyaśnuhi tarpayā kāmameṣāmathā mano vasudeyāya kṛṣva ॥९॥ apāmatiṣṭhaddharuṇahvaraṃ tamo'ntarvṛtrasya jaṭhareṣu parvataḥ । abhīmindro nadyo vavriṇā hitā viśvā anuṣṭhāḥ pravaṇeṣu jighnate ॥१०॥ sa śevṛdhamadhi dhā dyumnamasme mahi kṣatraṃ janāṣāḷindra tavyam । rakṣā ca no maghonaḥ pāhi sūrīnrāye ca naḥ svapatyā iṣe dhāḥ ॥११॥

“Hymn to Indra (Maghavan), whose strength none may comprehend — 11 verses. (after R.T.H. Griffith)”

divaścidasya varimā vi papratha indraṃ na mahnā pṛthivī cana prati । bhīmastuviṣmāñcarṣaṇibhya ātapaḥ śiśīte vajraṃ tejase na vaṃsagaḥ ॥१॥ so arṇavo na nadyaḥ samudriyaḥ prati gṛbhṇāti viśritā varīmabhiḥ । indraḥ somasya pītaye vṛṣāyate sanātsa yudhma ojasā panasyate ॥२॥ tvaṃ tamindra parvataṃ na bhojase maho nṛmṇasya dharmaṇāmirajyasi । pra vīryeṇa devatāti cekite viśvasmā ugraḥ karmaṇe purohitaḥ ॥३॥ sa idvane namasyubhirvacasyate cāru janeṣu prabruvāṇa indriyam । vṛṣā chandurbhavati haryato vṛṣā kṣemeṇa dhenāṃ maghavā yadinvati ॥४॥ sa inmahāni samithāni majmanā kṛṇoti yudhma ojasā janebhyaḥ । adhā cana śraddadhati tviṣīmata indrāya vajraṃ nighanighnate vadham ॥५॥ sa hi śravasyuḥ sadanāni kṛtrimā kṣmayā vṛdhāna ojasā vināśayan । jyotīṃṣi kṛṇvannavṛkāṇi yajyave'va sukratuḥ sartavā apaḥ sṛjat ॥६॥ dānāya manaḥ somapāvannastu te'rvāñcā harī vandanaśrudā kṛdhi । yamiṣṭhāsaḥ sārathayo ya indra te na tvā ketā ā dabhnuvanti bhūrṇayaḥ ॥७॥ aprakṣitaṃ vasu bibharṣi hastayoraṣāḷhaṃ sahastanvi śruto dadhe । āvṛtāso'vatāso na kartṛbhistanūṣu te kratava indra bhūrayaḥ ॥८॥

“Hymn to Indra, whom neither heaven nor earth can match in greatness — 8 verses. (after R.T.H. Griffith)”

eṣa pra pūrvīrava tasya camriṣo'tyo na yoṣāmudayaṃsta bhurvaṇiḥ । dakṣaṃ mahe pāyayate hiraṇyayaṃ rathamāvṛtyā hariyogamṛbhvasam ॥१॥ taṃ gūrtayo nemanniṣaḥ parīṇasaḥ samudraṃ na saṃcaraṇe saniṣyavaḥ । patiṃ dakṣasya vidathasya nū saho giriṃ na venā adhi roha tejasā ॥२॥ sa turvaṇirmahām̐ areṇu pauṃsye girerbhṛṣṭirna bhrājate tujā śavaḥ । yena śuṣṇaṃ māyinamāyaso made dudhra ābhūṣu rāmayanni dāmani ॥३॥ devī yadi taviṣī tvāvṛdhotaya indraṃ siṣaktyuṣasaṃ na sūryaḥ । yo dhṛṣṇunā śavasā bādhate tama iyarti reṇuṃ bṛhadarhariṣvaṇiḥ ॥४॥ vi yattiro dharuṇamacyutaṃ rajo'tiṣṭhipo diva ātāsu barhaṇā । svarmīḷhe yanmada indra harṣyāhanvṛtraṃ nirapāmaubjo arṇavam ॥५॥ tvaṃ divo dharuṇaṃ dhiṣa ojasā pṛthivyā indra sadaneṣu māhinaḥ । tvaṃ sutasya made ariṇā apo vi vṛtrasya samayā pāṣyārujaḥ ॥६॥

“Hymn to Indra, roused by libations, his golden car yoked with bay horses — 6 verses. (after R.T.H. Griffith)”

pra maṃhiṣṭhāya bṛhate bṛhadraye satyaśuṣmāya tavase matiṃ bhare । apāmiva pravaṇe yasya durdharaṃ rādho viśvāyu śavase apāvṛtam ॥१॥ adha te viśvamanu hāsadiṣṭaya āpo nimneva savanā haviṣmataḥ । yatparvate na samaśīta haryata indrasya vajraḥ śnathitā hiraṇyayaḥ ॥२॥ asmai bhīmāya namasā samadhvara uṣo na śubhra ā bharā panīyase । yasya dhāma śravase nāmendriyaṃ jyotirakāri harito nāyase ॥३॥ ime ta indra te vayaṃ puruṣṭuta ye tvārabhya carāmasi prabhūvaso । nahi tvadanyo girvaṇo giraḥ saghatkṣoṇīriva prati no harya tadvacaḥ ॥४॥ bhūri ta indra vīryaṃ tava smasyasya stoturmaghavankāmamā pṛṇa । anu te dyaurbṛhatī vīryaṃ mama iyaṃ ca te pṛthivī nema ojase ॥५॥ tvaṃ tamindra parvataṃ mahāmuruṃ vajreṇa vajrinparvaśaścakartitha । avāsṛjo nivṛtāḥ sartavā apaḥ satrā viśvaṃ dadhiṣe kevalaṃ sahaḥ ॥६॥

“Hymn to Indra, the liberal lord of lofty wealth — 6 verses. (after R.T.H. Griffith)”

nū citsahojā amṛto ni tundate hotā yaddūto abhavadvivasvataḥ । vi sādhiṣṭhebhiḥ pathibhī rajo mama ā devatātā haviṣā vivāsati ॥१॥ ā svamadma yuvamāno ajarastṛṣvaviṣyannataseṣu tiṣṭhati । atyo na pṛṣṭhaṃ pruṣitasya rocate divo na sānu stanayannacikradat ॥२॥ krāṇā rudrebhirvasubhiḥ purohito hotā niṣatto rayiṣāḷamartyaḥ । ratho na vikṣvṛñjasāna āyuṣu vyānuṣagvāryā deva ṛṇvati ॥३॥ vi vātajūto ataseṣu tiṣṭhate vṛthā juhūbhiḥ sṛṇyā tuviṣvaṇiḥ । tṛṣu yadagne vanino vṛṣāyase kṛṣṇaṃ ta ema ruśadūrme ajara ॥४॥ tapurjambho vana ā vātacodito yūthe na sāhvām̐ ava vāti vaṃsagaḥ । abhivrajannakṣitaṃ pājasā raja sthātuścarathaṃ bhayate patatriṇaḥ ॥५॥ dadhuṣṭvā bhṛgavo mānuṣeṣvā rayiṃ na cāruṃ suhavaṃ janebhyaḥ । hotāramagne atithiṃ vareṇyaṃ mitraṃ na śevaṃ divyāya janmane ॥६॥ hotāraṃ sapta juhvo yajiṣṭhaṃ yaṃ vāghato vṛṇate adhvareṣu । agniṃ viśveṣāmaratiṃ vasūnāṃ saparyāmi prayasā yāmi ratnam ॥७॥ acchidrā sūno sahaso no adya stotṛbhyo mitramahaḥ śarma yaccha । agne gṛṇantamaṃhasa uruṣyorjo napātpūrbhirāyasībhiḥ ॥८॥ bhavā varūthaṃ gṛṇate vibhāvo bhavā maghavanmaghavadbhyaḥ śarma । uruṣyāgne aṃhaso gṛṇantaṃ prātarmakṣū dhiyāvasurjagamyāt ॥९॥

“Hymn to Agni, the immortal herald and messenger of Vivasvān — 9 verses. (after R.T.H. Griffith)”

vayā idagne agnayaste anye tve viśve amṛtā mādayante । vaiśvānara nābhirasi kṣitīnāṃ sthūṇeva janām̐ upamidyayantha ॥१॥ mūrdhā divo nābhiragniḥ pṛthivyā athābhavadaratī rodasyoḥ । taṃ tvā devāso'janayanta devaṃ vaiśvānara jyotiridāryāya ॥२॥ ā sūrye na raśmayo dhruvāso vaiśvānare dadhire'gnā vasūni । yā parvateṣvoṣadhīṣvapsu yā mānuṣeṣvasi tasya rājā ॥३॥ bṛhatī iva sūnave rodasī giro hotā manuṣyo na dakṣaḥ । svarvate satyaśuṣmāya pūrvīrvaiśvānarāya nṛtamāya yahvīḥ ॥४॥ divaścitte bṛhato jātavedo vaiśvānara pra ririce mahitvam । rājā kṛṣṭīnāmasi mānuṣīṇāṃ yudhā devebhyo varivaścakartha ॥५॥ pra nū mahitvaṃ vṛṣabhasya vocaṃ yaṃ pūravo vṛtrahaṇaṃ sacante । vaiśvānaro dasyumagnirjaghanvām̐ adhūnotkāṣṭhā ava śambaraṃ bhet ॥६॥ vaiśvānaro mahimnā viśvakṛṣṭirbharadvājeṣu yajato vibhāvā । śātavaneye śatinībhiragniḥ puruṇīthe jarate sūnṛtāvān ॥७॥

“Hymn to Agni Vaiśvānara, the centre of the peoples — 7 verses. (after R.T.H. Griffith)”

vahniṃ yaśasaṃ vidathasya ketuṃ suprāvyaṃ dūtaṃ sadyoartham । dvijanmānaṃ rayimiva praśastaṃ rātiṃ bharadbhṛgave mātariśvā ॥१॥ asya śāsurubhayāsaḥ sacante haviṣmanta uśijo ye ca martāḥ । divaścitpūrvo nyasādi hotāpṛcchyo viśpatirvikṣu vedhāḥ ॥२॥ taṃ navyasī hṛda ā jāyamānamasmatsukīrtirmadhujihvamaśyāḥ । yamṛtvijo vṛjane mānuṣāsaḥ prayasvanta āyavo jījananta ॥३॥ uśikpāvako vasurmānuṣeṣu vareṇyo hotādhāyi vikṣu । damūnā gṛhapatirdama ām̐ agnirbhuvadrayipatī rayīṇām ॥४॥ taṃ tvā vayaṃ patimagne rayīṇāṃ pra śaṃsāmo matibhirgotamāsaḥ । āśuṃ na vājambharaṃ marjayantaḥ prātarmakṣū dhiyāvasurjagamyāt ॥५॥

“Hymn to Agni, the glorious priest and banner of sacrifice — 5 verses. (after R.T.H. Griffith)”

asmā idu pra tavase turāya prayo na harmi stomaṃ māhināya । ṛcīṣamāyādhrigava ohamindrāya brahmāṇi rātatamā ॥१॥ asmā idu praya iva pra yaṃsi bharāmyāṅgūṣaṃ bādhe suvṛkti । indrāya hṛdā manasā manīṣā pratnāya patye dhiyo marjayanta ॥२॥ asmā idu tyamupamaṃ svarṣāṃ bharāmyāṅgūṣamāsyena । maṃhiṣṭhamacchoktibhirmatīnāṃ suvṛktibhiḥ sūriṃ vāvṛdhadhyai ॥३॥ asmā idu stomaṃ saṃ hinomi rathaṃ na taṣṭeva tatsināya । giraśca girvāhase suvṛktīndrāya viśvaminvaṃ medhirāya ॥४॥ asmā idu saptimiva śravasyendrāyārkaṃ juhvā samañje । vīraṃ dānaukasaṃ vandadhyai purāṃ gūrtaśravasaṃ darmāṇam ॥५॥ asmā idu tvaṣṭā takṣadvajraṃ svapastamaṃ svaryaṃ raṇāya । vṛtrasya cidvidadyena marma tujannīśānastujatā kiyedhāḥ ॥६॥ asyedu mātuḥ savaneṣu sadyo mahaḥ pituṃ papivāñcārvannā । muṣāyadviṣṇuḥ pacataṃ sahīyānvidhyadvarāhaṃ tiro adrimastā ॥७॥ asmā idu gnāściddevapatnīrindrāyārkamahihatya ūvuḥ । pari dyāvāpṛthivī jabhra urvī nāsya te mahimānaṃ pari ṣṭaḥ ॥८॥ asyedeva pra ririce mahitvaṃ divaspṛthivyāḥ paryantarikṣāt । svarāḷindro dama ā viśvagūrtaḥ svariramatro vavakṣe raṇāya ॥९॥ asyedeva śavasā śuṣantaṃ vi vṛścadvajreṇa vṛtramindraḥ । gā na vrāṇā avanīramuñcadabhi śravo dāvane sacetāḥ ॥१०॥ asyedu tveṣasā ranta sindhavaḥ pari yadvajreṇa sīmayacchat । īśānakṛddāśuṣe daśasyanturvītaye gādhaṃ turvaṇiḥ kaḥ ॥११॥ asmā idu pra bharā tūtujāno vṛtrāya vajramīśānaḥ kiyedhāḥ । gorna parva vi radā tiraśceṣyannarṇāṃsyapāṃ caradhyai ॥१२॥ asyedu pra brūhi pūrvyāṇi turasya karmāṇi navya ukthaiḥ । yudhe yadiṣṇāna āyudhānyṛghāyamāṇo niriṇāti śatrūn ॥१३॥ asyedu bhiyā girayaśca dṛḷhā dyāvā ca bhūmā januṣastujete । upo venasya joguvāna oṇiṃ sadyo bhuvadvīryāya nodhāḥ ॥१४॥ asmā idu tyadanu dāyyeṣāmeko yadvavne bhūrerīśānaḥ । praitaśaṃ sūrye paspṛdhānaṃ sauvaśvye suṣvimāvadindraḥ ॥१५॥ evā te hāriyojanā suvṛktīndra brahmāṇi gotamāso akran । aiṣu viśvapeśasaṃ dhiyaṃ dhāḥ prātarmakṣū dhiyāvasurjagamyāt ॥१६॥

“Hymn to Indra, swift, strong and exalted, praised with song — 16 verses. (after R.T.H. Griffith)”

pra manmahe śavasānāya śūṣamāṅgūṣaṃ girvaṇase aṅgirasvat । suvṛktibhi stuvata ṛgmiyāyārcāmārkaṃ nare viśrutāya ॥१॥ pra vo mahe mahi namo bharadhvamāṅgūṣyaṃ śavasānāya sāma । yenā naḥ pūrve pitaraḥ padajñā arcanto aṅgiraso gā avindan ॥२॥ indrasyāṅgirasāṃ ceṣṭau vidatsaramā tanayāya dhāsim । bṛhaspatirbhinadadriṃ vidadgāḥ samusriyābhirvāvaśanta naraḥ ॥३॥ sa suṣṭubhā sa stubhā sapta vipraiḥ svareṇādriṃ svaryo navagvaiḥ । saraṇyubhiḥ phaligamindra śakra valaṃ raveṇa darayo daśagvaiḥ ॥४॥ gṛṇāno aṅgirobhirdasma vi varuṣasā sūryeṇa gobhirandhaḥ । vi bhūmyā aprathaya indra sānu divo raja uparamastabhāyaḥ ॥५॥ tadu prayakṣatamamasya karma dasmasya cārutamamasti daṃsaḥ । upahvare yaduparā apinvanmadhvarṇaso nadyaścatasraḥ ॥६॥ dvitā vi vavre sanajā sanīḷe ayāsya stavamānebhirarkaiḥ । bhago na mene parame vyomannadhārayadrodasī sudaṃsāḥ ॥७॥ sanāddivaṃ pari bhūmā virūpe punarbhuvā yuvatī svebhirevaiḥ । kṛṣṇebhiraktoṣā ruśadbhirvapurbhirā carato anyānyā ॥८॥ sanemi sakhyaṃ svapasyamānaḥ sūnurdādhāra śavasā sudaṃsāḥ । āmāsu ciddadhiṣe pakvamantaḥ payaḥ kṛṣṇāsu ruśadrohiṇīṣu ॥९॥ sanātsanīḷā avanīravātā vratā rakṣante amṛtāḥ sahobhiḥ । purū sahasrā janayo na patnīrduvasyanti svasāro ahrayāṇam ॥१०॥ sanāyuvo namasā navyo arkairvasūyavo matayo dasma dadruḥ । patiṃ na patnīruśatīruśantaṃ spṛśanti tvā śavasāvanmanīṣāḥ ॥११॥ sanādeva tava rāyo gabhastau na kṣīyante nopa dasyanti dasma । dyumām̐ asi kratumām̐ indra dhīraḥ śikṣā śacīvastava naḥ śacībhiḥ ॥१२॥ sanāyate gotama indra navyamatakṣadbrahma hariyojanāya । sunīthāya naḥ śavasāna nodhāḥ prātarmakṣū dhiyāvasurjagamyāt ॥१३॥

“Hymn to Indra, the far-famed hero who loves song — 13 verses. (after R.T.H. Griffith)”

tvaṃ mahām̐ indra yo ha śuṣmairdyāvā jajñānaḥ pṛthivī ame dhāḥ । yaddha te viśvā girayaścidabhvā bhiyā dṛḷhāsaḥ kiraṇā naijan ॥१॥ ā yaddharī indra vivratā verā te vajraṃ jaritā bāhvordhāt । yenāviharyatakrato amitrānpura iṣṇāsi puruhūta pūrvīḥ ॥२॥ tvaṃ satya indra dhṛṣṇuretāntvamṛbhukṣā naryastvaṃ ṣāṭ । tvaṃ śuṣṇaṃ vṛjane pṛkṣa āṇau yūne kutsāya dyumate sacāhan ॥३॥ tvaṃ ha tyadindra codīḥ sakhā vṛtraṃ yadvajrinvṛṣakarmannubhnāḥ । yaddha śūra vṛṣamaṇaḥ parācairvi dasyūm̐ryonāvakṛto vṛthāṣāṭ ॥४॥ tvaṃ ha tyadindrāriṣaṇyandṛḷhasya cinmartānāmajuṣṭau । vyasmadā kāṣṭhā arvate varghaneva vajriñchnathihyamitrān ॥५॥ tvāṃ ha tyadindrārṇasātau svarmīḷhe nara ājā havante । tava svadhāva iyamā samarya ūtirvājeṣvatasāyyā bhūt ॥६॥ tvaṃ ha tyadindra sapta yudhyanpuro vajrinpurukutsāya dardaḥ । barhirna yatsudāse vṛthā vargaṃho rājanvarivaḥ pūrave kaḥ ॥७॥ tvaṃ tyāṃ na indra deva citrāmiṣamāpo na pīpayaḥ parijman । yayā śūra pratyasmabhyaṃ yaṃsi tmanamūrjaṃ na viśvadha kṣaradhyai ॥८॥ akāri ta indra gotamebhirbrahmāṇyoktā namasā haribhyām । supeśasaṃ vājamā bharā naḥ prātarmakṣū dhiyāvasurjagamyāt ॥९॥

“Hymn to Indra, the mighty one whose birth terrified earth and heaven — 9 verses. (after R.T.H. Griffith)”

vṛṣṇe śardhāya sumakhāya vedhase nodhaḥ suvṛktiṃ pra bharā marudbhyaḥ । apo na dhīro manasā suhastyo giraḥ samañje vidatheṣvābhuvaḥ ॥१॥ te jajñire diva ṛṣvāsa ukṣaṇo rudrasya maryā asurā arepasaḥ । pāvakāsaḥ śucayaḥ sūryā iva satvāno na drapsino ghoravarpasaḥ ॥२॥ yuvāno rudrā ajarā abhogghano vavakṣuradhrigāvaḥ parvatā iva । dṛḷhā cidviśvā bhuvanāni pārthivā pra cyāvayanti divyāni majmanā ॥३॥ citrairañjibhirvapuṣe vyañjate vakṣassu rukmām̐ adhi yetire śubhe । aṃseṣveṣāṃ ni mimṛkṣurṛṣṭayaḥ sākaṃ jajñire svadhayā divo naraḥ ॥४॥ īśānakṛto dhunayo riśādaso vātānvidyutastaviṣībhirakrata । duhantyūdhardivyāni dhūtayo bhūmiṃ pinvanti payasā parijrayaḥ ॥५॥ pinvantyapo marutaḥ sudānavaḥ payo ghṛtavadvidatheṣvābhuvaḥ । atyaṃ na mihe vi nayanti vājinamutsaṃ duhanti stanayantamakṣitam ॥६॥ mahiṣāso māyinaścitrabhānavo girayo na svatavaso raghuṣyadaḥ । mṛgā iva hastinaḥ khādathā vanā yadāruṇīṣu taviṣīrayugdhvam ॥७॥ siṃhā iva nānadati pracetasaḥ piśā iva supiśo viśvavedasaḥ । kṣapo jinvantaḥ pṛṣatībhirṛṣṭibhiḥ samitsabādhaḥ śavasāhimanyavaḥ ॥८॥ rodasī ā vadatā gaṇaśriyo nṛṣācaḥ śūrāḥ śavasāhimanyavaḥ । ā vandhureṣvamatirna darśatā vidyunna tasthau maruto ratheṣu vaḥ ॥९॥ viśvavedaso rayibhiḥ samokasaḥ sammiślāsastaviṣībhirvirapśinaḥ । astāra iṣuṃ dadhire gabhastyoranantaśuṣmā vṛṣakhādayo naraḥ ॥१०॥ hiraṇyayebhiḥ pavibhiḥ payovṛdha ujjighnanta āpathyo na parvatān । makhā ayāsaḥ svasṛto dhruvacyuto dudhrakṛto maruto bhrājadṛṣṭayaḥ ॥११॥ ghṛṣuṃ pāvakaṃ vaninaṃ vicarṣaṇiṃ rudrasya sūnuṃ havasā gṛṇīmasi । rajasturaṃ tavasaṃ mārutaṃ gaṇamṛjīṣiṇaṃ vṛṣaṇaṃ saścata śriye ॥१२॥ pra nū sa martaḥ śavasā janām̐ ati tasthau va ūtī maruto yamāvata । arvadbhirvājaṃ bharate dhanā nṛbhirāpṛcchyaṃ kratumā kṣeti puṣyati ॥१३॥ carkṛtyaṃ marutaḥ pṛtsu duṣṭaraṃ dyumantaṃ śuṣmaṃ maghavatsu dhattana । dhanaspṛtamukthyaṃ viśvacarṣaṇiṃ tokaṃ puṣyema tanayaṃ śataṃ himāḥ ॥१४॥ nū ṣṭhiraṃ maruto vīravantamṛtīṣāhaṃ rayimasmāsu dhatta । sahasriṇaṃ śatinaṃ śūśuvāṃsaṃ prātarmakṣū dhiyāvasurjagamyāt ॥१५॥

“Hymn to the Maruts, the manly host, invoked by Nodhas — 15 verses. (after R.T.H. Griffith)”

paśvā na tāyuṃ guhā catantaṃ namo yujānaṃ namo vahantam ॥१॥ sajoṣā dhīrāḥ padairanu gmannupa tvā sīdanviśve yajatrāḥ ॥२॥ ṛtasya devā anu vratā gurbhuvatpariṣṭirdyaurna bhūma ॥३॥ vardhantīmāpaḥ panvā suśiśvimṛtasya yonā garbhe sujātam ॥४॥ puṣṭirna raṇvā kṣitirna pṛthvī girirna bhujma kṣodo na śambhu ॥५॥ atyo nājmansargaprataktaḥ sindhurna kṣodaḥ ka īṃ varāte ॥६॥ jāmiḥ sindhūnāṃ bhrāteva svasrāmibhyānna rājā vanānyatti ॥७॥ yadvātajūto vanā vyasthādagnirha dāti romā pṛthivyāḥ ॥८॥ śvasityapsu haṃso na sīdankratvā cetiṣṭho viśāmuṣarbhut ॥९॥ somo na vedhā ṛtaprajātaḥ paśurna śiśvā vibhurdūrebhāḥ ॥१०॥

“Hymn to Agni, whom the wise seek like a hidden flame, the bearer of offerings to the gods — 10 verses. (after R.T.H. Griffith)”

rayirna citrā sūro na saṃdṛgāyurna prāṇo nityo na sūnuḥ ॥१॥ takvā na bhūrṇirvanā siṣakti payo na dhenuḥ śucirvibhāvā ॥२॥ dādhāra kṣemamoko na raṇvo yavo na pakvo jetā janānām ॥३॥ ṛṣirna stubhvā vikṣu praśasto vājī na prīto vayo dadhāti ॥४॥ durokaśociḥ kraturna nityo jāyeva yonāvaraṃ viśvasmai ॥५॥ citro yadabhrāṭ chveto na vikṣu ratho na rukmī tveṣaḥ samatsu ॥६॥ seneva sṛṣṭāmaṃ dadhātyasturna didyuttveṣapratīkā ॥७॥ yamo ha jāto yamo janitvaṃ jāraḥ kanīnāṃ patirjanīnām ॥८॥ taṃ vaścarāthā vayaṃ vasatyāstaṃ na gāvo nakṣanta iddham ॥९॥ sindhurna kṣodaḥ pra nīcīrainonnavanta gāvaḥ svardṛśīke ॥१०॥

“Hymn to Agni, likened to the sun's glance, to breath and to one's own son — 10 verses. (after R.T.H. Griffith)”

vaneṣu jāyurmarteṣu mitro vṛṇīte śruṣṭiṃ rājevājuryam ॥१॥ kṣemo na sādhuḥ kraturna bhadro bhuvatsvādhīrhotā havyavāṭ ॥२॥ haste dadhāno nṛmṇā viśvānyame devāndhādguhā niṣīdan ॥३॥ vidantīmatra naro dhiyaṃdhā hṛdā yattaṣṭānmantrām̐ aśaṃsan ॥४॥ ajo na kṣāṃ dādhāra pṛthivīṃ tastambha dyāṃ mantrebhiḥ satyaiḥ ॥५॥ priyā padāni paśvo ni pāhi viśvāyuragne guhā guhaṃ gāḥ ॥६॥ ya īṃ ciketa guhā bhavantamā yaḥ sasāda dhārāmṛtasya ॥७॥ vi ye cṛtantyṛtā sapanta ādidvasūni pra vavācāsmai ॥८॥ vi yo vīrutsu rodhanmahitvota prajā uta prasūṣvantaḥ ॥९॥ cittirapāṃ dame viśvāyuḥ sadmeva dhīrāḥ sammāya cakruḥ ॥१०॥

“Hymn to Agni, victorious in the wood and a friend among men — 10 verses. (after R.T.H. Griffith)”

śrīṇannupa sthāddivaṃ bhuraṇyu sthātuścarathamaktūnvyūrṇot ॥१॥ pari yadeṣāmeko viśveṣāṃ bhuvaddevo devānāṃ mahitvā ॥२॥ āditte viśve kratuṃ juṣanta śuṣkādyaddeva jīvo janiṣṭhāḥ ॥३॥ bhajanta viśve devatvaṃ nāma ṛtaṃ sapanto amṛtamevaiḥ ॥४॥ ṛtasya preṣā ṛtasya dhītirviśvāyurviśve apāṃsi cakruḥ ॥५॥ yastubhyaṃ dāśādyo vā te śikṣāttasmai cikitvānrayiṃ dayasva ॥६॥ hotā niṣatto manorapatye sa cinnvāsāṃ patī rayīṇām ॥७॥ icchanta reto mithastanūṣu saṃ jānata svairdakṣairamūrāḥ ॥८॥ piturna putrāḥ kratuṃ juṣanta śroṣanye asya śāsaṃ turāsaḥ ॥९॥ vi rāya aurṇodduraḥ purukṣuḥ pipeśa nākaṃ stṛbhirdamūnāḥ ॥१०॥

“Hymn to Agni, the restless one who ascends the sky and unveils the nights — 10 verses. (after R.T.H. Griffith)”

śukraḥ śuśukvām̐ uṣo na jāraḥ paprā samīcī divo na jyotiḥ ॥१॥ pari prajātaḥ kratvā babhūtha bhuvo devānāṃ pitā putraḥ san ॥२॥ vedhā adṛpto agnirvijānannūdharna gonāṃ svādmā pitūnām ॥३॥ jane na śeva āhūryaḥ sanmadhye niṣatto raṇvo duroṇe ॥४॥ putro na jāto raṇvo duroṇe vājī na prīto viśo vi tārīt ॥५॥ viśo yadahve nṛbhiḥ sanīḷā agnirdevatvā viśvānyaśyāḥ ॥६॥ nakiṣṭa etā vratā minanti nṛbhyo yadebhyaḥ śruṣṭiṃ cakartha ॥७॥ tattu te daṃso yadahansamānairnṛbhiryadyukto vive rapāṃsi ॥८॥ uṣo na jāro vibhāvosraḥ saṃjñātarūpaściketadasmai ॥९॥ tmanā vahanto duro vyṛṇvannavanta viśve svardṛśīke ॥१०॥

“Hymn to Agni, bright as Dawn's lover, who fills the two joined worlds with light — 10 verses. (after R.T.H. Griffith)”

vanema pūrvīraryo manīṣā agniḥ suśoko viśvānyaśyāḥ ॥१॥ ā daivyāni vratā cikitvānā mānuṣasya janasya janma ॥२॥ garbho yo apāṃ garbho vanānāṃ garbhaśca sthātāṃ garbhaścarathām ॥३॥ adrau cidasmā antarduroṇe viśāṃ na viśvo amṛtaḥ svādhīḥ ॥४॥ sa hi kṣapāvām̐ agnī rayīṇāṃ dāśadyo asmā araṃ sūktaiḥ ॥५॥ etā cikitvo bhūmā ni pāhi devānāṃ janma martām̐śca vidvān ॥६॥ vardhānyaṃ pūrvīḥ kṣapo virūpā sthātuśca rathamṛtapravītam ॥७॥ arādhi hotā svarniṣattaḥ kṛṇvanviśvānyapāṃsi satyā ॥८॥ goṣu praśastiṃ vaneṣu dhiṣe bharanta viśve baliṃ svarṇaḥ ॥९॥ vi tvā naraḥ purutrā saparyanpiturna jivrervi vedo bharanta ॥१०॥ sādhurna gṛdhnurasteva śūro yāteva bhīmastveṣaḥ samatsu ॥११॥

“Hymn to Agni, observer of the heavenly laws, asked to pervade the worshipper's rites — 11 verses. (after R.T.H. Griffith)”