Sanskrit Corpus

upa pra jinvannuśatīruśantaṃ patiṃ na nityaṃ janayaḥ sanīḷāḥ । svasāraḥ śyāvīmaruṣīmajuṣrañcitramucchantīmuṣasaṃ na gāvaḥ ॥१॥ vīḷu ciddṛḷhā pitaro na ukthairadriṃ rujannaṅgiraso raveṇa । cakrurdivo bṛhato gātumasme ahaḥ svarvividuḥ ketumusrāḥ ॥२॥ dadhannṛtaṃ dhanayannasya dhītimādidaryo didhiṣvo vibhṛtrāḥ । atṛṣyantīrapaso yantyacchā devāñjanma prayasā vardhayantīḥ ॥३॥ mathīdyadīṃ vibhṛto mātariśvā gṛhegṛhe śyeto jenyo bhūt । ādīṃ rājñe na sahīyase sacā sannā dūtyaṃ bhṛgavāṇo vivāya ॥४॥ mahe yatpitra īṃ rasaṃ dive karava tsaratpṛśanyaścikitvān । sṛjadastā dhṛṣatā didyumasmai svāyāṃ devo duhitari tviṣiṃ dhāt ॥५॥ sva ā yastubhyaṃ dama ā vibhāti namo vā dāśāduśato anu dyūn । vardho agne vayo asya dvibarhā yāsadrāyā sarathaṃ yaṃ junāsi ॥६॥ agniṃ viśvā abhi pṛkṣaḥ sacante samudraṃ na sravataḥ sapta yahvīḥ । na jāmibhirvi cikite vayo no vidā deveṣu pramatiṃ cikitvān ॥७॥ ā yadiṣe nṛpatiṃ teja ānaṭ chuci reto niṣiktaṃ dyaurabhīke । agniḥ śardhamanavadyaṃ yuvānaṃ svādhyaṃ janayatsūdayacca ॥८॥ mano na yo'dhvanaḥ sadya etyekaḥ satrā sūro vasva īśe । rājānā mitrāvaruṇā supāṇī goṣu priyamamṛtaṃ rakṣamāṇā ॥९॥ mā no agne sakhyā pitryāṇi pra marṣiṣṭhā abhi viduṣkaviḥ san । nabho na rūpaṃ jarimā mināti purā tasyā abhiśasteradhīhi ॥१०॥

“Hymn to Agni, urged forward like a husband by loving wives — 10 verses. (after R.T.H. Griffith)”

ni kāvyā vedhasaḥ śaśvataskarhaste dadhāno naryā purūṇi । agnirbhuvadrayipatī rayīṇāṃ satrā cakrāṇo amṛtāni viśvā ॥१॥ asme vatsaṃ pari ṣantaṃ na vindannicchanto viśve amṛtā amūrāḥ । śramayuvaḥ padavyo dhiyaṃdhāstasthuḥ pade parame cārvagneḥ ॥२॥ tisro yadagne śaradastvāmicchuciṃ ghṛtena śucayaḥ saparyān । nāmāni ciddadhire yajñiyānyasūdayanta tanvaḥ sujātāḥ ॥३॥ ā rodasī bṛhatī vevidānāḥ pra rudriyā jabhrire yajñiyāsaḥ । vidanmarto nemadhitā cikitvānagniṃ pade parame tasthivāṃsam ॥४॥ saṃjānānā upa sīdannabhijñu patnīvanto namasyaṃ namasyan । ririkvāṃsastanvaḥ kṛṇvata svāḥ sakhā sakhyurnimiṣi rakṣamāṇāḥ ॥५॥ triḥ sapta yadguhyāni tve itpadāvidannihitā yajñiyāsaḥ । tebhī rakṣante amṛtaṃ sajoṣāḥ paśūñca sthātṝñcarathaṃ ca pāhi ॥६॥ vidvām̐ agne vayunāni kṣitīnāṃ vyānuṣakchurudho jīvase dhāḥ । antarvidvām̐ adhvano devayānānatandro dūto abhavo havirvāṭ ॥७॥ svādhyo diva ā sapta yahvī rāyo duro vyṛtajñā ajānan । vidadgavyaṃ saramā dṛḷhamūrvaṃ yenā nu kaṃ mānuṣī bhojate viṭ ॥८॥ ā ye viśvā svapatyāni tasthuḥ kṛṇvānāso amṛtatvāya gātum । mahnā mahadbhiḥ pṛthivī vi tasthe mātā putrairaditirdhāyase veḥ ॥९॥ adhi śriyaṃ ni dadhuścārumasmindivo yadakṣī amṛtā akṛṇvan । adha kṣaranti sindhavo na sṛṣṭāḥ pra nīcīragne aruṣīrajānan ॥१०॥

“Hymn to Agni, the treasure-lord of treasures — 10 verses. (after R.T.H. Griffith)”

rayirna yaḥ pitṛvitto vayodhāḥ supraṇītiścikituṣo na śāsuḥ । syonaśīratithirna prīṇāno hoteva sadma vidhato vi tārīt ॥१॥ devo na yaḥ savitā satyamanmā kratvā nipāti vṛjanāni viśvā । purupraśasto amatirna satya ātmeva śevo didhiṣāyyo bhūt ॥२॥ devo na yaḥ pṛthivīṃ viśvadhāyā upakṣeti hitamitro na rājā । puraḥsadaḥ śarmasado na vīrā anavadyā patijuṣṭeva nārī ॥३॥ taṃ tvā naro dama ā nityamiddhamagne sacanta kṣitiṣu dhruvāsu । adhi dyumnaṃ ni dadhurbhūryasminbhavā viśvāyurdharuṇo rayīṇām ॥४॥ vi pṛkṣo agne maghavāno aśyurvi sūrayo dadato viśvamāyuḥ । sanema vājaṃ samitheṣvaryo bhāgaṃ deveṣu śravase dadhānāḥ ॥५॥ ṛtasya hi dhenavo vāvaśānāḥ smadūdhnīḥ pīpayanta dyubhaktāḥ । parāvataḥ sumatiṃ bhikṣamāṇā vi sindhavaḥ samayā sasruradrim ॥६॥ tve agne sumatiṃ bhikṣamāṇā divi śravo dadhire yajñiyāsaḥ । naktā ca cakruruṣasā virūpe kṛṣṇaṃ ca varṇamaruṇaṃ ca saṃ dhuḥ ॥७॥ yānrāye martānsuṣūdo agne te syāma maghavāno vayaṃ ca । chāyeva viśvaṃ bhuvanaṃ sisakṣyāpaprivānrodasī antarikṣam ॥८॥ arvadbhiragne arvato nṛbhirnṝnvīrairvīrānvanuyāmā tvotāḥ । īśānāsaḥ pitṛvittasya rāyo vi sūrayaḥ śatahimā no aśyuḥ ॥९॥ etā te agna ucathāni vedho juṣṭāni santu manase hṛde ca । śakema rāyaḥ sudhuro yamaṃ te'dhi śravo devabhaktaṃ dadhānāḥ ॥१०॥

“Hymn to Agni, the truthful protector of all acts of vigour — 10 verses. (after R.T.H. Griffith)”

upaprayanto adhvaraṃ mantraṃ vocemāgnaye । āre asme ca śṛṇvate ॥१॥ yaḥ snīhitīṣu pūrvyaḥ saṃjagmānāsu kṛṣṭiṣu । arakṣaddāśuṣe gayam ॥२॥ uta bruvantu jantava udagnirvṛtrahājani । dhanaṃjayo raṇeraṇe ॥३॥ yasya dūto asi kṣaye veṣi havyāni vītaye । dasmatkṛṇoṣyadhvaram ॥४॥ tamitsuhavyamaṅgiraḥ sudevaṃ sahaso yaho । janā āhuḥ subarhiṣam ॥५॥ ā ca vahāsi tām̐ iha devām̐ upa praśastaye । havyā suścandra vītaye ॥६॥ na yorupabdiraśvyaḥ śṛṇve rathasya kaccana । yadagne yāsi dūtyam ॥७॥ tvoto vājyahrayo'bhi pūrvasmādaparaḥ । pra dāśvām̐ agne asthāt ॥८॥ uta dyumatsuvīryaṃ bṛhadagne vivāsasi । devebhyo deva dāśuṣe ॥९॥

“Hymn to Agni, who hears the worshippers even from afar — 9 verses. (after R.T.H. Griffith)”

juṣasva saprathastamaṃ vaco devapsarastamam । havyā juhvāna āsani ॥१॥ athā te aṅgirastamāgne vedhastama priyam । vocema brahma sānasi ॥२॥ kaste jāmirjanānāmagne ko dāśvadhvaraḥ । ko ha kasminnasi śritaḥ ॥३॥ tvaṃ jāmirjanānāmagne mitro asi priyaḥ । sakhā sakhibhya īḍyaḥ ॥४॥ yajā no mitrāvaruṇā yajā devām̐ ṛtaṃ bṛhat । agne yakṣi svaṃ damam ॥५॥

“Hymn to Agni, to whom the offerings are poured and the loudest hymn is sung — 5 verses. (after R.T.H. Griffith)”

kā ta upetirmanaso varāya bhuvadagne śaṃtamā kā manīṣā । ko vā yajñaiḥ pari dakṣaṃ ta āpa kena vā te manasā dāśema ॥१॥ ehyagna iha hotā ni ṣīdādabdhaḥ su puraetā bhavā naḥ । avatāṃ tvā rodasī viśvaminve yajā mahe saumanasāya devān ॥२॥ pra su viśvānrakṣaso dhakṣyagne bhavā yajñānāmabhiśastipāvā । athā vaha somapatiṃ haribhyāmātithyamasmai cakṛmā sudāvne ॥३॥ prajāvatā vacasā vahnirāsā ca huve ni ca satsīha devaiḥ । veṣi hotramuta potraṃ yajatra bodhi prayantarjanitarvasūnām ॥४॥ yathā viprasya manuṣo havirbhirdevām̐ ayajaḥ kavibhiḥ kaviḥ san । evā hotaḥ satyatara tvamadyāgne mandrayā juhvā yajasva ॥५॥

“Hymn to Agni, sought by the mind with hymns of praise — 5 verses. (after R.T.H. Griffith)”

kathā dāśemāgnaye kāsmai devajuṣṭocyate bhāmine gīḥ । yo martyeṣvamṛta ṛtāvā hotā yajiṣṭha itkṛṇoti devān ॥१॥ yo adhvareṣu śaṃtama ṛtāvā hotā tamū namobhirā kṛṇudhvam । agniryadvermartāya devānsa cā bodhāti manasā yajāti ॥२॥ sa hi kratuḥ sa maryaḥ sa sādhurmitro na bhūdadbhutasya rathīḥ । taṃ medheṣu prathamaṃ devayantīrviśa upa bruvate dasmamārīḥ ॥३॥ sa no nṛṇāṃ nṛtamo riśādā agnirgiro'vasā vetu dhītim । tanā ca ye maghavānaḥ śaviṣṭhā vājaprasūtā iṣayanta manma ॥४॥ evāgnirgotamebhirṛtāvā viprebhirastoṣṭa jātavedāḥ । sa eṣu dyumnaṃ pīpayatsa vājaṃ sa puṣṭiṃ yāti joṣamā cikitvān ॥५॥

“Hymn to Agni, the deathless herald true to Law, asked what oblation shall please him — 5 verses. (after R.T.H. Griffith)”

abhi tvā gotamā girā jātavedo vicarṣaṇe । dyumnairabhi pra ṇonumaḥ ॥१॥ tamu tvā gotamo girā rāyaskāmo duvasyati । dyumnairabhi pra ṇonumaḥ ॥२॥ tamu tvā vājasātamamaṅgirasvaddhavāmahe । dyumnairabhi pra ṇonumaḥ ॥३॥ tamu tvā vṛtrahantamaṃ yo dasyūm̐ravadhūnuṣe । dyumnairabhi pra ṇonumaḥ ॥४॥ avocāma rahūgaṇā agnaye madhumadvacaḥ । dyumnairabhi pra ṇonumaḥ ॥५॥

“Hymn to Agni Jātavedas, exalted by the Gotamas with sacred song — 5 verses. (after R.T.H. Griffith)”

hiraṇyakeśo rajaso visāre'hirdhunirvāta iva dhrajīmān । śucibhrājā uṣaso navedā yaśasvatīrapasyuvo na satyāḥ ॥१॥ ā te suparṇā aminantam̐ evaiḥ kṛṣṇo nonāva vṛṣabho yadīdam । śivābhirna smayamānābhirāgātpatanti miha stanayantyabhrā ॥२॥ yadīmṛtasya payasā piyāno nayannṛtasya pathibhī rajiṣṭhaiḥ । aryamā mitro varuṇaḥ parijmā tvacaṃ pṛñcantyuparasya yonau ॥३॥ agne vājasya gomata īśānaḥ sahaso yaho । asme dhehi jātavedo mahi śravaḥ ॥४॥ sa idhāno vasuṣkaviragnirīḷenyo girā । revadasmabhyaṃ purvaṇīka dīdihi ॥५॥ kṣapo rājannuta tmanāgne vastorutoṣasaḥ । sa tigmajambha rakṣaso daha prati ॥६॥ avā no agna ūtibhirgāyatrasya prabharmaṇi । viśvāsu dhīṣu vandya ॥७॥ ā no agne rayiṃ bhara satrāsāhaṃ vareṇyam । viśvāsu pṛtsu duṣṭaram ॥८॥ ā no agne sucetunā rayiṃ viśvāyupoṣasam । mārḍīkaṃ dhehi jīvase ॥९॥ pra pūtāstigmaśociṣe vāco gotamāgnaye । bharasva sumnayurgiraḥ ॥१०॥ yo no agne'bhidāsatyanti dūre padīṣṭa saḥ । asmākamidvṛdhe bhava ॥११॥ sahasrākṣo vicarṣaṇiragnī rakṣāṃsi sedhati । hotā gṛṇīta ukthyaḥ ॥१२॥

“Hymn to Agni, golden-tressed in mid-air, like a rushing tempest — 12 verses. (after R.T.H. Griffith)”

itthā hi soma inmade brahmā cakāra vardhanam । śaviṣṭha vajrinnojasā pṛthivyā niḥ śaśā ahimarcannanu svarājyam ॥१॥ sa tvāmadadvṛṣā madaḥ somaḥ śyenābhṛtaḥ sutaḥ । yenā vṛtraṃ niradbhyo jaghantha vajrinnojasārcannanu svarājyam ॥२॥ prehyabhīhi dhṛṣṇuhi na te vajro ni yaṃsate । indra nṛmṇaṃ hi te śavo hano vṛtraṃ jayā apo'rcannanu svarājyam ॥३॥ nirindra bhūmyā adhi vṛtraṃ jaghantha nirdivaḥ । sṛjā marutvatīrava jīvadhanyā imā apo'rcannanu svarājyam ॥४॥ indro vṛtrasya dodhataḥ sānuṃ vajreṇa hīḷitaḥ । abhikramyāva jighnate'paḥ sarmāya codayannarcannanu svarājyam ॥५॥ adhi sānau ni jighnate vajreṇa śataparvaṇā । mandāna indro andhasaḥ sakhibhyo gātumicchatyarcannanu svarājyam ॥६॥ indra tubhyamidadrivo'nuttaṃ vajrinvīryam । yaddha tyaṃ māyinaṃ mṛgaṃ tamu tvaṃ māyayāvadhīrarcannanu svarājyam ॥७॥ vi te vajrāso asthirannavatiṃ nāvyā anu । mahatta indra vīryaṃ bāhvoste balaṃ hitamarcannanu svarājyam ॥८॥ sahasraṃ sākamarcata pari ṣṭobhata viṃśatiḥ । śatainamanvanonavurindrāya brahmodyatamarcannanu svarājyam ॥९॥ indro vṛtrasya taviṣīṃ nirahansahasā sahaḥ । mahattadasya pauṃsyaṃ vṛtraṃ jaghanvām̐ asṛjadarcannanu svarājyam ॥१०॥ ime cittava manyave vepete bhiyasā mahī । yadindra vajrinnojasā vṛtraṃ marutvām̐ avadhīrarcannanu svarājyam ॥११॥ na vepasā na tanyatendraṃ vṛtro vi bībhayat । abhyenaṃ vajra āyasaḥ sahasrabhṛṣṭirāyatārcannanu svarājyam ॥१२॥ yadvṛtraṃ tava cāśaniṃ vajreṇa samayodhayaḥ । ahimindra jighāṃsato divi te badbadhe śavo'rcannanu svarājyam ॥१३॥ abhiṣṭane te adrivo yatsthā jagacca rejate । tvaṣṭā cittava manyava indra vevijyate bhiyārcannanu svarājyam ॥१४॥ nahi nu yādadhīmasīndraṃ ko vīryā paraḥ । tasminnṛmṇamuta kratuṃ devā ojāṃsi saṃ dadhurarcannanu svarājyam ॥१५॥ yāmatharvā manuṣpitā dadhyaṅdhiyamatnata । tasminbrahmāṇi pūrvathendra ukthā samagmatārcannanu svarājyam ॥१६॥

“Hymn to Indra, exalted by the Soma, who drove the Dragon from the earth — 16 verses. (after R.T.H. Griffith)”

indro madāya vāvṛdhe śavase vṛtrahā nṛbhiḥ । taminmahatsvājiṣūtemarbhe havāmahe sa vājeṣu pra no'viṣat ॥१॥ asi hi vīra senyo'si bhūri parādadiḥ । asi dabhrasya cidvṛdho yajamānāya śikṣasi sunvate bhūri te vasu ॥२॥ yadudīrata ājayo dhṛṣṇave dhīyate dhanā । yukṣvā madacyutā harī kaṃ hanaḥ kaṃ vasau dadho'smām̐ indra vasau dadhaḥ ॥३॥ kratvā mahām̐ anuṣvadhaṃ bhīma ā vāvṛdhe śavaḥ । śriya ṛṣva upākayorni śiprī harivāndadhe hastayorvajramāyasam ॥४॥ ā paprau pārthivaṃ rajo badbadhe rocanā divi । na tvāvām̐ indra kaścana na jāto na janiṣyate'ti viśvaṃ vavakṣitha ॥५॥ yo aryo martabhojanaṃ parādadāti dāśuṣe । indro asmabhyaṃ śikṣatu vi bhajā bhūri te vasu bhakṣīya tava rādhasaḥ ॥६॥ mademade hi no dadiryūthā gavāmṛjukratuḥ । saṃ gṛbhāya purū śatobhayāhastyā vasu śiśīhi rāya ā bhara ॥७॥ mādayasva sute sacā śavase śūra rādhase । vidmā hi tvā purūvasumupa kāmānsasṛjmahe'thā no'vitā bhava ॥८॥ ete ta indra jantavo viśvaṃ puṣyanti vāryam । antarhi khyo janānāmaryo vedo adāśuṣāṃ teṣāṃ no veda ā bhara ॥९॥

“Hymn to Indra, the Vṛtra-slayer, invoked in battles great and small — 9 verses. (after R.T.H. Griffith)”

upo ṣu śṛṇuhī giro maghavanmātathā iva । yadā naḥ sūnṛtāvataḥ kara ādarthayāsa idyojā nvindra te harī ॥१॥ akṣannamīmadanta hyava priyā adhūṣata । astoṣata svabhānavo viprā naviṣṭhayā matī yojā nvindra te harī ॥२॥ susaṃdṛśaṃ tvā vayaṃ maghavanvandiṣīmahi । pra nūnaṃ pūrṇavandhura stuto yāhi vaśām̐ anu yojā nvindra te harī ॥३॥ sa ghā taṃ vṛṣaṇaṃ rathamadhi tiṣṭhāti govidam । yaḥ pātraṃ hāriyojanaṃ pūrṇamindra ciketati yojā nvindra te harī ॥४॥ yuktaste astu dakṣiṇa uta savyaḥ śatakrato । tena jāyāmupa priyāṃ mandāno yāhyandhaso yojā nvindra te harī ॥५॥ yunajmi te brahmaṇā keśinā harī upa pra yāhi dadhiṣe gabhastyoḥ । uttvā sutāso rabhasā amandiṣuḥ pūṣaṇvānvajrinsamu patnyāmadaḥ ॥६॥

“Hymn to Indra (Maghavan), asked to listen graciously to the songs — 6 verses. (after R.T.H. Griffith)”

aśvāvati prathamo goṣu gacchati suprāvīrindra martyastavotibhiḥ । tamitpṛṇakṣi vasunā bhavīyasā sindhumāpo yathābhito vicetasaḥ ॥१॥ āpo na devīrupa yanti hotriyamavaḥ paśyanti vitataṃ yathā rajaḥ । prācairdevāsaḥ pra ṇayanti devayuṃ brahmapriyaṃ joṣayante varā iva ॥२॥ adhi dvayoradadhā ukthyaṃ vaco yatasrucā mithunā yā saparyataḥ । asaṃyatto vrate te kṣeti puṣyati bhadrā śaktiryajamānāya sunvate ॥३॥ ādaṅgirāḥ prathamaṃ dadhire vaya iddhāgnayaḥ śamyā ye sukṛtyayā । sarvaṃ paṇeḥ samavindanta bhojanamaśvāvantaṃ gomantamā paśuṃ naraḥ ॥४॥ yajñairatharvā prathamaḥ pathastate tataḥ sūryo vratapā vena ājani । ā gā ājaduśanā kāvyaḥ sacā yamasya jātamamṛtaṃ yajāmahe ॥५॥ barhirvā yatsvapatyāya vṛjyate'rko vā ślokamāghoṣate divi । grāvā yatra vadati kārurukthyastasyedindro abhipitveṣu raṇyati ॥६॥

“Hymn to Indra, by whose aid the mortal goes foremost in wealth of horses and kine — 6 verses. (after R.T.H. Griffith)”

asāvi soma indra te śaviṣṭha dhṛṣṇavā gahi । ā tvā pṛṇaktvindriyaṃ rajaḥ sūryo na raśmibhiḥ ॥१॥ indramiddharī vahato'pratidhṛṣṭaśavasam । ṛṣīṇāṃ ca stutīrupa yajñaṃ ca mānuṣāṇām ॥२॥ ā tiṣṭha vṛtrahanrathaṃ yuktā te brahmaṇā harī । arvācīnaṃ su te mano grāvā kṛṇotu vagnunā ॥३॥ imamindra sutaṃ piba jyeṣṭhamamartyaṃ madam । śukrasya tvābhyakṣarandhārā ṛtasya sādane ॥४॥ indrāya nūnamarcatokthāni ca bravītana । sutā amatsurindavo jyeṣṭhaṃ namasyatā sahaḥ ॥५॥ nakiṣṭvadrathītaro harī yadindra yacchase । nakiṣṭvānu majmanā nakiḥ svaśva ānaśe ॥६॥ ya eka idvidayate vasu martāya dāśuṣe । īśāno apratiṣkuta indro aṅga ॥७॥ kadā martamarādhasaṃ padā kṣumpamiva sphurat । kadā naḥ śuśravadgira indro aṅga ॥८॥ yaściddhi tvā bahubhya ā sutāvām̐ āvivāsati । ugraṃ tatpatyate śava indro aṅga ॥९॥ svādoritthā viṣūvato madhvaḥ pibanti gauryaḥ । yā indreṇa sayāvarīrvṛṣṇā madanti śobhase vasvīranu svarājyam ॥१०॥ tā asya pṛśanāyuvaḥ somaṃ śrīṇanti pṛśnayaḥ । priyā indrasya dhenavo vajraṃ hinvanti sāyakaṃ vasvīranu svarājyam ॥११॥ tā asya namasā sahaḥ saparyanti pracetasaḥ । vratānyasya saścire purūṇi pūrvacittaye vasvīranu svarājyam ॥१२॥ indro dadhīco asthabhirvṛtrāṇyapratiṣkutaḥ । jaghāna navatīrnava ॥१३॥ icchannaśvasya yacchiraḥ parvateṣvapaśritam । tadvidaccharyaṇāvati ॥१४॥ atrāha goramanvata nāma tvaṣṭurapīcyam । itthā candramaso gṛhe ॥१५॥ ko adya yuṅkte dhuri gā ṛtasya śimīvato bhāmino durhṛṇāyūn । āsanniṣūnhṛtsvaso mayobhūnya eṣāṃ bhṛtyāmṛṇadhatsa jīvāt ॥१६॥ ka īṣate tujyate ko bibhāya ko maṃsate santamindraṃ ko anti । kastokāya ka ibhāyota rāye'dhi bravattanve ko janāya ॥१७॥ ko agnimīṭṭe haviṣā ghṛtena srucā yajātā ṛtubhirdhruvebhiḥ । kasmai devā ā vahānāśu homa ko maṃsate vītihotraḥ sudevaḥ ॥१८॥ tvamaṅga pra śaṃsiṣo devaḥ śaviṣṭha martyam । na tvadanyo maghavannasti marḍitendra bravīmi te vacaḥ ॥१९॥ mā te rādhāṃsi mā ta ūtayo vaso'smānkadā canā dabhan । viśvā ca na upamimīhi mānuṣa vasūni carṣaṇibhya ā ॥२०॥

“Hymn to Indra, whose vigour fills mid-air as the Sun fills it — 20 verses. (after R.T.H. Griffith)”

pra ye śumbhante janayo na saptayo yāmanrudrasya sūnavaḥ sudaṃsasaḥ । rodasī hi marutaścakrire vṛdhe madanti vīrā vidatheṣu ghṛṣvayaḥ ॥१॥ ta ukṣitāso mahimānamāśata divi rudrāso adhi cakrire sadaḥ । arcanto arkaṃ janayanta indriyamadhi śriyo dadhire pṛśnimātaraḥ ॥२॥ gomātaro yacchubhayante añjibhistanūṣu śubhrā dadhire virukmataḥ । bādhante viśvamabhimātinamapa vartmānyeṣāmanu rīyate ghṛtam ॥३॥ vi ye bhrājante sumakhāsa ṛṣṭibhiḥ pracyāvayanto acyutā cidojasā । manojuvo yanmaruto ratheṣvā vṛṣavrātāsaḥ pṛṣatīrayugdhvam ॥४॥ pra yadratheṣu pṛṣatīrayugdhvaṃ vāje adriṃ maruto raṃhayantaḥ । utāruṣasya vi ṣyanti dhārāścarmevodabhirvyundanti bhūma ॥५॥ ā vo vahantu saptayo raghuṣyado raghupatvānaḥ pra jigāta bāhubhiḥ । sīdatā barhiruru vaḥ sadaskṛtaṃ mādayadhvaṃ maruto madhvo andhasaḥ ॥६॥ te'vardhanta svatavaso mahitvanā nākaṃ tasthururu cakrire sadaḥ । viṣṇuryaddhāvadvṛṣaṇaṃ madacyutaṃ vayo na sīdannadhi barhiṣi priye ॥७॥ śūrā ivedyuyudhayo na jagmayaḥ śravasyavo na pṛtanāsu yetire । bhayante viśvā bhuvanā marudbhyo rājāna iva tveṣasaṃdṛśo naraḥ ॥८॥ tvaṣṭā yadvajraṃ sukṛtaṃ hiraṇyayaṃ sahasrabhṛṣṭiṃ svapā avartayat । dhatta indro naryapāṃsi kartave'hanvṛtraṃ nirapāmaubjadarṇavam ॥९॥ ūrdhvaṃ nunudre'vataṃ ta ojasā dādṛhāṇaṃ cidbibhidurvi parvatam । dhamanto vāṇaṃ marutaḥ sudānavo made somasya raṇyāni cakrire ॥१०॥ jihmaṃ nunudre'vataṃ tayā diśāsiñcannutsaṃ gotamāya tṛṣṇaje । ā gacchantīmavasā citrabhānavaḥ kāmaṃ viprasya tarpayanta dhāmabhiḥ ॥११॥ yā vaḥ śarma śaśamānāya santi tridhātūni dāśuṣe yacchatādhi । asmabhyaṃ tāni maruto vi yanta rayiṃ no dhatta vṛṣaṇaḥ suvīram ॥१२॥

“Hymn to the Maruts, the glancing sons of Rudra, doers of mighty deeds — 12 verses. (after R.T.H. Griffith)”

maruto yasya hi kṣaye pāthā divo vimahasaḥ । sa sugopātamo janaḥ ॥१॥ yajñairvā yajñavāhaso viprasya vā matīnām । marutaḥ śṛṇutā havam ॥२॥ uta vā yasya vājino'nu vipramatakṣata । sa gantā gomati vraje ॥३॥ asya vīrasya barhiṣi sutaḥ somo diviṣṭiṣu । ukthaṃ madaśca śasyate ॥४॥ asya śroṣantvā bhuvo viśvā yaścarṣaṇīrabhi । sūraṃ citsasruṣīriṣaḥ ॥५॥ pūrvībhirhi dadāśima śaradbhirmaruto vayam । avobhiścarṣaṇīnām ॥६॥ subhagaḥ sa prayajyavo maruto astu martyaḥ । yasya prayāṃsi parṣatha ॥७॥ śaśamānasya vā naraḥ svedasya satyaśavasaḥ । vidā kāmasya venataḥ ॥८॥ yūyaṃ tatsatyaśavasa āviṣkarta mahitvanā । vidhyatā vidyutā rakṣaḥ ॥९॥ gūhatā guhyaṃ tamo vi yāta viśvamatriṇam । jyotiṣkartā yaduśmasi ॥१०॥

“Hymn to the Maruts, the best of guardians, who drink in the righteous man's dwelling — 10 verses. (after R.T.H. Griffith)”

pratvakṣasaḥ pratavaso virapśino'nānatā avithurā ṛjīṣiṇaḥ । juṣṭatamāso nṛtamāso añjibhirvyānajre ke cidusrā iva stṛbhiḥ ॥१॥ upahvareṣu yadacidhvaṃ yayiṃ vaya iva marutaḥ kena citpathā । ścotanti kośā upa vo ratheṣvā ghṛtamukṣatā madhuvarṇamarcate ॥२॥ praiṣāmajmeṣu vithureva rejate bhūmiryāmeṣu yaddha yuñjate śubhe । te krīḷayo dhunayo bhrājadṛṣṭayaḥ svayaṃ mahitvaṃ panayanta dhūtayaḥ ॥३॥ sa hi svasṛtpṛṣadaśvo yuvā gaṇo'yā īśānastaviṣībhirāvṛtaḥ । asi satya ṛṇayāvānedyo'syā dhiyaḥ prāvitāthā vṛṣā gaṇaḥ ॥४॥ pituḥ pratnasya janmanā vadāmasi somasya jihvā pra jigāti cakṣasā । yadīmindraṃ śamyṛkvāṇa āśatādinnāmāni yajñiyāni dadhire ॥५॥ śriyase kaṃ bhānubhiḥ saṃ mimikṣire te raśmibhista ṛkvabhiḥ sukhādayaḥ । te vāśīmanta iṣmiṇo abhīravo vidre priyasya mārutasya dhāmnaḥ ॥६॥

“Hymn to the Maruts, loud singers, active and full of strength — 6 verses. (after R.T.H. Griffith)”

ā vidyunmadbhirmarutaḥ svarkai rathebhiryāta ṛṣṭimadbhiraśvaparṇaiḥ । ā varṣiṣṭhayā na iṣā vayo na paptatā sumāyāḥ ॥१॥ te'ruṇebhirvaramā piśaṅgaiḥ śubhe kaṃ yānti rathatūrbhiraśvaiḥ । rukmo na citraḥ svadhitīvānpavyā rathasya jaṅghananta bhūma ॥२॥ śriye kaṃ vo adhi tanūṣu vāśīrmedhā vanā na kṛṇavanta ūrdhvā । yuṣmabhyaṃ kaṃ marutaḥ sujātāstuvidyumnāso dhanayante adrim ॥३॥ ahāni gṛdhrāḥ paryā va āgurimāṃ dhiyaṃ vārkāryāṃ ca devīm । brahma kṛṇvanto gotamāso arkairūrdhvaṃ nunudra utsadhiṃ pibadhyai ॥४॥ etattyanna yojanamaceti sasvarha yanmaruto gotamo vaḥ । paśyanhiraṇyacakrānayodaṃṣṭrānvidhāvato varāhūn ॥५॥ eṣā syā vo maruto'nubhartrī prati ṣṭobhati vāghato na vāṇī । astobhayadvṛthāsāmanu svadhāṃ gabhastyoḥ ॥६॥

“Hymn to the Maruts, riding on their lightning-laden cars — 6 verses. (after R.T.H. Griffith)”

ā no bhadrāḥ kratavo yantu viśvato'dabdhāso aparītāsa udbhidaḥ । devā no yathā sadamidvṛdhe asannaprāyuvo rakṣitāro divedive ॥१॥ devānāṃ bhadrā sumatirṛjūyatāṃ devānāṃ rātirabhi no ni vartatām । devānāṃ sakhyamupa sedimā vayaṃ devā na āyuḥ pra tirantu jīvase ॥२॥ tānpūrvayā nividā hūmahe vayaṃ bhagaṃ mitramaditiṃ dakṣamasridham । aryamaṇaṃ varuṇaṃ somamaśvinā sarasvatī naḥ subhagā mayaskarat ॥३॥ tanno vāto mayobhu vātu bheṣajaṃ tanmātā pṛthivī tatpitā dyauḥ । tadgrāvāṇaḥ somasuto mayobhuvastadaśvinā śṛṇutaṃ dhiṣṇyā yuvam ॥४॥ tamīśānaṃ jagatastasthuṣaspatiṃ dhiyaṃjinvamavase hūmahe vayam । pūṣā no yathā vedasāmasadvṛdhe rakṣitā pāyuradabdhaḥ svastaye ॥५॥ svasti na indro vṛddhaśravāḥ svasti naḥ pūṣā viśvavedāḥ । svasti nastārkṣyo ariṣṭanemiḥ svasti no bṛhaspatirdadhātu ॥६॥ pṛṣadaśvā marutaḥ pṛśnimātaraḥ śubhaṃyāvāno vidatheṣu jagmayaḥ । agnijihvā manavaḥ sūracakṣaso viśve no devā avasā gamanniha ॥७॥ bhadraṃ karṇebhiḥ śṛṇuyāma devā bhadraṃ paśyemākṣabhiryajatrāḥ । sthirairaṅgaistuṣṭuvāṃsastanūbhirvyaśema devahitaṃ yadāyuḥ ॥८॥ śataminnu śarado anti devā yatrā naścakrā jarasaṃ tanūnām । putrāso yatra pitaro bhavanti mā no madhyā rīriṣatāyurgantoḥ ॥९॥ aditirdyauraditirantarikṣamaditirmātā sa pitā sa putraḥ । viśve devā aditiḥ pañca janā aditirjātamaditirjanitvam ॥१०॥

“Hymn to the Viśvedevas, asking auspicious powers from every side — 10 verses. (after R.T.H. Griffith)”

ṛjunītī no varuṇo mitro nayatu vidvān । aryamā devaiḥ sajoṣāḥ ॥१॥ te hi vasvo vasavānāste apramūrā mahobhiḥ । vratā rakṣante viśvāhā ॥२॥ te asmabhyaṃ śarma yaṃsannamṛtā martyebhyaḥ । bādhamānā apa dviṣaḥ ॥३॥ vi naḥ pathaḥ suvitāya ciyantvindro marutaḥ । pūṣā bhago vandyāsaḥ ॥४॥ uta no dhiyo goagrāḥ pūṣanviṣṇavevayāvaḥ । kartā naḥ svastimataḥ ॥५॥ madhu vātā ṛtāyate madhu kṣaranti sindhavaḥ । mādhvīrnaḥ santvoṣadhīḥ ॥६॥ madhu naktamutoṣaso madhumatpārthivaṃ rajaḥ । madhu dyaurastu naḥ pitā ॥७॥ madhumānno vanaspatirmadhumām̐ astu sūryaḥ । mādhvīrgāvo bhavantu naḥ ॥८॥ śaṃ no mitraḥ śaṃ varuṇaḥ śaṃ no bhavatvaryamā । śaṃ na indro bṛhaspatiḥ śaṃ no viṣṇururukramaḥ ॥९॥

“Hymn to Varuṇa, Mitra and Aryaman among the gods, for guidance — 9 verses. (after R.T.H. Griffith)”

tvaṃ soma pra cikito manīṣā tvaṃ rajiṣṭhamanu neṣi panthām । tava praṇītī pitaro na indo deveṣu ratnamabhajanta dhīrāḥ ॥१॥ tvaṃ soma kratubhiḥ sukraturbhūstvaṃ dakṣaiḥ sudakṣo viśvavedāḥ । tvaṃ vṛṣā vṛṣatvebhirmahitvā dyumnebhirdyumnyabhavo nṛcakṣāḥ ॥२॥ rājño nu te varuṇasya vratāni bṛhadgabhīraṃ tava soma dhāma । śuciṣṭvamasi priyo na mitro dakṣāyyo aryamevāsi soma ॥३॥ yā te dhāmāni divi yā pṛthivyāṃ yā parvateṣvoṣadhīṣvapsu । tebhirno viśvaiḥ sumanā aheḷanrājansoma prati havyā gṛbhāya ॥४॥ tvaṃ somāsi satpatistvaṃ rājota vṛtrahā । tvaṃ bhadro asi kratuḥ ॥५॥ tvaṃ ca soma no vaśo jīvātuṃ na marāmahe । priyastotro vanaspatiḥ ॥६॥ tvaṃ soma mahe bhagaṃ tvaṃ yūna ṛtāyate । dakṣaṃ dadhāsi jīvase ॥७॥ tvaṃ naḥ soma viśvato rakṣā rājannaghāyataḥ । na riṣyettvāvataḥ sakhā ॥८॥ soma yāste mayobhuva ūtayaḥ santi dāśuṣe । tābhirno'vitā bhava ॥९॥ imaṃ yajñamidaṃ vaco jujuṣāṇa upāgahi । soma tvaṃ no vṛdhe bhava ॥१०॥ soma gīrbhiṣṭvā vayaṃ vardhayāmo vacovidaḥ । sumṛḷīko na ā viśa ॥११॥ gayasphāno amīvahā vasuvitpuṣṭivardhanaḥ । sumitraḥ soma no bhava ॥१२॥ soma rārandhi no hṛdi gāvo na yavaseṣvā । marya iva sva okye ॥१३॥ yaḥ soma sakhye tava rāraṇaddeva martyaḥ । taṃ dakṣaḥ sacate kaviḥ ॥१४॥ uruṣyā ṇo abhiśasteḥ soma ni pāhyaṃhasaḥ । sakhā suśeva edhi naḥ ॥१५॥ ā pyāyasva sametu te viśvataḥ soma vṛṣṇyam । bhavā vājasya saṃgathe ॥१६॥ ā pyāyasva madintama soma viśvebhiraṃśubhiḥ । bhavā naḥ suśravastamaḥ sakhā vṛdhe ॥१७॥ saṃ te payāṃsi samu yantu vājāḥ saṃ vṛṣṇyānyabhimātiṣāhaḥ । āpyāyamāno amṛtāya soma divi śravāṃsyuttamāni dhiṣva ॥१८॥ yā te dhāmāni haviṣā yajanti tā te viśvā paribhūrastu yajñam । gayasphānaḥ prataraṇaḥ suvīro'vīrahā pra carā soma duryān ॥१९॥ somo dhenuṃ somo arvantamāśuṃ somo vīraṃ karmaṇyaṃ dadāti । sādanyaṃ vidathyaṃ sabheyaṃ pitṛśravaṇaṃ yo dadāśadasmai ॥२०॥ aṣāḷhaṃ yutsu pṛtanāsu papriṃ svarṣāmapsāṃ vṛjanasya gopām । bhareṣujāṃ sukṣitiṃ suśravasaṃ jayantaṃ tvāmanu madema soma ॥२१॥ tvamimā oṣadhīḥ soma viśvāstvamapo ajanayastvaṃ gāḥ । tvamā tatanthorvantarikṣaṃ tvaṃ jyotiṣā vi tamo vavartha ॥२२॥ devena no manasā deva soma rāyo bhāgaṃ sahasāvannabhi yudhya । mā tvā tanadīśiṣe vīryasyobhayebhyaḥ pra cikitsā gaviṣṭau ॥२३॥

“Hymn to Soma, pre-eminent for wisdom and the worshippers' guide — 23 verses. (after R.T.H. Griffith)”

etā u tyā uṣasaḥ ketumakrata pūrve ardhe rajaso bhānumañjate । niṣkṛṇvānā āyudhānīva dhṛṣṇavaḥ prati gāvo'ruṣīryanti mātaraḥ ॥१॥ udapaptannaruṇā bhānavo vṛthā svāyujo aruṣīrgā ayukṣata । akrannuṣāso vayunāni pūrvathā ruśantaṃ bhānumaruṣīraśiśrayuḥ ॥२॥ arcanti nārīrapaso na viṣṭibhiḥ samānena yojanenā parāvataḥ । iṣaṃ vahantīḥ sukṛte sudānave viśvedaha yajamānāya sunvate ॥३॥ adhi peśāṃsi vapate nṛtūrivāporṇute vakṣa usreva barjaham । jyotirviśvasmai bhuvanāya kṛṇvatī gāvo na vrajaṃ vyuṣā āvartamaḥ ॥४॥ pratyarcī ruśadasyā adarśi vi tiṣṭhate bādhate kṛṣṇamabhvam । svaruṃ na peśo vidatheṣvañjañcitraṃ divo duhitā bhānumaśret ॥५॥ atāriṣma tamasaspāramasyoṣā ucchantī vayunā kṛṇoti । śriye chando na smayate vibhātī supratīkā saumanasāyājīgaḥ ॥६॥ bhāsvatī netrī sūnṛtānāṃ diva stave duhitā gotamebhiḥ । prajāvato nṛvato aśvabudhyānuṣo goagrām̐ upa māsi vājān ॥७॥ uṣastamaśyāṃ yaśasaṃ suvīraṃ dāsapravargaṃ rayimaśvabudhyam । sudaṃsasā śravasā yā vibhāsi vājaprasūtā subhage bṛhantam ॥८॥ viśvāni devī bhuvanābhicakṣyā pratīcī cakṣururviyā vi bhāti । viśvaṃ jīvaṃ carase bodhayantī viśvasya vācamavidanmanāyoḥ ॥९॥ punaḥpunarjāyamānā purāṇī samānaṃ varṇamabhi śumbhamānā । śvaghnīva kṛtnurvija āminānā martasya devī jarayantyāyuḥ ॥१०॥ vyūrṇvatī divo antām̐ abodhyapa svasāraṃ sanutaryuyoti । praminatī manuṣyā yugāni yoṣā jārasya cakṣasā vi bhāti ॥११॥ paśūnna citrā subhagā prathānā sindhurna kṣoda urviyā vyaśvait । aminatī daivyāni vratāni sūryasya ceti raśmibhirdṛśānā ॥१२॥ uṣastaccitramā bharāsmabhyaṃ vājinīvati । yena tokaṃ ca tanayaṃ ca dhāmahe ॥१३॥ uṣo adyeha gomatyaśvāvati vibhāvari । revadasme vyuccha sūnṛtāvati ॥१४॥ yukṣvā hi vājinīvatyaśvām̐ adyāruṇām̐ uṣaḥ । athā no viśvā saubhagānyā vaha ॥१५॥ aśvinā vartirasmadā gomaddasrā hiraṇyavat । arvāgrathaṃ samanasā ni yacchatam ॥१६॥ yāvitthā ślokamā divo jyotirjanāya cakrathuḥ । ā na ūrjaṃ vahatamaśvinā yuvam ॥१७॥ eha devā mayobhuvā dasrā hiraṇyavartanī । uṣarbudho vahantu somapītaye ॥१८॥

“Hymn to Uṣas, who raise their banner of light, with the Aśvins in the closing verses — 18 verses. (after R.T.H. Griffith)”

agnīṣomāvimaṃ su me śṛṇutaṃ vṛṣaṇā havam । prati sūktāni haryataṃ bhavataṃ dāśuṣe mayaḥ ॥१॥ agnīṣomā yo adya vāmidaṃ vacaḥ saparyati । tasmai dhattaṃ suvīryaṃ gavāṃ poṣaṃ svaśvyam ॥२॥ agnīṣomā ya āhutiṃ yo vāṃ dāśāddhaviṣkṛtim । sa prajayā suvīryaṃ viśvamāyurvyaśnavat ॥३॥ agnīṣomā ceti tadvīryaṃ vāṃ yadamuṣṇītamavasaṃ paṇiṃ gāḥ । avātirataṃ bṛsayasya śeṣo'vindataṃ jyotirekaṃ bahubhyaḥ ॥४॥ yuvametāni divi rocanānyagniśca soma sakratū adhattam । yuvaṃ sindhūm̐rabhiśasteravadyādagnīṣomāvamuñcataṃ gṛbhītān ॥५॥ ānyaṃ divo mātariśvā jabhārāmathnādanyaṃ pari śyeno adreḥ । agnīṣomā brahmaṇā vāvṛdhānoruṃ yajñāya cakrathuru lokam ॥६॥ agnīṣomā haviṣaḥ prasthitasya vītaṃ haryataṃ vṛṣaṇā juṣethām । suśarmāṇā svavasā hi bhūtamathā dhattaṃ yajamānāya śaṃ yoḥ ॥७॥ yo agnīṣomā haviṣā saparyāddevadrīcā manasā yo ghṛtena । tasya vrataṃ rakṣataṃ pātamaṃhaso viśe janāya mahi śarma yacchatam ॥८॥ agnīṣomā savedasā sahūtī vanataṃ giraḥ । saṃ devatrā babhūvathuḥ ॥९॥ agnīṣomāvanena vāṃ yo vāṃ ghṛtena dāśati । tasmai dīdayataṃ bṛhat ॥१०॥ agnīṣomāvimāni no yuvaṃ havyā jujoṣatam । ā yātamupa naḥ sacā ॥११॥ agnīṣomā pipṛtamarvato na ā pyāyantāmusriyā havyasūdaḥ । asme balāni maghavatsu dhattaṃ kṛṇutaṃ no adhvaraṃ śruṣṭimantam ॥१२॥

“Hymn to Agni and Soma, the mighty pair, asked to accept the hymn — 12 verses. (after R.T.H. Griffith)”

imaṃ stomamarhate jātavedase rathamiva saṃ mahemā manīṣayā । bhadrā hi naḥ pramatirasya saṃsadyagne sakhye mā riṣāmā vayaṃ tava ॥१॥ yasmai tvamāyajase sa sādhatyanarvā kṣeti dadhate suvīryam । sa tūtāva nainamaśnotyaṃhatiragne sakhye mā riṣāmā vayaṃ tava ॥२॥ śakema tvā samidhaṃ sādhayā dhiyastve devā haviradantyāhutam । tvamādityām̐ ā vaha tānhyuśmasyagne sakhye mā riṣāmā vayaṃ tava ॥३॥ bharāmedhmaṃ kṛṇavāmā havīṃṣi te citayantaḥ parvaṇāparvaṇā vayam । jīvātave prataraṃ sādhayā dhiyo'gne sakhye mā riṣāmā vayaṃ tava ॥४॥ viśāṃ gopā asya caranti jantavo dvipacca yaduta catuṣpadaktubhiḥ । citraḥ praketa uṣaso mahām̐ asyagne sakhye mā riṣāmā vayaṃ tava ॥५॥ tvamadhvaryuruta hotāsi pūrvyaḥ praśāstā potā januṣā purohitaḥ । viśvā vidvām̐ ārtvijyā dhīra puṣyasyagne sakhye mā riṣāmā vayaṃ tava ॥६॥ yo viśvataḥ supratīkaḥ sadṛṅṅasi dūre citsantaḷidivāti rocase । rātryāścidandho ati deva paśyasyagne sakhye mā riṣāmā vayaṃ tava ॥७॥ pūrvo devā bhavatu sunvato ratho'smākaṃ śaṃso abhyastu dūḍhyaḥ । tadā jānītota puṣyatā vaco'gne sakhye mā riṣāmā vayaṃ tava ॥८॥ vadhairduḥśaṃsām̐ apa dūḍhyo jahi dūre vā ye anti vā ke cidatriṇaḥ । athā yajñāya gṛṇate sugaṃ kṛdhyagne sakhye mā riṣāmā vayaṃ tava ॥९॥ yadayukthā aruṣā rohitā rathe vātajūtā vṛṣabhasyeva te ravaḥ । ādinvasi vanino dhūmaketunāgne sakhye mā riṣāmā vayaṃ tava ॥१०॥ adha svanāduta bibhyuḥ patatriṇo drapsā yatte yavasādo vyasthiran । sugaṃ tatte tāvakebhyo rathebhyo'gne sakhye mā riṣāmā vayaṃ tava ॥११॥ ayaṃ mitrasya varuṇasya dhāyase'vayātāṃ marutāṃ heḷo adbhutaḥ । mṛḷā su no bhūtveṣāṃ manaḥ punaragne sakhye mā riṣāmā vayaṃ tava ॥१२॥ devo devānāmasi mitro adbhuto vasurvasūnāmasi cāruradhvare । śarmansyāma tava saprathastame'gne sakhye mā riṣāmā vayaṃ tava ॥१३॥ tatte bhadraṃ yatsamiddhaḥ sve dame somāhuto jarase mṛḷayattamaḥ । dadhāsi ratnaṃ draviṇaṃ ca dāśuṣe'gne sakhye mā riṣāmā vayaṃ tava ॥१४॥ yasmai tvaṃ sudraviṇo dadāśo'nāgāstvamadite sarvatātā । yaṃ bhadreṇa śavasā codayāsi prajāvatā rādhasā te syāma ॥१५॥ sa tvamagne saubhagatvasya vidvānasmākamāyuḥ pra tireha deva । tanno mitro varuṇo māmahantāmaditiḥ sindhuḥ pṛthivī uta dyauḥ ॥१६॥

“Hymn to Agni Jātavedas, praised with a eulogy framed like a car — 16 verses. (after R.T.H. Griffith)”

dve virūpe carataḥ svarthe anyānyā vatsamupa dhāpayete । hariranyasyāṃ bhavati svadhāvāñchukro anyasyāṃ dadṛśe suvarcāḥ ॥१॥ daśemaṃ tvaṣṭurjanayanta garbhamatandrāso yuvatayo vibhṛtram । tigmānīkaṃ svayaśasaṃ janeṣu virocamānaṃ pari ṣīṃ nayanti ॥२॥ trīṇi jānā pari bhūṣantyasya samudra ekaṃ divyekamapsu । pūrvāmanu pra diśaṃ pārthivānāmṛtūnpraśāsadvi dadhāvanuṣṭhu ॥३॥ ka imaṃ vo niṇyamā ciketa vatso mātṝrjanayata svadhābhiḥ । bahvīnāṃ garbho apasāmupasthānmahānkavirniścarati svadhāvān ॥४॥ āviṣṭyo vardhate cārurāsu jihmānāmūrdhvaḥ svayaśā upasthe । ubhe tvaṣṭurbibhyaturjāyamānātpratīcī siṃhaṃ prati joṣayete ॥५॥ ubhe bhadre joṣayete na mene gāvo na vāśrā upa tasthurevaiḥ । sa dakṣāṇāṃ dakṣapatirbabhūvāñjanti yaṃ dakṣiṇato havirbhiḥ ॥६॥ udyaṃyamīti saviteva bāhū ubhe sicau yatate bhīma ṛñjan । ucchukramatkamajate simasmānnavā mātṛbhyo vasanā jahāti ॥७॥ tveṣaṃ rūpaṃ kṛṇuta uttaraṃ yatsampṛñcānaḥ sadane gobhiradbhiḥ । kavirbudhnaṃ pari marmṛjyate dhīḥ sā devatātā samitirbabhūva ॥८॥ uru te jrayaḥ paryeti budhnaṃ virocamānaṃ mahiṣasya dhāma । viśvebhiragne svayaśobhiriddho'dabdhebhiḥ pāyubhiḥ pāhyasmān ॥९॥ dhanvansrotaḥ kṛṇute gātumūrmiṃ śukrairūrmibhirabhi nakṣati kṣām । viśvā sanāni jaṭhareṣu dhatte'ntarnavāsu carati prasūṣu ॥१०॥ evā no agne samidhā vṛdhāno revatpāvaka śravase vi bhāhi । tanno mitro varuṇo māmahantāmaditiḥ sindhuḥ pṛthivī uta dyauḥ ॥११॥

“Hymn to Agni, the two unlike fires that nourish the golden child — 11 verses. (after R.T.H. Griffith)”

sa pratnathā sahasā jāyamānaḥ sadyaḥ kāvyāni baḷadhatta viśvā । āpaśca mitraṃ dhiṣaṇā ca sādhandevā agniṃ dhārayandraviṇodām ॥१॥ sa pūrvayā nividā kavyatāyorimāḥ prajā ajanayanmanūnām । vivasvatā cakṣasā dyāmapaśca devā agniṃ dhārayandraviṇodām ॥२॥ tamīḷata prathamaṃ yajñasādhaṃ viśa ārīrāhutamṛñjasānam । ūrjaḥ putraṃ bharataṃ sṛpradānuṃ devā agniṃ dhārayandraviṇodām ॥३॥ sa mātariśvā puruvārapuṣṭirvidadgātuṃ tanayāya svarvit । viśāṃ gopā janitā rodasyordevā agniṃ dhārayandraviṇodām ॥४॥ naktoṣāsā varṇamāmemyāne dhāpayete śiśumekaṃ samīcī । dyāvākṣāmā rukmo antarvi bhāti devā agniṃ dhārayandraviṇodām ॥५॥ rāyo budhnaḥ saṃgamano vasūnāṃ yajñasya keturmanmasādhano veḥ । amṛtatvaṃ rakṣamāṇāsa enaṃ devā agniṃ dhārayandraviṇodām ॥६॥ nū ca purā ca sadanaṃ rayīṇāṃ jātasya ca jāyamānasya ca kṣām । sataśca gopāṃ bhavataśca bhūrerdevā agniṃ dhārayandraviṇodām ॥७॥ draviṇodā draviṇasasturasya draviṇodāḥ sanarasya pra yaṃsat । draviṇodā vīravatīmiṣaṃ no draviṇodā rāsate dīrghamāyuḥ ॥८॥ evā no agne samidhā vṛdhāno revatpāvaka śravase vi bhāhi । tanno mitro varuṇo māmahantāmaditiḥ sindhuḥ pṛthivī uta dyauḥ ॥९॥

“Hymn to Agni, engendered by strength, who takes all wisdom to himself — 9 verses. (after R.T.H. Griffith)”

apa naḥ śośucadaghamagne śuśugdhyā rayim । apa naḥ śośucadagham ॥१॥ sukṣetriyā sugātuyā vasūyā ca yajāmahe । apa naḥ śośucadagham ॥२॥ pra yadbhandiṣṭha eṣāṃ prāsmākāsaśca sūrayaḥ । apa naḥ śośucadagham ॥३॥ pra yatte agne sūrayo jāyemahi pra te vayam । apa naḥ śośucadagham ॥४॥ pra yadagneḥ sahasvato viśvato yanti bhānavaḥ । apa naḥ śośucadagham ॥५॥ tvaṃ hi viśvatomukha viśvataḥ paribhūrasi । apa naḥ śośucadagham ॥६॥ dviṣo no viśvatomukhāti nāveva pāraya । apa naḥ śośucadagham ॥७॥ sa naḥ sindhumiva nāvayāti parṣā svastaye । apa naḥ śośucadagham ॥८॥

“Hymn to Agni, asked to chase away sin and shine wealth upon the worshippers — 8 verses. (after R.T.H. Griffith)”

vaiśvānarasya sumatau syāma rājā hi kaṃ bhuvanānāmabhiśrīḥ । ito jāto viśvamidaṃ vi caṣṭe vaiśvānaro yatate sūryeṇa ॥१॥ pṛṣṭo divi pṛṣṭo agniḥ pṛthivyāṃ pṛṣṭo viśvā oṣadhīrā viveśa । vaiśvānaraḥ sahasā pṛṣṭo agniḥ sa no divā sa riṣaḥ pātu naktam ॥२॥ vaiśvānara tava tatsatyamastvasmānrāyo maghavānaḥ sacantām । tanno mitro varuṇo māmahantāmaditiḥ sindhuḥ pṛthivī uta dyauḥ ॥३॥

“Hymn to Agni Vaiśvānara, the supreme king over all living things — 3 verses. (after R.T.H. Griffith)”

jātavedase sunavāma somamarātīyato ni dahāti vedaḥ । sa naḥ parṣadati durgāṇi viśvā nāveva sindhuṃ duritātyagniḥ ॥१॥

“Hymn to Agni Jātavedas, asked to consume the wealth of the malignant — 1 verse. (after R.T.H. Griffith)”

sa yo vṛṣā vṛṣṇyebhiḥ samokā maho divaḥ pṛthivyāśca samrāṭ । satīnasatvā havyo bhareṣu marutvānno bhavatvindra ūtī ॥१॥ yasyānāptaḥ sūryasyeva yāmo bharebhare vṛtrahā śuṣmo asti । vṛṣantamaḥ sakhibhiḥ svebhirevairmarutvānno bhavatvindra ūtī ॥२॥ divo na yasya retaso dughānāḥ panthāso yanti śavasāparītāḥ । taraddveṣāḥ sāsahiḥ pauṃsyebhirmarutvānno bhavatvindra ūtī ॥३॥ so aṅgirobhiraṅgirastamo bhūdvṛṣā vṛṣabhiḥ sakhibhiḥ sakhā san । ṛgmibhirṛgmī gātubhirjyeṣṭho marutvānno bhavatvindra ūtī ॥४॥ sa sūnubhirna rudrebhirṛbhvā nṛṣāhye sāsahvām̐ amitrān । sanīḷebhiḥ śravasyāni tūrvanmarutvānno bhavatvindra ūtī ॥५॥ sa manyumīḥ samadanasya kartāsmākebhirnṛbhiḥ sūryaṃ sanat । asminnahansatpatiḥ puruhūto marutvānno bhavatvindra ūtī ॥६॥ tamūtayo raṇayañchūrasātau taṃ kṣemasya kṣitayaḥ kṛṇvata trām । sa viśvasya karuṇasyeśa eko marutvānno bhavatvindra ūtī ॥७॥ tamapsanta śavasa utsaveṣu naro naramavase taṃ dhanāya । so andhe cittamasi jyotirvidanmarutvānno bhavatvindra ūtī ॥८॥ sa savyena yamati vrādhataścitsa dakṣiṇe saṃgṛbhītā kṛtāni । sa kīriṇā citsanitā dhanāni marutvānno bhavatvindra ūtī ॥९॥ sa grāmebhiḥ sanitā sa rathebhirvide viśvābhiḥ kṛṣṭibhirnvadya । sa pauṃsyebhirabhibhūraśastīrmarutvānno bhavatvindra ūtī ॥१०॥ sa jāmibhiryatsamajāti mīḷhe'jāmibhirvā puruhūta evaiḥ । apāṃ tokasya tanayasya jeṣe marutvānno bhavatvindra ūtī ॥११॥ sa vajrabhṛddasyuhā bhīma ugraḥ sahasracetāḥ śatanītha ṛbhvā । camrīṣo na śavasā pāñcajanyo marutvānno bhavatvindra ūtī ॥१२॥ tasya vajraḥ krandati smatsvarṣā divo na tveṣo ravathaḥ śimīvān । taṃ sacante sanayastaṃ dhanāni marutvānno bhavatvindra ūtī ॥१३॥ yasyājasraṃ śavasā mānamukthaṃ paribhujadrodasī viśvataḥ sīm । sa pāriṣatkratubhirmandasāno marutvānno bhavatvindra ūtī ॥१४॥ na yasya devā devatā na martā āpaścana śavaso antamāpuḥ । sa prarikvā tvakṣasā kṣmo divaśca marutvānno bhavatvindra ūtī ॥१५॥ rohicchyāvā sumadaṃśurlalāmīrdyukṣā rāya ṛjrāśvasya । vṛṣaṇvantaṃ bibhratī dhūrṣu rathaṃ mandrā ciketa nāhuṣīṣu vikṣu ॥१६॥ etattyatta indra vṛṣṇa ukthaṃ vārṣāgirā abhi gṛṇanti rādhaḥ । ṛjrāśvaḥ praṣṭibhirambarīṣaḥ sahadevo bhayamānaḥ surādhāḥ ॥१७॥ dasyūñchimyūm̐śca puruhūta evairhatvā pṛthivyāṃ śarvā ni barhīt । sanatkṣetraṃ sakhibhiḥ śvitnyebhiḥ sanatsūryaṃ sanadapaḥ suvajraḥ ॥१८॥ viśvāhendro adhivaktā no astvaparihvṛtāḥ sanuyāma vājam । tanno mitro varuṇo māmahantāmaditiḥ sindhuḥ pṛthivī uta dyauḥ ॥१९॥

“Hymn to Indra, the mighty king of earth and spacious heaven — 19 verses. (after R.T.H. Griffith)”

pra mandine pitumadarcatā vaco yaḥ kṛṣṇagarbhā nirahannṛjiśvanā । avasyavo vṛṣaṇaṃ vajradakṣiṇaṃ marutvantaṃ sakhyāya havāmahe ॥१॥ yo vyaṃsaṃ jāhṛṣāṇena manyunā yaḥ śambaraṃ yo ahanpiprumavratam । indro yaḥ śuṣṇamaśuṣaṃ nyāvṛṇaṅmarutvantaṃ sakhyāya havāmahe ॥२॥ yasya dyāvāpṛthivī pauṃsyaṃ mahadyasya vrate varuṇo yasya sūryaḥ । yasyendrasya sindhavaḥ saścati vrataṃ marutvantaṃ sakhyāya havāmahe ॥३॥ yo aśvānāṃ yo gavāṃ gopatirvaśī ya āritaḥ karmaṇikarmaṇi sthiraḥ । vīḷościdindro yo asunvato vadho marutvantaṃ sakhyāya havāmahe ॥४॥ yo viśvasya jagataḥ prāṇataspatiryo brahmaṇe prathamo gā avindat । indro yo dasyūm̐radharām̐ avātiranmarutvantaṃ sakhyāya havāmahe ॥५॥ yaḥ śūrebhirhavyo yaśca bhīrubhiryo dhāvadbhirhūyate yaśca jigyubhiḥ । indraṃ yaṃ viśvā bhuvanābhi saṃdadhurmarutvantaṃ sakhyāya havāmahe ॥६॥ rudrāṇāmeti pradiśā vicakṣaṇo rudrebhiryoṣā tanute pṛthu jrayaḥ । indraṃ manīṣā abhyarcati śrutaṃ marutvantaṃ sakhyāya havāmahe ॥७॥ yadvā marutvaḥ parame sadhasthe yadvāvame vṛjane mādayāse । ata ā yāhyadhvaraṃ no acchā tvāyā haviścakṛmā satyarādhaḥ ॥८॥ tvāyendra somaṃ suṣumā sudakṣa tvāyā haviścakṛmā brahmavāhaḥ । adhā niyutvaḥ sagaṇo marudbhirasminyajñe barhiṣi mādayasva ॥९॥ mādayasva haribhirye ta indra vi ṣyasva śipre vi sṛjasva dhene । ā tvā suśipra harayo vahantūśanhavyāni prati no juṣasva ॥१०॥ marutstotrasya vṛjanasya gopā vayamindreṇa sanuyāma vājam । tanno mitro varuṇo māmahantāmaditiḥ sindhuḥ pṛthivī uta dyauḥ ॥११॥

“Hymn to Indra, who with Ṛjiśvan drove the dusky brood away — 11 verses. (after R.T.H. Griffith)”

imāṃ te dhiyaṃ pra bhare maho mahīmasya stotre dhiṣaṇā yatta ānaje । tamutsave ca prasave ca sāsahimindraṃ devāsaḥ śavasāmadannanu ॥१॥ asya śravo nadyaḥ sapta bibhrati dyāvākṣāmā pṛthivī darśataṃ vapuḥ । asme sūryācandramasābhicakṣe śraddhe kamindra carato vitarturam ॥२॥ taṃ smā rathaṃ maghavanprāva sātaye jaitraṃ yaṃ te anumadāma saṃgame । ājā na indra manasā puruṣṭuta tvāyadbhyo maghavañcharma yaccha naḥ ॥३॥ vayaṃ jayema tvayā yujā vṛtamasmākamaṃśamudavā bharebhare । asmabhyamindra varivaḥ sugaṃ kṛdhi pra śatrūṇāṃ maghavanvṛṣṇyā ruja ॥४॥ nānā hi tvā havamānā janā ime dhanānāṃ dhartaravasā vipanyavaḥ । asmākaṃ smā rathamā tiṣṭha sātaye jaitraṃ hīndra nibhṛtaṃ manastava ॥५॥ gojitā bāhū amitakratuḥ simaḥ karmankarmañchatamūtiḥ khajaṃkaraḥ । akalpa indraḥ pratimānamojasāthā janā vi hvayante siṣāsavaḥ ॥६॥ utte śatānmaghavannucca bhūyasa utsahasrādririce kṛṣṭiṣu śravaḥ । amātraṃ tvā dhiṣaṇā titviṣe mahyadhā vṛtrāṇi jighnase puraṃdara ॥७॥ triviṣṭidhātu pratimānamojasastisro bhūmīrnṛpate trīṇi rocanā । atīdaṃ viśvaṃ bhuvanaṃ vavakṣithāśatrurindra januṣā sanādasi ॥८॥ tvāṃ deveṣu prathamaṃ havāmahe tvaṃ babhūtha pṛtanāsu sāsahiḥ । semaṃ naḥ kārumupamanyumudbhidamindraḥ kṛṇotu prasave rathaṃ puraḥ ॥९॥ tvaṃ jigetha na dhanā rurodhithārbheṣvājā maghavanmahatsu ca । tvāmugramavase saṃ śiśīmasyathā na indra havaneṣu codaya ॥१०॥ viśvāhendro adhivaktā no astvaparihvṛtāḥ sanuyāma vājam । tanno mitro varuṇo māmahantāmaditiḥ sindhuḥ pṛthivī uta dyauḥ ॥११॥

“Hymn to Indra, the mighty one, brought a mighty hymn — 11 verses. (after R.T.H. Griffith)”

tatta indriyaṃ paramaṃ parācairadhārayanta kavayaḥ puredam । kṣamedamanyaddivyanyadasya samī pṛcyate samaneva ketuḥ ॥१॥ sa dhārayatpṛthivīṃ paprathacca vajreṇa hatvā nirapaḥ sasarja । ahannahimabhinadrauhiṇaṃ vyahanvyaṃsaṃ maghavā śacībhiḥ ॥२॥ sa jātūbharmā śraddadhāna ojaḥ puro vibhindannacaradvi dāsīḥ । vidvānvajrindasyave hetimasyāryaṃ saho vardhayā dyumnamindra ॥३॥ tadūcuṣe mānuṣemā yugāni kīrtenyaṃ maghavā nāma bibhrat । upaprayandasyuhatyāya vajrī yaddha sūnuḥ śravase nāma dadhe ॥४॥ tadasyedaṃ paśyatā bhūri puṣṭaṃ śradindrasya dhattana vīryāya । sa gā avindatso avindadaśvānsa oṣadhīḥ so apaḥ sa vanāni ॥५॥ bhūrikarmaṇe vṛṣabhāya vṛṣṇe satyaśuṣmāya sunavāma somam । ya ādṛtyā paripanthīva śūro'yajvano vibhajanneti vedaḥ ॥६॥ tadindra preva vīryaṃ cakartha yatsasantaṃ vajreṇābodhayo'him । anu tvā patnīrhṛṣitaṃ vayaśca viśve devāso amadannanu tvā ॥७॥ śuṣṇaṃ pipruṃ kuyavaṃ vṛtramindra yadāvadhīrvi puraḥ śambarasya । tanno mitro varuṇo māmahantāmaditiḥ sindhuḥ pṛthivī uta dyauḥ ॥८॥

“Hymn to Indra, whose highest power is distant, on earth and in heaven — 8 verses. (after R.T.H. Griffith)”

yoniṣṭa indra niṣade akāri tamā ni ṣīda svāno nārvā । vimucyā vayo'vasāyāśvāndoṣā vastorvahīyasaḥ prapitve ॥१॥ o tye nara indramūtaye gurnū cittānsadyo adhvano jagamyāt । devāso manyuṃ dāsasya ścamnante na ā vakṣansuvitāya varṇam ॥२॥ ava tmanā bharate ketavedā ava tmanā bharate phenamudan । kṣīreṇa snātaḥ kuyavasya yoṣe hate te syātāṃ pravaṇe śiphāyāḥ ॥३॥ yuyopa nābhiruparasyāyoḥ pra pūrvābhistirate rāṣṭi śūraḥ । añjasī kuliśī vīrapatnī payo hinvānā udabhirbharante ॥४॥ prati yatsyā nīthādarśi dasyoroko nācchā sadanaṃ jānatī gāt । adha smā no maghavañcarkṛtādinmā no magheva niṣṣapī parā dāḥ ॥५॥ sa tvaṃ na indra sūrye so apsvanāgāstva ā bhaja jīvaśaṃse । māntarāṃ bhujamā rīriṣo naḥ śraddhitaṃ te mahata indriyāya ॥६॥ adhā manye śratte asmā adhāyi vṛṣā codasva mahate dhanāya । mā no akṛte puruhūta yonāvindra kṣudhyadbhyo vaya āsutiṃ dāḥ ॥७॥ mā no vadhīrindra mā parā dā mā naḥ priyā bhojanāni pra moṣīḥ । āṇḍā mā no maghavañchakra nirbhenmā naḥ pātrā bhetsahajānuṣāṇi ॥८॥ arvāṅehi somakāmaṃ tvāhurayaṃ sutastasya pibā madāya । uruvyacā jaṭhara ā vṛṣasva piteva naḥ śṛṇuhi hūyamānaḥ ॥९॥

“Hymn to Indra, asked to come to the altar like a panting courser — 9 verses. (after R.T.H. Griffith)”

candramā apsvantarā suparṇo dhāvate divi । na vo hiraṇyanemayaḥ padaṃ vindanti vidyuto vittaṃ me asya rodasī ॥१॥ arthamidvā u arthina ā jāyā yuvate patim । tuñjāte vṛṣṇyaṃ payaḥ paridāya rasaṃ duhe vittaṃ me asya rodasī ॥२॥ mo ṣu devā adaḥ svarava pādi divaspari । mā somyasya śambhuvaḥ śūne bhūma kadā cana vittaṃ me asya rodasī ॥३॥ yajñaṃ pṛcchāmyavamaṃ sa taddūto vi vocati । kva ṛtaṃ pūrvyaṃ gataṃ kastadbibharti nūtano vittaṃ me asya rodasī ॥४॥ amī ye devā sthana triṣvā rocane divaḥ । kadva ṛtaṃ kadanṛtaṃ kva pratnā va āhutirvittaṃ me asya rodasī ॥५॥ kadva ṛtasya dharṇasi kadvaruṇasya cakṣaṇam । kadaryamṇo mahaspathāti krāmema dūḍhyo vittaṃ me asya rodasī ॥६॥ ahaṃ so asmi yaḥ purā sute vadāmi kāni cit । taṃ mā vyantyādhyo vṛko na tṛṣṇajaṃ mṛgaṃ vittaṃ me asya rodasī ॥७॥ saṃ mā tapantyabhitaḥ sapatnīriva parśavaḥ । mūṣo na śiśnā vyadanti mādhya stotāraṃ te śatakrato vittaṃ me asya rodasī ॥८॥ amī ye sapta raśmayastatrā me nābhirātatā । tritastadvedāptyaḥ sa jāmitvāya rebhati vittaṃ me asya rodasī ॥९॥ amī ye pañcokṣaṇo madhye tasthurmaho divaḥ । devatrā nu pravācyaṃ sadhrīcīnā ni vāvṛturvittaṃ me asya rodasī ॥१०॥ suparṇā eta āsate madhya ārodhane divaḥ । te sedhanti patho vṛkaṃ tarantaṃ yahvatīrapo vittaṃ me asya rodasī ॥११॥ navyaṃ tadukthyaṃ hitaṃ devāsaḥ supravācanam । ṛtamarṣanti sindhavaḥ satyaṃ tātāna sūryo vittaṃ me asya rodasī ॥१२॥ agne tava tyadukthyaṃ deveṣvastyāpyam । sa naḥ satto manuṣvadā devānyakṣi viduṣṭaro vittaṃ me asya rodasī ॥१३॥ satto hotā manuṣvadā devām̐ acchā viduṣṭaraḥ । agnirhavyā suṣūdati devo deveṣu medhiro vittaṃ me asya rodasī ॥१४॥ brahmā kṛṇoti varuṇo gātuvidaṃ tamīmahe । vyūrṇoti hṛdā matiṃ navyo jāyatāmṛtaṃ vittaṃ me asya rodasī ॥१५॥ asau yaḥ panthā ādityo divi pravācyaṃ kṛtaḥ । na sa devā atikrame taṃ martāso na paśyatha vittaṃ me asya rodasī ॥१६॥ tritaḥ kūpe'vahito devānhavata ūtaye । tacchuśrāva bṛhaspatiḥ kṛṇvannaṃhūraṇāduru vittaṃ me asya rodasī ॥१७॥ aruṇo mā sakṛdvṛkaḥ pathā yantaṃ dadarśa hi । ujjihīte nicāyyā taṣṭeva pṛṣṭyāmayī vittaṃ me asya rodasī ॥१८॥ enāṅgūṣeṇa vayamindravanto'bhi ṣyāma vṛjane sarvavīrāḥ । tanno mitro varuṇo māmahantāmaditiḥ sindhuḥ pṛthivī uta dyauḥ ॥१९॥

“Hymn to the Viśvedevas, on the Moon in the waters and the lightnings' unconfined abiding — 19 verses. (after R.T.H. Griffith)”

indraṃ mitraṃ varuṇamagnimūtaye mārutaṃ śardho aditiṃ havāmahe । rathaṃ na durgādvasavaḥ sudānavo viśvasmānno aṃhaso niṣpipartana ॥१॥ ta ādityā ā gatā sarvatātaye bhūta devā vṛtratūryeṣu śambhuvaḥ । rathaṃ na durgādvasavaḥ sudānavo viśvasmānno aṃhaso niṣpipartana ॥२॥ avantu naḥ pitaraḥ supravācanā uta devī devaputre ṛtāvṛdhā । rathaṃ na durgādvasavaḥ sudānavo viśvasmānno aṃhaso niṣpipartana ॥३॥ narāśaṃsaṃ vājinaṃ vājayanniha kṣayadvīraṃ pūṣaṇaṃ sumnairīmahe । rathaṃ na durgādvasavaḥ sudānavo viśvasmānno aṃhaso niṣpipartana ॥४॥ bṛhaspate sadaminnaḥ sugaṃ kṛdhi śaṃ yoryatte manurhitaṃ tadīmahe । rathaṃ na durgādvasavaḥ sudānavo viśvasmānno aṃhaso niṣpipartana ॥५॥ indraṃ kutso vṛtrahaṇaṃ śacīpatiṃ kāṭe nibāḷha ṛṣirahvadūtaye । rathaṃ na durgādvasavaḥ sudānavo viśvasmānno aṃhaso niṣpipartana ॥६॥ devairno devyaditirni pātu devastrātā trāyatāmaprayucchan । tanno mitro varuṇo māmahantāmaditiḥ sindhuḥ pṛthivī uta dyauḥ ॥७॥

“Hymn to Indra, Mitra, Varuṇa, Agni, the Marut host and Aditi for aid — 7 verses. (after R.T.H. Griffith)”

yajño devānāṃ pratyeti sumnamādityāso bhavatā mṛḷayantaḥ । ā vo'rvācī sumatirvavṛtyādaṃhościdyā varivovittarāsat ॥१॥ upa no devā avasā gamantvaṅgirasāṃ sāmabhi stūyamānāḥ । indra indriyairmaruto marudbhirādityairno aditiḥ śarma yaṃsat ॥२॥ tanna indrastadvaruṇastadagnistadaryamā tatsavitā cano dhāt । tanno mitro varuṇo māmahantāmaditiḥ sindhuḥ pṛthivī uta dyauḥ ॥३॥

“Hymn to the Ādityas, asked to accept the sacrifice and show favour — 3 verses. (after R.T.H. Griffith)”

ya indrāgnī citratamo ratho vāmabhi viśvāni bhuvanāni caṣṭe । tenā yātaṃ sarathaṃ tasthivāṃsāthā somasya pibataṃ sutasya ॥१॥ yāvadidaṃ bhuvanaṃ viśvamastyuruvyacā varimatā gabhīram । tāvām̐ ayaṃ pātave somo astvaramindrāgnī manase yuvabhyām ॥२॥ cakrāthe hi sadhryaṅnāma bhadraṃ sadhrīcīnā vṛtrahaṇā uta sthaḥ । tāvindrāgnī sadhryañcā niṣadyā vṛṣṇaḥ somasya vṛṣaṇā vṛṣethām ॥३॥ samiddheṣvagniṣvānajānā yatasrucā barhiru tistirāṇā । tīvraiḥ somaiḥ pariṣiktebhirarvāgendrāgnī saumanasāya yātam ॥४॥ yānīndrāgnī cakrathurvīryāṇi yāni rūpāṇyuta vṛṣṇyāni । yā vāṃ pratnāni sakhyā śivāni tebhiḥ somasya pibataṃ sutasya ॥५॥ yadabravaṃ prathamaṃ vāṃ vṛṇāno'yaṃ somo asurairno vihavyaḥ । tāṃ satyāṃ śraddhāmabhyā hi yātamathā somasya pibataṃ sutasya ॥६॥ yadindrāgnī madathaḥ sve duroṇe yadbrahmaṇi rājani vā yajatrā । ataḥ pari vṛṣaṇāvā hi yātamathā somasya pibataṃ sutasya ॥७॥ yadindrāgnī yaduṣu turvaśeṣu yaddruhyuṣvanuṣu pūruṣu sthaḥ । ataḥ pari vṛṣaṇāvā hi yātamathā somasya pibataṃ sutasya ॥८॥ yadindrāgnī avamasyāṃ pṛthivyāṃ madhyamasyāṃ paramasyāmuta sthaḥ । ataḥ pari vṛṣaṇāvā hi yātamathā somasya pibataṃ sutasya ॥९॥ yadindrāgnī paramasyāṃ pṛthivyāṃ madhyamasyāmavamasyāmuta sthaḥ । ataḥ pari vṛṣaṇāvā hi yātamathā somasya pibataṃ sutasya ॥१०॥ yadindrāgnī divi ṣṭho yatpṛthivyāṃ yatparvateṣvoṣadhīṣvapsu । ataḥ pari vṛṣaṇāvā hi yātamathā somasya pibataṃ sutasya ॥११॥ yadindrāgnī uditā sūryasya madhye divaḥ svadhayā mādayethe । ataḥ pari vṛṣaṇāvā hi yātamathā somasya pibataṃ sutasya ॥१२॥ evendrāgnī papivāṃsā sutasya viśvāsmabhyaṃ saṃ jayataṃ dhanāni । tanno mitro varuṇo māmahantāmaditiḥ sindhuḥ pṛthivī uta dyauḥ ॥१३॥

“Hymn to Indra and Agni, asked to mount their all-beholding car — 13 verses. (after R.T.H. Griffith)”

vi hyakhyaṃ manasā vasya icchannindrāgnī jñāsa uta vā sajātān । nānyā yuvatpramatirasti mahyaṃ sa vāṃ dhiyaṃ vājayantīmatakṣam ॥१॥ aśravaṃ hi bhūridāvattarā vāṃ vijāmāturuta vā ghā syālāt । athā somasya prayatī yuvabhyāmindrāgnī stomaṃ janayāmi navyam ॥२॥ mā cchedma raśmīm̐riti nādhamānāḥ pitṝṇāṃ śaktīranuyacchamānāḥ । indrāgnibhyāṃ kaṃ vṛṣaṇo madanti tā hyadrī dhiṣaṇāyā upasthe ॥३॥ yuvābhyāṃ devī dhiṣaṇā madāyendrāgnī somamuśatī sunoti । tāvaśvinā bhadrahastā supāṇī ā dhāvataṃ madhunā pṛṅktamapsu ॥४॥ yuvāmindrāgnī vasuno vibhāge tavastamā śuśrava vṛtrahatye । tāvāsadyā barhiṣi yajñe asminpra carṣaṇī mādayethāṃ sutasya ॥५॥ pra carṣaṇibhyaḥ pṛtanāhaveṣu pra pṛthivyā riricāthe divaśca । pra sindhubhyaḥ pra giribhyo mahitvā prendrāgnī viśvā bhuvanātyanyā ॥६॥ ā bharataṃ śikṣataṃ vajrabāhū asmām̐ indrāgnī avataṃ śacībhiḥ । ime nu te raśmayaḥ sūryasya yebhiḥ sapitvaṃ pitaro na āsan ॥७॥ puraṃdarā śikṣataṃ vajrahastāsmām̐ indrāgnī avataṃ bhareṣu । tanno mitro varuṇo māmahantāmaditiḥ sindhuḥ pṛthivī uta dyauḥ ॥८॥

“Hymn to Indra and Agni, the only providence the worshipper looks for — 8 verses. (after R.T.H. Griffith)”

tataṃ me apastadu tāyate punaḥ svādiṣṭhā dhītirucathāya śasyate । ayaṃ samudra iha viśvadevyaḥ svāhākṛtasya samu tṛpṇuta ṛbhavaḥ ॥१॥ ābhogayaṃ pra yadicchanta aitanāpākāḥ prāñco mama ke cidāpayaḥ । saudhanvanāsaścaritasya bhūmanāgacchata saviturdāśuṣo gṛham ॥२॥ tatsavitā vo'mṛtatvamāsuvadagohyaṃ yacchravayanta aitana । tyaṃ ciccamasamasurasya bhakṣaṇamekaṃ santamakṛṇutā caturvayam ॥३॥ viṣṭvī śamī taraṇitvena vāghato martāsaḥ santo amṛtatvamānaśuḥ । saudhanvanā ṛbhavaḥ sūracakṣasaḥ saṃvatsare samapṛcyanta dhītibhiḥ ॥४॥ kṣetramiva vi mamustejanenam̐ ekaṃ pātramṛbhavo jehamānam । upastutā upamaṃ nādhamānā amartyeṣu śrava icchamānāḥ ॥५॥ ā manīṣāmantarikṣasya nṛbhyaḥ sruceva ghṛtaṃ juhavāma vidmanā । taraṇitvā ye piturasya saścira ṛbhavo vājamaruhandivo rajaḥ ॥६॥ ṛbhurna indraḥ śavasā navīyānṛbhurvājebhirvasubhirvasurdadiḥ । yuṣmākaṃ devā avasāhani priye'bhi tiṣṭhema pṛtsutīrasunvatām ॥७॥ niścarmaṇa ṛbhavo gāmapiṃśata saṃ vatsenāsṛjatā mātaraṃ punaḥ । saudhanvanāsaḥ svapasyayā naro jivrī yuvānā pitarākṛṇotana ॥८॥ vājebhirno vājasātāvaviḍḍhyṛbhumām̐ indra citramā darṣi rādhaḥ । tanno mitro varuṇo māmahantāmaditiḥ sindhuḥ pṛthivī uta dyauḥ ॥९॥

“Hymn to the Ṛbhus, celebrated for their holy work — 9 verses. (after R.T.H. Griffith)”

takṣanrathaṃ suvṛtaṃ vidmanāpasastakṣanharī indravāhā vṛṣaṇvasū । takṣanpitṛbhyāmṛbhavo yuvadvayastakṣanvatsāya mātaraṃ sacābhuvam ॥१॥ ā no yajñāya takṣata ṛbhumadvayaḥ kratve dakṣāya suprajāvatīmiṣam । yathā kṣayāma sarvavīrayā viśā tannaḥ śardhāya dhāsathā svindriyam ॥२॥ ā takṣata sātimasmabhyamṛbhavaḥ sātiṃ rathāya sātimarvate naraḥ । sātiṃ no jaitrīṃ saṃ maheta viśvahā jāmimajāmiṃ pṛtanāsu sakṣaṇim ॥३॥ ṛbhukṣaṇamindramā huva ūtaya ṛbhūnvājānmarutaḥ somapītaye । ubhā mitrāvaruṇā nūnamaśvinā te no hinvantu sātaye dhiye jiṣe ॥४॥ ṛbhurbharāya saṃ śiśātu sātiṃ samaryajidvājo asmām̐ aviṣṭu । tanno mitro varuṇo māmahantāmaditiḥ sindhuḥ pṛthivī uta dyauḥ ॥५॥

“Hymn to the Ṛbhus, who wrought the lightly rolling car and the bay steeds — 5 verses. (after R.T.H. Griffith)”

īḷe dyāvāpṛthivī pūrvacittaye'gniṃ gharmaṃ surucaṃ yāmanniṣṭaye । yābhirbhare kāramaṃśāya jinvathastābhirū ṣu ūtibhiraśvinā gatam ॥१॥ yuvordānāya subharā asaścato rathamā tasthurvacasaṃ na mantave । yābhirdhiyo'vathaḥ karmanniṣṭaye tābhirū ṣu ūtibhiraśvinā gatam ॥२॥ yuvaṃ tāsāṃ divyasya praśāsane viśāṃ kṣayatho amṛtasya majmanā । yābhirdhenumasvaṃ pinvatho narā tābhirū ṣu ūtibhiraśvinā gatam ॥३॥ yābhiḥ parijmā tanayasya majmanā dvimātā tūrṣu taraṇirvibhūṣati । yābhistrimanturabhavadvicakṣaṇastābhirū ṣu ūtibhiraśvinā gatam ॥४॥ yābhī rebhaṃ nivṛtaṃ sitamadbhya udvandanamairayataṃ svardṛśe । yābhiḥ kaṇvaṃ pra siṣāsantamāvataṃ tābhirū ṣu ūtibhiraśvinā gatam ॥५॥ yābhirantakaṃ jasamānamāraṇe bhujyuṃ yābhiravyathibhirjijinvathuḥ । yābhiḥ karkandhuṃ vayyaṃ ca jinvathastābhirū ṣu ūtibhiraśvinā gatam ॥६॥ yābhiḥ śucantiṃ dhanasāṃ suṣaṃsadaṃ taptaṃ gharmamomyāvantamatraye । yābhiḥ pṛśniguṃ purukutsamāvataṃ tābhirū ṣu ūtibhiraśvinā gatam ॥७॥ yābhiḥ śacībhirvṛṣaṇā parāvṛjaṃ prāndhaṃ śroṇaṃ cakṣasa etave kṛthaḥ । yābhirvartikāṃ grasitāmamuñcataṃ tābhirū ṣu ūtibhiraśvinā gatam ॥८॥ yābhiḥ sindhuṃ madhumantamasaścataṃ vasiṣṭhaṃ yābhirajarāvajinvatam । yābhiḥ kutsaṃ śrutaryaṃ naryamāvataṃ tābhirū ṣu ūtibhiraśvinā gatam ॥९॥ yābhirviśpalāṃ dhanasāmatharvyaṃ sahasramīḷha ājāvajinvatam । yābhirvaśamaśvyaṃ preṇimāvataṃ tābhirū ṣu ūtibhiraśvinā gatam ॥१०॥ yābhiḥ sudānū auśijāya vaṇije dīrghaśravase madhu kośo akṣarat । kakṣīvantaṃ stotāraṃ yābhirāvataṃ tābhirū ṣu ūtibhiraśvinā gatam ॥११॥ yābhī rasāṃ kṣodasodnaḥ pipinvathuranaśvaṃ yābhī rathamāvataṃ jiṣe । yābhistriśoka usriyā udājata tābhirū ṣu ūtibhiraśvinā gatam ॥१२॥ yābhiḥ sūryaṃ pariyāthaḥ parāvati mandhātāraṃ kṣaitrapatyeṣvāvatam । yābhirvipraṃ pra bharadvājamāvataṃ tābhirū ṣu ūtibhiraśvinā gatam ॥१३॥ yābhirmahāmatithigvaṃ kaśojuvaṃ divodāsaṃ śambarahatya āvatam । yābhiḥ pūrbhidye trasadasyumāvataṃ tābhirū ṣu ūtibhiraśvinā gatam ॥१४॥ yābhirvamraṃ vipipānamupastutaṃ kaliṃ yābhirvittajāniṃ duvasyathaḥ । yābhirvyaśvamuta pṛthimāvataṃ tābhirū ṣu ūtibhiraśvinā gatam ॥१५॥ yābhirnarā śayave yābhiratraye yābhiḥ purā manave gātumīṣathuḥ । yābhiḥ śārīrājataṃ syūmaraśmaye tābhirū ṣu ūtibhiraśvinā gatam ॥१६॥ yābhiḥ paṭharvā jaṭharasya majmanāgnirnādīdeccita iddho ajmannā । yābhiḥ śaryātamavatho mahādhane tābhirū ṣu ūtibhiraśvinā gatam ॥१७॥ yābhiraṅgiro manasā niraṇyatho'graṃ gacchatho vivare goarṇasaḥ । yābhirmanuṃ śūramiṣā samāvataṃ tābhirū ṣu ūtibhiraśvinā gatam ॥१८॥ yābhiḥ patnīrvimadāya nyūhathurā gha vā yābhiraruṇīraśikṣatam । yābhiḥ sudāsa ūhathuḥ sudevyaṃ tābhirū ṣu ūtibhiraśvinā gatam ॥१९॥ yābhiḥ śaṃtātī bhavatho dadāśuṣe bhujyuṃ yābhiravatho yābhiradhrigum । omyāvatīṃ subharāmṛtastubhaṃ tābhirū ṣu ūtibhiraśvinā gatam ॥२०॥ yābhiḥ kṛśānumasane duvasyatho jave yābhiryūno arvantamāvatam । madhu priyaṃ bharatho yatsaraḍbhyastābhirū ṣu ūtibhiraśvinā gatam ॥२१॥ yābhirnaraṃ goṣuyudhaṃ nṛṣāhye kṣetrasya sātā tanayasya jinvathaḥ । yābhī rathām̐ avatho yābhirarvatastābhirū ṣu ūtibhiraśvinā gatam ॥२२॥ yābhiḥ kutsamārjuneyaṃ śatakratū pra turvītiṃ pra ca dabhītimāvatam । yābhirdhvasantiṃ puruṣantimāvataṃ tābhirū ṣu ūtibhiraśvinā gatam ॥२३॥ apnasvatīmaśvinā vācamasme kṛtaṃ no dasrā vṛṣaṇā manīṣām । adyūtye'vase ni hvaye vāṃ vṛdhe ca no bhavataṃ vājasātau ॥२४॥ dyubhiraktubhiḥ pari pātamasmānariṣṭebhiraśvinā saubhagebhiḥ । tanno mitro varuṇo māmahantāmaditiḥ sindhuḥ pṛthivī uta dyauḥ ॥२५॥

“Hymn to the Aśvins, invoked with Heaven and Earth and Agni — 25 verses. (after R.T.H. Griffith)”

idaṃ śreṣṭhaṃ jyotiṣāṃ jyotirāgāccitraḥ praketo ajaniṣṭa vibhvā । yathā prasūtā savituḥ savāyam̐ evā rātryuṣase yonimāraik ॥१॥ ruśadvatsā ruśatī śvetyāgādāraigu kṛṣṇā sadanānyasyāḥ । samānabandhū amṛte anūcī dyāvā varṇaṃ carata āmināne ॥२॥ samāno adhvā svasroranantastamanyānyā carato devaśiṣṭe । na methete na tasthatuḥ sumeke naktoṣāsā samanasā virūpe ॥३॥ bhāsvatī netrī sūnṛtānāmaceti citrā vi duro na āvaḥ । prārpyā jagadvyu no rāyo akhyaduṣā ajīgarbhuvanāni viśvā ॥४॥ jihmaśye caritave maghonyābhogaya iṣṭaye rāya u tvam । dabhraṃ paśyadbhya urviyā vicakṣa uṣā ajīgarbhuvanāni viśvā ॥५॥ kṣatrāya tvaṃ śravase tvaṃ mahīyā iṣṭaye tvamarthamiva tvamityai । visadṛśā jīvitābhipracakṣa uṣā ajīgarbhuvanāni viśvā ॥६॥ eṣā divo duhitā pratyadarśi vyucchantī yuvatiḥ śukravāsāḥ । viśvasyeśānā pārthivasya vasva uṣo adyeha subhage vyuccha ॥७॥ parāyatīnāmanveti pātha āyatīnāṃ prathamā śaśvatīnām । vyucchantī jīvamudīrayantyuṣā mṛtaṃ kaṃ cana bodhayantī ॥८॥ uṣo yadagniṃ samidhe cakartha vi yadāvaścakṣasā sūryasya । yanmānuṣānyakṣyamāṇām̐ ajīgastaddeveṣu cakṛṣe bhadramapnaḥ ॥९॥ kiyātyā yatsamayā bhavāti yā vyūṣuryāśca nūnaṃ vyucchān । anu pūrvāḥ kṛpate vāvaśānā pradīdhyānā joṣamanyābhireti ॥१०॥ īyuṣṭe ye pūrvatarāmapaśyanvyucchantīmuṣasaṃ martyāsaḥ । asmābhirū nu praticakṣyābhūdo te yanti ye aparīṣu paśyān ॥११॥ yāvayaddveṣā ṛtapā ṛtejāḥ sumnāvarī sūnṛtā īrayantī । sumaṅgalīrbibhratī devavītimihādyoṣaḥ śreṣṭhatamā vyuccha ॥१२॥ śaśvatpuroṣā vyuvāsa devyatho adyedaṃ vyāvo maghonī । atho vyucchāduttarām̐ anu dyūnajarāmṛtā carati svadhābhiḥ ॥१३॥ vyañjibhirdiva ātāsvadyaudapa kṛṣṇāṃ nirṇijaṃ devyāvaḥ । prabodhayantyaruṇebhiraśvairoṣā yāti suyujā rathena ॥१४॥ āvahantī poṣyā vāryāṇi citraṃ ketuṃ kṛṇute cekitānā । īyuṣīṇāmupamā śaśvatīnāṃ vibhātīnāṃ prathamoṣā vyaśvait ॥१५॥ udīrdhvaṃ jīvo asurna āgādapa prāgāttama ā jyotireti । āraikpanthāṃ yātave sūryāyāganma yatra pratiranta āyuḥ ॥१६॥ syūmanā vāca udiyarti vahni stavāno rebha uṣaso vibhātīḥ । adyā taduccha gṛṇate maghonyasme āyurni didīhi prajāvat ॥१७॥ yā gomatīruṣasaḥ sarvavīrā vyucchanti dāśuṣe martyāya । vāyoriva sūnṛtānāmudarke tā aśvadā aśnavatsomasutvā ॥१८॥ mātā devānāmaditeranīkaṃ yajñasya keturbṛhatī vi bhāhi । praśastikṛdbrahmaṇe no vyucchā no jane janaya viśvavāre ॥१९॥ yaccitramapna uṣaso vahantījānāya śaśamānāya bhadram । tanno mitro varuṇo māmahantāmaditiḥ sindhuḥ pṛthivī uta dyauḥ ॥२०॥

“Hymn to Uṣas, the fairest of lights, and to Night sent away — 20 verses. (after R.T.H. Griffith)”

imā rudrāya tavase kapardine kṣayadvīrāya pra bharāmahe matīḥ । yathā śamasaddvipade catuṣpade viśvaṃ puṣṭaṃ grāme asminnanāturam ॥१॥ mṛḷā no rudrota no mayaskṛdhi kṣayadvīrāya namasā vidhema te । yacchaṃ ca yośca manurāyeje pitā tadaśyāma tava rudra praṇītiṣu ॥२॥ aśyāma te sumatiṃ devayajyayā kṣayadvīrasya tava rudra mīḍhvaḥ । sumnāyannidviśo asmākamā carāriṣṭavīrā juhavāma te haviḥ ॥३॥ tveṣaṃ vayaṃ rudraṃ yajñasādhaṃ vaṅkuṃ kavimavase ni hvayāmahe । āre asmaddaivyaṃ heḷo asyatu sumatimidvayamasyā vṛṇīmahe ॥४॥ divo varāhamaruṣaṃ kapardinaṃ tveṣaṃ rūpaṃ namasā ni hvayāmahe । haste bibhradbheṣajā vāryāṇi śarma varma cchardirasmabhyaṃ yaṃsat ॥५॥ idaṃ pitre marutāmucyate vacaḥ svādoḥ svādīyo rudrāya vardhanam । rāsvā ca no amṛta martabhojanaṃ tmane tokāya tanayāya mṛḷa ॥६॥ mā no mahāntamuta mā no arbhakaṃ mā na ukṣantamuta mā na ukṣitam । mā no vadhīḥ pitaraṃ mota mātaraṃ mā naḥ priyāstanvo rudra rīriṣaḥ ॥७॥ mā nastoke tanaye mā na āyau mā no goṣu mā no aśveṣu rīriṣaḥ । vīrānmā no rudra bhāmito vadhīrhaviṣmantaḥ sadamittvā havāmahe ॥८॥ upa te stomānpaśupā ivākaraṃ rāsvā pitarmarutāṃ sumnamasme । bhadrā hi te sumatirmṛḷayattamāthā vayamava itte vṛṇīmahe ॥९॥ āre te goghnamuta pūruṣaghnaṃ kṣayadvīra sumnamasme te astu । mṛḷā ca no adhi ca brūhi devādhā ca naḥ śarma yaccha dvibarhāḥ ॥१०॥ avocāma namo asmā avasyavaḥ śṛṇotu no havaṃ rudro marutvān । tanno mitro varuṇo māmahantāmaditiḥ sindhuḥ pṛthivī uta dyauḥ ॥११॥

“Hymn to Rudra, the strong lord of heroes with braided hair — 11 verses. (after R.T.H. Griffith)”

citraṃ devānāmudagādanīkaṃ cakṣurmitrasya varuṇasyāgneḥ । āprā dyāvāpṛthivī antarikṣaṃ sūrya ātmā jagatastasthuṣaśca ॥१॥ sūryo devīmuṣasaṃ rocamānāṃ maryo na yoṣāmabhyeti paścāt । yatrā naro devayanto yugāni vitanvate prati bhadrāya bhadram ॥२॥ bhadrā aśvā haritaḥ sūryasya citrā etagvā anumādyāsaḥ । namasyanto diva ā pṛṣṭhamasthuḥ pari dyāvāpṛthivī yanti sadyaḥ ॥३॥ tatsūryasya devatvaṃ tanmahitvaṃ madhyā kartorvitataṃ saṃ jabhāra । yadedayukta haritaḥ sadhasthādādrātrī vāsastanute simasmai ॥४॥ tanmitrasya varuṇasyābhicakṣe sūryo rūpaṃ kṛṇute dyorupasthe । anantamanyadruśadasya pājaḥ kṛṣṇamanyaddharitaḥ saṃ bharanti ॥५॥ adyā devā uditā sūryasya niraṃhasaḥ pipṛtā niravadyāt । tanno mitro varuṇo māmahantāmaditiḥ sindhuḥ pṛthivī uta dyauḥ ॥६॥

“Hymn to Sūrya, the eye of Mitra, Varuṇa and Agni, soul of all that moves — 6 verses. (after R.T.H. Griffith)”

nāsatyābhyāṃ barhiriva pra vṛñje stomām̐ iyarmyabhriyeva vātaḥ । yāvarbhagāya vimadāya jāyāṃ senājuvā nyūhatū rathena ॥१॥ vīḷupatmabhirāśuhemabhirvā devānāṃ vā jūtibhiḥ śāśadānā । tadrāsabho nāsatyā sahasramājā yamasya pradhane jigāya ॥२॥ tugro ha bhujyumaśvinodameghe rayiṃ na kaścinmamṛvām̐ avāhāḥ । tamūhathurnaubhirātmanvatībhirantarikṣaprudbhirapodakābhiḥ ॥३॥ tisraḥ kṣapastrirahātivrajadbhirnāsatyā bhujyumūhathuḥ pataṃgaiḥ । samudrasya dhanvannārdrasya pāre tribhī rathaiḥ śatapadbhiḥ ṣaḷaśvaiḥ ॥४॥ anārambhaṇe tadavīrayethāmanāsthāne agrabhaṇe samudre । yadaśvinā ūhathurbhujyumastaṃ śatāritrāṃ nāvamātasthivāṃsam ॥५॥ yamaśvinā dadathuḥ śvetamaśvamaghāśvāya śaśvaditsvasti । tadvāṃ dātraṃ mahi kīrtenyaṃ bhūtpaidvo vājī sadamiddhavyo aryaḥ ॥६॥ yuvaṃ narā stuvate pajriyāya kakṣīvate aradataṃ puraṃdhim । kārotarācchaphādaśvasya vṛṣṇaḥ śataṃ kumbhām̐ asiñcataṃ surāyāḥ ॥७॥ himenāgniṃ ghraṃsamavārayethāṃ pitumatīmūrjamasmā adhattam । ṛbīse atrimaśvināvanītamunninyathuḥ sarvagaṇaṃ svasti ॥८॥ parāvataṃ nāsatyānudethāmuccābudhnaṃ cakrathurjihmabāram । kṣarannāpo na pāyanāya rāye sahasrāya tṛṣyate gotamasya ॥९॥ jujuruṣo nāsatyota vavriṃ prāmuñcataṃ drāpimiva cyavānāt । prātirataṃ jahitasyāyurdasrāditpatimakṛṇutaṃ kanīnām ॥१०॥ tadvāṃ narā śaṃsyaṃ rādhyaṃ cābhiṣṭimannāsatyā varūtham । yadvidvāṃsā nidhimivāpagūḷhamuddarśatādūpathurvandanāya ॥११॥ tadvāṃ narā sanaye daṃsa ugramāviṣkṛṇomi tanyaturna vṛṣṭim । dadhyaṅha yanmadhvātharvaṇo vāmaśvasya śīrṣṇā pra yadīmuvāca ॥१२॥ ajohavīnnāsatyā karā vāṃ mahe yāmanpurubhujā puraṃdhiḥ । śrutaṃ tacchāsuriva vadhrimatyā hiraṇyahastamaśvināvadattam ॥१३॥ āsno vṛkasya vartikāmabhīke yuvaṃ narā nāsatyāmumuktam । uto kaviṃ purubhujā yuvaṃ ha kṛpamāṇamakṛṇutaṃ vicakṣe ॥१४॥ caritraṃ hi verivācchedi parṇamājā khelasya paritakmyāyām । sadyo jaṅghāmāyasīṃ viśpalāyai dhane hite sartave pratyadhattam ॥१५॥ śataṃ meṣānvṛkye cakṣadānamṛjrāśvaṃ taṃ pitāndhaṃ cakāra । tasmā akṣī nāsatyā vicakṣa ādhattaṃ dasrā bhiṣajāvanarvan ॥१६॥ ā vāṃ rathaṃ duhitā sūryasya kārṣmevātiṣṭhadarvatā jayantī । viśve devā anvamanyanta hṛdbhiḥ samu śriyā nāsatyā sacethe ॥१७॥ yadayātaṃ divodāsāya vartirbharadvājāyāśvinā hayantā । revaduvāha sacano ratho vāṃ vṛṣabhaśca śiṃśumāraśca yuktā ॥१८॥ rayiṃ sukṣatraṃ svapatyamāyuḥ suvīryaṃ nāsatyā vahantā । ā jahnāvīṃ samanasopa vājaistrirahno bhāgaṃ dadhatīmayātam ॥१९॥ pariviṣṭaṃ jāhuṣaṃ viśvataḥ sīṃ sugebhirnaktamūhathū rajobhiḥ । vibhindunā nāsatyā rathena vi parvatām̐ ajarayū ayātam ॥२०॥ ekasyā vastorāvataṃ raṇāya vaśamaśvinā sanaye sahasrā । nirahataṃ ducchunā indravantā pṛthuśravaso vṛṣaṇāvarātīḥ ॥२१॥ śarasya cidārcatkasyāvatādā nīcāduccā cakrathuḥ pātave vāḥ । śayave cinnāsatyā śacībhirjasuraye staryaṃ pipyathurgām ॥२२॥ avasyate stuvate kṛṣṇiyāya ṛjūyate nāsatyā śacībhiḥ । paśuṃ na naṣṭamiva darśanāya viṣṇāpvaṃ dadathurviśvakāya ॥२३॥ daśa rātrīraśivenā nava dyūnavanaddhaṃ śnathitamapsvantaḥ । viprutaṃ rebhamudani pravṛktamunninyathuḥ somamiva sruveṇa ॥२४॥ pra vāṃ daṃsāṃsyaśvināvavocamasya patiḥ syāṃ sugavaḥ suvīraḥ । uta paśyannaśnuvandīrghamāyurastamivejjarimāṇaṃ jagamyām ॥२५॥

“Hymn to the Aśvins, Nāsatyas, whose chariot is swift as thought — 25 verses. (after R.T.H. Griffith)”

madhvaḥ somasyāśvinā madāya pratno hotā vivāsate vām । barhiṣmatī rātirviśritā gīriṣā yātaṃ nāsatyopa vājaiḥ ॥१॥ yo vāmaśvinā manaso javīyānrathaḥ svaśvo viśa ājigāti । yena gacchathaḥ sukṛto duroṇaṃ tena narā vartirasmabhyaṃ yātam ॥२॥ ṛṣiṃ narāvaṃhasaḥ pāñcajanyamṛbīsādatriṃ muñcatho gaṇena । minantā dasyoraśivasya māyā anupūrvaṃ vṛṣaṇā codayantā ॥३॥ aśvaṃ na gūḷhamaśvinā durevairṛṣiṃ narā vṛṣaṇā rebhamapsu । saṃ taṃ riṇītho viprutaṃ daṃsobhirna vāṃ jūryanti pūrvyā kṛtāni ॥४॥ suṣupvāṃsaṃ na nirṛterupasthe sūryaṃ na dasrā tamasi kṣiyantam । śubhe rukmaṃ na darśataṃ nikhātamudūpathuraśvinā vandanāya ॥५॥ tadvāṃ narā śaṃsyaṃ pajriyeṇa kakṣīvatā nāsatyā parijman । śaphādaśvasya vājino janāya śataṃ kumbhām̐ asiñcataṃ madhūnām ॥६॥ yuvaṃ narā stuvate kṛṣṇiyāya viṣṇāpvaṃ dadathurviśvakāya । ghoṣāyai citpitṛṣade duroṇe patiṃ jūryantyā aśvināvadattam ॥७॥ yuvaṃ śyāvāya ruśatīmadattaṃ mahaḥ kṣoṇasyāśvinā kaṇvāya । pravācyaṃ tadvṛṣaṇā kṛtaṃ vāṃ yannārṣadāya śravo adhyadhattam ॥८॥ purū varpāṃsyaśvinā dadhānā ni pedava ūhathurāśumaśvam । sahasrasāṃ vājinamapratītamahihanaṃ śravasyaṃ tarutram ॥९॥ etāni vāṃ śravasyā sudānū brahmāṅgūṣaṃ sadanaṃ rodasyoḥ । yadvāṃ pajrāso aśvinā havante yātamiṣā ca viduṣe ca vājam ॥१०॥ sūnormānenāśvinā gṛṇānā vājaṃ viprāya bhuraṇā radantā । agastye brahmaṇā vāvṛdhānā saṃ viśpalāṃ nāsatyāriṇītam ॥११॥ kuha yāntā suṣṭutiṃ kāvyasya divo napātā vṛṣaṇā śayutrā । hiraṇyasyeva kalaśaṃ nikhātamudūpathurdaśame aśvināhan ॥१२॥ yuvaṃ cyavānamaśvinā jarantaṃ punaryuvānaṃ cakrathuḥ śacībhiḥ । yuvo rathaṃ duhitā sūryasya saha śriyā nāsatyāvṛṇīta ॥१३॥ yuvaṃ tugrāya pūrvyebhirevaiḥ punarmanyāvabhavataṃ yuvānā । yuvaṃ bhujyumarṇaso niḥ samudrādvibhirūhathurṛjrebhiraśvaiḥ ॥१४॥ ajohavīdaśvinā taugryo vāṃ proḷhaḥ samudramavyathirjaganvān । niṣṭamūhathuḥ suyujā rathena manojavasā vṛṣaṇā svasti ॥१५॥ ajohavīdaśvinā vartikā vāmāsno yatsīmamuñcataṃ vṛkasya । vi jayuṣā yayathuḥ sānvadrerjātaṃ viṣvāco ahataṃ viṣeṇa ॥१६॥ śataṃ meṣānvṛkye māmahānaṃ tamaḥ praṇītamaśivena pitrā । ākṣī ṛjrāśve aśvināvadhattaṃ jyotirandhāya cakrathurvicakṣe ॥१७॥ śunamandhāya bharamahvayatsā vṛkīraśvinā vṛṣaṇā nareti । jāraḥ kanīna iva cakṣadāna ṛjrāśvaḥ śatamekaṃ ca meṣān ॥१८॥ mahī vāmūtiraśvinā mayobhūruta srāmaṃ dhiṣṇyā saṃ riṇīthaḥ । athā yuvāmidahvayatpuraṃdhirāgacchataṃ sīṃ vṛṣaṇāvavobhiḥ ॥१९॥ adhenuṃ dasrā staryaṃ viṣaktāmapinvataṃ śayave aśvinā gām । yuvaṃ śacībhirvimadāya jāyāṃ nyūhathuḥ purumitrasya yoṣām ॥२०॥ yavaṃ vṛkeṇāśvinā vapanteṣaṃ duhantā manuṣāya dasrā । abhi dasyuṃ bakureṇā dhamantoru jyotiścakrathurāryāya ॥२१॥ ātharvaṇāyāśvinā dadhīce'śvyaṃ śiraḥ pratyairayatam । sa vāṃ madhu pra vocadṛtāyantvāṣṭraṃ yaddasrāvapikakṣyaṃ vām ॥२२॥ sadā kavī sumatimā cake vāṃ viśvā dhiyo aśvinā prāvataṃ me । asme rayiṃ nāsatyā bṛhantamapatyasācaṃ śrutyaṃ rarāthām ॥२३॥ hiraṇyahastamaśvinā rarāṇā putraṃ narā vadhrimatyā adattam । tridhā ha śyāvamaśvinā vikastamujjīvasa airayataṃ sudānū ॥२४॥ etāni vāmaśvinā vīryāṇi pra pūrvyāṇyāyavo'vocan । brahma kṛṇvanto vṛṣaṇā yuvabhyāṃ suvīrāso vidathamā vadema ॥२५॥

“Hymn to the Aśvins, invited by the ancient priest to the Soma mead — 25 verses. (after R.T.H. Griffith)”

ā vāṃ ratho aśvinā śyenapatvā sumṛḷīkaḥ svavām̐ yātvarvāṅ । yo martyasya manaso javīyāntrivandhuro vṛṣaṇā vātaraṃhāḥ ॥१॥ trivandhureṇa trivṛtā rathena tricakreṇa suvṛtā yātamarvāk । pinvataṃ gā jinvatamarvato no vardhayatamaśvinā vīramasme ॥२॥ pravadyāmanā suvṛtā rathena dasrāvimaṃ śṛṇutaṃ ślokamadreḥ । kimaṅga vāṃ pratyavartiṃ gamiṣṭhāhurviprāso aśvinā purājāḥ ॥३॥ ā vāṃ śyenāso aśvinā vahantu rathe yuktāsa āśavaḥ pataṃgāḥ । ye apturo divyāso na gṛdhrā abhi prayo nāsatyā vahanti ॥४॥ ā vāṃ rathaṃ yuvatistiṣṭhadatra juṣṭvī narā duhitā sūryasya । pari vāmaśvā vapuṣaḥ pataṃgā vayo vahantvaruṣā abhīke ॥५॥ udvandanamairataṃ daṃsanābhirudrebhaṃ dasrā vṛṣaṇā śacībhiḥ । niṣṭaugryaṃ pārayathaḥ samudrātpunaścyavānaṃ cakrathuryuvānam ॥६॥ yuvamatraye'vanītāya taptamūrjamomānamaśvināvadhattam । yuvaṃ kaṇvāyāpiriptāya cakṣuḥ pratyadhattaṃ suṣṭutiṃ jujuṣāṇā ॥७॥ yuvaṃ dhenuṃ śayave nādhitāyāpinvatamaśvinā pūrvyāya । amuñcataṃ vartikāmaṃhaso niḥ prati jaṅghāṃ viśpalāyā adhattam ॥८॥ yuvaṃ śvetaṃ pedava indrajūtamahihanamaśvinādattamaśvam । johūtramaryo abhibhūtimugraṃ sahasrasāṃ vṛṣaṇaṃ vīḍvaṅgam ॥९॥ tā vāṃ narā svavase sujātā havāmahe aśvinā nādhamānāḥ । ā na upa vasumatā rathena giro juṣāṇā suvitāya yātam ॥१०॥ ā śyenasya javasā nūtanenāsme yātaṃ nāsatyā sajoṣāḥ । have hi vāmaśvinā rātahavyaḥ śaśvattamāyā uṣaso vyuṣṭau ॥११॥

“Hymn to the Aśvins, asked to come with friendly help in their falcon-borne chariot — 11 verses. (after R.T.H. Griffith)”

ā vāṃ rathaṃ purumāyaṃ manojuvaṃ jīrāśvaṃ yajñiyaṃ jīvase huve । sahasraketuṃ vaninaṃ śatadvasuṃ śruṣṭīvānaṃ varivodhāmabhi prayaḥ ॥१॥ ūrdhvā dhītiḥ pratyasya prayāmanyadhāyi śasmansamayanta ā diśaḥ । svadāmi gharmaṃ prati yantyūtaya ā vāmūrjānī rathamaśvināruhat ॥२॥ saṃ yanmithaḥ paspṛdhānāso agmata śubhe makhā amitā jāyavo raṇe । yuvoraha pravaṇe cekite ratho yadaśvinā vahathaḥ sūrimā varam ॥३॥ yuvaṃ bhujyuṃ bhuramāṇaṃ vibhirgataṃ svayuktibhirnivahantā pitṛbhya ā । yāsiṣṭaṃ vartirvṛṣaṇā vijenyaṃ divodāsāya mahi ceti vāmavaḥ ॥४॥ yuvoraśvinā vapuṣe yuvāyujaṃ rathaṃ vāṇī yematurasya śardhyam । ā vāṃ patitvaṃ sakhyāya jagmuṣī yoṣāvṛṇīta jenyā yuvāṃ patī ॥५॥ yuvaṃ rebhaṃ pariṣūteruruṣyatho himena gharmaṃ paritaptamatraye । yuvaṃ śayoravasaṃ pipyathurgavi pra dīrgheṇa vandanastāryāyuṣā ॥६॥ yuvaṃ vandanaṃ nirṛtaṃ jaraṇyayā rathaṃ na dasrā karaṇā saminvathaḥ । kṣetrādā vipraṃ janatho vipanyayā pra vāmatra vidhate daṃsanā bhuvat ॥७॥ agacchataṃ kṛpamāṇaṃ parāvati pituḥ svasya tyajasā nibādhitam । svarvatīrita ūtīryuvoraha citrā abhīke abhavannabhiṣṭayaḥ ॥८॥ uta syā vāṃ madhumanmakṣikārapanmade somasyauśijo huvanyati । yuvaṃ dadhīco mana ā vivāsatho'thā śiraḥ prati vāmaśvyaṃ vadat ॥९॥ yuvaṃ pedave puruvāramaśvinā spṛdhāṃ śvetaṃ tarutāraṃ duvasyathaḥ । śaryairabhidyuṃ pṛtanāsu duṣṭaraṃ carkṛtyamindramiva carṣaṇīsaham ॥१०॥

“Hymn to the Aśvins, called with their wondrous thought-swift car — 10 verses. (after R.T.H. Griffith)”

kā rādhaddhotrāśvinā vāṃ ko vāṃ joṣa ubhayoḥ । kathā vidhātyapracetāḥ ॥१॥ vidvāṃsāvidduraḥ pṛcchedavidvānitthāparo acetāḥ । nū cinnu marte akrau ॥२॥ tā vidvāṃsā havāmahe vāṃ tā no vidvāṃsā manma vocetamadya । prārcaddayamāno yuvākuḥ ॥३॥ vi pṛcchāmi pākyā na devānvaṣaṭkṛtasyādbhutasya dasrā । pātaṃ ca sahyaso yuvaṃ ca rabhyaso naḥ ॥४॥ pra yā ghoṣe bhṛgavāṇe na śobhe yayā vācā yajati pajriyo vām । praiṣayurna vidvān ॥५॥ śrutaṃ gāyatraṃ takavānasyāhaṃ ciddhi rirebhāśvinā vām । ākṣī śubhaspatī dan ॥६॥ yuvaṃ hyāstaṃ maho ranyuvaṃ vā yanniratataṃsatam । tā no vasū sugopā syātaṃ pātaṃ no vṛkādaghāyoḥ ॥७॥ mā kasmai dhātamabhyamitriṇe no mākutrā no gṛhebhyo dhenavo guḥ । stanābhujo aśiśvīḥ ॥८॥ duhīyanmitradhitaye yuvāku rāye ca no mimītaṃ vājavatyai । iṣe ca no mimītaṃ dhenumatyai ॥९॥ aśvinorasanaṃ rathamanaśvaṃ vājinīvatoḥ । tenāhaṃ bhūri cākana ॥१०॥ ayaṃ samaha mā tanūhyāte janām̐ anu । somapeyaṃ sukho rathaḥ ॥११॥ adha svapnasya nirvide'bhuñjataśca revataḥ । ubhā tā basri naśyataḥ ॥१२॥

“Hymn to the Aśvins, asking what praise may win their grace — 12 verses. (after R.T.H. Griffith)”